“Mi Nga Chavi N’wina Va Ntlhambinyana”

“Mi nga chavi n’wina va ntlhambinyana, hikuva Tata wa n’wina ú tsakele ku mi nyika Mfumo.”—LUKA 12:32.

1. Xana a xi ri xihi xisekelo xa marito ya Yesu lama nge: “Mi nga chavi n’wina va ntlhambinyana”?

“NGOPFU-NGOPFU lavani Mfumo wa [Xikwembu].” (Luka 12:31) Loko Yesu a vula marito lawa eka vaapostola vakwe, u boxe nsinya wa nawu lowu kongomisiweke emiehleketweni ya Vakreste ku sukela esikwini rakwe ku fikela namuntlha. Mfumo wa Xikwembu wu fanele wu rhanga emahlweni evuton’wini bya hina. (Matewu 6:33) Hambi swi ri tano, emhakeni ya Luka, Yesu u vule marito lama khutazaka ni lama tiyisaka nhlana entlaweni wo hlawuleka wa Vakreste. U te: “Mi nga chavi n’wina va ntlhambinyana, hikuva Tata wa n’wina ú tsakele ku mi nyika Mfumo.” (Luka 12:32) Tanihi Murisi Lonene, Yesu a a swi tiva leswaku vadyondzisiwa vakwe lavakulu a va ta langutana ni minkarhi yo tika. Kambe a ku ri hava xivangelo xa leswaku va chava loko va hambeta va lava Mfumo wa Xikwembu ku sungula. Hikwalaho, xikhutazo xa Yesu a ku nga ri xileriso xa vukarhi. Kambe, a ku ri xitshembiso xa rirhandzu lexi nyikeke ntshembo ni xivindzi.

2. I vamani lava vumbaka ntlhambinyana, naswona ha yini va ri ni lunghelo ro hlawuleka?

² Yesu a a vulavula ni vadyondzisiwa vakwe, naswona u va vitane leswaku i “ntlhambinyana.” Nakambe a a vulavula ni lava Yehovha a nga ta va ‘nyika mfumo.’ Loko va ringanisiwa ni mintshungu leyikulu leyi a yi ta amukela Yesu endzhaku ka nkarhi, ntlawa lowu a wu ri wutsongo hakunene. Nakambe va tekiwe va ri va risima hikwalaho ka leswi va hlawuleriweke vumundzuku lebyi xiyekaka, leswaku va tirhisiwa entirhweni wa vuhosi. Tata wa vona, Murisi Lonkulu, Yehovha, u vitane ntlhambinyana leswaku wu amukela ndzhaka ya le tilweni malunghana ni Mfumo wa Kreste wa Vumesiya.

Ntlhambinyana

3. Hi xihi xivono xo vangama xa ntlhambinyana lexi Yohane a xi voneke?

³ Kutani, i vamani lava vumbaka ntlhambinyana lowu nga ni ntshembo wo hlamarisa? I valandzeri va Yesu Kreste lava totiwaka hi moya wo kwetsima. (Mintirho 2:1-4) Loko a va vona tanihi vayimbeleri va le tilweni va tamele tinanga, muapostola Yohane u tsarile: “Ndzi languta, kutani ndzi vona Xinyimpfana xi yimile entshaveni ya Siyoni, xi ri ni vanhu va 144 000 lava mimombo ya vona yi tsariweke vito ra xona ni ra Tata wa xona. Lava, hi lava va nga tinyamisangiki hi vavasati, hikuva va tengile. Hi lava va landzelelaka Xinyimpfana hinkwako lomu xi yaka kona. Lava hi lava va kutsuriweke exikarhi ka vanhu leswaku va va mihandzu yo rhanga ya ntshovelo, va humeseriwa Xikwembu ni Xinyimpfana. A ku humanga vunwa emilon’weni ya vona ni siku ni rin’we; va hava xivati.”—Nhlavutelo 14:1, 4, 5.

4. Xana ntlhambinyana wu ni xiyimo xihi emisaveni namuntlha?

⁴ Ku sukela hi Pentekosta ya 33 C.E., vatotiwa lava, lava tswariweke hi moya va tirhe tanihi vayimeri va Kreste emisaveni. (2 Vakorinto 5:20) Namuntlha, ku sele masalela ya vona ntsena, lama tirhaka swin’we tanihi ntlawa wa nandza wo tshembeka ni wa vutlharhi. (Matewu 24:45; Nhlavutelo 12:17) Ngopfu-ngopfu ku sukela elembeni ra 1935, va hlangane ni “tinyimpfu tin’wana,” Vakreste lava nga ni ntshembo wa laha misaveni, lava sweswi va fikaka eka timiliyoni. Va hoxa xandla eku chumayeleni ka mahungu lamanene emisaveni hinkwayo.—Yohane 10:16.

5. Hi rihi langutelo ra masalela ya ntlhambinyana, naswona ha yini va nga fanelanga va chava?

⁵ Xana hi rihi langutelo ra masalela lawa ya ntlhambinyana lama nga kona emisaveni? Leswi va tivaka leswaku va ta amukela ‘Mfumo lowu nga tsekatsekiki,’ va endla ntirho wo kwetsima hi ku chava ni ku xixima Xikwembu. (Vaheveru 12:28) Hi ku titsongahata va xiya leswaku va ni lunghelo lerikulu leri tisaka ntsako lowukulu. Va kume ‘dayimani yin’we ya nxavo lowukulu’ leyi Yesu a yi boxeke loko a vulavula hi Mfumo. (Matewu 13:46) Loko nhlomulo lowukulu wu tshinela, vatotiwa va Xikwembu va yima va nga chavi nchumu. Ku nga khathariseki leswi nga ta humelela emisaveni ya vanhu hi “siku lerikulu ro vangama ra Hosi,” a va chavi nchumu hi swilo swa nkarhi lowu taka. (Mintirho 2:19-21) Xana va nga chavela yini?

Nhlayo Ya Hunguteka

6, 7. (a) Ha yini nhlayo ya ntlhambinyana lowu wa ha riki emisaveni yi ri yitsongo? (b) Xana munhu un’wana ni un’wana u fanele ku wu teka njhani ntshembo lowu a nga na wona?

⁶ Emalembeni ya sweswinyana nhlayo ya ntlhambinyana lowu seleke emisaveni yi hungutekile swinene. Leswi swi kombisiwe hi xiviko xa Xitsundzuxo xa 1994. Emavandlheni ya kwalomu ka 75 000 ya vanhu va Yehovha emisaveni hinkwayo, i vanhu va 8 617 ntsena lava dyeke swifanekiselo va kombisa ku tivula ka vona leswaku i swirho swa masalela. (Matewu 26:26-30) Ku hambana ni sweswo, nhlayo ya lava veke kona a yi ri 12 288 917. Vakreste lava totiweke va swi tiva leswaku leswi swi fanele ku rindzeriwa. Yehovha u veke nhlayo leyi pimiweke, 144 000, leswaku yi hlanganisa ntlhambinyana, naswona a a ri karhi a yi hlengeleta ku sukela hi Pentekosta ya 33 C.E. Entiyisweni, ku vitaniwa ka ntlhambinyana a ku ta hela loko nhlayo yi tshinela emakun’wini, naswona vumbhoni byi kombisa leswaku ku hlengeletiwa lokukulu ka vanhu lava lava katekisiweke ku hele hi 1935. Hambi swi ri tano, enkarhini wa makumu ku profetiwe leswaku tinyimpfu tin’wana ti ta kula ti va “ntshungu lowukulu wa vanhu; [lowu ku nga riki] na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Ku sukela hi 1935, nhlengeleto lowukulu wa Yehovha wu ve wa ntshungu lowu lowukulu, lowu ntshembo wa vona ku nga vutomi lebyi nga heriki emisaveni ya paradeyisi.—Nhlavutelo 7:9; 14:15, 16; Pisalema 37:29.

⁷ Vunyingi bya ntlhambinyana wolowo lowu wa ha riki kona emisaveni sweswi byi ni malembe ya 70, 80 kumbe 90. Va nga ri vangani va le henhlanyana ka malembe ya 100 ya vutomi bya vona. Hinkwavo lava, ku nga khathariseki leswaku va ni malembe mangani va swi tiva leswaku hi ku pfuxeriwa etilweni, va ta hetelela va hlanganisiwe na Yesu Kreste naswona va ta fuma na yena eMfun’weni wakwe lowu vangamaka. Vanhu va ntshungu lowukulu va ta va vafumiwa va laha misaveni va Kreste, Hosi. Onge un’wana ni un’wana a nga tsakela leswi Yehovha a swi hleleleke lava n’wi rhandzaka. A swi le matimbeni ya hina ku hlawula ntshembo lowu hi nga vaka na wona. Sweswo swi tiviwa hi Yehovha. Mintlawa leyi hayimbirhi yi nga tsakela ntshembo wa yona wa vumundzuku lebyi tsakisaka, ku nga khathariseki leswaku hi le Mfun’weni wa le tilweni kumbe emisaveni ya paradeyisi ehansi ka Mfumo wolowo.—Yohane 6:44, 65; Vaefesa 1:17, 18.

8. Xana ku funghiwa ka lava 144 000 ku fike kwihi, naswona ku ta endleka yini loko se ku herile?

⁸ Ntlhambinyana lowu heleleke wa 144 000 i ‘Israyele wa Xikwembu,’ lowu tekeke ndhawu ya Israyele wa ntumbuluko eswikongomelweni swa Xikwembu. (Vagalatiya 6:16) Hikwalaho, masalela lama ha riki emisaveni, hi wona ma vumbaka tiko rolero ra moya. Masalela wolawo ma karhi ma funghiwa leswaku ma amukeriwa hi Yehovha hi laha ku heleleke. Exivonweni, muapostola Yohane u vone leswi swi humelela, kutani u vikile a ku: “Ndzi vona ntsumi yin’wana yi tlhandluka hi tlhelo ra vuxa yi tamele xifungho xa Xikwembu lexi hanyaka. Yi vitana, hi rito leri tlakukeke, tintsumi leti ta mune leti Xikwembu xi ti nyikeke matimba yo onha misava ni lwandle. Ntsumi yi ku: ‘Mi nga onhi misava, kumbe lwandle, kumbe mirhi, ku kondza loko hi ta fungha malandza ya Xikwembu xa hina hi mfungho emimombyeni ya vona.’ Kutani ndzi twa ntsengo wa lava funghiweke: A va ringana 144 000, va huma etinyimbeni hinkwato ta Vaisraele [va moya] va ri lava funghiweke.” (Nhlavutelo 7:2-4) Tanihi leswi swi nga erivaleni leswaku ntirho lowu wo fungha Vaisrayele va moya wu kusuhi ni ku hela, ku kombisiwa swiendlakalo leswi nyanyulaka leswi nga ta endleka ku nga ri khale. Xo sungula, “nhlomulo lowukulu,” laha timheho ta mune ta ndzoviso ti tshikiwaka kona emisaveni, wu fanele wu tshinele ngopfu.—Nhlavutelo 7:14.

9. Xana ntlhambinyana wu yi languta njhani nhlayo leyi andzaka ya ntshungu lowukulu?

⁹ Ntshungu lowukulu lowu se wu hlengeletiweke wu fika eka timiliyoni. Leswi swi tsakisa timbilu ta masalela! Hambi leswi ntlhambinyana lowu nga kona emisaveni wu yaka emahlweni wu hunguteka hi nhlayo, wu letele ni ku lunghiselela vavanuna lava fanelekaka va ntshungu lowukulu leswaku va byarha vutihlamuleri malunghana ni nhlengeletano ya Xikwembu ya laha misaveni leyi kulaka. (Esaya 61:5) Hi laha Yesu a kombiseke ha kona, ku ta va ni lava nga ta pona nhlomulo lowukulu.—Matewu 24:22.

“Mi Nga Chavi”

10. (a) Hi wihi nhlaselo lowu faneleke ku wela vanhu va Xikwembu, naswona wu ta yisa eka yini? (b) Hi swihi swivutiso leswi hi vutisiwaka swona?

¹⁰ Sathana ni mademona yakwe va cukumeteriwe emisaveni. Yena ni valandzeri vakwe va tilulamisela ku hlasela vanhu va Yehovha. Nhlaselo lowu, lowu vhumbhiweke eBibeleni, wu hlamuseriwa tanihi nhlaselo wa Gogo wa Magogo. Xana i vamani lava Diyavulosi a va hlaselaka ngopfu? Xana a hi swirho swo hetelela swa ntlhambinyana, Vaisrayele va moya va Xikwembu, lava tshamaka hi ku rhula “e šikari ka misav̌a”? (Ezekiyele 38:1-12) Ina, kambe masalela ya ntlawa lowu totiweke wo tshembeka, kun’we ni vanakulobye vo tshembeka, ku nga tinyimpfu tin’wana, va ta vona ndlela leyi nhlaselo wa Sathana wu nga ta xi pfuxa ha yona xiendlo lexi hlamarisaka xa Yehovha Xikwembu. U ta nghenelela a lwela vanhu vakwe, kutani leswi swi ta vula ku sungula ka “siku le’rikulu, le’ri tšhav̌isaka ra Hosi.” (Yuwele 2:31) Namuntlha, nandza lowo tshembeka, wa vutlharhi u endla ntirho wa nkoka, wo ponisa vutomi, u tsundzuxa hi ku nghenelela loku ka Yehovha. (Malakiya 4:5; 1 Timotiya 4:16) Xana u wu seketela hi ku hiseka ntirho wolowo, u hlanganyela entirhweni wo chumayela mahungu lamanene ya Mfumo wa Yehovha? Xana u ta ya emahlweni u endla sweswo tanihi muhuweleri wa Mfumo la nga chaviki?

11. Ha yini ku va ni xivindzi swi ri swa nkoka namuntlha?

¹¹ Hi ku ya hi xiyimo lexi nga kona xa misava, swi le nkarhini swinene leswaku ntlhambinyana wu yingisa marito lawa Yesu a ma vuleke: ‘U nga chavi we ntlhambinyana’! Xivindzi xo tano i xa nkoka loko hi languta hinkwaswo leswi endliwaka sweswi hi ku pfumelelana ni xikongomelo xa Yehovha. Un’wana ni un’wana wa lava ntlhambinyana u xiya xilaveko xo tiyisela ku fikela emakumu. (Luka 21:19) Tanihi leswi Yesu Kreste, Hosi ni N’wini wa ntlhambinyana, a tiyiseleke ni ku tlhela a tshembeka ku fikela emakun’wini ya vutomi byakwe bya laha misaveni, kutani un’wana ni un’wana wa masalela u fanele ku tiyisela, a tshembeka.—Vaheveru 12:1, 2.

12. Xana Pawulo, ku fana na Yesu, u va khutaze njhani Vakreste lava totiweke leswaku va nga chavi?

¹² Vatotiwa hinkwavo va fanele ku va ni langutelo leri fanaka ni leri muapostola Pawulo a a ri na rona. Xiya marito ya yena tanihi muhuweleri la totiweke wa ta ku pfuka ka vafi hi ku pfumelelana ni xikhutazo xa Yesu xa leswaku va nga chavi. Pawulo u tsarile: “Tsundzuka Yesu Kriste, wa rixaka ra Davhida, loyi a pfuxiweke eku feni, hilaha Evhangeli leyi ndzi yi twarisaka yi vulaka hakona. Evhangeli ya kona yi ndzi vangele maxangu, ndzi ko ndzi bohiwa hi tinketani kukota xigevenga, kambe Rito ra Xikwembu rona a ri bohiwanga, kutani, etimhakeni hinkwato ndzi tiyisela hikwalaho ka vahlawuriwa va Xikwembu, leswaku na vona va ta kuma ku ponisiwa loku humaka eka Kriste Yesu, va kuma ni ku kwetsima loku nga heriki. Rito leri ri tiyile, leri nge: ‘Loko hi file na yena, nakona hi ta hanya na yena; loko hi tiyisela, nakona hi ta fuma na yena; loko hi n’wi landzula, na yena ú ta hi landzula; loko hi nga tshembeki, yena wa tshembeka masiku hinkwawo, hikuva a nga ka a nga tilandzuli.’”—2 Timotiya 2:8-13.

13. Xana hi wihi ntshembo lowu enteke lowu swirho swa ntlhambinyana swi nga na wona, naswona xana wu swi susumetela ku endla yini?

¹³ Ku kota muapostola Pawulo, swirho leswi saleke swa ntlhambinyana lowu totiweke swi tiyimisele ku tiyisela maxangu loko swi twarisa rungula ra matimba leri tsariweke eRitweni ra Xikwembu. Ntshembo wa vona wu tiyile swinene tanihi leswi va khomelelaka eswitshembisweni swa Xikwembu swa ku pona ni swa ku nyikiwa “harhi ya vutomi” loko va tshama va tshembekile ku fikela eku feni. (Nhlavutelo 2:10) Hi ku pfuxiwa hi ku hatlisa ni ku hundzuka ka xiyimo xa vona, va ta hlanganisiwa na Kreste, va fuma na yena tanihi tihosi. Ku ta va ku hlula lokukulu swonghasi ka ndlela ya vona yo hlayisa vutshembeki tanihi vahluri va misava!—1 Yohane 5:3, 4.

Ntshembo Lowu Hlawulekeke

14, 15. Xana ntshembo wa ku pfuxiwa ka ntlhambinyana wu hlawuleke hi ndlela yihi?

¹⁴ Ntshembo wa ku pfuxiwa wa ntlhambinyana wu hlawulekile. Hi tindlela tihi? Hi xikombiso, wu rhangela ku pfuxiwa ka “lavo lulama ni lava nga lulamangiki.” (Mintirho 24:15) Kahle-kahle, ku pfuxiwa ka vatotiwa ku landza nongonoko wo karhi wa nkoka, hi laha swi kombisiwaka kahle ha kona hi marito lawa lama kumekaka eka 1 Vakorinto 15:20, 23: “Kriste ú pfuxiwile exikarhi ka vafi. Hi swona leswi tshembisaka leswaku lava feke na vona va ta pfuxiwa. Kambe un’wana ni un’wana ú ta pfuxiwa hi nkarhi wa yena: Wo rhanga i Kriste xi nga xo xitshembiso; kutani loko Kriste a ta, lava nga va yena va ta landza.” Hi ku va ni ku tiyisela ni ripfumelo leri Yesu a ri kombiseke, ntlhambinyana wu tiva leswi wu nga ta swi kuma loko wu heta vutomi bya laha misaveni, ngopfu-ngopfu ku sukela loko Hosi ya ntiyiso yi tile etempeleni ya yona yi ta avanyisa hi 1918.—Malakiya 3:1.

¹⁵ Pawulo u hi nyika xivangelo xin’wana xo teka ku pfuxiwa loku tanihi loku hlawulekeke. Hi laha ku tsariweke ha kona eka 1 Vakorinto 15:51-53, u tsarile: “Yingisani, ndzi mi byela xihundla: A hi nga fi hinkwerhu, kambe hinkwerhu hi ta hundzuriwa, hi nkarhinyana, hi ku copeta ka tihlo, eku beni ka mhalamhala ya makumu. . . . Hikuva leswi onhakaka swi fanele ku funengela leswi nga onhakiki, ni leswi faka swi fanele ku funengela leswi nga fiki.” Marito lawa ma tirha eka swirho swa ntlhambinyana leswi faka enkarhini wa vukona bya Kreste. Handle ko etlela nkarhi wo leha eku feni, va ambexiwa ku ka va nga fi, “hi nkarhinyana, hi ku copeta ka tihlo.”

16, 17. Malunghana ni ntshembo wa vona wa ku pfuxiwa, xana Vakreste lava totiweke namuntlha va katekisiwa njhani hi laha ku hlawulekeke?

¹⁶ Hi ku ya hi ku twisisa loku, hi nga twisisa mongo wa marito ya muapostola Yohane lama kumekaka eka Nhlavutelo 14:12, 13. U tsarile: “Leswi swi lava leswaku vahlawuriwa va Xikwembu va tiyisela, va ri karhi va hlayisa milawu ya xona, ni ku pfumela ka vona eka Yesu. Kutani ndzi twa rito ri huma etilweni ri ku: ‘Tsala leswi: Ku katekile vafi lava ku sukela sweswi va felaka eHosini!’ Moya na wona wu ri: ‘Ina, va katekile, hikuva va phyuphya emikarhalweni ya vona, kutani mintirho ya vona yi ta va landzela.’”

¹⁷ Mawaku hakelo yo hlawuleka swonghasi leyi rindzeleke masalela ya ntlhambinyana! Ku pfuxiwa ka wona ku ta ta hi ku hatlisa, loko va ha ku etlela eku feni. Va ta hundzuka hi ndlela yo hlamarisa swinene loko va teka xiavelo xa vona exivandleni xa moya! Leswi ku kwetsimisiwa koloko ka ntlhambinyana ku yaka emahlweni ni leswi ku hetiseka ka vuprofeta lebyikulu bya Bibele ku tshinelaka emakumu, swirho leswi saleke swa ntlhambinyana hakunene a swi fanelanga swi ‘chava.’ Naswona ku pfumala ku chava ka swona ku tiyisa ntshungu lowukulu, lowu faneleke wu hlakulela langutelo leri fanaka ra ku nga chavi tanihi leswi wu rindzeleke ku kutsuriwa enkarhini lowukulu wa maxangu lowu nga si tshamaka wu va kona emisaveni.

18, 19. (a) Ha yini nkarhi lowu hi hanyaka eka wona wu lava leswaku hi teka goza hi xihatla? (b) Ha yini vatotiwa ni tinyimpfu tin’wana va nga fanelanga va chava?

¹⁸ Ku anakanyisisa hi mintirho ya ntlhambinyana swi pfuna vona ni ntshungu lowukulu leswaku va hambeta va chava Xikwembu xa ntiyiso. Nkarhi wa ku avanyisa ka yena wu fikile, naswona nkarhi lowu saleke i wa risima. Hakunene, wu komile nkarhi lowu saleke leswaku van’wana va teka goza. Kambe, hina a hi chavi leswaku xikongomelo xa Xikwembu xi ta tsandzeka. Xi ta humelela hakunene!

¹⁹ Ana marito ya le tilweni lama huwelelaka ma twiwile ma ku: “Matimba ya ku fuma misava, sweswi ma nyikiwile Hosi ya hina ni Mesiya wa yona, kutani ú ta fuma hilaha ku nga heriki.” (Nhlavutelo 11:15) Hakunene, Murisi Lonkulu, Yehovha, u kongomisa tinyimpfu takwe hinkwato “e tindleleni le’to lulama, hikwalaho ka v̌ito ra yena.” (Pisalema 23:3) Ntlhambinyana wu yisiwa ehakelweni ya wona ya le tilweni hi ku kongoma. Naswona tinyimpfu tin’wana ti ta ponisiwa enhlomulweni lowukulu ti ya tiphina hi vutomi lebyi nga heriki exivandleni xa laha misaveni xa Mfumo wa Xikwembu lowu vangamaka ehansi ka vulawuri bya Kreste Yesu. Hikwalaho, hambi leswi marito ya Yesu a ma kongomisiwe eka ntlhambinyana, swi le rivaleni leswaku malandza ya Xikwembu hinkwawo emisaveni ma fanele ku yingisa marito yakwe lama nge: “Mi nga chavi.”

Xana U Nga Hlamusela?

◻ Ha yini hi fanele ku langutela leswaku nhlayo leyi saleke ya ntlhambinyana yi hunguteka?

◻ Hi xihi xiyimo xa masalela lama totiweke namuntlha?

◻ Ha yini Vakreste va nga fanelanga va chava, ku nga khathariseki nhlaselo lowu tshinelaka wa Gogo wa Magogo?

◻ Ha yini ntshembo wa ku pfuxiwa wa lava 144 000 wu hlawulekile, ngopfu-ngopfu namuntlha?