Vukwele Byi Lave Ku Onha Vutomi Bya Mina

VUKWELE byi sungule ku ndzi hlasela swinene loko ndzi tekane ni nuna wa mina wa vumbirhi, Mark.a Havumbirhi bya hina, a hi boheka ku khathalela vana va hina vo tala swin’we ni ku hanyisana ni khale ka vanghana va hina va vukati. Xiyimo nkarhi wun’wana a xi tika swinene. Loko ku ri ni mholovo endyangwini, a swi vonaka onge Mark a nga yimi na mina. Ndzi sungule ku ehleketa leswaku wa ha rhandza khale ka nsati wakwe. Ematshan’weni yo lawula mavondzo ya mina, ndzi ma pfumelele leswaku ma lawula vutomi bya mina. A ndzi titwa ndzi nga sirhelelekanga loko khale ka nsati wa Mark a ri kona.

A ndzi xiyaxiya Mark hi minkarhi hinkwayo, hambi ku ri ku languta ni mahlo ya yena ku vona laha a languteke kona. Emahlweni yakwe a ndzi vona swilo leswi ni ku swi anakanya a a nga swi anakanyi. Minkarhi yin’wana a ndzi n’wi hehla, ndzi vula leswaku wa ha rhandzana ni khale ka nsati wakwe. Siku rin’wana a karhatiwe swinene hi leswi lerova a suka a famba a siya nhlengeletano ya Vukreste. Ndzi titwe ndzi ri ni nandzu emahlweni ka Yehovha. Ndzi endle vutomi bya ndyangu byi nga ha tsakisi hikuva eku heteleleni ni vana va khumbekile. A ndzi tivenga hikwalaho ka leswi a ndzi swi endla, kambe ku nga khathariseki leswaku ndzi ringetisa ku yini, a ndzi tsandzeka ku lawula mavondzo ya mina.

Ematshan’weni yo ndzi pfuna, Mark u sungule ku tlherisela. Loko ndzi n’wi lumbeta, a a ndzi haxa hi marito lawa, “Vukwele, u ni vukwele.” A tlhela a ringeta ku ndzi endla leswaku ndzi va ni vukwele. Kumbexana a a ehleketa leswaku leswi swi ta herisa vukwele bya mina, kambe swi endle swilo swi biha swinene. U sungule ku languta vavasati van’wana, a phofula ndlela leyi va sasekeke ha yona. Leswi swi ndzi endle ndzi titwa ndzi nga ri nchumu naswona tanihi loyi a nga laviwiki. Swi fike laha ntlhaveko wun’wana—rivengo—wu sunguleke ku hluka. Hi nkarhi wolowo a ndzi hlundzuke lerova a ndzi nga ha lavi ku n’wi vona yena ni vaka vona.

Loko Bibele yi vula leswaku “[vukwele, NW] i ku bola ka marambu,” yi tiyisile hakunene. (Swivuriso 14:30) Rihanyo ra mina na rona ri sungule ku khumbeka. Ndzi ve ni swilondza swa le marhumbyini leswi tekeke nkarhi wo leha ku hola. Ndzi ye mahlweni ndzi onha vutomi bya mina hi ku xopaxopa xin’wana ni xin’wana lexi Mark a xi endlaka. A ndzi secha swikhwama swakwe, naswona loko ndzo kuma nomboro ya riqingho, a ndzi ba riqingho leri, ku vona leswaku i mani a nga ta hlamula. Endzeni-ndzeni a ndzi tisola swinene, a ndzi rila hikwalaho ka leswi ndzi swi endlaka emahlweni ka Yehovha. Kambe a ndzi nga swi koti ku swi tshika. A ndzi ri nala wa mina n’wini.

Vumoya bya mina byi khumbekile ndzi nga ha swi koti ni ku khongela. A ndzi n’wi rhandza Yehovha naswona a ndzi swi lava swinene ku endla leswi lulameke. A ndzi ma tiva hinkwawo matsalwa lama vulavulaka hi vavanuna ni vavasati, kambe a ndzi nga swi koti ku ma tirhisa. A ku ri ro sungula evuton’wini bya mina, ndzi titwa ndzi nga ha swi lavi ku hanya, ku nga khathariseki mhaka ya leswaku a ndzi ri ni vana lavanene.

Vakulu va le vandlheni ra Vukreste a va ri xikhutazo lexikulu naswona va ringete hi matimba ya vona hinkwawo ku ndzi pfuna. Kambe loko va vula leswaku ndzi ni vukwele, a ndzi ala hi ku chava ku khomiwa hi tingana, a ndzi nga swi lavi ku pfumela leswaku ndzi na xona xiphiqo xo tano.

Hi ku famba ka nkarhi, a ndzi vabya lerova ndzi boheka ku ya exibedlhele ndzi ya handzuriwa. Loko ndzi ri kwalaho ndzi vone leswaku swilo swi fanele swi cinca. Mina na Mark hi kunguhate ku hambana ku ringana tin’hweti tinharhu, leswaku hi kambisisa xiyimo xa hina un’wana ni un’wana a ri yexe. Hi nkarhi wolowo ku humelele nchumu wun’wana wo hlamarisa. Eka magazini wa Xalamuka! ku humelele xihloko lexi nge “Mpfuno Eka Vana Va Swindzendzele Lava Kuleke.”b

Phela, mana wa mina a a ri xindzendzele. Hambi leswi a ndzi nga xanisiwi emirini, vatswari va mina a va si tshama va kombisa leswaku va rhandzana kumbe leswaku va ndzi rhandza. A ndzi tsundzuki manana a ndzi khoma a ndzi vukarha kumbe ku ndzi byela leswaku wa ndzi rhandza. Xisweswo ndzi kule ndzi nga yi tivi ndlela yo kombisa rirhandzu kumbe ku rhandziwa.

Manana a a hamba a ndzi byela hi swigangu swa tatana ni leswaku a nga n’wi tshembi. Xisweswo ndzi anakanya leswaku ndzi kule ndzi nga va tshembi vavanuna. Hikwalaho ka ndlela leyi ndzi kurisiweke ha yona, minkarhi hinkwayo a ndzi tivona ndzi nga ri nchumu eka van’wana, ngopfu-ngopfu eka vavasati van’wana. Ku hlaya ka mina xihloko xa Xalamuka! yoleyo, ku ndzi pfune leswaku ndzi twisisa vuyelo bya swilo leswi. A ku ri ro sungula ndzi twisisa xivangelo-nkulu xa xiphiqo xa mina xa vukwele.

Ndzi teke xihloko lexi xa Xalamuka! ndzi xi komba nuna wa mina, Mark, xi pfune na yena leswaku a ndzi twisisa ku antswa. Ku nga ri khale mina na yena hi swi kotile ku landzelela xitsundzuxo xa Bibele eka mimpatswa leyi kunguhataka ku hambana. Hi vuyelelanile. (1 Vakorinto 7:10, 11) Sweswi vukati bya hina bya antswa swinene ku tlula nkarhi lowu hundzeke. Hi endla swilo swo tala swin’we, ngopfu-ngopfu mintirho ya Vukreste. Mark se u ni ntwela-vusiwana swinene. Se u ndzi byela ko tala leswaku wa ndzi rhandza, sweswi se ndza swi tshemba.

Loko ndzi tiva leswaku hi ta vonana ni khale ka nsati wa Mark, ndzi khongela eka Yehovha leswaku a ndzi nyika matimba, ndzi n’wi kombela leswaku a ndzi pfuna ndzi tikhoma tanihi Mukreste la wupfeke. Swa tirha hakunene. Hambi ku ri rivengo ra mina eka yena ra hela. A ndza ha ehleketi hi swilo swo biha kumbe ku pfumelela mianakanyo ya mina yi nga lawuleki.

Ndzi va na yona mintlhaveko ya vukwele byo biha nkarhi wun’wana. I vutomi lebyi hetisekeke emisaveni leyintshwa ya Xikwembu lebyi nga ta yi susa hi ku helela. Sweswi, se ndzi dyondzile ku lawula vukwele bya mina, ematshan’weni yo byi pfumelela byi ndzi lawula. Ina, vukwele byi lave ku onha vutomi bya mina, kambe ndzi nkhensa Yehovha ni nhlengeletano yakwe, sweswi ndzi munhu la tsakeke ku tlula khale, naswona rihanyo ra mina ri tlhelele exiyin’weni lexinene. Nakambe, se ndzi ni vuxaka lebyi tiyeke ni Xikwembu xa mina, Yehovha.—Xi nyikeriwile.

[Tinhlamuselo ta le hansi]