Wa Tsundzuka Xana?

Xana minkandziyiso ya sweswinyana ya Xihondzo xo Rindza a yi ri ya risima eka wena? Hikwalaho, tikambele hi swivutiso leswi landzelaka ku vona loko wa ha tsundzuka:

◻ Hi Yihi Dyondzo Leyi Hi Nga Yi Dyondzaka Hi Ku Wa Ka Vaamoni? (Sofoniya 2:9, 10)

Yehovha a nga ku honisi ku tlheriseriwa ka musa wa yena hi tihanyi. Naswona hi nkarhi wa yena lowu faneleke, u ta teka goza nakambe, hi laha a endleke ha kona eminkarhini ya khale. (Ringanisa Pisalema 2:6-12.)—12/15, tluka 10.

◻ Hi Tihi Tindlela Timbirhi Letikulu Leti Vakreste Va Nga Ni Ku Rhula Ha Tona?

Yo sungula, va ni “ku rhula ni Xikwembu, hi Hosi ya [vona] Yesu Kreste.” (Varhoma 5:1) Ya vumbirhi, va ni ku rhula exikarhi ka vona vini hi ku hlakulela “vutlhari byo ta hi le henhla,” lebyi nga ni “ku rhula ni ku olova.” (Yakobo 3:17)—1/1, tluka 11.

◻ Xana Hi Swihi Swilo Swin’Wana Leswi Rito Ra Xikwembu Ri Fanisiwaka Na Swona, Naswona Swilo Leswi Swi Hi Pfuna Njhani Hina?

Rito ra Xikwembu ri fanisiwa ni ntswamba lowu wundlaka, swakudya leswi tiyeke, mati lama timulaka ni lama basisaka, xivoni ni tlhari ro kariha. Ku twisisa leswi marito lawa ma vulaka swona swi nga pfuna mutirheli leswaku a tirhisa Bibele hi vutshila.—1/1, tluka 29.

◻ Xana Dyondzo Leyi Ringaniseriweke Ya Misava Yi Fanele Yi Hi Pfuna Ku Endla Yini?

Yi nga hi pfuna leswaku hi hlaya kahle, hi tsala khwatsi, hi kula emianakanyweni ni le mahanyelweni ni ku kuma vuleteri lebyinene lebyi lavekaka evuton’wini bya siku na siku ni ku endla vutirheli byo kwetsima hi ndlela leyi humelelaka.—2/1, tluka 10.

◻ Hi Yihi Dyondzo Ya Ntikelo Leyi Hi Nga Yi Dyondzaka Eka Yesu Malunghana Ni Dyondzo?

A hi fanelanga hi tirhisa dyondzo leswaku hi tidzunisa, kambe leswaku hi dzunisa Mudyondzisi lonkulu, Yehovha Xikwembu. (Yohane 7:18)—2/1, tluka 10.

◻ Xana Mfumo Wa Xikwembu I Yini?

Mfumo lowu hi woxe i hulumendhe ya le tilweni leyi simekiweke hi Xikwembu leyi nga ta tisa ku rhandza ka Xikwembu ni ku herisa vuyelo bya xidyoho ni rifu ivi yi kondletela swiyimo swo lulama emisaveni. (Daniyele 2:44; Nhlavutelo 11:15; 12:10)—2/1, tluka 16.

◻ Xana Bibele Yi Yi Nyikela Njhani Dyondzo Leyi Lavekaka Yo Herisa Madzolonga Hi Ku Helela?

Hi ku tirhisa Rito ra yena, ku nga Bibele, Yehovha u dyondzisa vanhu leswaku va rhandza ku rhula ni ku lulama. (Esaya 48:17, 18) Rito ra Xikwembu ri ni matimba yo fikelela ni ku khumba mbilu ya munhu, ri cinca mianakanyo ni hanyelo ra yena. (Vaheveru 4:12)—2/15, tluka 6.

◻ Ha Yini Ku Nga Vuriwaka Leswaku Vuprofeta Bya Esaya Ndzima 35 Byi Ta Fanela Ku Hetiseka Kanharhu?

Vuprofeta bya Esaya byi hetiseke ro sungula loko Vayuda va vuye evuhlongeni bya Babilona hi 537 B.C.E. Namuntlha byi ni ku hetiseka loku yaka emahlweni hi tlhelo ra moya ku sukela loko Israyele wa moya a ntshunxiwile evuhlongeni bya Babilona Lonkulu. Byi ta tlhela byi va ni ku hetiseka ka vunharhu loku fambisanaka ni xitshembiso xa Bibele xa paradeyisi ya xiviri emisaveni. (Pisalema 37:10, 11; Nhlavutelo 21:4, 5)—2/15, tluka 17.

◻ Xana Ku Rhandza Ka Xikwembu Vanhu Ku Kombisiwe Njhani Hi Masingita Lama Endliweke Hi N’Wana Wa Xona, Yesu?

Tanihi leswi Yesu “a a nga tisunguleli a endla xilo hi yexe; [a] endla ntsena lexi a xi voneke xi endliwa hi Tata wa yena,” ntwela-vusiwana wa yena wu kombise ku khumbeka ka Yehovha hi un’wana ni un’wana wa malandza ya yena. (Yohane 5:19)—3/1, tluka 5.

◻ Xana Xiga Xa Yesu Lexi Nge “Sirha-Bakwa Ra Ntsundzuko” Lexi Tirhisiweke Eka Yohane 5:28, 29, (NW) Xi Vula Yini?

Rito ra Xigriki leri nge mne·mei’on (sirha-bakwa ra ntsundzuko), leri tirhisiweke laha ri vula leswaku Yehovha u tsundzuka rhekhodo ya munhu la feke, ku katsa swivumbeko ni vutivi bya yena hinkwabyo. Lebyi i vumbhoni lebyi tiyeke bya leswaku Xikwembu xa khathala hi vanhu ha un’we-un’we!—3/1, tluka 6.

◻ Hi Rihi Rungula Leri Nga Xitsundzuxo Eka Vuprofeta Bya Sofoniya Leri Nga Mpfuno Swinene Eka Hina?

Namuntlha a hi fanelanga hi pfumelela ku kanakana ku mila timitsu etimbilwini ta hina ni ku susa siku ra Yehovha leri taka emianakanyweni ya hina. Nakambe, hi fanele hi tivonela eka vuyelo lebyi tsanisaka bya ku honisa. (Sofoniya 1:12, 13; 3:8)—3/1, tluka 17.

◻ Ha Yini Vutshembeki Eka Xikwembu Byi Tisa Ntlhontlho?

Hikuva vutshembeki byi lwisana ni mimboyamelo ya vutianakanyi leyi hi yi tekeleleke eka vatswari va hina. (Genesa 8:21; Varhoma 7:19) Ku tlula kwalaho, Sathana ni madimona ya yena va tiyimisele ku hi endla hi cukumeta vutshembeki bya hina eka Xikwembu. (Vaefesa 6:12; 1 Petro 5:8)—3/15, tluka 10.

◻ Hi Le Tindhawini Tihi Ta Mune Leti Eka Tona Hi Faneleke Hi Langutana Ni Ntlhontlho Wo Hlayisa Vutshembeki, Naswona I Yini Lexi Nga Hi Pfunaka Leswaku Hi Endla Tano?

Tindhawu leti ta mune, i vutshembiki eka Yehovha, eka nhlengeletano ya yena, eka vandlha ni le ka vanghana va hina va vukati. Mpfuno wun’wana wo langutana ni mintlhontlho leyi i ku twisisa leswaku ntlhontlho lowu wa vutshembeki wu fambisana ni ku lweriwa ka vuhosi bya Yehovha.—3/15, tluka 20.

◻ Hi Yihi Dyondzo Leyi Hi Nga Yi Dyondzaka Emhakeni Ya Davhida Loko A Ringete Ku Tlherisa Areka Ya Ntwanano Le Yerusalema? (2 Samuwele 6:2-7)

Davhida u honise swiletelo swa Yehovha mayelana ni marhwalele ya Areka, naswona leswi swi vange khombo. Laha hi dyondzaka leswaku a hi fanelanga hi sola Yehovha hikwalaho ka swiphiqo leswi hi welaka eka swona loko hi honisa swiletelo leswi nga erivaleni. (Swivuriso 19:3)—4/1, tluka 28, 29.