Ntlawa Wa Vu-101 Wa Gilead—Wu Hisekela Mintirho Leyinene
MUVUMBI wa hina, Yehovha Xikwembu, swin’we ni N’wana wakwe Yesu Kreste va yi hisekela mintirho leyinene. Tanihi xikombiso xa hina lexinene, Yesu u kombise ku hiseka hi ku endla ntirho lowu a a wu nyikiwe hi Xikwembu, lowu a wu katsa ku tinyiketela “hikwalaho ka hina, leswaku a hi . . . endla vanhu lava tengeke, lava va nga va yena ntsena, ni lava va chivirikelaka ku endla leswinene.” (Tito 2:14) Swirho swa 48 swa ntlawa wa vu-101 swa Xikolo xa Bibele xa Gilead xa Watchtower, hakunene swi ku kombisile ku hisekela ka swona mintirho leyinene. Nongonoko wa ku thwasisiwa ka varhumiwa lava a a wu ri hi September 7, 1996, eNtsindza wa Dyondzo wa Watchtower le Patterson, eNew York.
Switsundzuxo Leswinene Leswaku Va Tshama Va Hiseka
Mutshama-xitulu wa nongonoko wa ku thwasisiwa ka swichudeni a a ku ri Carey Barber, xirho xa Huvo leyi Fumaka, loyi a nga ni malembe lama tlulaka 70 a ri evutirhelini bya nkarhi hinkwawo. Emaritweni ya yena yo pfula, Makwerhu Barber u yise nyingiso entirhweni wa Yesu wo chumayela ni ku dyondzisa, loyi a ri “ku vonakala ka misava.” (Yohane 8:12) U swi veke erivaleni leswaku Yesu a nga endlanga leswaku lunghelo leri ro xiximeka ri va ra yena ntsena, kambe u khutaze vadyondzisiwa va yena leswaku na vona va endla ku vonakala ka vona ku vangama. (Matewu 5:14-16) Lunghelo leri ra ntirho ri endla leswaku vutomi bya Mukreste byi va ni xikongomelo naswona ri endla leswaku hinkwavo lava nga “vanhu va ku vonakala” va byarha vutihlamuleri lebyikulu.—Vaefesa 5:8.
Endzhaku ka marito lawa yo pfula, Don Adams wa Tihofisi ta Vukongomisi leti nga eyindlu-nkulu le Brooklyn, u tivisiwile. A a ri ni nkulumo leyi nge, “Ku Ya Emahlweni, Hayi Ku Tlhelela Endzhaku.” Makwerhu Adams u yise nyingiso eXikolweni xa Gilead hi xoxe ni xikongomelo xa xona—xa ku ndlandlamuxa ku chumayeriwa ka mahungu lamanene ku ya fika ematikweni mambe. U vulavule hi ku ndlandlamuka ka nhlengeletano ya Xikwembu, leyi kandziyiseke tibuku ta Bibele emisaveni hinkwayo hi tindzimi leti tlulaka 300. Buku leyi nge, Vutivi Lebyi Yisaka eVuton’wini Lebyi Nga Heriki, leyi kandziyisiweke hi 1995, yi kumeka hi tindzimi ta 111 naswona ku kunguhatiwe leswaku yi kandziyisiwa ni hi tindzimi tin’wana leti engetelekeke. Ana se yi ve xitirho lexi pfunaka vadyondzisiwa lavantshwa va Yesu leswaku va fika eyinhleni ya ku tinyiketela ni ku khuvuriwa endzhaku ka tin’hweti ti nga ri tingani. Hikwalaho, varhumiwa lava lavantshwa va ta va va ri ni swipfuneti swo dyondza Bibele swa sweswinyana, entirhweni wa vona.
Ku landzele, Lyman Swingle, loyi a nga xirho xa Huvo leyi Fumaka, a vulavula hi nhloko-mhaka leyi nge, “Hambetani Mi Endlela Yehovha Vutirheli Bya N’wina Byo Kwetsima,” leyi sekeriweke eka Nhlavutelo 7:15. Leswi Yehovha a nga Xikwembu lexi tsakeke, ku ya emahlweni u n’wi tirhela hi swona swi endlaka munhu a tsaka. (1 Timotiya 1:11) Hikwalaho ka ntirho lowu lowu tsakisaka, ntshungu lowukulu wa vanhu lava humaka eswiphen’wini hinkwaswo swa misava wu sungule ku n’wi gandzela. Hi malembe yo tala, lava leteriweke eXikolweni xa Gilead va hoxe xandla eku pfuneni ka vo tala va vona, leswaku va kuma vutivi lebyi kongomeke bya ntiyiso. Hikwalaho, hi ni xivangelo lexi twalaka xo tshemba leswaku Yehovha u ta hambeta a katekisa lava sweswi va rhumiwaka leswaku va ya hlengeleta swirho swin’wana swa ntshungu lowukulu lowu ndlandlamukaka.
“Ku Kombisa Ntsako Wa Yehovha,” leyi a ku ri nkulumo leyi vekiweke hi Daniel Sydlik, loyi na yena a nga xirho xa Huvo leyi Fumaka. U kombise leswaku malandza hinkwawo ya Xikwembu, ku katsa ni varhumiwa lava lavantshwa, ma ni lunghelo ra ku dyondzisa vanhu ndlela ya vutomi lebyi nga heriki ni ndlela yo hanya vutomi byo antswa sweswi. Makwerhu Sydlik, u te: “Ku dyondzisa i vutshila lebyi vuyerisaka hi byoxe. Leswi swi vonaka eka tinghohe ta vanhu lava dyondzisaka ni le ka tinghohe ta vanhu lava dyondzisiwaka.” (Pisalema 16:8-11) U tshahe marito ya murhumiwa un’wana wa le Estonia loyi a vuleke leswi, “Hi ni rungula ra nkoka emisaveni hinkwayo, naswona tinghohe ta hina hi tona ti ri kombisaka.” Ku languteka ka tinghohe ta hina ku nga ha endla leswaku vanhu vo tala va hi amukela ni ku tsakela rungula ra hina. Vanhu va lava ku tiva lexi endlaka malandza ya Yehovha ma tsaka. Makwerhu Sydlik u tsundzuxile: “Hikwalaho yisa nyingiso eka ndlela leyi nghohe ya wena yi langutekaka ha yona. Vanhu va tsakisiwa hi ku vona vanhu lava tsakeke.”
Ulysses Glass, la hoxeke xandla eku leteleni ka swichudeni swa Gilead ku sukela eka ntlawa wa vu-12 hi 1949, u vekele vayingiseri nkulumo leyi nge, “Hi Ku Lehisa Mbilu, Hlayisani Mimoya-xiviri Ya N’wina.” Ku lehisa mbilu swi vula yini? Swi vula ku rindzela xo karhi hi ku rhula, hi ku kombisa ku tiyisela loko u khunguvanyisiwa kumbe loko u ri ni ntshikilelo. Munhu la lehisaka mbilu wa tikhoma; kambe lowa ximbilwa-mbilwana u ni magugu naswona u hatla a khunguvanyeka. Makwerhu Glass u te: “Vanhu vo tala va anakanya leswaku ku lehisa mbilu ku kombisa ku tsana kumbe ku tsandzeka ku endla xiboho,” kambe “eka Yehovha i xikombiso xa ku va ni matimba ni xikongomelo.” (Swivuriso 16:32) Hi yihi mimbuyelo ya ku lehisa mbilu? “Ku lehisa mbilu loko u hlundzukile swi ta ku pfuna leswaku u nga vi ni nhlomulo masiku ya dzana,” ku vula xivuriso xa Xichayina. “Ku lehisa mbilu swi antswisa vumunhu bya munhu,” ku vule Makwerhu Glass. “Kahle-kahle, ku tiyisa timfanelo letin’wana leswaku ti va kona hi masiku. Ku endla leswaku ripfumelo ri va nchumu wa nkoka, ku rhula ku va loku khomelelaka nkarhi wo leha, ni ku tiyisa rirhandzu.”
“I lunghelo ku kuma xiavelo lexi humaka eka Yehovha Xikwembu hi ku tirhisa nhlengeletano ya yena,” ku vule Mark Noumair, loyi a ri murhumiwa le Kenya ku ringana malembe ya 11 naswona sweswi i muleteri eGilead. Loko a sungula nkulumo leyi nge, “Loko Mi Nga Ri Na Ripfumelo, A Mi Nge Tlhaveriwi Hi Dyambu,” Makwerhu Noumair u yise nyingiso eka xikombiso xa Hosi Akazi wa Yuda. Esaya u tiyisekise hosi leswaku Yehovha u ta yi seketela entirhweni wa yona, kambe hambiswiritano, Akazi u tsandzeke ku N’wi tshemba. (Esaya 7:2-9) Makwerhu Noumair u ye emahlweni a kombisa leswaku varhumiwa—entiyisweni, hinkwerhu ka hina—va fanele ku va ni ripfumelo eka Yehovha leswaku va ta kota ku khomelela nkarhi wo leha eswiavelweni swa vona. Ntlhontlho lowukulu wa ntirho wa vurhumiwa hi leswaku wu lava ripfumelo leri tiyeke. Makwerhu Noumair u te: “Minkarhi hinkwayo tsundzukani leswaku ku hava xiyimo lexi hetisekeke eka mafambiselo lawa ya swilo.”
Mintokoto Leyi Khutazaka Ku Tirha Hi Ku Hiseka
Hi nkarhi wa ku leteriwa ka swona eGilead, hi mahelo-vhiki man’wana ni man’wana swichudeni a swi heta nkarhi evutirhelini bya le rivaleni, lebyi nga ta va nchumu lowukulu eswiavelweni swa swona swa vurhumiwa. Wallace Liverance, xirho xin’wana xa vadyondzisi va le Gilead, u ve ni mbulavurisano ni swichudeni swa 15, leswi hlamuseleke mintokoto ya swona. Leon Weaver wa Komiti ya Ndzawulo ya Ntirho na Lon Schilling wa Komiti ya Mintirho ya Bethele, u ve ni mbulavurisano ni swirho swa komiti ya rhavi leswi a swi suka eAfrika ni le Latin America, leswi hlamuseleke mintokoto ya xivandla xa vurhumiwa ni ku nyikela ni switsundzuxo leswinene eka varhumiwa lava a va thwasa. Ku boxiwe leswaku le Sierra Leone, kwalomu ka 90 wa tiphesente ta lava khuvuriweke hi lembe ra ntirho ra 1995 va pfuniwe hi varhumiwa. Mayana rhekhodo leyinene swonghasi ya ntirho lowu endliwaka hi ku hiseka!
Ku gimete Milton Henschel, muungameri wa Sosayiti loyi a vekeleke vayingiseri va 2734, nkulumo leyi nge, “Nhlengeletano Ya Yehovha Leyi Vonakaka Yi Hlawulekile.” I yini xi endlaka nhlengeletano ya Xikwembu yi nga ringanisiwi na nchumu? A hi mpimo wa yona kumbe matimba ya yona, kambe hileswi yi kongomisiwaka hi milawu ya ku lulama ni swiboho swa Xikwembu swa vuavanyisi. Eminkarhini ya khale, a a ku ri vanhu va Yehovha, tiko ra Israyele, lava a va nyikiwe milawu ya yena leyo kwetsima, leyi endleke tiko leri ri hlawuleka. (Varhoma 3:1, 2) Namuntlha, nhlengeletano ya Yehovha yi ni vun’we tanihi leswi yi tirhaka ehansi ka nkongomiso wa Yesu Kreste. (Matewu 28:19, 20) Ya humelela, ya kula. Xana yi kona nhlengeletano yin’wana emisaveni, leyi Huvo ya yona leyi Fumaka yi kambisisaka Rito ra Xikwembu, ku nga Bibele, emahlweni ko va yi endla swiboho swa nkoka? Hi tindlela leti ni tin’wana, nhlengeletano ya Yehovha leyi vonakaka yi hlawulekile hakunene.
Nongonoko lowu wo tsakisa wu hetelele hi ku nyikeriwa ka tidiploma ni ku hlayiwa ka papila leri humaka eka ntlawa wa swichudeni leri phofulaka ku tlangela ka swona vuleteri lebyi byo hlawuleka.
[Bokisi leri nga eka tluka 22]
Tinhlayo Ta Ntlawa
Nhlayo ya matiko lama yimeriweke: 9
Nhlayo ya matiko lawa va averiweke eka wona: 12
Nhlayo ya swichudeni: 48
Xiringaniso xa malembe: 31,7
Xiringaniso xa malembe entiyisweni: 13,8
Xiringaniso xa malembe evutirhelini bya nkarhi hinkwawo: 9,8
[Xifaniso lexi nga eka tluka 23]
Ntlawa Wa Vu-101 Lowu Thwasaka Wa Xikolo Xa Bibele Xa Gilead Xa Watchtower
Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Dehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.