Swivutiso Swa Vahlayi

Yesu u te: “Loko mi rivalela vanhu swidyoho swa vona, va ta rivaleriwa hakunene; loko mi nga rivaleli vanhu swidyoho swa vona, a va nga rivaleriwi.” Xana marito lawa ma vula leswaku Vakreste va nga rivalela swidyoho?

Ku hava xisekelo xa Matsalwa xo gimeta hi ku vula leswaku Vakreste hinkwavo, kumbe hambi ku ri vakulu lava hlawuriweke emavandlheni, va ni matimba lama humaka eka Xikwembu yo rivalela swidyoho. Kambe, leswi Yesu a swi byeleke vadyondzisiwa va yena eka Yohane 20:23, leyi tshahiweke laha henhla, swi kombisa leswaku Xikwembu xi nyike vaapostola matimba yo hlawuleka emhakeni leyi. Naswona marito ya Yesu kwalaho ma nga ha hlamusela leswi fanaka ni leswi a swi vuleke eka Matewu 18:18 malunghana ni swiboho swa le tilweni.

Vakreste va nga rivalela milandzu yo karhi, hi ku pfumelelana ni xitsundzuxo xa muapostola Pawulo lexi rhekhodiweke eka Vaefesa 4:32 leyi nge: “Twelanani vusiwana mi tsetselelana, mi rivalelana, tanihi leswi Xikwembu na xona xi mi rivaleleke eka Kriste.” Laha Pawulo a vulavula hi swiphiqo swa munhu hi xiyexe leswi humelelaka exikarhi ka Vakreste, swo tanihi ku tsandzeka ku hlawula marito loko u vulavula. Va fanele va tikarhatela ku lulamisa timhaka leti, va rivalelana. Tsundzuka marito ya Yesu lama nge: “Hikwalaho, loko u humesa mhamba ya wena alitarini, kutani u tsundzuka kwalaho leswaku makwenu u ni mhaka na wena, siya mhamba ya wena kwala alitarini, kutani u rhanga u ya rivalelana ni makwenu; hi kona u nga ta ta, u ta humesa mhamba ya wena.”—Matewu 5:23, 24; 1 Petro 4:8.

Hambiswiritano, mongo wa Yohane 20:23 wu ringanyeta leswaku Yesu a vulavula hi swidyoho leswikulu, hilaha swi kombisiweke ha kona hi leswi a swi vuleke eka vayingiseri vakwe volavo hi ku kongoma. A hi voneni xivangelo xa kona.

Esikwini leri a pfuxiweke ha rona, Yesu u humelele eka vadyondzisiwa vakwe endlwini leyi pfariweke eYerusalema. Mhaka yi ri: “Yesu a engeta a ku ka vona: ‘Ku rhula a ku ve na n’wina! Tanihi leswi Tatana a ndzi rhumeke, na mina ndza mi rhuma.’ Loko a vurise sweswo, a va huhutela, a ku: ‘Amukelani Moya lowo Kwetsima. Loko mi rivalela vanhu swidyoho swa vona, va ta rivaleriwa hakunene; loko mi nga rivaleli vanhu swidyoho swa vona, a va nga rivaleriwi.’”—Yohane 20:21-23.

A swi kanakanisi leswaku vadyondzisiwa lava boxiweke laha a ku ri vaapostola lavakulu lavo tshembeka. (Ringanisa ndzimana 24.) Hi ku va huhutela a ku, “Amukelani Moya lowo Kwetsima,” hi ku fanekisela Yesu a va lemukisa leswaku ku nga ri khale moya lowo kwetsima a wu ta chululeriwa ehenhla ka vona. Yesu u ye emahlweni a vula leswaku a va ta va ni matimba ya ku rivalela swidyoho. Hikwalaho ka xivangelo xexo, tinhlamuselo takwe timbirhi ta hlangana, yin’wana yi kongomisa eka leyi landzelaka.

Endzhaku ka masiku ya 50 a pfuxiwile, hi siku ra Pentekosta, Yesu u va chululele moya lowo kwetsima. Xana wu endle yini? Xin’wana xa kona hi leswaku, lava amukeleke moya va tswariwe ra vumbirhi tanihi vana va Xikwembu va moya ni ntshembo wo va vafumi-kulobye na Kreste etilweni. (Yohane 3:3-5; Varhoma 8:15-17; 2 Vakorinto 1:22) Kambe ku chuluriwa koloko ka moya ku endle swo tala. Van’wana lava wu amukeleke va kume matimba yo endla masingita. Hi ndlela yoleyo van’wana va vulavule tindzimi timbe leti a va nga ti tivi. Van’wana va profetile. Kambe van’wana va horise vavabyi kumbe ku pfuxa vafi.—1 Vakorinto 12:4-11.

Tanihileswi marito ya Yesu eka Yohane 20:22 ma kombetelaka eka ku chuluriwa loku ka moya lowo kwetsima eka vadyondzisiwa, marito yakwe lama fambisanaka ni lawa ya malunghana ni ku rivalela swidyoho ma languteka ma vula leswaku vaapostola a va nyikiwe mfanelo yo hlawuleka hi Xikwembu hi ku tirha ka moya lowo kwetsima yo rivalela swidyoho kumbe ku nga swi rivaleli.—Vona The Watchtower, March 1, 1949, tluka 78.

Bibele a yi hi nyiki vuxokoxoko hinkwabyo bya nkarhi wun’wana ni wun’wana lowu vaapostola va tirhiseke matimba wolawo ha wona, naswona a yi rhekhodanga mhaka yin’wana ni yin’wana ya laha va tirhiseke nyiko ya mahlori ya ku vulavula hi tindzimi, ku profeta, kumbe ku horisa mavabyi.—2 Vakorinto 12:12; Vagalatiya 3:5; Vaheveru 2:4.

Mhaka yin’wana leyi katsaka matimba ya vaapostola ya ku rivalela kumbe ku nga rivaleli swidyoho i ya Ananiya na Safira, lava hembeleke moya. Petro, la tweke Yesu a vula marito lawa hi ma hlayaka eka Yohane 20:22, 23, u paluxe Ananiya na Safira. Petro u sungule a vulavula na Ananiya, ivi a fela kwalaho. Loko ku nghena Safira endzhakunyana ivi na yena a vula mavunwa, Petro u n’wi avanyisile. Petro a nga n’wi rivalelanga swidyoho swa yena kambe u te: “Yingisa, swigingi swa lava nga ya lahla nuna wa wena hi leswi enyangweni; na wena va ta ku rhwala va huma na wena.” Na yena a fela kwalaho.—Mintirho 5:1-11.

Emhakeni leyi muapostola Petro u tirhise mfanelo yo hlawuleka yo rivalela swidyoho hi ku kongoma, ku nga singita leri kombisaka leswaku Xikwembu a xi nge swi rivaleli swidyoho swa Ananiya na Safira. Nakambe swi vonaka onge vaapostola a va ri ni matimba yo tlula ya munhu yo twisisa swilo etimhakeni leti eka tona a va tiyiseka leswaku swidyoho swi rivaleriwile exisekelweni xa gandzelo ra Kreste. Hikwalaho vaapostola volavo lava nyikiweke matimba hi moya a va ta rivalela swidyoho kumbe va nga swi rivaleli.a

Leswi a swi vuli swona leswaku vakulu hinkwavo lava totiweke hi moya va le nkarhini wolowo a va ri ni matimba wolawo ya masingita. Hi nga vona sweswo eka leswi muapostola Pawulo a swi vuleke malunghana ni wanuna la susiweke evandlheni ra le Korinto. Pawulo a nga vulanga swona leswaku, ‘Ndzi rivalela munhu loyi swidyoho swa yena’ kumbe ‘Ndza swi tiva leswaku munhu loyi u rivaleriwe swidyoho swakwe etilweni, hikwalaho n’wi amukeleni.’ Ematshan’weni ya sweswo, Pawulo u khongotele vandlha hinkwaro leswaku ri rivalela Mukreste la tlheriseriweke naswona ri n’wi rhandza. Pawulo u engeterile: “Munhu un’wana ni un’wana loyi mi n’wi rivalelaka, ndza n’wi rivalela na mina.”—2 Vakorinto 2:5-11.

Loko munhu loyi a tlheriseriwe evandlheni, Vakreste hinkwavo va xinuna ni va xisati a va fanele ku n’wi rivalela hi mongo wa leswaku va nga n’wi khomi hi timbilu eka leswi a nga swi endla. Kambe, xo sungula, a a fanele ku hundzuka ivi a tlheriseriwa. Xana sweswo a swi ta humelela hi ndlela yihi?

Ku ni swidyoho leswikulu leswi vakulu va vandlha va faneleke ku swi tamela, swo tanihi ku yiva, ku hemba kumbe ku tikhoma loko biha. Va ringeta ku tshinya ni ku laya vadyohi vo tano, va va yisa eku hundzukeni. Kambe loko munhu a endla xidyoho lexikulu ha vomu, vakulu lava va tirhisa nkongomiso wa Xikwembu wo susa mudyohi. (1 Vakorinto 5:1-5, 11-13) Leswi Yesu a swi vuleke eka Yohane 20:23 a swi tirhi eka milandzu yo tano. Vakulu lava a va na tona tinyiko ta moya to endla masingita, to tanihi vuswikoti byo horisa lava vabyaka emirini kumbe ku pfuxa vafi; tinyiko to tano ti hetisise xikongomelo xa tona eka lembe-xidzana ro sungula naswona ti hele enkarhini wolowo. (1 Vakorinto 13:8-10) Ku tlula kwalaho, namuntlha vakulu a va na wona matimba lama humaka eka Xikwembu yo rivalela swidyoho leswikulu hi ku vula leswaku mudyohi la dyoheke swinene u basisiwile emahlweni ya Yehovha. Muxaka lowu wa ku rivalela wu fanele wu va exisekelweni xa gandzelo ra nkutsulo, naswona i Yehovha ntsena loyi a nga rivalelaka exisekelweni xolexo.—Pisalema 32:5; Matewu 6:9, 12; 1 Yohane 1:9.

Tanihi le mhakeni ya munhu wa le Korinto wa khale, loko munhu la endleke xidyoho lexikulu a ala ku hundzuka, u fanele ku susiwa. Loko endzhaku a hundzuka naswona a kombisa mintirho leyi kombisaka ku hundzuka, swa koteka leswaku Xikwembu xi n’wi rivalela. (Mintirho 26:20) Exiyin’weni xo tano, Matsalwa ma nyika vakulu xivangelo xo pfumela leswaku hakunene Yehovha u rivalele mudyohi. Kutani loko munhu a tlheriseriwile, vakulu va nga n’wi pfuna hi tlhelo ra moya leswaku a tiya eripfumelweni. Van’wana evandlheni va nga rivalela hi ndlela leyi Vakreste va le Korinto va rivaleleke munhu la susiweke ha yona loyi a tlheriseriweke enkarhini wolowo.

Loko va kanela timhaka hi ndlela leyi, vakulu a va tiendleli mimpimanyeto ya vona vini ya ku avanyisa. Va tirhisa misinya ya milawu ya Bibele ni ku landzela maendlelo ya Matsalwa lama Yehovha a ma vekeke. Hikwalaho, ku rivalela kumbe ku nga rivaleli ka vakulu ku ta va ku kongomisiwa hi marito ya Yesu eka Matewu 18:18 leyi nge: “Ndzi tiyisile ndzi ri ka n’wina, hinkwaswo leswi mi nga ta swi alela la misaveni, swi ta aleriwa ni le tilweni; ni hinkwaswo leswi mi nga ta swi pfumelela la misaveni, swi ta pfumeleriwa ni le tilweni.” Swiendlo swa vona swi ta va swi kombisa langutelo ra Yehovha ra timhaka hilaha ri hlamuseriweke ha kona eBibeleni.

Xisweswo, leswi Yesu a swi vuleke, hilaha swi rhekhodiweke ha kona eka Yohane 20:23, a swi lwisani ni Matsalwa laman’wana hinkwawo, kambe swi kombisa leswaku vaapostola a va ri ni mfanelo leyi hlawulekeke malunghana ni ku rivalela, hi ku pfumelelana ni xikhundla xa vona eku sunguleni ka vandlha ra Vukreste.

[Nhlamuselo ya le hansi]