Ku Avelana Nchavelelo Lowu Yehovha A Wu Nyikaka
“Ku tshemba ka hina ehenhla ka n’wina ku tiyile swinene, hikuva hi tiva leswaku, leswi mi averiwaka mahlomulo man’we na hina, mi ta averiwa na kona ku chaveleriwa loku hi nga na kona.”—2 VAKORINTO 1:7.
1, 2. Xana i yini leswi vo tala lava veke Vakreste namuntlha va langutaneke na swona?
VAHLAYI vo tala va sweswinyana va Xihondzo xo Rindza va kule va nga ri na vutivi bya ntiyiso wa Xikwembu. Kumbexana swi tano ni le ka wena. Loko swi ri tano, tsundzuka ndlela leyi u titweke ha yona loko mahlo ya wena ya ku twisisa ma sungule ku pfuleka. Hi xikombiso, loko ro sungula u twe leswaku vafi a va le ku xanisekeni ku ri na sweswo a va twi nchumu, xana a wu nga chavelelekanga? Naswona loko u dyondze hi ntshembo wa vafi, leswaku magidi ya timiliyoni ma ta pfuxeriwa evuton’wini emisaveni leyintshwa ya Xikwembu, xana a wu nga chavelelekanga?—Eklesiasta 9:5, 10; Yohane 5:28, 29.
2 Ku vuriwa yini hi xitshembiso xa Xikwembu xa ku herisa vubihi ni ku cinca misava leyi yi va paradeyisi? Loko u dyondze leswi, xana a swi ku chavelelanga ni ku ku endla u swi langutela hi mahlo-ngati? Xana u titwe njhani loko u dyondza ro sungula hi ntshembo wo ka u nga fi kambe u ponela emisaveni yoleyo leyi taka ya Paradeyisi? A swi kanakanisi leswaku a wu nyanyukile. Ina, u amukele rungula ra Xikwembu leri chavelelaka leri sweswi ri chumayeriwaka emisaveni hinkwayo hi Timbhoni ta Yehovha.—Pisalema 37:9-11, 29; Yohane 11:26; Nhlavutelo 21:3-5.
3. Ha yini lava avelanaka rungula ra Xikwembu leri chavelelaka eka van’wana na vona va xaniseka?
3 Hambiswiritano, loko u ringete ku byela van’wana rungula ra Bibele, u tlhele u swi xiya leswaku “a hi hinkwavo lava nga ni ku pfumela.” (2 Vatesalonika 3:2) Kumbexana van’wana va khale ka vanghana va wena a va ku hlekula hikwalaho ko phofula ripfumelo ra wena eswitshembisweni swa Bibele. Swi nga ha endleka u xanisiwile hikwalaho ko hambeta u dyondza Bibele swin’we ni Timbhoni ta Yehovha. Nkaneto wu nga ha va wu kurile loko u sungula ku endla mindzulamiso leswaku vutomi bya wena byi pfumelelana ni misinya ya milawu ya Bibele. U sungule ku langutana ni nhlomulo lowu Sathana ni misava yakwe va wu tiselaka hinkwavo lava amukelaka nchavelelo wa Xikwembu.
4. Hi tihi tindlela to hambana-hambana leti vanhu lavantshwa lava tsakelaka va nga ha angulaka ha tona loko va langutane ni nhlomulo?
4 Lexi vavisaka, hilaha Yesu a vhumbheke hakona, nhlomulo wu vangela van’wana leswaku va wa ni ku tshika ku hlanganyela ka vona ni vandlha ra Vukreste. (Matewu 13:5, 6, 20, 21) Van’wana va tiyisela nhlomulo hi ku endla leswaku mianakanyo ya vona yi tshama eka switshembiso leswi chavelelaka leswi va swi dyondzaka. Eku heteleleni va nyiketela vutomi bya vona eka Yehovha kutani va khuvuriwa tanihi vadyondzisiwa va N’wana wa yena, Yesu Kreste. (Matewu 28:19, 20; Marka 8:34) Kavula, nhlomulo a wu heli loko Mukreste a khuvuriwa. Hi xikombiso, ku tenga swi nga ha nonon’hwa eka munhu loyi a a tikhome hi ndlela yo biha. Van’wana va boheka ku lwisana ni nkaneto wa nkarhi na nkarhi wa swirho swa ndyangu leswi nga riki vapfumeri. Ku nga khathariseki nhlomulo lowu vaka kona, hinkwavo lava hanyaka vutomi bya ku tinyiketela eka Xikwembu hi ku tshembeka va nga tiyiseka hi nchumu wun’we. Hakunene, va ta kuma nchavelelo ni mpfuno wa Xikwembu.
“Xikwembu Lexi Ku Chavelela Hinkwako Ku Humaka Eka Xona”
5. Loko a ri karhi a langutane ni miringo yo tala, i yini leswi Pawulo a tlheleke a swi kuma?
5 Munhu un’wana loyi a tlangeleke swinene nchavelelo lowu Xikwembu xi wu nyikaka i muapostola Pawulo. Endzhaku ka nkarhi wo karhi wa ndzingo eAsiya na le Makedoniya, u titwe a ntshunxeke swinene loko a twe leswaku vandlha ra le Korinto ri angule kahle eka papila rakwe ra ndzayo. Leswi swi n’wi susumetele ku va tsalela papila ra vumbirhi, leri nga ni marito lama landzelaka ya ku dzunisa: “A ku vongiwe Xikwembu Tata wa Hosi ya hina Yesu Kriste, Tatana wa tintswalo, Xikwembu lexi ku chavelela hinkwako ku humaka eka xona; xa hi chavelela emaxangwini hinkwawo ya hina.”—2 Vakorinto 1:3, 4.
6. Hi dyondza yini eka marito ya Pawulo lama kumekaka eka 2 Vakorinto 1:3, 4?
6 Marito lawa lama huhuteriweke ma vula swo tala. A hi ma kambisiseni. Loko Pawulo a phofula swidzuniso kumbe ku nkhensa eka Xikwembu kumbe a kombela eka xona eka mapapila yakwe, hakanyingi hi kuma leswaku u tlhela a katsa ni ku kombisa ku tlangela swinene Yesu, Nhloko ya vandlha ra Vukreste. (Varhoma 1:8; 7:25; Vaefesa 1:3; Vaheveru 13:20, 21) Hikwalaho, Pawulo u kongomisa marito ya yena ya ku dzunisa eka “Xikwembu Tata wa Hosi ya hina Yesu Kriste.” (Xiitaliki i xerhu.) Kutani, ro sungula eka matsalwa yakwe, u tirhisa riviti ra Xigriki leri hundzuluxeriweke va ku “tintswalo.” Riviti leri ri huma eka rito leri tirhiseriwaka ku twela munhu la nga maxangwini vusiwana. Xisweswo Pawulo u hlamusela ntwela-vusiwana wa Xikwembu eka munhu wihi na wihi wa malandza ya xona lama tshembekaka lama vonaka maxangu—ntwela-vusiwana lowu susumetelaka Xikwembu ku ma kombisa tintswalo. Eku heteleleni, Pawulo a a titshege hi Yehovha tanihi xihlovo xa mfanelo leyi leyi rhandzekaka hi ku n’wi vitana “Tatana wa tintswalo.”—Xiitaliki i xerhu.
7. Ha yini ku nga vuriwaka leswaku Yehovha i “Xikwembu lexi ku chavelela hinkwako ku humaka eka xona”?
7 “Tintswalo” ta Xikwembu ti susela loyi a xanisekaka nhlomulo. Hikwalaho, Pawulo u ya emahlweni a hlamusela Yehovha a ri “Xikwembu lexi ku chavelela hinkwako ku humaka eka xona.” Xisweswo, nchavelelo wihi na wihi lowu hi nga ha wu kumaka eka tintswalo ta vapfumeri-kulorhi, hi nga ha languta eka Yehovha tanihi xihlovo xa wona. Ku hava nchavelelo wa xiviri, lowu khomelelaka lowu nga humiki eka Xikwembu. Ku tlula kwalaho, hi xona xi nga vumba munhu hi xifaniso xa xona, xisweswo xi hi endla hi swi kota ku va vachaveleri. Naswona i moya lowo kwetsima wa Xikwembu lowu susumetelaka malandza ya xona ku kombisa nsovo eka lava lavaka nchavelelo.
Ku Leteriwa Ku Va Vachaveleri
8. Hambileswi Xikwembu xi nga riki xona xihlovo xa miringo leyi hi langutanaka na yona, xana hi nga vuyeriwa hi yini loko hi tiyiselela maxangu?
8 Hambileswi Yehovha Xikwembu a pfumelelaka miringo yo hambana-hambana leyi welaka malandza yakwe yo tshembeka, a hi yena la vangaka miringo yo tano. (Yakobo 1:13) Hambiswiritano, nchavelelo lowu a wu nyikelaka loko hi tiyiselela nhlomulo wo karhi, wu nga hi letela leswaku hi xalamukela swilaveko swa van’wana. Vuyelo byi va byihi? “Hikokwalaho, na hina hi kota ku chavelela lava nge maxangwini ya tinxaka-xaka, hi va chavelela hi ku chavelela loku na hina hi nyikiweke kona hi Xikwembu.” (2 Vakorinto 1:4) Xisweswo Yehovha u hi letela leswaku hi hoxa xandla hilaha ku humelelaka eku chaveleleni ka vapfumeri-kulorhi ni lava hi hlanganaka na vona evutirhelini bya hina loko hi ri karhi hi tekelela Kreste kutani hi “tšhav̌elela hikwav̌o la’v̌a v̌av̌isekaka.”—Esaya 61:2; Matewu 5:4.
9. (a) I yini lexi nga ta hi pfuna leswaku hi tiyiselela mahlomulo? (b) Xana van’wana va chaveleleka hi ndlela yihi loko hi tiyiselela nhlomulo hi ku tshembeka?
9 Pawulo u tiyisele miringo yakwe yo tala hikwalaho ka ku pfuniwa hi nchavelelo lowukulu lowu a wu kumeke eka Xikwembu ha Kreste. (2 Vakorinto 1:5) Na hina hi nga kuma nchavelelo lowukulu hi ku anakanyisisa hi switshembiso swa Xikwembu swa risima, hi ku khongelela nseketelo wa moya wa xona lowo kwetsima, na hi ku vona ndlela leyi Xikwembu xi hlamulaka swikhongelo swa hina ha yona. Xisweswo hi ta tiyisiwa leswaku hi ya emahlweni hi seketela vuhosi bya Yehovha ni ku kombisa leswaku Diyavulosi i muhembi. (Yobo 2:4; Swivuriso 27:11) Loko hi swi kotile ku tiyiselela nhlomulo wihi na wihi, ku fana na Pawulo, hi fanele hi yisa ku dzuneka hinkwako eka Yehovha, loyi nchavelelo wa yena wu endlaka leswaku Vakreste va tshama va tshembekile emiringweni. Ku tiyisela ka Vakreste vo tshembeka ku ni vuyelo lebyi chavelelaka eka vamakwerhu, ku endla van’wana va tiyimisela ku “chivirika emahlomulweni lama fanaka.”—2 Vakorinto 1:6.
10, 11. (a) Hi swihi swilo swin’wana leswi vangeke ku xaniseka evandlheni ra le Korinto wa khale? (b) Xana Pawulo u ri chavelele njhani vandlha ra le Korinto, naswona hi wihi ntshembo lowu a wu phofuleke?
10 Vakorinto va vone maxangu lama voniwaka hi Vakreste hinkwavo va ntiyiso. Ku engetela kwalaho, a va boheka ku kuma ndzayo yo susa muoswi la nga hundzukiki. (1 Vakorinto 5:1, 2, 11, 13) Ku tsandzeka ku teka goza leri ni ku herisa timholovo ni ku avana ku tise xisandzu evandlheni. Kambe eku heteleleni va yi tirhisile ndzayo ya Pawulo naswona va kombise ku hundzuka ka xiviri. Hikwalaho, u va bumabumerile swinene ni ku vula leswaku n’wangulo wa vona lowunene eka papila rakwe wu n’wi chavelerile. (2 Vakorinto 7:8, 10, 11, 13) Handle ko kanakana, loyi a susiweke u tlhele a hundzuka. Kutani Pawulo u va tsundzuxe leswaku va ‘n’wi rivalela, ni ku n’wi chavelela, leswaku munhu wo tano a nga hluriwi hi gome ku tlula mpimo.’—2 Vakorinto 2:7.
11 Papila ra Pawulo ra vumbirhi ri fanele ri chavelele vandlha ra le Korinto hakunene. Naswona lexi a ku ri xin’wana xa swikongomelo swakwe. U hlamuserile: “Kutani ku tshemba ka hina ehenhla ka n’wina ku tiyile swinene, hikuva hi tiva leswaku, leswi mi averiwaka mahlomulo man’we na hina, mi ta averiwa na kona ku chaveleriwa loku hi nga na kona.” (2 Vakorinto 1:7) Loko a gimeta papila rakwe, Pawulo u khongoterile: “Mi tšhav̌elelana; . . . kutani Šikwembu ša riranḍu ni ša ku rula ši ta v̌a na ṅwina.”—2 Vakorinto 13:11, BX.
12. Hi xihi xilaveko lexi Vakreste hinkwavo va nga na xona?
12 Mawaku dyondzo ya nkoka swonghasi leyi hi nga yi dyondzaka eka leswi! Swirho hinkwaswo swa vandlha ra Vukreste swi fanele ku ‘avelana nchavelelo’ lowu Xikwembu xi wu nyikaka hi Rito ra xona, hi moya wa xona lowo kwetsima na hi nhlengeletano ya xona ya laha misaveni. Hambi ku ri vanhu lava susiweke va nga ha lava nchavelelo loko va hundzukile ni ku lulamisa ndlela ya vona leyi hoxeke. Xisweswo, “nandza la tshembekaka, wo tlhariha” u simeke lunghiselelo ra tintswalo ro va pfuna. Kan’we hi lembe vakulu vambirhi va nga ha endzela vanhu vo karhi lava susiweke. Lava hi lava va nga ha kombisiki moya wo xandzuka kumbe ku endla xidyoho lexikulu naswona va nga ha va va lava mpfuno leswaku va teka magoza lama faneleke leswaku va ta vuyiseriwa.—Matewu 24:45; Ezekiyele 34:16.
Nhlomulo Wa Pawulo eAsiya
13, 14. (a) Xana Pawulo u wu hlamusele njhani nkarhi wa nhlomulo lowukulu lowu a langutaneke na wona eAsiya? (b) Hi xihi xiendlakalo lexi kumbexana Pawulo a anakanya ha xona?
13 Muxaka wa ku xaniseka lowu vandlha ra le Korinto ri tshameke ri langutana na wona ku ta fikela sweswi a wu nge pimanisiwi ni mahlomulo yo tala lawa Pawulo a bohekeke ku langutana na wona. Xisweswo, u va tsundzuxile: “Vamakwerhu, hi lava leswaku mi tiva ta maxangu lawa ya hi humeleleke etikweni ra Asiya. Hi tshikeleriwile ngopfu swinene, ku tlula matimba ya hina, hi kondza hi hela mbilu, hi nga ha tshembi leswaku hi ta hanya. Hakunene, a hi titwa hi ri lava avanyiseriweke rifu; leswi swi endle leswaku hi nga ha titshembi, kambe hi veka ku tshemba ka hina eka Xikwembu lexi pfuxaka vafi. Xi hi ponisile emakhombyeni layo tano lama vangaka rifu, kutani xi ta engeta xi hi ponisa eka wona. Hi vekile ku tshemba ka hina eka xona, kutani xa ha ta hi ponisa.”—2 Vakorinto 1:8-10.
14 Swidyondzi swin’wana swa Bibele swi tshemba leswaku Pawulo a kombetela eka dzolonga ra le Efesa, leri a ri ta va ri endle leswaku Pawulo swin’we ni vanghana vakwe vambirhi va le Makedoniya lava a famba-famba na vona, ku nga Gayo na Aristarko va lahlekeriwa hi vutomi bya vona. Vakreste lava vambirhi va kokiwe hi nkani va yisiwa endlwini ya mintlango leyi a yi tele hi ntshungu wa vapfukeri lowu nga “heta [kwalomu ka] tiawara timbirhi, [wu] ri karhi [wu] huwelela hinkwa[wo] hi rito rin’we, [wu] ku: ‘I nkulu, Artemi [xikwembu-kati xa] Vaefesa!’” Eku heteleleni, mulanguteri wa muti u swi kotile ku miyeta ntshungu. Nxungeto lowu wa vutomi bya Gayo ni bya Aristarko wu fanele wu khomise Pawulo gome swinene. Entiyisweni, a navela ku nghena a vulavurisana ni ntshungu lowu wa vapfukeri lava hlundzukeke, kambe u siveriwile ku nghenisa vutomi byakwe ekhombyeni hi ndlela leyi.—Mintirho 19:26-41.
15. Hi xihi xiyimo lexi chavisaka lexi nga ha vaka xi hlamuseriwa eka 1 Vakorinto 15:32?
15 Hambiswiritano, swi nga ha endleka Pawulo a a hlamusela xiyimo xin’wana lexi chavisaka ku tlula xiendlakalo lexi se xi boxiweke. Eka papila rakwe ro sungula leri yaka eka Vakorinto, Pawulo u vutisile: “Loko onge ndzi lwile ni swivandzana le Efesa ndzi ri munhu ntsena la faka, a swi ta va swi ndzi pfunile yini xana?” (1 Vakorinto 15:32) Leswi swi nga ha vula leswaku vutomi bya Pawulo a byi nga xungetiwi hi vanhu lava fanaka ni swivandzana ntsena kambe ni hi swiharhi swinene swa nhova exitediyamu xa le Efesa. Nkarhi wun’wana swigevenga a swi xupuriwa hi ku sindzisiwa ku lwa ni swivandzana loko mintshungu leyi nga ni torha ra ngati yi hlalerile. Loko Pawulo a vula leswaku a langutane ni swivandzana swa xiviri, swi nga ha endleka a ponisiwe hi singita leswaku a nga fi hi ndlela yo vava, hilaha Daniyele a ponisiweke hakona emilon’wini ya tinghala ta xiviri.—Daniyele 6:22.
Swikombiso Swa Manguva Lawa
16. (a) Hayini Timbhoni ta Yehovha to tala ti vone maxangu lama fanaka ni ya Pawulo? (b) I yini lexi hi nga tiyisekaka ha xona malunghana ni lava va feke hikwalaho ka ripfumelo ra vona? (c) Hi byihi vuyelo lebyinene lebyi veke kona loko Vakreste va pone ri ahlamile?
16 Vakreste vo tala va manguva lawa va vona maxangu yo fana ni ya Pawulo. (2 Vakorinto 11:23-27) Ni namuntlha, Vakreste va “tshikeleriwile ngopfu swinene, ku tlula matimba ya [vona],” naswona vo tala va langutane ni swiyimo leswi eka swona ‘a va nga ha tshembi leswaku va ta hanya.’ (2 Vakorinto 1:8) Van’wana va file va dlayiwa hi vayayarheli ni vaxanisi va tihanyi. Hi nga tiyiseka leswaku matimba ya Xikwembu lama chavelelaka ma va pfunile leswaku va tiyisela ni leswaku va fe timbilu ni mianakanyo ya vona swi ri eku hetisekeni ka ntshembo wa vona, ku nga ha va ku ri ntshembo wa le tilweni kumbe wa laha misaveni. (1 Vakorinto 10:13; Vafilipiya 4:13; Nhlavutelo 2:10) Eka swiendlakalo swin’wana, Yehovha u nghenelerile etimhakeni leti, naswona vamakwerhu va ponisiwile eku feni. A swi kanakanisi leswaku lava ponisiweke hi ndlela yoleyo ku tshemba ka vona “Xikwembu lexi pfuxaka vafi,” ku engetelekile. (2 Vakorinto 1:9) Endzhaku ka sweswo, va swi kotile ku vulavula hi ku tiyiseka lokukulu loko va ri karhi va byela van’wana hi rungula ra Xikwembu leri chavelelaka.—Matewu 24:14.
17-19. Hi yihi mintokoto leyi kombisaka leswaku vamakwerhu va le Rwanda va kume nchavelelo wa Xikwembu?
17 Sweswinyana vamakwerhu va hina lava rhandzekaka eRwanda va langutane ni mhaka leyi fanaka na liya ya Pawulo ni vanghana vakwe. Vo tala va lahlekeriwe hi vutomi bya vona, kambe matshalatshala ya Sathana ma tsandzekile ku herisa ripfumelo ra vona. Ematshan’weni ya sweswo, vamakwerhu etikweni leri va kume nchavelelo wa Xikwembu hi ku kongoma hi tindlela to tala. Hi nkarhi wa ku dlayeteriwa ka rixaka exikarhi ka Matutsi ni Mahutu lava tshamaka eRwanda, a ku ri ni Mahutu lava vekeke vutomi bya vona ekhombyeni leswaku va sirhelela Matutsi ni Matutsi lava sirheleleke Mahutu. Van’wana va dlayiwe hi lava hisekelaka etlhelo hikwalaho ko sirhelela vapfumeri-kulobye. Hi xikombiso, Mbhoni ya Muhutu leyi vuriwaka Gahizi yi dlayiwile endzhaku ko tumbeta makwerhu wa xisati wa Mututsi la vuriwaka Chantal. Nuna wa Chantal la nga Mututsi, Jean, a a tumbetiwe endhawini yin’wana hi makwerhu wa xisati wa Muhutu la vuriwaka Charlotte. Ku ringana masiku ya 40 Jean ni makwerhu un’wana wa Mututsi va tshame va tumbetiwile endzeni ka chimele leyikulu, va huma swa xinkarhana ni vusiku ntsena. Nkarhi lowu hinkwawo, Charlotte a a va phamela swakudya ni ku va sirhelela hambileswi a a tshama ekusuhi ni govela ra mavuthu ya Mahutu. Eka tluka leri, u nga vona xifaniso xa Jean na Chantal lava tlheleke va hlangana, lava nkhensaka swinene vagandzeri-kulobye va Mahutu hikwalaho ka leswi va ‘vekeke vutomi bya vona ekhombyeni’ hikwalaho ka vona hilaha Prisila na Akwila va endleke hakona eka muapostola Pawulo.—Varhoma 16:3, 4.
18 Mbhoni yin’wana ya Muhutu, Rwakabubu, u ndhundhuzeriwe hi phepha-hungu ra Intaremara hikwalaho ko sirhelela vapfumeri-kulobye va Matutsi.a Ri te: “Nakambe ku na Rwakabubu, un’wana wa Timbhoni ta Yehovha, loyi a hambeteke a tumbeta vanhu etindhawini to hambana-hambana eka vamakwavo va yena (leyi i ndlela leyi vapfumeri-kulobye va vitananaka ha yona). A a heta siku hinkwaro a ri karhi a va heleketela swakudya ni mati yo nwa hambileswi a nga na asma. Kambe Xikwembu xi n’wi endle a va ni matimba lama nga tolovelekangiki.”
19 Nakambe, anakanya hi mpatswa wa Mahutu lowu tsakelaka lowu vuriwaka Nicodeme na Athanasie. Loko ku dlayeteriwa ka rixaka ku nga si sungula, mpatswa lowu lowu tekaneke a wu ri karhi wu dyondza Bibele ni Mbhoni ya Mututsi leyi vuriwaka Alphonse. Va veke vutomi bya vona ekhombyeni hi ku tumbeta Alphonse ekaya ra vona. Endzhakunyana va xiye leswaku yindlu leyi a yi nga ri ndhawu leyi hlayisekeke hikuva vaakelani va vona va Mahutu a va n’wi tiva munghana wa vona wa Mututsi. Hikwalaho, Nicodeme na Athanasie va tumbete Alphonse emugodini ejaratini ra vona. Leri a ku ri goza lerinene hikuva vaakelani se a va sungule ku ta va ta hlota Alphonse kwalomu ka siku rin’wana ni rin’wana. Loko a ri karhi a etlele emugodini lowu ku ringana 28 wa masiku, Alphonse u anakanye hi timhaka ta Bibele to tanihi liyani ya Rahava, loyi a tumbeteke Vaisrayele vambirhi elwangwini ra yindlu yakwe le Yeriko. (Yoxuwa 6:17) Namuntlha Alphonse u ya emahlweni ni ntirho wakwe eRwanda tanihi muchumayeri wa mahungu, wa nkhensa swinene leswi swichudeni swakwe swa Bibele swa Mahutu swi vekeke vutomi bya swona ekhombyeni hikwalaho ka yena. Kambe ku vuriwa yini hi Nicodeme na Athanasie? Sweswi i Timbhoni ta Yehovha leti khuvuriweke naswona va fambisa tidyondzo ta Bibele to tlula 20 ni vanhu lava tsakelaka.
20. Xana Yehovha u va chavelele hi ndlela yihi vamakwerhu va le Rwanda, kambe hi xihi xilaveko lexi vo tala va vona va ha riki na xona?
20 Hi nkarhi lowu ku dlayeteriwa ka rixaka ku sunguleke ha wona eRwanda, a ku ri ni vachumayeri va mahungu lamanene va 2 500 etikweni leri. Hambileswi madzana ma lahlekeriweke hi vutomi bya wona kumbe ma bohekeke ku baleka etikweni, nhlayo ya Timbhoni yi tlakukile yi tlula 3 000. Lebyi i vumbhoni bya leswaku hakunene Xikwembu xi va chavelerile vamakwerhu. Ku vuriwa yini hi vana lava feriweke hi vatswari ni tinoni to tala leti nga kona exikarhi ka Timbhoni ta Yehovha? Hi ntumbuluko, va ha langutane ni nhlomulo naswona va lava nchavelelo lowu yaka emahlweni. (Yakobo 1:27) Mihloti ya vona yi ta suriwa hi ku helela loko ku pfuxiwa vafi emisaveni leyintshwa ya Xikwembu. Hambiswiritano, hikwalaho ka ku pfuniwa hi vamakwavo ni hi leswi va nga vagandzeri va “Xikwembu lexi ku chavelela hinkwako ku humaka eka xona va swi kota ku langutana ni vutomi.”
21. (a) Hi kwihi kun’wana laha vamakwerhu va nga ni xilaveko lexikulu xa nchavelelo wa Xikwembu kona, naswona hi yihi ndlela yin’wana leyi hinkwerhu ka hina hi nga pfunaka ha yona? (Vona bokisi “Ku Kuma Nchavelelo eMalembeni Ya Mune Ya Nyimpi.”) (b) Xana ku pfumala ka hina nchavelelo ku ta hetelela ku enerisiwe rini?
21 Etindhawini tin’wana to tala to fana na Eritrea, Singapore, ni le khale ka Yugoslavia, vamakwerhu va hambeta va tirhela Yehovha hi ku tshembeka ku nga khathariseki nhlomulo lowu va langutaneke na wona. Onge hi nga pfuna vamakwerhu vo tano hi ku hamba hi va khongelela leswaku va ta kuma nchavelelo. (2 Vakorinto 1:11) Naswona onge hi nga tiyisela hi ku tshembeka ku kondza ku fika nkarhi lowu ha wona Xikwembu ha Yesu Kreste xi nga “ta sula mihloti hinkwayo emahlweni ya [hina]” hi ku helela. Kutani hi mpimo lowu heleleke hi ta kuma nchavelelo lowu Yehovha a nga ta wu nyikela emisaveni yakwe leyintshwa ya ku lulama hi mpimo lowu heleleke.—Nhlavutelo 7:17; 21:4; 2 Petro 3:13.
[Nhlamuselo ya le hansi]
a Xihondzo xo Rindza xa January 1, 1995, tluka 26, xi hlamusele ntokoto wa Deborah, n’wana wa xisati wa Rwakabubu, loyi xikhongelo xa yena xi khumbeke swinene vuthu ra masocha ya Mahutu kutani xi ponisa ndyangu eku dlayiweni.
Xana Wa Swi Twisisa?
◻ Ha yini Yehovha a vitaniwa “Xikwembu lexi ku chavelela hinkwako ku humaka eka xona”?
◻ Xana hi fanele hi ma languta njhani mahlomulo?
◻ Xana hi nga avelana nchavelelo na vamani?
◻ Xana ku pfumala ka hina nchavelelo ku ta hetelela ku enerisiwe hi ndlela yihi?
[Xifaniso lexi nga eka tluka 17]
Jean na Chantal, hambileswi va nga Timbhoni leti nga Matutsi, a va tumbetiwe etindhawini to hambana hi Timbhoni ta Mahutu hi nkarhi wa ku dlayeteriwa ka rixaka le Rwanda
[Xifaniso lexi nga eka tluka 17]
Timbhoni ta Yehovha ti ya emahlweni ti byela vaakelani va tona rungula ra Xikwembu leri chavelelaka eRwanda