Miseve Ya Ku Vonakala eMinkarhini Ya Vaapostola

“Ku v̌onakala ku byaleriwe l’a lulameke, ni ku ṭaka ku nyikiwa v̌a timbilu to lulama.”—PISALEMA 97:11.

1. Xana Timbhoni ta Yehovha ta namuntlha ti fana njhani ni Vakreste vo sungula?

MAWAKU ndlela leyi hina, tanihi Vakreste va ntiyiso, hi tlangelaka ha yona marito lama nga eka Pisalema 97:11! ‘Miseve ya ku vonakala’ yi hi voningele hi ku phindha-phindha. Hakunene, van’wana va hina va vone miseve ya ku vonakala ya Yehovha hi makume ya malembe. Leswi hinkwaswo swi hi tsundzuxa Swivuriso 4:18, leyi nge: “Ndlela ya la’v̌o lulama yi kotisa ku v̌onakala, ku hatima ka kona ku engeteleka ku fikela nhlekanhi lo’wukulu.” Leswi hi tlangelaka Matsalwa ku tlula ku landza ndhavuko, hina Timbhoni ta Yehovha hi fana ni Vakreste vo sungula. Langutelo ra vona ri nga voniwa kahle etibukwini ta matimu ya Matsalwa ya Vukreste ya Xigriki ni le mapapileni ya tona, lama tsariweke ehansi ka ku huhuteriwa hi Xikwembu.

2. Hi yihi miseve yin’wana yo sungula ya ku vonakala leyi valandzeri va Yesu va yi amukeleke?

² Yin’wana ya miseve yo sungula ya ku vonakala leyi valandzeri vo sungula va Yesu Kreste va yi kumeke a yi vulavula hi Mesiya. Andriya u byele makwavo Simoni Petro a ku: “Hi kumile Mesiya.” (Yohane 1:41) Nkarhi wun’wana endzhakunyana ka sweswo, Tatana wa le tilweni u pfune muapostola Petro leswaku a humesa vumbhoni bya mhaka yoleyo loko a ku eka Yesu Kreste: “U Mesiya, N’wana wa Xikwembu lexi hanyaka.”—Matewu 16:16, 17; Yohane 6:68, 69.

Ku Vonakala Malunghana Ni Ntirho Wa Vona Wo Chumayela

3, 4. Endzhaku ka ku pfuxiwa ka yena, i ku voningeriwa kwihi loku Yesu a ku nyikeke valandzeri va yena malunghana ni ntirho wa nkarhi lowu taka?

³ Endzhaku ka ku pfuxiwa ka yena, Yesu Kreste u humese miseve ya ku vonakala malunghana ni vutihlamuleri lebyi a byi rhwexeke valandzeri va yena hinkwavo. Swi vonaka onge a a byela vadyondzisiwa vakwe va 500 lava a va hlengeletanile eGaleliya loko a ku: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n’wina masiku hinkwawo, ku ko ku hela misava.” (Matewu 28:19, 20; 1 Vakorinto 15:6) Hikwalaho, valandzeri hinkwavo va Kreste a va fanele ku va vachumayeri, naswona ntirho wa vona wo chumayela a wu nga fanelanga wu endliwa eka ‘tinyimpfu leti lahlekeke ta yindlu ya Israyele ntsena.’ (Matewu 10:6) Naswona nkhuvulo wa Yohane a wu nga ta tirhisiwa tanihi xikombiso xo hundzuka leswaku va ta rivaleriwa swidyoho. Ematshan’weni ya sweswo, a va fanele va khuvula vanhu “hi vito ra Tatana, ni ra N’wana, ni ra Moya lowo Kwetsima.”

⁴ Emahlweninyana ka ku tlhandlukela ka Yesu etilweni, vaapostola vakwe vo tshembeka va 11 va n’wi vutisile: “Hosi, xana hi wona nkarhi lowu u nga ta pfuxa mfumo wa lsrayele ke?” Ematshan’weni yo hlamula xivutiso xexo, Yesu u va nyike swiletelo swin’wana malunghana ni ntirho wa vona wo chumayela, a ku: “Mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.” Ku fikela enkarhini wolowo, a va ri timbhoni ta Yehovha ntsena, kambe sweswi a va ta tlhela va va timbhoni ta Kreste.—Mintirho 1:6-8.

5, 6. I miseve yihi ya ku vonakala leyi vadyondzisiwa va Yesu va yi amukeleke hi Pentekosta?

⁵ Vona miseve leyikulu swonghasi ya ku vonakala leyi valandzeri va Yesu va yi amukeleke masiku ya khume ntsena endzhakunyana! Hi siku ra Pentekosta ya 33 C.E., a ku ri ro sungula va twisisa nhlamuselo ya Yuwele 2:28, 29 hi xitalo leyi nge: “[Mina Yehovha] ndi ta tšhela moya wa mina e henhla ka nyama hikwayo, ku ta profeta v̌ana v̌a ṅwina v̌a šinuna ni v̌a šisati; ŝidyuhati ŝa ṅwina ŝi ta lora miloro, ni madžaha ya ṅwina ma v̌ona mahlori. Ni le henhla ka malanḍa ya šinuna ni ya šisati, nḍi ta tšhela moya wa mina hi masiku walawo.” Vadyondzisiwa va Yesu va vone moya lowo kwetsima, hi xivumbeko xa tindzimi leti fanaka ni ndzilo, ti ri ehenhla ka tinhloko ta vona hinkwavo—vavanuna ni vavasati va kwalomu ka 120—va hlengeletane eYerusalema.—Mintirho 1:12-15; 2:1-4.

⁶ Nakambe, hi siku ra Pentekosta, vadyondzisiwa va swi twisise ro sungula, leswaku marito ya Pisalema 16:10, ma tirha eka Yesu Kreste la pfuxiweke. Mupisalema u te: “[Wena Yehovha Xikwembu] u nga ka u nga ṭhiki moya wa nga e šiv̌andleni ša v̌afi; u nga ka u nga pfumeri leŝaku muhlawuriwa wa wena a v̌ona ku bola.” Vadyondzisiwa va swi xiyile leswaku marito wolawo a ma tirhanga eka Hosi Davhida, hikuva sirha rakwe a ri ri kona ku fikela siku rolero. A swi hlamarisi leswi vanhu va kwalomu ka 3 000 lava yingiseleke ku hlamuseriwa loku ka ku vonakala lokuntshwa va khorwisiweke swinene lerova va khuvuriwa siku rolero!—Mintirho 2:14-41.

7. I ku vonakala kwihi lokukulu loku muapostola Petro a ku amukeleke hi nkarhi wa ku endza ka yena eka Korneliyo ndhuna ya Murhoma?

⁷ Ku ringana malembe-xidzana yo tala, Vaisrayele va tlangele leswi Xikwembu xi swi vuleke ha vona loko xi ku: “Nḍi tiv̌ile ṅwina ntsena e šikari ka tinšaka hikwato ta misav̌a.” (Amosi 3:2) Hakunene, a ku ri ku vonakala lokukulu loku muapostola Petro ni lava a ri na vona endlwini ya Korneliyo ndhuna ya Murhoma va ku kumeke, loko moya lowo kwetsima wu xikela ro sungula ehenhla ka vapfumeri va Vamatiko lava nga yimbangiki. Lexi xiyekaka swinene hi leswi a ri ri ro sungula leswaku moya lowo kwetsima wu nyikiwa vanhu va nga si khuvuriwa. Kambe a swi fanele ku va hi ndlela yoleyo. Handle ka sweswo, Petro a nga ta swi tiva leswaku Vamatiko lava lava nga yimbangiki a va lulameriwe hi nkhuvulo. Hi ku tlangela nkoka wa xiendlakalo xolexo swinene, Petro u vutisile a ku: “I mani la nga alaka sweswi leswaku vanhu lava [Vamatiko] va khuvuriwa hi mati, leswi va amukeleke Moya lowo Kwetsima kukotisa hina ke?” Kavula, a ku vanga na munhu loyi a ri kona loyi a ri na mfanelo yo ala, naswona Vamatiko lava va khuvuriwile.—Mintirho 10:44-48; ringanisa Mintirho 8:14-17.

A Ka Ha Yimbiwi

8. Ha yini Vakreste van’wana vo sungula swi va nonon’hwerile ku tshika mukhuva wa ku yimba?

⁸ Ku vonakala kun’wana lokukulu ka ntiyiso ku vonakile emhakeni ya ku yimba. Mukhuva wa ku yimba wu sungule hi 1919 B.C.E. hi ntwanano wa Yehovha na Abrahama. Kutani Xikwembu xi lerise Abrahama leswaku yena ni va xinuna hinkwavo lava nga emutini wa yena va yimbisiwa. (Genesa 17:9-14, 23-27) Hikwalaho ku yimba ku ve mfungho lowu a wu hlawula vatukulu va Abrahama. Naswona a va tinyungubyisa swinene hi mukhuva lowu! Hikwalaho, “l’a nga yimbangiki” a a tekeriwa ehansi. (Esaya 52:1; 1 Samuwele 17:26, 27) Swa olova ku vona xivangelo lexi a xi endla Vakreste van’wana va Vayuda va lava ku hlayisa mukhuva lowu. Van’wana va vona va burisane swinene na Pawulo na Barnaba hi mhaka leyi. Leswaku va yi lulamisa, Pawulo ni van’wana va ye eYerusalema leswaku va ya vonana ni huvo leyi fumaka ya Vakreste.—Mintirho 15:1, 2.

9. I miseve yihi ya ku vonakala leyi paluxeriweke huvo leyi fumaka yo sungula, hi laha swi rhekhodiweke ha kona eka Mintirho ndzima 15?

⁹ Emhakeni leyi, a ku nga ri ku tirha ka mahlori lama nga tolovelekangiki loku endleke Vakreste volavo vo sungula leswaku va kuma rivoningo ra leswaku ku yimba a ku nga ha ri mhaka leyi bohaka eka malandza ya Yehovha. Ematshan’weni ya sweswo, va kume ku vonakala koloko loku engetelekeke hi ku kambisisa Matsalwa, va titshega hi moya lowo kwetsima leswaku wu va kongomisa, ni ku twa mintokoto ya Petro na Pawulo malunghana ni ku hundzuka ka Vamatiko lava nga yimbangiki. (Mintirho 15:6-21) Xiboho xi endliwile epapileni leri hlayekaka hi ndlela leyi: “Hikuva Moya lowo Kwetsima swin’we na hina, hi vonile leswaku a hi nga mi rhwexi ndzhwalo wun’wana, loko wu nga ri wa timfanelo leti: Hileswaku mi tshika tinyama leti tlhaveriweke swikwembu swa hava, mi nga dyi ngati ni leswi vanhu va swi dlayeke hi ku swi tlimba minkolo, mi tshika ni vuoswi.” (Mintirho 15:28, 29) Xisweswo Vakreste vo sungula a va ntshunxiwile eka nawu wo yimba ni le ka swileriso swin’wana swa Nawu wa Muxe. Hikwalaho, Pawulo u kote ku byela Vakreste va le Galatiya a ku: “Hi ntshunxiwile hileswi Kriste a hi ntshunxeke.”—Vagalatiya 5:1.

Rivoningo Eka Tievhangeli

10. Hi yihi miseve yin’wana ya ku vonakala leyi paluxiweke eka Evhangeli ya Matewu?

¹⁰ A swi kanakanisi leswaku Evhangeli ya Matewu, leyi tsariweke kwalomu ka 41 C.E., yi ni miseve yo tala ya ku vonakala leyi pfunaka vahlayi va yona. Hi xiringaniso a hi vangani Vakreste vo sungula lava tweke Yesu hi byakwe loko a hlamusela tidyondzo takwe. Xa nkoka ngopfu, Evhangeli ya Matewu yi kandziyise leswaku nhloko-mhaka ya ku chumayela ka Yesu a ku ri Mfumo. Naswona vona ndlela leyi Yesu a kandziyiseke swinene nkoka wa ku va ni nsusumeto lowunene ha yona! Kunene a ku ri miseve ya ku vonakala leyi a yi ri eDyondzweni ya yena ya le Ntshaveni, eswifanisweni swakwe (swo tanihi leswi rhekhodiweke eka ndzima 13), ni le ka vuprofeta byakwe lebyikulu eka tindzima 24 na 25! Leswi hinkwaswo swi tivisiwe Vakreste vo sungula emhakeni ya Evhangeli ya Matewu, malembe ya nhungu endzhaku ka Pentekosta ya 33 C.E.

11. Ku nga vuriwa yini malunghana ni mpimo wa rungula ra Tievhangeli ta Luka na Marka?

¹¹ Endzhakunyana ka malembe ya kwalomu ka 15, Luka u tsale Evhangeli yakwe. Hambi leswi timhaka ta yona to tala ti fanaka ni ta Matewu, rungula ra yona ri engeteleke hi 59 wa tiphesente. Luka u tsale tsevu wa mahlori ya Yesu ni swifaniso swa yena swo tlula khume-mbirhi leswi nga boxiwiki hi vatsari lavan’wana va Tievhangeli. Handle ko kanakana malembe ma nga ri mangani endzhakunyana, Marka u tsale Evhangeli yakwe, a hlamusela Yesu Kreste tanihi munhu wo gingirika, muendli wa mahlori. Hambi leswi Marka a runguleke swiendlakalo swo tala leswi tsariweke hi Matewu na Luka, u rhekhode xifaniso xin’we lexi vona va nga xi vikangiki. Exifanisweni xolexo, Yesu u fanise Mfumo wa Xikwembu tanihi mbewu leyi milaka, leyi kulaka yi leha ivi yi tswala mihandzu hakatsongo-tsongo.a—Marka 4:26-29.

12. Xana Evhangeli ya Yohane yi nyikela ku voningeriwa loku engetelekeke ku fikela kwihi?

¹² Kutani a ku ri na Evhangeli ya Yohane, leyi tsariweke ku tlula malembe ya 30 endzhaku ka loko Marka a tsale ya yena. Mawaku ku vonakala lokukulu loku Yohane a ku kombiseke hi vutirheli bya Yesu, ngopfu-ngopfu hi ku nyikela tinhlamuselo to tala ta vukona bya Yena a nga si va munhu! I Yohane ntsena loyi a nyikelaka mhaka ya ku pfuxiwa ka Lazaro, naswona hi yena ntsena loyi a hi nyikaka swo tala swa leswi Yesu a swi vuleke eka vaapostola vakwe vo tshembeka kun’we ni xikhongelo lexi kufumetaka mbilu evusikwini bya ku xengiwa ka yena, hi laha swi rhekhodiweke ha kona eka tindzima 13 ku ya eka 17. Entiyisweni, ku vuriwe leswaku 92 wa tiphesente ta Evhangeli ya Yohane ti hlawulekile.

Miseve Ya Ku Vonakala eMapapileni Ya Pawulo

13. Ha yini van’wana va vone onge papila ra Pawulo leri yaka eka Varhoma i Evhangeli?

¹³ Muapostola Pawulo u tirhisiwe hi ku hlawuleka eku yiseni ka ku vonakala ka ntiyiso eka Vakreste lava a va hanya eminkarhini ya vaapostola. Hi xikombiso ku ni papila ra Pawulo leri a ri ya eka Varhoma, leri tsariweke kwalomu ka 56 C.E.—ku lava ku va nkarhi lowu fanaka ni lowu Luka a tsaleke Evhangeli ya yena ha wona. Epapileni leri Pawulo u kandziyise ntiyiso wa leswaku vululami byi va kona hikwalaho ka tintswalo leti nga fanelangiki ta Xikwembu ni ripfumelo eka Yesu Kreste. Ku kandziyisa ka Pawulo tlhelo leri ra mahungu lamanene, ku endle leswaku van’wana va languta papila ra yena leri a ri ya eka Varhoma tanihi Evhangeli ya vuntlhanu.

14-16. (a) Epapileni rakwe ro sungula leri yaka eka Vakreste va le Korinto, i ku vonakala kwihi loku Pawulo a ku humeseke malunghana ni xilaveko xa vun’we? (b) Hi kwihi ku vonakala kun’wana malunghana ni mahanyelo loku Vakorinto vo Sungula yi nga na kona?

¹⁴ Pawulo u tsale hi timhaka to karhi leti a ti karhata Vakreste va le Korinto. Papila rakwe leri a ri ya eka Vakorinto ri katsa tindzayo to tala leti huhuteriweke leti pfuneke Vakreste ku fikela esikwini ra hina. Xo sungula, a a fanele a kombisa Vakorinto xihoxo lexi a va xi endla xo gandzela vanhu vo karhi. Muapostola u va tshinyile, hi xivindzi a va byela a ku: “Ndza mi khongotela vamakwerhu, hi vito ra Hosi ya hina Yesu Kriste, ndzi ri: Twananani hinkwenu eku vulavuleni. Ku nga tshuki ku va ni ku avana exikarhi ka n’wina, kambe mi hlangana mi va van’we eku anakanyeni ne makungwini ya n’wina.”—1 Vakorinto 1:10-15.

¹⁵ Mahanyelo yo biha a ma amukeriwa evandlheni ra Vukreste eKorinto. Wanuna a a teke nsati wa tata wakwe, xisweswo a endla ‘vuoswi lebyi nga endliwiki hambi ku ri hi vanhu va matiko.’ Hi ku kongoma, Pawulo u tsarile: “Hlongolani lowo biha exikarhi ka n’wina.” (1 Vakorinto 5:1, 11-13) Wolowo a ku ri nchumu lowuntshwa evandlheni ra Vukreste—ku susa. Mhaka yin’wana leyi vandlha ra le Korinto a ri lava ku voningeriwa eka yona a ku ri leswi swirho swin’wana swa rona a swi yisa vamakwavo va moya etihubyeni ta misava leswaku va ya tenga milandzu. Pawulo u va tshinye hi matimba hikwalaho ko endla sweswo.—1 Vakorinto 6:5-8.

¹⁶ Nakambe mhaka yin’wana leyi hlaseleke vandlha ra le Korinto a yi fambelana ni vuxaka bya rimbewu. Eka 1 Vakorinto ndzima 7, Pawulo u kombise leswaku hikwalaho ka ku andza ka ku tikhoma loko biha hi tlhelo ra rimbewu, swi ta va swinene leswaku wanuna un’wana ni un’wana a va ni nsati wa yena n’wini ni wansati un’wana ni un’wana a va ni nuna wa yena n’wini. Nakambe Pawulo u kombise leswaku hambi leswi vanhu lava titshameleke voxe va kotaka ku tirhela Yehovha handle ko kavanyetiwa, a hi hinkwavo lava nga ni nyiko ya ku titshamela voxe. Naswona loko wansati a feriwa hi nuna wa yena, a ta ntshunxeka ku tlhela a tekiwa, kambe ‘eHosini ntsena.’—1 Vakorinto 7:39.

17. I ku vonakala kwihi loku Pawulo a ku humeseke emhakeni ya dyondzo ya ku pfuxiwa ka vafi?

¹⁷ Mawaku miseve ya ku vonakala malunghana ni ku pfuxiwa ka vafi leyi Hosi yi tirhiseke Pawulo ku yi paluxa! Xana Vakreste lava totiweke va ta pfuxiwa va ri ni miri wa njhani? “Wu lahliwa wu ri miri wa ntumbuluko, wu pfuxiwa wu ri miri wa moya,” ku tsale Pawulo. Ku hava mimiri ya nyama leyi nga ta tekeriwa etilweni, hikuva “nyama ni ngati swi nga ka swi nga dyi ndzhaka ya Mfumo wa Xikwembu.” Pawulo u tlhandlekele hi ku vula leswaku a hi vatotiwa hinkwavo lava nga ta rindza esirheni, kambe hi nkarhi wa vukona bya yena van’wana va ta pfuxeriwa evuton’wini lebyi nga riki na ku fa xikan’we-kan’we endzhaku ka ku fa ka vona.—1 Vakorinto 15:43-53.

18. I ku vonakala kwihi malunghana ni vumundzuku loku papila ro sungula ra Pawulo eka Vatesalonika a ri ri na kona?

¹⁸ Epapileni ra yena leri yaka eka Vakreste va le Tesalonika, Pawulo u tirhisiwe ku humesa ku vonakala malunghana ni nkarhi lowu wa ha taka. Siku ra Yehovha ri ta ta tanihi khamba ra ni vusiku. Pawulo u tlhele a hlamusela: “Siku vanhu va nga ta ku: ‘Ku rhulile, ku hava xo karhata’, hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana; va nga ka va nga poni.”—1 Vatesalonika 5:2, 3.

19, 20. I miseve yihi ya ku vonakala leyi Vakreste va le Yerusalema ni le Yudiya va yi kumeke epapileni ra Pawulo leri yaka eka Vaheveru?

¹⁹ Hi ku tsalela Vaheveru papila, Pawulo u rhumele miseve ya ku vonakala eka Vakreste vo sungula va le Yerusalema ni le Yudiya. Vona ndlela leyi hi matimba a kombiseke ku tlakuka ka fambiselo ra vugandzeri bya Vakreste eka fambiselo ra vugandzeri bya Muxe! Ematshan’weni yo landzela Nawu lowu rhumeriweke hi tintsumi, Vakreste va ni ripfumelo eka ku kutsuriwa loku huweleriweke ro sungula hi N’wana wa Xikwembu, loyi a tlakukeke swinene ku tlula varhumiwa volavo va tintsumi. (Vaheveru 2:2-4) Muxe a a ri murindzi ntsena endlwini ya Xikwembu. Hambi swi ri tano, Yesu Kreste u ungamela yindlu hinkwayo. Kreste i muprista lonkulu hi mukhuva wa Melkisedeke, u ni xikhundla lexi tlakukeke eka vuprista bya Aroni. Pawulo u tlhele a kombisa leswaku Vaisrayele va tsandzekile ku nghena eku wiseni ka Xikwembu hikwalaho ka ku pfumala ka vona ripfumelo ni ku yingisa, kambe Vakreste va nghena hikwalaho ka vutshembeki ni ku yingisa ka vona.—Vaheveru 3:1–4:11.

²⁰ Nakambe, ntwanano lowuntshwa wu tlakukile swinene eka ntwanano wa Nawu. Hi laha swi profetiweke ha kona ka ha sale malambe ya 600, eka Yeremiya 31:31-34, lava nga eka ntwanano lowuntshwa va ni nawu wa Xikwembu lowu tsariweke etimbilwini ta vona naswona va tsakela ku rivaleriwa ka ntiyiso ka swidyoho. Ematshan’weni yo va ni muprista lonkulu loyi a faneleke ku endla magandzelo lembe na lembe ya swidyoho swa yena ni swa vanhu van’wana, Vakreste va na Yesu Kreste tanihi Muprista wa vona Lonkulu, loyi a nga riki na xidyoho ni loyi a nyikeleke gandzelo ra swidyoho kan’we eka hinkwavo. Ematshan’weni ya ku nghena evukwetsimiselweni lebyi endliweke hi mavoko leswaku a nyikela gandzelo rakwe, u nghene etilweni hi roxe, laha a humeleleke emahlweni ka Yehovha hi byakwe. Tlhandla-kambirhi, magandzelo ya swiharhi ehansi ka ntwanano wa Nawu wa Muxe a ma swi heriselanga makumu swidyoho, phela a ma nga ta humesiwa lembe na lembe. Kambe gandzelo ra Kreste, leri nyikeriweke kan’we swa nkarhi hinkwawo, ra swi susa swidyoho. Leswi hinkwaswo swi humesa ku vonakala ka tempele leyikulu ya moya, eswivaveni leswi masalela lama totiweke ni “tinyimpfu tin’wana” ma tirhaka eka swona namuntlha.—Yohane 10:16; Vaheveru 9:24-28.

21. Xana bulo leri ri kombisa yini malunghana ni ku hetiseka ka Pisalema 97:11 na Swivuriso 4:18 eminkarhini ya vaapostola?

²¹ A ku na ndhawu leyi ringaneleke leswaku hi nga nyikela swikombiso leswi engetelekeke, swo tanihi miseve ya ku vonakala leyi kumekaka emapapileni ya muapostola Petro ni lawaya ya mudyondzisiwa Yakobo na Yuda. Kambe leswi se swi boxiweke swi ta va swi enerile ku kombisa leswaku Pisalema 97:11 na Swivuriso 4:18 ti hetiseke hi ndlela leyikulu eminkarhini ya vaapostola. Ntiyiso wu engetelekile ku ya emahlweni ku sukela eka swivumbeko ni swifanekiselo wu ya wu hetiseka na hi xiviri.—Vagalatiya 3:23-25; 4:21-26.

22. Ku humelele yini endzhaku ka rifu ra vaapostola, naswona xihloko lexi landzelaka xi ta kombisa yini?

²² Endzhaku ka rifu ra vaapostola va Yesu ni ku sungula ka vugwinehi lebyi vhumbhiweke, rivoningo ra ntiyiso a ri nga ha pfurhi ngopfu. (2 Vatesalonika 2:1-11) Hambi swi ri tano, hi ku ya hi xitshembiso xa Yesu, endzhaku ka malembe-xidzana yo tala N’wini u vuyile naswona u kume “nandza la tshembekaka, wo tlhariha” a ri karhi a nyika “malandza” swakudya swa wona hi nkarhi wa kona. Hikwalaho, Yesu Kreste u hlawule nandza leswaku a langutela “rifuwo hinkwaro ra yena.” (Matewu 24:45-47) Xana i miseve yihi ya ku vonakala leyi landzeleke? Leswi ku ta buriwa ha swona exihlokweni lexi landzelaka.

[Nhlamuselo ya le hansi]

Wa Tsundzuka Xana?

◻ I tindzimana tihi ta Bibele leti kombisaka leswaku ku twisisa ntiyiso i nchumu lowu yaka emahlweni?

◻ Xana i miseve yihi ya ku vonakala leyi rhekhodiweke ebukwini ya Mintirho?

◻ I ku vonakala kwihi loku kumekaka eka Tievhangeli?

◻ Mapapila ya Pawulo ma ni miseve yihi ya ku vonakala?