Ha Yini U Tsakela Vukhongeri?

ETIKWENI rin’wana ni rin’wana leri nga laha misaveni, vukhongeri bya tsakeriwa. Hi tlhelo lerin’wana, ku na van’wana lava vulaka kahle leswaku vukhongeri a va byi tsakeli. Kambe xana a va titwisa xisweswo ni khale?

Ndlela leyi munhu a vumbiweke ha yona, yi n’wi endla a nga eneriseki hi ku helela hi swilo leswi vonakaka ntsena. Vanhu va lava swakudya swa moya. Vutomi bya siku na siku, lebyi langutanaka ntsena ni ku kuma swilaveko swa nyama, ni ku tihungasanyana minkarhi yin’wana, a byi swi enerisi hi ku helela swilaveko swa munhu swa xiviri. Hi laha ku hambaneke ni swiharhi, vanhu va lava ku tiva leswaku, ‘Xana xikongomelo xa vutomi i yini?’ ‘Vutomi lebyi byo koma, lebyi nga ni swilo swo tala swo saseka ni swo tala leswi biheke, xana ko va byona ntsena?’ Xana a wu si tshama u vutisa swivutiso swo tanihi leswi?

Hambi swi ri tano, vanhu va timiliyoni to tala lava hanyaka namuntlha, va kulele etindhawini leti ku tsakela vukhongeri swi nga khutaziwiki. Nkucetelo wolowo wu nga ha va wu hume eka vatswari va vona, vadyondzisi, tintangha kumbe ni le ka hulumendhe.

Skalabrino, jaha ra le Albania, ri hlamusele leswaku ehansi ka mfumo wa Vukhomanisi, vanhu a va dyondzisiwa leswaku a ku na Xikwembu. Ku tlula kwalaho, a swi ri ni khombo eka vona ku vulavula hi vukhongeri; loko wo vulavula ha byona a wu ta pfaleriwa ekhotsweni. Kambe, hi 1991, loko a ri le Switzerland tanihi mubaleki, u kume nkarhi wo dyondza Bibele. U swi amukerile. Ha yini?

Phela, le Albania a twe leswaku ku ni buku leyi va nge i Bibele, kambe a nga tivi nchumu ha yona. Xisweswo, eku sunguleni a nga ha va a nga susumetiwi ngopfu hi ku lava ku twisisa Bibele. Hambi leswi a byeriweke leswaku u ta dyondza hi xikongomelo xa Xikwembu hi vanhu ni misava, yena u swi vone swi ta n’wi pfuna ku antswisa mavulavulelo yakwe ya ririmi ra kwalaho. Kambe, hi ku hatlisa, u kume leswaku leswi a a swi dyondza swi enerisa ku navela ka moya loku enteke loku a a ri na kona. Mbilu yakwe yi tsakisiwe swinene hi xitshembiso xa Xikwembu xa misava leyintshwa laha ku nga ta va ni ku rhula kona, misava leyi vanhu va nga hanyaka hi laha ku nga heriki eka yona, va kuma ni ndzalo ya swilo hinkwaswo leswi lavekaka leswaku va hanya. Ku tsakela kakwe ku engetelekile loko a twe leswaku yena ni ndyangu wa yena va nga swi kota ku va xiphemu xa misava leyi leyintshwa. Hi ku hisiwa hi mahungu lawa lamanene, u bele ndyangu wakwe riqingho le Albania a wu byela ha wona.

Aleksei, la tshamaka le Russia, na yena u hlamarisiwe swinene hi vuyelo lebyi vutivi lebyi kongomeke bya Bibele, byi nga vaka na byona evuton’wini bya munhu. Hikwalaho ka ku mphimpheriwa hi swiphiqo ni ku tsandzeka ku kuma tinhlamuselo leti enerisaka hi xikongomelo xa vutomi, u kunguhate ku tisunga. Kambe, u rhange hi ku ya le Finland a endzela munghana wakwe. Loko a ri endleleni a khandziye xitimela, u byele vakhandziyi-kulobye hi xiphiqo xakwe. Exikarhi ka vona a ku ri na un’wana wa Timbhoni ta Yehovha, loyi a n’wi khutazeke ku dyondza Bibele tanihi leswi yi nyikelaka ntlhantlho wa swiphiqo swo tano. A nga swi kholwanga. Loko a ri endleleni yo vuya, u humeleriwe hi nchumu lowu fanaka. Sweswi a ku ri Mbhoni yin’wana leyi vulavuleke na yena, yi n’wi byela leswaku na yona a yi ri ni swiphiqo leswi fanaka, kambe Bibele yi n’wi pfune ku swi hlula. Na yena u n’wi khutaze ku hlaya Bibele. Loko a fika ekaya ku nghene riqingho. A ku ri munghana wakwe un’wana la hlayaka ni Timbhoni naswona a a tsakile swinene. Wanuna loyi u sungule ku swi vona leswaku kumbexana Bibele yi nga n’wi nyika leswi a swi lavaka, kambe a a swi tiva leswaku a nge yi twisisi handle ko pfuniwa. U pfumerile ku va ni dyondzo ya Bibele ya nkarhi na nkarhi ni Timbhoni ta Yehovha, naswona u sungule ku ya emihlanganweni ya tona. A swi n’wi tekelanga nkarhi wo leha ku vona leswaku ha yini vanhu lava va landzelelaka leswi Bibele yi swi dyondzisaka va tsake swonghasi, hambi leswi na vona va langutanaka ni swiphiqo leswi welaka vanhu hinkwavo.

Hi ku tiva swinene xivumbeko xa munhu, Yesu Kreste u te: “Munhu a nga ka a nga hanyi hi vuswa ntsena.” (Matewu 4:4) U tlhele a ku: “Va tsaka lava va khathalelaka xilaveko xa vona xa moya.” (Matewu 5:3, NW) Ntsako wa vona wu vangiwa hi leswi va xi xiyaka swinene xilaveko xa vona, va tekaka magoza lamanene ku xi enerisa, ivi va kuma mikateko ya Xikwembu. Kambe, xilaveko xa hina xa moya a xi enerisiwi ntsena hi ku joyina kereke ntsena kumbe ku ya emihlanganweni yo karhi ya vukhongeri. Vukhongeri lebyi nga taleriwa hi mihiva-hivana byi ngo khumba mintlhaveko ya munhu ntsena, kambe xana bya yi nyikela mintlhantlho ya xiviri ya swiphiqo swa vutomi? Hambi loko vukhongeri byi ti seketela tidyondzo tin’wana ta xisekelo leti nga tinene, loko byi tsandzeka ku hlamusela xikongomelo xa xiviri xa vutomi, xana byi ta xi enerisa xilaveko xa wena xa moya? Ku tlula kwalaho, xana ku landzelela vukhongeri byo tano swi ta ku tisela vuxaka lebyinene ni Xikwembu? Handle ka sweswo, ku eneriseka ka xiviri a ku kona.

Hikwalaho ka sweswo, vanhu vo tala va karhi va hlota nchumu wo karhi lowu va nga siki wu kumaka ni sweswi.

[Xifaniso lexi nga eka tluka 3]

Xana swilaveko swa wena swa moya swi ta enerisiwa hakunene hi ku joyina kereke yo karhi?

[Xifaniso lexi nga eka tluka 4]

Vo tala va kume leswaku loko va twisise Bibele, vutomi byi sungula ku va lebyintshwa