Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Loko swi ri tano, u ta kuma swi tsakisa ku pfuxeta leswi landzelaka:

▫ Ha yini tinhlori ta Israyele ti hlawule ku tshama endlwini ya muoswi Rahava?

Tinhlori ta Israyele a ti hanya hi Nawu wa Xikwembu, kutani a ti nga lavi ku tshama endlwini ya Rahava hi xikongomelo xo endla vuoswi. Kumbexana va anakanye leswaku ku ya endlwini ya muoswi a swi ta endla muti wu nga va ehleketeleli nchumu nikantsongo. Tanihi leswi yindlu ya yena a yi akiwe erirhangwini ra muti, a swi ta olova ku baleka. Kambe ku tlula kwalaho, Yehovha u va kongomise eka mudyohi loyi mbilu ya yena yi khumbekeke swinene hi swiviko swa ntirhisano wa Xikwembu ni Vaisrayele lerova a hundzuka ni ku cinca tindlela ta yena.—12/15, matluka 24-5.

▫ Xana ku hlundzuka swi ri khumba njhani rihanyo ra hina?

Minkambisiso yi komba leswaku ku hlundzuka ku tswala tihomoni ta ntshikilelo. Ku tshamela ku hlundzuka ku nga vanga ku nga ringani exikarhi ka swivumbeko leswi sirhelelaka ni leswi onhaka tirhelo ra tisele ta miri leswi nga vangelaka vuvabyi bya mbilu na misiha ya ngati.—12/15, tluka 32.

▫ Xana i swiringanyeto swihi leswi nga ta hi pfuna ku antswisa ku hangalasa ka hina timagazini ta Xihondzo xo Rindza na Xalamuka!?

Tolovelana ni leswi nga endzeni ka Xihondzo xo Rindza na Xalamuka!; olovisa rungula ra wena; pfumelelana ni swiyimo hi ku lunghiselela marungula ma nga ri mangani; tivekele pakani ya wena n’wini.—1/1, matluka 24-5.

▫ Ha yini Muxe a ri xikombiso lexinene swonghasi xa ku titsongahatela vulawuri bya Xikwembu lexi hi faneleke ku xi tekelela?

Muxe a a lava ku kongomisiwa hi Yehovha etimhakeni. A a nga tinaveleli leswinene, kambe a tikarhatela ku dzunisa Yehovha. A a ri ni ripfumelo leri tiyeke, naswona a nga kalanga a rivala leswaku Yehovha a ri yena Mufumi wa xiviri wa tiko ra Israyele.—1/15, tluka 11.

▫ Hi tihi tindlela tin’wana leti dyondzo ya Xikwembu yi hlulaka ha tona?

Dyondzo ya Xikwembu yi hlula hi ku phamela vanhu va Yehovha ku twisisa loku yaka emahlweni ka ntiyiso. Yi pfuna vanhu ku famba eku vonakaleni ka moya, naswona yi kombisa lava titsongahataka ndlela yo gandzela Xikwembu “hi moya ni ntiyiso.” (Yohane 4:24) Dyondzo ya Xikwembu nakambe yi hlula miringo ni misava leyo biha.—2/1, matluka 10-12.

▫ Hi xihi xilotlelo xo nyikela ndzayo leyi humelelaka?

Xilotlelo xa kona i ku xixima munhu lon’wana ni mfanelo yakwe ya ku khomiwa hi xichavo. Hi mukhuva wolowo, mutsundzuxi wa Mukreste u fanele a va ni tintswalo ni xivindzi, kambe u fanele a xixima loyi a n’wi layaka.—2/1, tluka 28.

▫ Xana swi tise ku yini leswaku Kereke ya Rhoma Khatoliki yi amukela Ntlhandluko wa Mariya tanihi dyondzo ya yona?

Eka malembe xidzana yo sungula endzhaku ka rifu ra Yesu, dyondzo ya Ntlhandluko wa Mariya a ya etilweni a yi nga ri kona emianakanyweni ya Vakreste. Hambi swi ri tano, endzhaku ka loko dyondzo ya Vunharhu-un’we yi ve dyondzo ya ximfumo ekerekeni, Mariya u sungule ku tekiwa a ri wa nkoka swinene. Dyondzo leyi ya Ntlhandluko a yi amukeriwanga tanihi leyi hlavuteriweke ku fikela hi November 1, 1950, loko Mupapa Pius XII a tivise a ku: “Hi yi hlamusela tanihi dyondzo leyi hlavuteriweke hi Xikwembu.”—Munificentissimus Deus.—2/15, matluka 26-7.

▫ Eka Yeremiya ndzima 24, xana swirhundzu swimbirhi, swa makuwa, yo nandziha ni xa lawa yo biha a swi yimela yini?

Makuwa yo nandziha a ma yimela Vayuda lava eku sunguleni va yisiweke evuhlongeni le Babilona, laha masalela ya vona a ma ta tlhelela eYudiya. Makuwa yo biha a ma yimela Hosi Sedekiyasi ni lava a va ri na yena eku xandzukeleni ka Hosi Nebukadnetsara hambi leswi a va hlambanyile hi vito ra Xikwembu. Hi laha ku fanaka esikwini ra hina hi kuma masalela ya Israyele wa moya, lama tswaleke mihandzu leyinene evuton’wini bya wona ku hambana ni vafundhisi va Vujagana, lava tswaleke mihandzu yo biha.—3/1, matluka 14-16.

▫ Xana Maquartodeciman a ku ri vamani, naswona hikwalaho ka yini va ri va nkoka eka Vakreste va namuntlha?

Endzhaku ka vaapostola, a ku ri na van’wana lava a va tlangela Xilalelo xa Hosi hi Nisan 14 lembe rin’wana ni rin’wana, va landzelela ndlela ya vaapostola. Va ve lava tiviwaka tanihi “Van’wakhume-mune” kumbe Maquartodeciman. Leswi swa tsakisa namuntlha, hikuva swi komba leswaku hambi ku ri endzhaku ka ku fa ka vaapostola, a ku ri na van’wana lava namarhelaka ndlela leyi faneleke yo tlangela rifu ra Yesu kan’we hi lembe hi Nisan 14.—3/15, matluka 4-5.

▫ Xana William Whiston A A Ri Mani Ke?

A ri xidyondzi xo tlhariha hi lembe xidzana ra vu-18 le Nghilandhi, munghana lonkulu wa Sir Isaac Newton. Whiston u hundzuluxele Matsalwa ya Vukreste ya Xigriki, a kaneta dyondzo ya Vunharhu-un’we erivaleni, naswona a a ri mudyondzisi wa dyondzo ya tinyeleti ni tinhlayo. Kambe Whiston kumbexana u tsundzukiwa ngopfu hi ku hundzuluxela ka yena matsalwa ya n’wamatimu wa Muyuda Flavius Josephus a ma yisa eka Xinghezi.—3/15, matluka 26-8.

▫ Xana munhu u vumbiwe njhani hi xifaniso xa Xikwembu? (Genesa 1:27)

Munhu u endliwe a ri ni vuswikoti byo kombisa timfanelo ta Xikwembu leti xiyekaka, ku nga rirhandzu, vululami, vutlhari ni matimba—ku katsa ni timfanelo tin’wana.—4/1, tluka 25.