Va Kume Ku Rhula eMisaveni Leyi Nga Ni Madzolonga

XIFANISO lexi nga laha xifunengetweni xa magazini lowu xi kombisa xivono xa nyimpi leyikulu ya le Bosnia na Herzegovina. Xana ku nga va ni ku rhula endhawini yo tano? Lexi hlamarisaka, nhlamulo i ina. Hambi leswi vaaki va Marhoma Khatoliki, Maorthodox ya le Vuxeni ni Mamoslem endhawini yoleyo leyi nga enhlomulweni va lwelaka tiko, vanhu vo tala va navela ku rhula, naswona van’wana va ku kumile.

Va ka Djorem a va ake eSarajevo, naswona a va ri Timbhoni ta Yehovha. Hambi leswi a ku ri ni madzolonga yo tala edorobeni rero, hi ntolovelo a va endzela vaakelani va vona leswaku va ya avelana na vona mahungu lamanene ya Mfumo wa Xikwembu. (Matewu 24:14) Hikwalaho ka yini? Hikuva ndyangu wa ka Djorem a wu swi tiva leswaku Mfumo lowu i wa xiviri, ni leswaku ana se wu simekiwile ematilweni, ni leswaku i ntshembo lowunene ni lowu tiyeke wa vanhu wa ku rhula. Timbhoni ta Yehovha ti ni ntshembo lowu heleleke eka leswi muapostola Pawulo a swi vuleke “Mahungu Lamanene ya ku rhula.” (Vaefesa 2:17) Hikwalaho ka vanhu vo tanihi Bozo na Hena Djorem, vo tala va kuma ku rhula eBosnia ni le Herzegovina.

Ku Rhula Ka Xiviri Loku Taka

Ku ni swo tala swo swi vula hi va ka Djorem. Hambi swi ri tano, xo sungula, a hi vulavuleni hi mpatswa wun’wana lowu kumeke ntshembo malunghana ni Mfumo wa Xikwembu. Mavito ya vona i Artur na Arina. Vona ni swijahatana swa vona a va tshama eriphabliki ra le ndhawini leyi a yi ri khale ka Soviet Union. Loko ku tlhekeke nyimpi ya xin’wana-manana, Artur u lwile a ri karhi a yima na tlhelo rin’wana. Hambi swi ri tano, hi ku hatlisa u tivutisile, ‘Hikwalaho ka yini ndzi lwa ni vanhu lava eku sunguleni a va ri va ka hina?’ U rhurhile etikweni rero naswona, endzhaku ko nonon’hweriwa swinene, yena ni ndyangu wakwe lowutsongo va ye eEstonia.

Loko a endzele eSt. Petersburg, Artur u hlangane ni Timbhoni ta Yehovha naswona u tsakisiwe hi leswi a swi dyondzeke malunghana ni Mfumo wa Xikwembu. Ku rhandza ka Yehovha hi leswaku ku nga ri khale Mfumo wa Xikwembu wu ta va wona ntsena lowu nga ta va wu lawula vanhu. (Daniyele 2:44) Kutani misava yi ta va ndhawu yo rhula, a ku nga he vi na tinyimpi ta xin’wana-manana kumbe mpfilu-mpfilu wa misava hinkwayo. Esaya u profetile malunghana ni nkarhi wolowo a ku: “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.”—Esaya 11:9.

Loko a vona xifaniso xa vumundzuku byebyo bya misava ya ku rhula eka xipfuneto xo dyondza Bibele lexi Mbhoni yi n’wi kombeke xona, Artur u vule leswaku u tshame a tshama endhawini leyi fanaka ni leyi kombisiweke. Hambi swi ri tano, sweswi yi onhiwile hi nyimpi ya xin’wana-manana. Leswi va tlheleleke le Estonia, Artur ni ndyangu wakwe va karhi va dyondza swo tala malunghana ni Mfumo wa Xikwembu hi ku tirhisa dyondzo ya Bibele ni Timbhoni ta Yehovha.

Ku Rhula Exikarhi Ka Madzolonga

Pisalema 37:37 yi ri: “Šiya l’a tengeke, u languta l’a lulameke; hikuv̌a munhu wa ku rula o ni v̌atukulu.” Entiyisweni, ku rhula ka la tengeke ni ka la lulameke emahlweni ka Xikwembu a hi ka nkarhi lowu taka ntsena. U na kona hambi ku ri sweswi. Xana sweswo swi kotekisa ku yini? Xiya ntokoto wa wanuna loyi a vuriwaka Paul.

Paul u tshama ekampeni ya vabaleki leyi nga le kule edzonga-vupela-dyambu bya Etiyopiya, hambi leswi entiyisweni a humaka etikweni ra le kusuhi. Etikweni ra rikwavo, u hlangane na un’wana wa Timbhoni ta Yehovha loyi a tirha eka khampani ya tioyili, kutani wanuna loyi u n’wi nyike xipfuneto xo dyondza Bibele, ku nga buku leyi nge Ntiyiso Lowu Yisaka eVuton’wini Lebyi Nga Heriki.a Paul a nga ha tlhelanga a hlangana na yona Mbhoni leyi, kambe u hlaye buku leyi hi vukhetha. Nyimpi ya xin’wana-manana yi endle leswaku a balekela ekampeni ya vabaleki le Etiyopiya, naswona u fike kona a vulavula ni van’wana hi leswi a swi dyondzeke. Ntlawa lowutsongo wu swi amukerile leswaku i ntiyiso. Hi ku landza leswi va swi dyondzeke, hi ku hatlisa va sungule ku chumayela van’wana ekampeni.

Paul u tsalele yindlu-nkulu ya Sosayiti ya Watch Tower a kombela mpfuno. Mutirheli loyi a rhumeriweke a suka eAddis Ababa u hlamarisiwe hi ku kuma vanhu va 35 va n’wi rindzerile, va tilulamisele ku dyondza swo tala malunghana ni Mfumo wa Xikwembu. Ku endliwe malunghiselo ya leswaku va pfuniwa nkarhi na nkarhi.

Swi nga vurisiwa ku yini leswaku vanhu vo kota Paul va kume ku rhula? Va hanya vutomi byo tika, kambe va ni ripfumelo eka Xikwembu. Loko va karhatiwa hi misava leyi nga ni madzolonga, va tirhisa ndzayo ya Bibele leyi nge: “Mi nga vileli ha nchumu; kambe etimhakeni hinkwato, khongelani, mi tivisa Xikwembu leswi mi swi pfumalaka, mi kombela mi ri karhi mi nkhensa.” Hikwalaho ka sweswo, va va ni ku eneriseka loku pfumalekaka namuntlha. Marito lawa muapostola Pawulo a ma tsaleleke vandlha ra le Filipiya ma tirha eka vona: “Ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.” Kunene, va byi vona vuxaka lebyikulu lebyi va nga na byona na Yehovha, “Xikwembu xa ku rhula.”—Vafilipiya 4:6, 7, 9.

Ku Rhula Loku Nga Kona Sweswi

Hosi leyi vekiweke ya Mfumo wa Xikwembu i Yesu Kreste, loyi eBibeleni a vuriwaka “Hosi ya ku rula.” (Esaya 9:6) Ha yona muprofeta wa khale u te: “O ta v̌ula ku rula e ka matiko, o ta fuma ku sukela e lwandle riṅwana e ku yisa e lwandle riṅwana, ni ku suka nambyeni e ku yisa makumu ya misav̌a.” (Zakariya 9:10) Marito yo tano lama huhuteriweke ma ve ni nkucetelo lowukulu evuton’wini bya wanuna la vuriwaka José.

Enkarhini wun’wana José a a ri ekhotsweni. A a ri therorisi naswona u khomiwe loko a ri karhi a tilulamisela ku ya hlasela komponi ya maphorisa. A anakanya leswaku i madzolonga ntsena lawa a ma ta sindzisa mfumo ku antswisa swiyimo swa tiko ra ka vona. Loko a ri ekhotsweni, Timbhoni ta Yehovha ti sungule ku dyondza Bibele ni nsati wakwe.

Endzhaku ka loko José a ntshunxiwile, na yena u sungule ku dyondza Bibele, kutani marito lama landzelaka ya Pisalema 85:8 ma sungule ku tirha eka yena: “Nḍi ta yingisa le’ŝi v̌uriwaka i Yehova Šikwembu; hikuv̌a o v̌ula ku rula ka tiko ra yena, ni ka v̌ahlawuriwa v̌a yena.” Hambi swi ri tano, ndzimana yoleyo yi gimeta hi xitsundzuxo lexi nge: “Kambe v̌a nga ṭhuki v̌a ha v̌uyela e ku hungukeni ka v̌ona.” Kutani, munhu loyi a lavaka ku rhula ka Yehovha a nge tilawuli kumbe ku xandzukela ku rhandza ka Yena.

Namuntlha, José ni nsati wakwe i vatirheli va Vakreste. Va kongomisa van’wana eMfun’weni wa Yehovha tanihi wona lowu nga ta tlhantlha swiphiqo leswi José eku sunguleni a ringeteke ku swi tlhantlha hi ku tirhisa tibomo to endliwa ekaya. Va tiyimisele ku tshemba Bibele, leyi nge: “Yehova o ta nyika nkateko wa yena.” (Pisalema 85:12) Entiyisweni, José wa ha ku endzela komponi leyi a kunguhate ku yi hlasela. Hikwalaho ka yini? Leswaku a ta ya burisana ni mindyangu ya kona malunghana ni Mfumo wa Xikwembu.

Vanhu Lava Nga Ni Ku Rhula

Eka Pisalema 37:10, 11, (BML) Bibele yi ri: “Ku nga ri khale, lavo homboloka va ta nyamalala, u ta va lava endhawini ya vona, kambe u nge va kumi. Kambe lava titsongahataka va ta kuma tiko ra vona, va ta dya mihandzu ya rona leyo tala va tiphina.” Mayana ku langutela loko vangama swonghasi!

Hambi swi ri tano, xiya leswaku ku rhula ka Yehovha i ka “lava titsongahataka.” Lava lavaka ku rhula va fanele va dyondza ku va lavo rhula. Leswi swi ve tano hi Keith, loyi a tshamaka eNew Zealand. Keith u hlamuseriwe tanihi loyi a a nga “ngheneki, a a rhandza madzolonga ni timholovo.” A a ri xirho xa ntlawa wa tinsula-voya naswona a tshama ekaya leri biyeriweke leri nga ni mintanga leyi rindziwaka hi timbyana tinharhu leswaku a sivela makhamba. Nsati wakwe, loyi a nga mana wa vana va tsevu, u n’wi tharile.

Loko Keith a hlangana ni Timbhoni ta Yehovha, mahungu lamanene ma ve ni nkucetelo lowukulu eka yena. Hi ku hatlisa yena ni vana vakwe a va ya eminhlanganweni ya Timbhoni. U tsemete misisi yakwe leyo leha kutani a sungula ku burisana ni khale ka vanghana va yena malunghana ni Mfumo wa Xikwembu. Van’wana va vona va sungule ku dyondza Bibele.

Ku fana ni timiliyoni ta vanhu va timbilu letinene emisaveni hinkwayo namuntlha, Keith u sungule ku tirhisa marito ya muapostola Petro lama nge: “Loyi a navelaka ku hanya vutomi lebyi tsakisaka, ni ku vona masiku lamanene, . . . a a tshike leswo homboloka a endla swo lulama; a a lave ku rhula a tiyisela endleleni ya kona.” (1 Petro 3:10, 11) Khale ka nsati wa Keith u amukele mhaka ya leswaku va tlhela va tekana, naswona sweswi Keith u dyondze ku “lav[a] ku rhula a tiyisela endleleni ya kona.”

Ku rhula ka Yehovha ku ponise vutomi bya vanhu vo tala, kun’we na mutlangi un’wana loyi a velekiweke endhawini ya khale ka U.S.S.R. Wanuna loyi u wine timendlele eka mintlangu ya Tiolimpiki, kambe u pfilunganyekile ivi a tlhelela eka swidzidzirisi ni xihoko. Endzhaku ko heta 19 wa malembe kun’we ni malembe manharhu lama nga rivalekiki lawa a gweviwe wona ekampeni ya ntirho le Siberia, u teke riendzo ro ya eCanada a khandziye byatso a nyenga hi byona, naswona endzhaku ka loko a pone ku fa makhamba mambirhi hikwalaho ka mukhuva wa yena wo tirhisa swidzidzirisi, u khongele eka Xikwembu leswaku xi n’wi pfuna ku kuma xikongomelo xa xiviri evuton’wini. Hi ku va ni dyondzo ya Bibele ni Timbhoni ta Yehovha leti vulavulaka Xirhaxiya swi n’wi pfune ku kuma tinhlamulo ta swivutiso swakwe. Namuntlha wanuna loyi, ku fana ni timiliyoni letin’wana, u kume ku rhula ni Xikwembu ni le ka yena n’wini.

Ntshembo Wa Ku Pfuxiwa

Xo hetelela, a hi tlheleleni eka Bozo na Hena va ka Djorem le Sarajevo. Mpatswa lowu a wu ri na n’wana wa nhwanyana wa malembe ya ntlhanu hi vukhale, Magdalena. Hi July n’wexemu, hi vunharhu bya vona a va ri karhi va suka ekaya nakambe va ya entirhweni wa vona wo chumayela loko va dlayiwa hi ku buluka ka bomo. Ku vuriwa yini hi ku rhula loku va chumayeleke vanhu ha kona? Xana ku dlayiwa ka vona hi bomo swi kombisa leswaku leswi a va swi chumayela a hi ku rhula ka ntiyiso ke?

Nikatsongo! Emafambiselweni lawa ya swilo, ku va ni mahlomulo. Vanhu va dlawa hi tibomo kumbe hi swibuluki. Van’wana va dlaya hi vuvabyi kumbe hi timhangu. Vo tala va dlaya hi vudyuhari. Hambi ku ri lava tsakelaka ku rhula ka Xikwembu va khumbeka na vona, kambe ku endleka ka swilo leswi a swi va siyi va ri hava ntshembo.

Yesu u tshembise munghana wakwe Marta a ku: “Hi mina ku pfuka ni vutomi; la pfumelaka ka mina, hambi a nga fa, ú ta hanya.” (Yohane 11:25) Va ka Djorem a va ri ni ntshembo wolowo, ku fana ni Timbhoni ta Yehovha hinkwato. Naswona va ka Djorem a va ri ni ripfumelo ra leswaku loko vo tshuka va file, va ta pfuxeriwa emisaveni leyi nga ta va yi ri ndhawu ya ku rhula ka xiviri. Yehovha Xikwembu u “ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:4.

Emahlweninyana ka rifu rakwe, Yesu u byele valandzeri vakwe a ku: “Ndzi mi nyika ku rhula ka mina. . . . Timbilu ta n’wina ti nga karhateki.” (Yohane 14:27) Hi tsaka ni va ka Djorem lava a va ri ni ku rhula koloko naswona lava hi xiviri va nga ta ku tsakela hi xitalo eku pfuxiweni ka vafi. Hi tsaka ni hinkwavo lava gandzelaka Yehovha, Xikwembu xa ku rhula. Vanhu vo tano va ni ku rhula ka mianakanyo. Va tsakela ku rhula ni Xikwembu. Va hlakulela ku rhula ni van’wana. Naswona va ni ntshembo wa vumundzuku lebyi nga ni ku rhula. Ina, va kume ku rhula, hambi leswi va hanyaka emisaveni leyi nga ni madzolonga. Kunene, hinkwavo lava gandzelaka Xikwembu hi moya ni ntiyiso va tsakela ku rhula. Onge na wena u nga kuma ku rhula ko tano.

[Nhlamuselo ya le hansi]

[Swifaniso leswi nga eka tluka 7]

Va kume ku rhula hambi leswi va hanyaka emisaveni leyi nga ni madzolonga