Ku Engeteriwa Ka Nhlayo Ya Huvo Leyi Fumaka

HI XIKONGOMELO xo kurisa nhlayo ya vatirhi va Huvo leyi Fumaka ya Timbhoni ta Yehovha, xirho xin’wana xi engeteriwile eka vakulu va 11 lava tirhaka eka yona sweswi, ku sukela hi July 1, 1994. Xirho lexintshwa i Gerrit Lösch.

Makwerhu Lösch u nghenele ntirho wa nkarhi hinkwawo hi November 1, 1961, naswona u thwase eka ntlawa wa vu-41 wa Xikolo xa Bibele xa Gilead xa Watchtower. U tirhe entirhweni wa xifundzha ni wa muganga eAustria ku sukela hi 1963 ku ya ka 1976. U tekile hi 1967, naswona yena ni nsati wa yena, Merete, endzhaku va tirhe 14 wa malembe tanihi swirho swa ndyangu wa Bethele le Austria eVienna. Malembe ya mune lama hundzeke va averiwe ku ya tirha eyindlu-nkulu ya Sosayiti eBrooklyn, New York, laha Makwerhu Lösch a tirheke eTihofisini ta Vulawuri, a tlhela a tirha tanihi mupfuneti eka Komiti ya Ntirho. Hikwalaho ka mintokoto ya yena yo hambana-hambana ensin’wini ya le Yuropa, ni leswi a tivaka Xijarimani, Xinghezi, Xiromania na Xintariyana, u ta pfuneta swinene entirhweni wa Huvo leyi Fumaka.