Xana U Endla Ku Rhandza Ka Xikwembu?

EVUTIRHELINI bya tona bya yindlu na yindlu, Timbhoni timbirhi ta Yehovha ti hlangane ni mufundhisi wa Kereke ya Episcopal. U tikombe a ri munhu wa xinghana, a fuwe malebvu, a ri ni malembe ya kwalomu ka 60 hi vukhale, a ambale xikipa lexi a xi tsariwe vito ra kereke ya yena. Endzhaku ka loko a hefemulele ehenhla, u te: “Ndzi navela onge swirho swa kereke ya hina swi nga hiseka ku fana na n’wina eku hangalaseni ka Rito, kambe ndzi mi kombela leswaku mi nga ha engeti mi ta ekaya ra mina.”

Ina, ku ni vanhu vo tala lava navelaka ntirho wa Timbhoni ta Yehovha, naswona va bumabumela ku hiseka ni ku chivirika ka tona. Kambe, a va swi tsakeli nikatsongo leswi Timbhoni ti swi endlaka, naswona a va anakanyi leswaku va nga tshuka va wu endlile ntirho lowu. Hambi swi ri tano, langutelo leri vonakaka ri tikaneta a hi rintshwa. Yesu u ri xiyile esikwini ra yena, kutani u kandziyise yinhla leyi hi xikombiso lexi a xi tlhontlha mianakanyo.

“Xana mi ri yini hi mhaka leyi? Munhu a a ri ni vana vambirhi; a ya eka lowo rhanga, a ku: ‘N’wananga, yana u ya tirha ensin’wini ya mina ya vhinya namuntlha.’ N’wana loyi a hlamula a ku: ‘A ndzi yi!’ kambe endzhaku a sala a tiehleketa, a ya. Tata wa kona a ya eka lowun’wana, a n’wi byerisa sweswo. Yoloye a hlamula a ku: ‘Ndzi ta ya tatana!’ kambe a nga yi. Xana eka vona lavambirhi, hi wihi loyi a nga endla ku rhandza ka tata wa yena xana?”—Matewu 21:28-31.

Nhlamulo yi le rivaleni. Ku fana ni ntshungu lowu yingiseke Yesu, hi nga hlamula hi ku, “Hi lowo rhanga.” Kambe kahle-kahle, hi ku tirhisa xifaniso xexo, Yesu a a hi kombisa leswaku ku endla leswi tatana a swi lavaka hi swona leswi a swi ri swa nkoka. Hambi leswi n’wana wo sungula a vuleke leswaku a a nga swi lavi ku ya, u endle hi ndlela leyi a lerisiweke ha yona naswona u bumabumeriwile. Ku endla muxaka lowunene wa ntirho na swona i swa nkoka. N’wana lowo sungula u teke goza hi ku ya tirha ensin’wini ya vhinya ya tata wa yena; a nga yanga a ya tirha ensin’wini ya yena n’wini ya vhinya.

Xana leswi hinkwaswo swi vula yini eka hina? I yini leswi Xikwembu xi swi lavaka eka vagandzeri namuntlha? Hi nga dyondza yini eka vutomi bya Yesu leswi nga ta hi pfuna ku endla ku rhandza ka Tata wakwe? Leswi i swivutiso swa nkoka, naswona ku kuma tinhlamulo letinene swi ta vula vutomi lebyi nga heriki eka hina, tanihi leswi “loyi a endlaka ku rhandza ka Xikwembu, [a tshamaka] hilaha ku nga heriki.”—1 Yohane 2:17; Vaefesa 5:17.

Xana “Ku Rhandza Ka Xikwembu” I Yini?

Rito ku “rhandza” ri kumeka minkarhi yo tlula 80 eka Comprehensive Concordance of the New World Translation of the Holy Scriptures. Etindhawini ta kwalomu ka 60 (kumbe minkarhi ya kwalomu ka tiphesente ta 75) laha ri humelelaka kona ku vulavuriwa hi ku rhandza ka Xikwembu. Swiga swo tanihi leswi nge “rirhandzu ra Xikwembu,” “ku rhandza ka Tata wa mina,” na “ku rhandza ka Xikwembu” swi humelela minkarhi yo tlula 20. Hi ku ya hi leswi, hi nga swi vona leswaku ku endla ku rhandza ka Xikwembu ku fanele ku va ka nkoka swinene eka hina. Hi fanele hi tikarhatela swinene ku endla ku rhandza ka Xikwembu evuton’wini bya hina.

Hi Xitsonga rito leri nge ku “rhandza” ri vula ‘ku navela, ku tiyimisela, nchumu lowu naveriwaka, ngopfu-ngopfu ku tihlawulela kumbe ku tiyimisela ka munhu la nga ni vulawuri kumbe matimba.’ Kutani Yehovha, Mufumi la Tlakukeke, u ni ku navela kumbe ku tiyimisela. Hi kwihi ku tiyimisela loku? Hi ku komisa Matsalwa ma hi byela leswaku “[Xikwembu xi rhandza] leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso.” (1 Timotiya 2:4) Yesu Kreste ni Vakreste vo sungula va tirhe hi mbilu hinkwayo leswaku va dyondzisa van’wana hi vutivi lebyi lebyi kongomeke.—Matewu 9:35; Mintirho 5:42; Vafilipiya 2:19, 22.

I mani la endlaka ku rhandza ka Xikwembu namuntlha? Exikarhi ka magidi-mbirhi ya timiliyoni ta vanhu lava tivulaka valandzeri va Yesu Kreste, i vangani lava fanaka ni n’wana lowo rhanga exifanisweni xa Yesu, la yeke a ya endla ku rhandza ka tata wa yena? Ku kuma nhlamulo swa olova. Valandzeri va ntiyiso va minkondzo ya Yesu Kreste va fanele va endla ntirho lowu a nga vula leswaku va ta wu endla: “Evhangeli yi fanele ku rhanga yi twarisiwa ematikweni hinkwawo.” (Marka 13:10) Timbhoni ta Yehovha, leti nhlayo ya tona yi tlulaka mune wa timiliyoni ni hafu emisaveni hinkwayo, ti chumayela mahungu lamanene ya Mfumo wa Xikwembu hi ku hiseka ni ku dyondzisa van’wana, ti kombisa Mfumo tanihi ntshembo wa vanhu wu ri woxe wa ku rhula ni nsirhelelo. Xana u hlanganyela hi ku helela eku endleni ka ku rhandza ka Xikwembu? Xana u chumayela mahungu lamanene ya Mfumo hi laha Yesu a endleke ha kona?—Mintirho 10:42; Vaheveru 10:7.

Ku Kuma Ntsako Eku Endleni Ka Ku Rhandza Ka Xikwembu

Hambi leswi ku dyondza leswi ku rhandza ka Tatana ku nga swona swi tisaka ntsako, ku dyondzisa van’wana hi ku rhandza ka Xikwembu hi swona swi tisaka ntsako lowukulu ngopfu. Yesu u kume ntsako eku dyondziseni ka vanhu hi Tata wakwe. A swi fana ni swakudya eka yena. (Yohane 4:34) Na hina hi ta kuma ntsako wa ntiyiso loko hi endla leswi Yesu a swi endleke, ku nga ku chumayela ni ku dyondzisa leswi a swi dyondziseke, swilo leswi a swi kumeke eka Tata wa yena. (Matewu 28:19, 20) Hi laha Yesu a tshembiseke ha kona, “loko mi tiva swilo leswi, mi tlhela mi swi endla, mi ta va mi katekile.”—Yohane 13:17.

Hi xikombiso: Manana loyi a tlheleke a nghenela vutirheli bya vuphayona bya nkarhi hinkwawo sweswinyana u te: “Ku vona nghohe ya xichudeni xa Bibele yi tsakile loko mintiyiso yo hambana-hambana ya Bibele yi khumba mbilu ya xona swa nyanyula swinene! I ntsako lowukulu eka mina ku vona xichudeni xa Bibele xi tsala matsalwa hinkwawo dyondzo yi nga si sungula ni ku tsala tinotsi hi nkarhi wa dyondzo leswaku xi ta hlamula swivutiso swihi na swihi swa mpfuxeto endzhaku.” Xin’wana xa swichudeni swa yena swa Bibele xi twe ntiyiso emalembeni ya xona yo sungula ya kondlo-a-ndzi-dyi. Tanihi leswi se a xi tekiwile naswona xi karhateka hi swiphiqo swa munhu hi xiyexe, a xi navela ku hlangana ni Timbhoni. Vona ndlela leyi a xi tsake ha yona loko phayona ra xisati ri xi kumile! Wansati loyi lontshwa u tsakele ku tlhela a sungula dyondzo yakwe ya Bibele.

Ku Tshama Hi Tsakile Eku Endleni Ka Ku Rhandza Ka Xikwembu

Hosi Davhida wa Israyele wa khale a a tikarhatela ku endla ku rhandza ka Xikwembu evuton’wini byakwe hinkwabyo. Ku nga khathariseki ku nonon’hweriwa ni mintshikilelo leyo tala leyi a hlanganeke na yona, u huhuteriwe ku vula a ku: “Šikwembu ša nga, nḍi ṭakela ku endla ku rhanḍa ka wena! Kutani nawu wa wena wu le mbilwini ya mina.” (Pisalema 40:8) Ku endla ku rhandza ka Yehovha a swi ri eka moya-xiviri wa Davhida, eka yena hi byakwe. Xexo a ku ri xihundla xa ntsako wakwe lowu nga heriki loko a tirhela Yehovha. Ku endla ku rhandza ka Xikwembu a ku nga ri ndzhwalo eka Davhida. Kambe, a swi n’wi tsakisa, a swi huma embilwini yakwe. Evuton’wini byakwe hinkwabyo, u lwele ku endla leswi a nga swi kotaka leswaku a tirhela Yehovha Xikwembu xa yena, hambi leswi minkarhi yin’wana a endleke swidyoho ni swihoxo.

Minkarhi yin’wana ntsako wa hina wu nga ha tsana. Hi nga tikuma hi karhele kumbe hi ri ni gome. Kumbexana swilo leswi humeleleke nkarhi lowu nga hundza swi nga tshama swi ri karhi swi hi vangela swiphiqo, ripfalo ra hina ri hi karhata hikwalaho ka xidyoho lexi hi xi endleke enkarhini lowu hundzeke. Hakanyingi, hi nga hlula mintlhaveko leyi hi dyondzo ya rixaladza swinene ya Rito ra Xikwembu. Hi nga tikarhatela ku nghenisa nawu wa Xikwembu ‘etimbilwini ta hina,’ hi laha Davhida a endleke ha kona. Loko hi tikarhatela ku endla ku rhandza ka Xikwembu hi mbilu hinkwayo, hi leswaku hi matimba ya hina hinkwawo, xi ta hi hakela hi ndlela leyi faneleke, hikuva xa tshembeka.—Vaefesa 6:6; Vaheveru 6:10-12; 1 Petro 4:19.

Lexi tsakisaka, eka Vaheveru 10:5-7, muapostola Pawulo u tshahe marito ya Davhida eka Pisalema 40:6-8 kutani a ma tirhisa malunghana na Yesu Kreste. Hi ku endla tano, Pawulo u kombise ndlela leyi Yesu a a tshinelelane na Tata wakwe ha yona. Kahle-kahle rito ra Xiheveru leri nge ku “rhandza” ri nga vula ‘ku tsakela, ku navela, kumbe ntsako.’ Hikwalaho, Pisalema 40:8 yi nga hlayeka hi ndlela leyi malunghana na Kreste: “Xikwembu xanga, ndzi tsakela ku endla leswi ku tsakisaka!”a Yesu a a lava ku endla leswi tsakisaka Tata wakwe. Yesu u endle leswi tlulaka leswi a komberiweke ku endla swona. U endle leswi tsakisaka mbilu ya Tata wakwe, naswona u swi endle hi mbilu yo basa.

Evuton’wini hinkwabyo, Yesu a a tinyikete ku dyondzisa van’wana leswi ku rhandza ka Xikwembu ku nga swona, na leswi a va fanele ku swi endla leswaku va katekisiwa hi Xikwembu. A a ri muchumayeri ni mudyondzisi wa nkarhi hinkwawo naswona u kume ntsako lowukulu eku endleni ka ntirho wolowo. Hikwalaho loko hi endla ntirho wa Yehovha nkarhi hinkwawo hi ta kuma ntsako lowukulu. Xana na wena u nga hlanganyela hi vutalo entirhweni wo chumayela leswaku u ta kuma ntsako lowukulu?

Mpfuno wun’wana wa ku tshama hi tsakile eku endleni ka ku rhandza ka Xikwembu i ku languta vumundzuku hi ndlela leyi faneleke. Sweswo hi leswi Yesu a swi endleke. “Loyi a nga chavangiki ku byarha [mhandzi ya nxaniso, NW] a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena.” U kume ntsako hi ku tshembeka eka Xikwembu ku fikela emakumu, ivi endzhaku a kuma hakelo ya vuhosi evokweni ra xinene ra Tata wakwe.—Vaheveru 12:2.

Anakanya hi ntsako lowu taka lowu nga ta kumiwa hi lava yaka emahlweni va endla ku rhandza ka Xikwembu. Va ta vona ku herisiwa ka lava phikelelaka va endla ku rhandza ka vona ka vutianakanyi hambi leswi swiendlo swa vona swi xanisaka lava tiyimiseleke ku endla ku rhandza ka Xikwembu. (2 Vatesalonika 1:7, 8) Anakanya hi ntsako wa varhandziwa lava pfuxiweke loko va kuma lunghelo ra ku dyondza ku rhandza ka Xikwembu ni ku ku endla. Kumbe xiya xikongomelo xa Xikwembu xo kondletela misava yi va Paradeyisi. Nakambe xo hetelela, anakanya hi ntshunxeko lowu nga ta va kona loko Sathana, mukaneti wa ku rhandza ka Yehovha a loviseriwa makumu.

Ina, ku endla ku rhandza ka Xikwembu namuntlha ku nga tisa ntsako lowukulu sweswi ni ntsako lowu nga heriki enkarhini lowu taka. Ku nga khathariseki ndlela leyi vanhu va angulaka ha yona entirhweni wo chumayela, a hi tekeleleni xikombiso xa Yesu xo tsakela ku endla ku rhandza ka Tata wakwe.

[Nhlamuselo ya le hansi]