Swivutiso Swa Vahlayi

Hi ku kongoma, xana ku kona ku hambana exikarhi ka marito ya Bibele lama nge “tinyimpfu tin’wana” ni “ntshungu lowukulu”?

Ina, hambi leswi hi nga fanelangiki ku khumbeka ngopfu hi matirhiselo ya rito kumbe ku khunguvanyeka loko un’wana a tirhisa marito lawa a ma hlanganisa.

Vakreste vo tala va tolovelane ni tindzimana leti hi kumaka marito lawa eka tona. Yohane 10:16 hi yin’wana ya tona. Kwalaho Yesu u te: “Ndzi ni tinyimpfu tin’wana leti nga riki ta tshanga leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun’we, ti va ni murisi un’we.” Rito lerin’wana, “ntshungu lowukulu,” ri humelela eka Nhlavutelo 7:9. Ha hlaya: “Endzhaku ka sweswo, ndzi languta, kutani ndzi vona ntshungu lowukulu wa vanhu; a ku nga ri na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo ni le mahlweni ka Xinyimpfana, va ambele tinguvu to leha leto basa, va tamele mincindzu emandleni ya vona.”

A hi rhangeni hi languta Yohane 10:16. Xana tinyimpfu i vamani? Kahle-kahle, swi ta va swinene ku tsundzuka leswaku hinkwavo valandzeri va Yesu lava tshembekaka va vitaniwa tinyimpfu. Eka Luka 12:32, u vule vadyondzisiwa va yena lava a va ta ya etilweni a ku i “ntlhambinyana.” Ntlhambi wa yini? Wa tinyimpfu. “Tinyimpfu” ta “ntlhambinyana” ti ta va xiphemu xa Mfumo wa le tilweni. Hambi swi tano, ku ni van’wana, lava nga ni ntshembo lowu hambaneke, lava Yesu a va vitanaka tanihi tinyimpfu.

Leswi hi nga swi vona eka Yohane ndzima 10. Endzhaku ko vulavula hi tinyimpfu to tanihi vaapostola va yena lava va rhamberiweke vutomi bya le tilweni, eka ndzimana 16 Yesu u engeterile: “Ndzi ni tinyimpfu tin’wana leti nga riki ta tshanga leri; na tona ndzi fanele ku ti vuyisa.” I khale Timbhoni ta Yehovha ti swi xiyile leswaku endzimaneni leyi Yesu a vulavula hi vanhu lava nga ni langutelo ro hanya emisaveni. Vo tala lava tshembekeke enkarhini wa le mahlweni ka Vukreste, vo tanihi Abrahama, Sara, Nowa na Malakiya, a va ri na langutelo ro tano. Kutani handle ko kanakana hi nga va katsa tanihi xiphemu xa “tinyimpfu tin’wana” ta Yohane 10:16. Enkarhini wa Gidi ra Malembe, timbhoni to tano leti tshembekeke ta le mahlweni ka Vukreste ti ta pfuxiwa kutani ti dyondza ni ku amukela Kreste Yesu, ti va “tinyimpfu tin’wana” ta Murisi Lonene.

Nakambe ha swi tiva leswaku hi mpfhuka loko ku vitaniwa ka ntlawa lowu yaka etilweni ku fike emakumu, ku ni timiliyoni leti veke Vakreste. Na vona handle ko kanakana va vuriwa “tinyimpfu tin’wana,” tanihi leswi va nga riki xiphemu xa “ntlhambinyana.” Ematshan’wini ya sweswo, namuntlha tinyimpfu tin’wana ti langutele ku hanya eparadeyisini ya laha misaveni hi laha ku kongomeke.

Sweswi, i yini lexi nga vuriwaka malunghana ni nhlamuselo ya “ntshungu lowukulu” lowu kombisiweke eka Nhlavutelo 7:9? Ina, languta eka ndzimana 13 ni xivutiso, “I vamani xana? Va huma kwihi xana?” Hi kuma nhlamulo eka Nhlavutelo 7:14: “Lava, hi lava humaka eku xanisekeni lokukulu.” Kutani “ntshungu lowukulu” wu vumbiwa hi lava humaka, kumbe lava ponaka, nhlomulo lowukulu. Hi laha ndzimana 17 yi vulaka ha kona, va ta ‘yisiwa eswihlobyeni swa mati ya vutomi’ emisaveni.

Kambe, hi ndlela leyi twisisekaka, leswaku va pona nhlomulo lowukulu lowu tshinelaka, eku sunguleni va fanele va va va hlantswile tinguvu ta vona hi ngati ya Xinyimpfana, va va vagandzeri va ntiyiso. Hikwalaho, hambi leswi Nhlavutelo 7:9 yi hlamuselaka ntshungu lowu endzhaku ka nhlomulo, hi nga ha tirhisa rito “ntshungu lowukulu” eka hinkwavo lava nga ni ntshembo wo hanya emisaveni lava endlaka ntirho wa Yehovha lowo kwetsima sweswi, nhlomulo lowukulu wu nga si wela vukhongeri bya mavunwa hi nhlaselo wa matiko.

Hi ku komisa, hi nga ha tsundzuka “tinyimpfu tin’wana” tanihi rito leri anameke, leri katsaka malandza hinkwawo ya Xikwembu lama nga ni ntshembo wo hanya hi laha ku nga heriki emisaveni. Ri katsa ntlawa lowu nga nyawuriki wa lava namuntlha va fanaka ni tinyimpfu lava va hlengeletiweke tanihi “ntshungu lowukulu” lava nga ni ntshembo wo hundza eka nhlomulo lowukulu lowu tshinelaka va karhi va hanya. Vo tala va Vakreste lavo tshembeka lava hanyaka namuntlha i “tinyimpfu tin’wana,” ku katsa ni xiphemu xa “ntshungu lowukulu.”

I swa nkoka ku phindha mhaka ya leswaku, hambi leswi swi nga swinene ku ti twisisa kahle tinhlamuselo leti, a ku na xilaveko eka Mukreste un’wana ni un’wana xo khumbeka ngopfu—hi leswi nga ha vuriwaka ku xopaxopa ka marito. Pawulo u tsundzuxe hi ta van’wana lava a va “tela hi manyunyu ni ku tikukumuxa” ni ku katseka eka “ku kanetana ehenhla ka marito ntsena.” (1 Timotiya 6:4) Loko hina hi vona ku hambana kun’wana exikarhi ka marito, swi lulamile. Kambe, a hi fanelanga hambi ku ri erivaleni kumbe exihundleni ku xopaxopa van’wana lava va nga ha vaka va nga ma tirhisi kahle marito ya Bibele.