Xiviko Xa Vahuweleri Va Mfumo

Rito Ra Xikwembu Ri Ni Matimba

“RITO ra Xikwembu ra hanya, naswona [ri ni matimba, NW].” (Vaheveru 4:12) Marito lawa ma tikombise ma ri ntiyiso minkarhi yo tala loko vanhu lava a va xisiwile hi vukhongeri bya mavunwa va paluxeriwe ntiyiso wa Bibele. Tanihi laha swi kombisiweke ha kona eka ntokoto lowu landzelaka wa le Dominican Republic, matimba ya Bibele ma nga cinca vutomi bya munhu ma tlhela ma n’wi nyika ntshembo.

Timbhoni ta Yehovha ti endzele murhangeri wa xisati wa Khatholiki loyi a ha ku feriwa hi vana va yena vambirhi lavatsongo. A a ri ni gome ni ku titshandza khombo rakwe siku na siku. Timbhoni ti n’wi kombile leswi Bibele yi swi vulaka eka Yohane 5:28, 29 hi ntshembo wa ku pfuka ka vafi. Endzaku ko vulavurisana ka yena ni Timbhoni, a nga kumanga nchavelelo ntsena eka ntshembo wa ku pfuxiwa ka lava feke kambe u vone ni leswaku varhangeri va yena va vukhongeri bya Khatholiki a va n’wi xisa.

U tshike Kereke ya Khatholiki hi ku hatlisa, ivi a amukela dyondzo ya Bibele ya nkarhi hikwawo ni Timbhoni ta Yehovha. Hambi swi ri tano, nuna wa yena, a nga pfumelelananga na yona mianakanyo ya yena. Tanihi leswi na yena a ri xirho-nkulu xa Khatholiki, u hlele leswaku vanghana va politiki ni va vukhongeri lava tivekaka swinene va endzela nsati wa yena, leswaku va ringeta ku n’wi hambukisa endleleni leyi a yi tekeke ni ku n’wi vuyisela eka Vukhatoliki. Endzhakunyana u n’wi xungetile a ku u lava ku dlaya vukati, enkarhini wun’wana u tivise maxaka ya yena ni varhangeri lava a a nghena na vona kereke leswaku va lava ku dlaya vukati.

Kambe kungu ra yena a ri tirhanga. Ku hambana ni sweswo, u tiyimisele swinene ku ya emahlweni ni tidyondzo ta yena ta Bibele. Hikwalaho ka ku kula ka yena emoyeni ni ku kurisa ka yena timfanelo letinene ta Vukreste, nuna wa yena u anakanye ku tshama na yena ku tlula ku dlaya vukati. Siku rin’wana u pfumele ni ku kambisisa tibuku ta Bibele leti a ri eku tidyondzeni—kambe hi ndlela yin’we. A a lava ku tirhisa vuhundzuluxeri byakwe bya Bibele ya Khatholiki.

Lexi n’wi hlamariseke, hi ku pfuniwa hi tibuku ta Timbhoni ta Yehovha, u sungule ku dyondza swilo leswintshwa leswi humaka eBibeleni yakwe hi ku kongoma. U lemuke leswaku nsati wa yena u hlawule ndlela leyinene, hi ku hatlisa a lunghekela ku landzela xikombiso xa yena. Hakunene, u vone xilaveko xo ncinca vutomi bya yena. Xiphiqo xin’we lexi a xi nonon’hwa a ku ri ku tshika ku dzaha. Endzhaku ko hlaya nkandziyiso wa magazini wa Awake! wa July 8, 1989, lowu nga ni xihloko lexi nge “Death for Sale—Ten Ways to Stop Smoking,” u susumeteleke ku tshika mukhuva lowu lowu nga humiki ematsalweni. Ematshan’wini ya bokisi ra fole ra ntolovelo leri a ri kumeka nkarhi na nkarhi exikhwameni xa yena, u sungule ku tshama ni nkandziyiso wolowo wa Awake! Nkarhi na nkarhi loko a susumeteleka ku dzaha, a a hlaya swihloko leswi vulavulaka hi ku dzaha. Endlelo ra yena ri tirhile! Endzhaku ko hlaya swihloko leswi minkarhi yo tala, u swi kotile ku tshika ku dzaha.

Namutlha hinkwavo nuna na nsati va tirhela Yehovha tanihi vatirheli lava khuvuriweke. Loko xiyimo xi n’wi pfumelela, u tirha tanihi mutirheli wa nkarhi hinkwawo, a nyikela nkarhi wa yena wo tala eku huweleleni ka mahungu lamanene ya Mfumo wa Xikwembu naswona u tirha tanihi nandza wa vutirheli evandleni ra ka vona ra Timbhoni ta Yehovha. Yena ni nsati wa yena va langutele ku pfuka ka vafi laha va nga ta hlanganisa vana va vona lava nga ta pfukela evuton’wini emisaveni leyintshwa. Ina, Rito ra Xikwembu, ku nga Bibele, ra tirha naswona ri ni matimba!