Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Kutani, vona loko u ta swi kota ku hlamula swivutiso leswi landzelaka:

◻ Xana Marito Ya Yesu, Lama Nge “Loko Mi Rivalela Vanhu Swidyoho Swa Vona, Va Ta Rivaleriwa Hakunene,” Ma Vula Leswaku Vakreste Va Nga Rivalela Swidyoho? (Yohane 20:23)

Ku hava xisekelo xa Matsalwa xo gimeta hi ku vula leswaku Vakreste hinkwavo, kumbe hambi ku ri vakulu lava hlawuriweke emavandlheni, va ni matimba lama humaka eka Xikwembu yo rivalela swidyoho. Mongo wa marito ya Yesu wu vonaka wu kombisa leswaku vaapostola a va nyikiwe mfanelo yo hlawuleka hi ku tirha ka moya lowo kwetsima yo rivalela swidyoho kumbe ku nga swi rivaleli. (Vona Mintirho 5:1-11; 2 Vakorinto 12:12.)—4/15, tluka 28.

◻ I Yini Lexi Xiyekaka Malunghana Ni Vuhundzuluxeri Bya J. J. Stewart Perowne Bya Buku Ya Tipisalema, Leyi Kandziyisiweke Ro Sungula Hi 1864?

Eka vuhundzuluxeri byakwe Perowne u ringete ku namarhela “swinene xivumbeko xa Xiheveru eka swivulavulelo ni le ka matsalelo ya swivulwa.” Hi ku endla tano a a rhandza leswaku ku sirheleriwa vito ra Xikwembu hi xivumbeko xa “Yehovha.”—4/15, tluka 31.

◻ I Nkongomiso Wihi Lowu Yesu A Wu Nyikeke Valandzeri Vakwe Mayelana Ni Ndlela Yo Tirhisana Ni Tihulumendhe Ta Misava Leyi?

Yesu u te: “Nyikani Khezari leswi nga swa Khezari, ni Xikwembu leswi nga swa Xikwembu.” (Matewu 22:21) U tlhele a ku: “Loko munhu a ku sindzisa ku famba mpfhuka wun’we, famba na yena mimpfhuka mimbirhi.” (Matewu 5:41) Laha Yesu a kombisa nsinya wa nawu wo tiveka ehansi hi ku tirhandzela, eka swilaveko leswi twalaka, hambi i swa ntirhisano ni vanhu kumbe swilaveko swa hulumendhe leswi twananaka ni nawu wa Xikwembu. (Luka 6:27-31; Yohane 17:14, 15)—5/1, tluka 12.

◻ Xana Ku ‘Famba Entiyisweni’ Swi Vula Yini? (Pisalema 86:11)

Leswi swi katsa ku tshama eka swilaveko swa Xikwembu ni ku xi tirhela hi ku tshembeka ni hi mbilu hinkwayo. (Pisalema 25:4, 5; Yohane 4:23, 24)—5/15, tluka 18.

◻ I Yini Leswi Hetisisiweke Hi Ku Va Yehovha A Rhumele Yonasi ENinivha?

Eku heteleleni, ntirho wa Yonasi wo chumayela eNinivha wu kombise ku hambana exikarhi ka vanhu va Ninivha lava hundzukeke ni Vaisrayele va tinhamu to nonon’hwa, lava a va pfumala ripfumelo ni ku titsongahata hi ndlela leyi vavisaka. (Ringanisa Deteronoma 9:6, 13; Yonasi 3:4-10.)—5/15, tluka 28.

◻ Xana Nyoka Ni “Wansati” Loyi Ku Vulavuriwaka Ha Yena Eka Genesa 3:15 I Mani?

Nyoka a hi yona leyi tolovelekeke kambe hi loyi a yi tirhiseke, ku nga Sathana Diyavulosi. (Nhlavutelo 12:9) “Wansati” a hi Evha kambe i nhlengeletano ya Yehovha ya le tilweni, mana wa malandza ya yena ya laha misaveni lama totiweke hi moya. (Vagalatiya 4:26)—6/1, tluka 9.

◻ Xana Munhu A Nga Huma EBabilona Lonkulu Ni Ku Kuma Vutumbelo Hi Ndlela Yihi? (Nhlavutelo 18:4)

Munhu u fanele a tihambanisa hilaha ku heleleke ni tinhlengeletano ta vukhongeri bya mavunwa ni mindhavuko ni malangutelo lawa ti ma tswalaka, naswona u fanele ku kuma vutumbelo enhlengeletanweni ya Yehovha ya le tilweni. (Vaefesa 5:7-11)—6/1, tluka 18.

◻ Ha Yini Gama Ri Boxiwa Ko Tala EMatsalweni?

Vatsari va Bibele va kombetela eka swihlawulekisi swa gama leswi fanekiselaka swilo swo tanihi vutlhari, nsirhelelo wa Xikwembu ni rivilo.—6/15, tluka 8.

◻ Xana Malandza Ya Xikwembu Ya Namuntlha Lama Nga Ni Ntshembo Wa Laha Misaveni Ma Ni Moya Wa Xikwembu Hi Mpimo Lowu Fanaka Ni Wa Vakreste Lava Totiweke Hi Moya?

Kahle-kahle, nhlamulo i ina. Moya wa Xikwembu wa kumeka hi mpimo lowu ringanaka eka mintlawa hinkwayo, naswona vutivi ni ku twisisa byi kumiwa hi hinkwavo.—6/15, tluka 31.

◻ Ha Yini Swi Hi Vuyerisa Namuntlha Ku Kambisisa Ntirho Wo Kwetsima Lowu Endliweke Hi Vaprista Va Vaisrayele Etempeleni Ya Le Yerusalema?

Loko hi endla tano hi kota ku tlangela lunghiselelo ra tintswalo hi xitalo laha eka rona vanhu lava nga ni xidyoho namuntlha va rivaleriwaka hi Xikwembu. (Vaheveru 10:1-7)—7/1, tluka 8.

◻ Xana Tempele Ya Vumbirhi Leyi Akiweke EYerusalema Yi Kuma Ku Dzuneka Lokukulu Ku Tlula Leyi Akiweke Hi Solomoni Hi Ndlela Yihi?

Tempele ya vumbirhi yi tshame malembe ya 164 ku tlula tempele ya Solomoni. Vagandzeri vo tala lava humaka ematikweni yo tala va khitikanele eswivaveni swa yona. Xa nkoka ngopfu, tempele leyi ya vumbirhi a yi hambanile swinene hikuva N’wana wa Xikwembu, Yesu Kreste, u dyondzise eswivaveni swa yona.—7/1, matluka 12, 13.

◻ Hi Rini Laha Xikwembu Xi Simekeke Tempele Ya Xona Ya Moya?

A ku ri hi 29 C.E. loko Xikwembu xi kombise ku amukela xikhongelo xa Yesu loko a khuvuriwa. (Matewu 3:16, 17) Ku amukela ka Xikwembu miri lowu Yesu a wu nyikeleke swi vula leswaku, hi ndlela ya moya, altari leyikulu ku tlula leyi a yi ri etempeleni ya Yerusalema yi sungule ku tirha.—7/1, matluka 14, 15.

◻ Ha Yini Hi Fanele Hi Rivalela?

Ku rivalela mudyohi la tisolaka i swa nkoka loko hi lava ku hlayisa vun’we bya Vukreste. Ku hlayisa rivengo ni xikhomela swi ta hi tekela ku rhula ka mianakanyo. Loko hi nga rivaleli, hi tinghenisa ekhombyeni ra leswaku siku rin’wana Yehovha a nge hi rivaleli swidyoho swa hina. (Matewu 6:14, 15)—7/15, tluka 18.

◻ Xana Vaisrayele Va Nga Va Lava Kwetsimaka Hi Mukhuva Wihi?

Ku kwetsima a ku koteka ntsena loko va va ni vuxaka lebyikulu na Yehovha, Xikwembu lexo kwetsima, ni hi ku n’wi gandzela hi mukhuva lowu tengeke. A va lava vutivi lebyi kongomeke bya “La Kwetsimaka Swinene” leswaku va n’wi gandzela hi ndlela leyi kwetsimaka, va basile emirini ni le moyeni. (Swivuriso 2:1-6; 9:10, NW)—8/1, tluka 11.