Swivutiso Swa Vahlayi

Tanihi leswi muprista wa khale Melkisedeke a a ri munhu wa xiviri, ha yini Bibele yi vula leswaku a a ri ‘hava rixaka’?

Nhlamuselo leyi yi tsariwe eka Vaheveru 7:3. (BX) Xiya mongo wa tsalwa leri:

“Melkisedeke yoloye a a ri hosi ya Salema ni muprista wa Xikwembu xa le Henhla-henhla, loko Abrahama a vuya hi le ku dlayeni ka tihosi. Melkisedeke ú hlangane na yena, a n’wi katekisa; kutani Abrahama a n’wi pambulela vukhume bya hinkwaswo leswi phanghiweke. Xo sungula, vito ra ‘Melkisedeke’ loko ri hlamuseriwa, ri vula ‘hosi ya ku lulama,’ xa vumbirhi, i ‘hosi ya Salema’, hileswaku ‘hosi ya ku rhula.’ Tata wa yena a nga tiviwi, hambi a ri mana wa yena, kumbe mavito ya vakokwa wa yena. Masiku ya yena a ma na masungulo, hambi byi ri vutomi bya yena, a byi na makumu. Ú fana na N’wana wa Xikwembu, kutani ú ya emahlweni a ri muprista hilaha ku nga heriki.”—Vaheveru 7:1-3.

Tanihi laha swi hlamuseriweke ha kona, Melkisedeke a a ri munhu wa xiviri, ku fana na Abrahama, loyi a tirhisaneke na yena hi ku kongoma. (Genesa 14:17-20; Vaheveru 7:4-10) Loko swi ri tano, Melkisedeke u fanela a ve na vona vatswari, tatana na manana, naswona swi nga ha endleka a ve na vona vana. Hikwalaho, tanihi munhu a a ri na rona rixaka, kumbe xivongo. U tlhele a va na wona makumu ya vutomi byakwe bya nyama. Hi nkarhi wo karhi Melkisedeke u file, hi ku landza marito ya muapostola Pawulo eka Varhoma 5:12, 14. Kambe hikwalaho ka leswi hi nga swi tiviki leswaku Melkisedeke u fe rini, kutani a tshika ku tirha tanihi muprista, hi ndlela yoleyo, nkarhi lowu a nga tirha ku fikela eka wona a wu tiviwi hi munhu.

Eka Vaheveru, Pawulo u hlamusele hi Melkisedeke loko a vulavula hi ntirho wa Yesu Kreste tanihi Muprista Loyi a Tlakukeke eka hinkwavo. Loko a kombetela eka Melkisedeke loyi a fanekiselaka Yesu loko a ta va a ri entirhweni lowu wa vuprista, Pawulo u te: ‘Yesu u ve muprista lonkulu ku fana na Melkisedeke.’ (Vaheveru 6:20) Hi mukhuva wihi?

Pawulo a nga va a swi xiyile leswaku rhekhodo ya Bibele a yi nyiki vuxokoxoko hi xivongo xa Melkisedeke—vakokwana wa yena kumbe vatukulu. Rungula rolero a ri kona eBibeleni. Hi ku ya hi leswi Pawulo a a swi tiva kumbe leswi hi swi tivaka, swi nga ha vuriwa hi laha ku faneleke leswaku Melkisedeke a ri “hava rixaka” (New World Translation of the Holy Scriptures; American Standard Version), “a ri hava masungulo” (W. J. Conybeare) kumbe “a ri hava xivongo.”—J. B. Phillips.

Xana Yesu a ri tano hi ndlela yihi? Entiyisweni, ha swi tiva leswaku Tata wa Yesu a a ri Yehovha Xikwembu naswona Mariya mana wa yena a a ri wa rixaka ra Yuda. Kambe a ku ri ni ku fanana exikarhi ka Melkisedeke na Yesu. Hi mukhuva wihi? Yesu a nga velekiwanga erixakeni ra Levhi, rixaka ra vaprista etikweni ra Israyele. E-e, Yesu u ve muprista ku nga ri hikwalaho ka rixaka ra vanhu. Melkisedeke na yena u ve muprista, ku nga ri hi ku “landza milawu ni swileriso swa vanhu,” leswi vulaka ku velekiwa erixakeni ni le ndyangwini wa vuprista. (Vaheveru 7:15, 16) Ematshan’wini ya leswaku a va muprista hi leswi tata wa yena wa xiviri a ri muprista, Yesu u “vekiwile Muprista Lonkulu hi Xikwembu, [ku fana] na Melkisedeke.”—Vaheveru 5:10.

Ku tlula kwalaho, Yesu u hava vatukulu kumbe lava n’wi tlhandlamaka eka vuprista byakwe. Hi mukhuva lowu na yena a a ri hava rixaka. U ta va evutirhelini byakwe bya vuprista tanihi mukongomisi loyi a pfunaka hi laha ku nga heriki. Pawulo u hlamusela hi vutirheli lebyi byi nga heriki, a ku:

“Ntirho wa yena wa vuprista, Yesu ú wu khomela makumu, hikuva ú hanya hi masiku ni masiku. Hikokwalaho, wa swi kota minkarhi hinkwayo ku ponisa lava tshinelelaka Xikwembu ha yena, leswi a hanyaka hi masiku hinkwawo ni ku va khongelela.”—Vaheveru 7:24, 25.

Nkambisiso wa hina wa marito ya Pawulo lama kumekaka eka Vaheveru 7:3 hikwalaho a wu fanelanga wu va vutivi lebyi nga vuliki nchumu lebyi hi byi hlayisaka enhlokweni ntsena. Wu fanele wu engetela ku tlangela ka hina lunghiselelo ra rirhandzu leri Yehovha Xikwembu a hi lulamiseleke rona leswaku hi rivaleriwa xidyoho hi laha ku nga heriki, ni ku tlangela ndlela leyi a hi lulamiseleke yona leswaku hi amukela mpfuno ni nkongomiso hi laha ku nga heriki.