“Ematshan’weni Ya Nsuku, Ndzi Kume Tidayimani”

HI KU VULA KA MICHALIS KAMINARIS

Endzhaku ka malembe ya ntlhanu ndzi ri eAfrika Dzonga laha a ndzi famba ndzi lava nsuku, ndzi tlhelele ekaya ndzi ri ni nchumu wun’wana wa nkoka. Mi nge ndzi mi hlamusela rifuwo leri ndzi nga na rona sweswi naswona leri ndzi naveleke ku ri avela van’wana.

NDZI velekiwe hi 1904 exihlaleni xa Greece xa Cephalonia eLwandle ra Ionia. Vatswari va mina ha vambirhi va file endzhaku ka kwalaho, hikwalaho ndzi kule ndzi ri xisiwana. A ndzi navela ku kuma mpfuno, naswona hakanyingi a ndzi khongela eka Xikwembu. Hambileswi a ndzi nghena Kereke ya Orthodox ya Magriki, Bibele a ndzi yi honisa hi ku helela. A ndzi wu kumanga nchavelelo nikatsongo.

Hi 1929, ndzi anakanye ku famba ndzi lavisisa laha ndzi nga kumaka vutomi byo antswa kona. Ndzi suke exihlaleni xa ka hina lexi nga riki na nchumu, ivi ndzi tluta ndzi kongoma eAfrika Dzonga hi ndlela leyi hundzaka hi le Nghilandhi. Endzhaku ka masiku ya 17 ndzi ri elwandle, ndzi fike le Cape Town, eAfrika Dzonga, laha ndzi fikeke ndzi thoriwa hi ku hatlisa hi munhu loyi a hi huma etikweni rin’we. Hambiswiritano, a ndzi kumanga nchavelelo eka rifuwo ra swilo leswi vonakaka.

Nchumu Wa Risima Swinene

Se a ndzi ri ni kwalomu ka malembe mambirhi ndzi tshama eAfrika Dzonga loko un’wana wa Timbhoni ta Yehovha a endzele ndhawu leyi a ndzi tirha eka yona ivi a ndzi fambisela tibuku ta Bibele ta ririmi ra Xigriki. A ku ri xibukwana lexi nge Where Are the Dead? ni lexi nge Oppression, When Will It End? Ndza ha ti tsundzuka tinghitsi leti a ndzi ri na tona loko ndzi swi hlaya, ndzi tlhela ndzi nhlokohata matsalwa hinkwawo lawa ma tshahiweke. Siku rin’wana ndzi byele munghana wa mina ndzi ku: “Ndzi kume leswi a ndzi swi lava malembe lawa hinkwawo. Ndzi te laha Afrika ndzi ta lava nsuku, kambe ematshan’weni ya nsuku, ndzi kume tidayimani.”

A ndzi tsake ngopfu loko ndzi dyondze leswaku Xikwembu xi na rona vito ra xiviri, Yehovha, ni leswaku Mfumo wa xona se wu simekiwile ematilweni, ni leswaku hi hanya emasikwini ya makumu ya mafambiselo lawa ya swilo. (Pisalema 83:18; Daniyele 2:44; Matewu 6:9, 10; 24:3-12; 2 Timotiya 3:1-5; Nhlavutelo 12:7-12) A swi tsakisa swonghasi ku dyondza leswaku Mfumo wa Yehovha wu ta tisela vanhu va tinxaka hinkwato mikateko leyi nga heriki! Mhaka yin’wana leyi ndzi tsakiseke a ku ri leswaku ntiyiso lowu wa risima a wu ri karhi wu chumayeriwa emisaveni hinkwayo.—Esaya 9:6, 7; 11:6-9; Matewu 24:14; Nhlavutelo 21:3, 4.

Hi ku hatlisa ndzi kume adirese ya rhavi ra Sosayiti ya Watch Tower eCape Town ivi ndzi kuma tibuku tin’wana ta Bibele. A ndzi tsake ngopfu ku tikumela ya mina Bibele. Leswi ndzi swi hlayeke swi ndzi susumetele ku nyikela vumbhoni. Ndzi sungule hi ku rhumela tibuku ta Bibele eka maxaka ya mina, vanghana ni van’wana lava ndzi tivanaka na vona va le dorobeni ra ka hina ra Lixoúrion. Loko ndzi ri karhi ndzi dyondza, hakatsongo-tsongo ndzi sungule ku twisisa leswaku loko munhu a lava ku tsakisa Yehovha u fanele ku nyiketela vutomi bya yena eka yena. Hikwalaho, endzhaku ka sweswo ndzi endle tano hi xikhongelo.

Siku rin’wana, ndzi ye eka nhlangano wun’wana wa Timbhoni ta Yehovha, kambe leswi Xinghezi a ndzi nga xi tivi, a ndzi twanga nchumu. Loko ndzi twe leswaku ku ni Magriki yo tala lama tshamaka ePort Elizabeth, ndzi rhurhele kona, kambe a ndzi ti kumanga Timbhoni leti vulavulaka Xigriki. Hikwalaho, ndzi anakanye ku tlhelela eGreece leswaku ndzi ta kota ku va muevhangeli wa nkarhi hinkwawo. Ndza ha tsundzuka loko ndzi tibyela leswaku, ‘Ndzi ta tlhelela eGreece hambiloko ndzo fika ndzi nga ri na nchumu.’

Vutirheli Bya Nkarhi Hinkwawo eGreece

Hi ximun’wana xa 1934, ndzi khandziye Duilio, xikepe xa Italy. Ndzi fike le Marseilles, eFurwa, naswona endzhaku ka loko ndzi tshame kona khume ra masiku, ndzi sukile ndzi kongoma eGreece, ndzi khandziye Patris, xikepe xo rhwala vanhu. Loko hi ri elwandle, xikepe lexi xi onhakile, naswona nivusiku ku humesiwe xileriso xa leswaku swikwekwetsu swo phalala swi xikiseriwa ematini. Kutani ndzi tsundzuka marito lawa ndzi nga tibyela wona malunghana ni ku fika eGreece ndzi nga ri na nchumu. Hambiswiritano, eku heteleleni ku fike xikepe xo koka swikepe swin’wana xa le Italy, naswona xi hi kokile xi hi yisa eNaples, le Italy. Eku heteleleni hi fike ePiraiévs (Piraeus), eGreece.

Ku suka kwalaho, ndzi kongome eAtena ivi ndzi ya erhavini ra Sosayiti ya Watch Tower. Eka bulo ra mina na Athanassios Karanassios, mulanguteri wa rhavi, ndzi kombele xiavelo xo va muchumayeri wa nkarhi hinkwawo. Hi siku leri landzeleke, ndzi nghene endleleni yo kongoma Peloponnisos, exiphen’wini lexi nga edzongeni wa tiko-nkulu ra Greece. Muganga lowu hinkwawo a wu averiwe mina leswaku wu va nsimu ya mina!

Hi ku hiseka lokukulu ndzi sungule ntirho wa ku chumayela, ndzi nghena doroba hi doroba, muti hi muti, purasi hi purasi ni ku suka eka yindlu yin’wana ku ya eka leyin’wana leyi nga yoxe. Hi ku hatlisa ndzi sungule ku tirha na Michael Triantafilopoulos, loyi a ndzi khuvuleke hi ximumu xa 1935—se a ku ri nkarhi lowu tlulaka lembe ndzi sungule vutirheli bya nkarhi hinkwawo! A ku nga ri na xo famba xa mani na mani, hikwalaho a hi famba hi milenge kun’wana ni kun’wana. Xiphiqo xa hina lexikulu a ku ri nkaneto wa vafundhisi, lava a va endla xin’wana ni xin’wana leswaku va hi tshikisa ntirho. Hikwalaho ka sweswo, hi langutane ni xihlawuhlawu lexikulu. Kambe, ku nga khathariseki swihinga, vumbhoni byi nyikeriwile, naswona vito ra Yehovha ri twarisiwile kun’wana ni kun’wana.

Ku Tiyisela Nkaneto

Mixo wun’wana, loko ndzi ri karhi ndzi chumayela emugangeni wa tintshava wa Arcadia, ndzi fike eximutanini xa Magouliana. Endzhaku ka loko ndzi nyikele vumbhoni ku ringana awara, ndzi twe swingelengele swa kereke naswona hi ku hatlisa ndzi swi xiyile leswaku swingelengele leswi a swi beriwa mina! Ntshungu wa vapfukeri wu hlengeletanile wu rhangeriwe hi archimandrite (ku nga mufundhisi wa kereke la nga ehansi ka bixopo) wa Orthodox ya Magriki. Ndzi hatle ndzi pfala nkwama wa mina wa tibuku ivi ndzi khongela eka Yehovha hi mbilu. Mufundhisi loyi ni ntshungu wa vana lowu a wu n’wi landzela, u te ka mina hi ku kongoma. U sungule ku huwelela, “Hi yena loyi! Hi yena loyi!”

Vana va ndzi rhendzerile, kutani mufundhisi loyi a nghena exikarhi ivi a sungula ku ndzi susumeta hi khwiri ra yena lerikulu, a ri karhi a vula leswaku a nga lavi ku ndzi khumba hi mavoko yakwe i vi a ku, ‘leswaku ndzi nga tithyakisi.’ U huwelerile a ku: “N’wi himeni! N’wi himeni!” Kambe endzhaku ka kwalaho, ku humelele ndhuna ya maphorisa kutani yi famba na hina exitichini xa maphorisa hi ri vambirhi. Mufundhisi u tengisiwile hikwalaho ka leswi a hlohloteleke ntshungu wa vapfukeri naswona u rihisiwe 300 wa tidrakma ni tihakelo ta huvo. Mina ndzi ntshunxiwile.

Loko hi fika endhawini leyintshwa, hi endle doroba lerikulu leswaku ri va ntsindza wa ntirho wa hina, naswona ku sukela kwalaho a hi hlanganisa nsimu ya hina hi ku famba mpfhuka wo ringana tiawara ta mune. Leswi swi vula leswaku a hi suka hi mahlamba-ndlopfu ivi hi vuya ekaya se ri perile, hi ntolovelo hi endzela ximutana xin’we kumbe swimbirhi hi siku. Endzhaku ka loko hi hlanganise swimitana leswi a swi ri ekusuhi, hi chumayele edorobeni leri nga ntsindza kutani hi ya emahlweni. Hakanyingi a hi khomiwa hikwalaho ka leswi vafundhisi a va hlohlotela vanhu leswaku va lwisana na hina. Exifundzheni xa Parnassus, exikarhi ka tiko ra Greece, maphorisa ma ndzi lave tin’hweti to tala. Hambiswiritano, a va kalanga va ndzi khoma.

Siku rin’wana mina na Makwerhu Triantafilopoulos a hi chumayela emutini wa Mouríki, emugangeni wa Boeotia. Hi avanyise muti lowu hi swiyenge swimbirhi, naswona mina ndzi sungule ku tirha etindhawini ta swiganga, tanihi leswi a ku ri mina lontsongo. Hi xitshuketa ndzi twe ku rila endhawini leyi nga ehansi. Loko ndzi ri karhi ndzi rhelela hi ku tsutsuma, ndzi anakanyile ndzi ku, ‘Makwerhu Triantafilopoulos u le ku biweni.’ Vaaki va muti lowu a va hlengeletane endlwini yo xavisela swakunwa, naswona muprista a ya ehenhla ni le hansi ku fana ni nkunzi leyi mpfhumpfhaka. A a ri karhi a huwelela a ku, “Vanhu lava va vula leswaku hina hi ‘mbewu ya Nyoka.’”

Ana se muprista a tshove nhonga ya nxongotelo hi ku ba nhloko ya Makwerhu Triantafilopoulos, naswona ngati a yi ri karhi yi xiririkela exikandzeni xa yena. Endzhaku ka loko ndzi n’wi sule ngati, hi swi kotile ku famba. Hi fambe tiawara tinharhu ku kondza hi fika edoroba-nkulu ra Thebes. Mbanga yi tshunguriwe etliliniki ya kwalaho. Hi mangale mhaka leyi emaphoriseni naswona mhaka ya ku mangaleriwa ka yena yi tengiwile. Hambiswiritano, muprista loyi a a ri ni vuxaka byin’wana bya le xihundleni naswona eku heteleleni u ntshunxiwile.

Loko hi ri karhi hi tirha edorobeni ra Leukas, hi “khomiwe” hi valandzeri va un’wana wa varhangeri va tipolitiki va ndhawu leyi ivi va hi yisa endlwini leyi ku xaviseriwaka swakunwa eka yona, laha hi tikumeke hi hehliwa hi vanhu lava tiendleleke xihubyana xa vona lexi nga riki enawini. Murhangeri loyi wa tipolitiki ni vanhu va yena a va hi rhendzelekela hi ku cincana naswona a va ri karhi va vulavulela—a va hokoloka nkarhi na nkarhi—ni ku hi chavisa hi swibakele swa vona. Hinkwavo a va pyopyiwile. Ku hi rhukana ka vona ku hambetile ku sukela ninhlikanhi ku fika loko dyambu ri pela, kambe a hi kalanga hi hlundzuka, a hi ri karhi hi n’wayitela loko hi phofula ku pfumala ka hina nandzu naswona etimbilwini a hi ri karhi hi khongela mpfuno wa Yehovha Xikwembu leswaku a hi pfuna.

Hi nkarhi wa mpimavayeni maphorisa mambirhi ma hi ponisile. Ma hi yise exitichini xa maphorisa naswona ma hi khome kahle swinene. Leswaku a tiyimelela, murhangeri loyi wa tipolitiki u tile siku leri landzeleke ivi a hi hehla hi ku vula leswaku hi hangalasa xikungu xa vuxisi xo lwisana ni Hosi ya Greece. Hikwalaho a hi rindziwe hi vavanuna vambirhi loko maphorisa ma hi rhumela edorobeni ra Lamia leswaku ku ta endliwa vulavisisi byin’wana. Hi pfaleriwe ekhotsweni ku ringana masiku ya nkombo, kutani hi yisiwa edorobeni ra Larissa leswaku hi ya tengisiwa, hi bohiwe mavoko hi timpecana.

Vamakwerhu va Vukreste eLarissa, lava a va tivisiwe ka ha ri emahlweni, a va rindzele ku fika ka hina. Rirhandzu leri hlamarisaka leri va hi kombiseke rona ri nyikele vumbhoni lebyinene eka varindzi. Gqweta ra hina, ku nga un’wana wa Timbhoni ta Yehovha loyi nakambe a tshameke a va xandla xa kolonele, a ri tiveka swinene edorobeni. Loko ri humelela ehubyeni ivi ri tenga mhaka ya hina, swihehlo leswi hi hehliweke hi swona swi paluxiwe swi ri mavunwa, naswona hi ntshunxiwile.

Ku humelela lokukulu ka ku chumayela ka Timbhoni ta Yehovha ku vange leswaku nkaneto wu andza. Milawu leyi yirisaka vuproselita yi pasisiwile hi 1938 na 1939, naswona mina na Michael hi khumbekile emilandzwini yo tala leyi tengiweke ehubyeni malunghana ni mhaka leyi. Endzhaku ka sweswo, hofisi ya rhavi yi hi khutaze ku tirha hi hambanile leswaku hi nga tivangeli mahlo ya vanhu vo tala entirhweni wa hina. A swi ndzi tikela ku va ndzi nga ri na munghana. Hambiswiritano, hi ku tshemba Yehovha, ndzi fambe hi milenge ndzi hlanganisa miganga ya Attica, Boeotia, Phthiotis, Euboea, Aetolia, Acarnania, Eurytania ni muganga wa Peloponnisos.

Lexi ndzi pfuneke eminkarhini leyi a ku ri marito yo tsakisa ya mupisalema yo tshembela eka Yehovha: “Loko nḍi ri na wena, nḍi nga tihoša v̌andleni ra v̌alala, kambe hi Šikwembu ša mina, nḍi nga tlula rihlampfu. I Šikwembu le’ši nḍi boheke hi v̌amba ra matimba, kambe wa nḍi fambisa hi ndlela le’yi lulameke. O endle milenge ya mina le’yi fanaka ni ya tinhlangu, o nḍi tiyisile tinḍawini ta mina le’ti tlakukeke.”—Pisalema 18:29, 32, 33.

Hi 1940, tiko ra Italy ri sungule ku lwa nyimpi na tiko ra Greece, naswona endzhakunyana ka kwalaho mavuthu ya Jarimani ma nghene etikweni leri. Nawu wo hlayisa ku rhula ni vuhlayiseki wu humesiwile, naswona tibuku ta Sosayiti ya Watch Tower a ti yirisiwile. Leyi a yi ri minkarhi yo nonon’hwa eka Timbhoni ta Yehovha eGreece; hambiswiritano, ti andze hi ndlela leyi hlamarisaka—ku suka eka Timbhoni ta 178 hi 1940, ku ya eka 1770 eku heleni ka Nyimpi ya Vumbirhi ya Misava hi 1945!

Ku Tirha eBethele

Hi 1945, ndzi rhambiwile leswaku ndzi ya tirha ehofisini ya rhavi ra Timbhoni ta Yehovha eAtena. Bethele leswi vulaka “Yindlu ya Xikwembu,” hi nkarhi wolowo a yi ri endlwini leyi a yi lo hiriwa, eLombardou Street. Tihofisi a ti ri exithezini xo sungula, kasi vugandliselo a byi ri emuakweni wa le hansi. A byi ri ni muchini lowutsongo wo kandziyisa ni muchini wo tsemelela maphepha. Eku sunguleni vatirhi vo kandziyisa a va ri vambirhi ntsena, kambe hi ku hatlisa vatirheli va ku tirhandzela va sungule ku ta va suka emakaya ya vona leswaku va ta pfuna entirhweni lowu.

Ku tihlanganisa ni yindlu-nkulu ya Sosayiti ya Watch Tower, eBrooklyn, le New York, ku tlhele ku kondleteriwa hi 1945, naswona hi lembe leri hi tlhele hi sungula ku kandziyisa Xihondzo xo Rindza eGreece nkarhi na nkarhi. Kutani hi 1947, hi rhurhile hi ya le 16 Tenedou Street, kambe muchini wo gandlisa a wu sele eLombardou Street. Endzhaku muchini wo gandlisa wu tekiwile le Lombardou Street wu yisiwa eka fektri leyi nga ya Mbhoni eka mpfhuka wa kwalomu ka ntlhanu wa tikhilomitara. Hikwalaho, ku ringana nkarhi wo karhi a hi famba-famba exikarhi ka tindhawu letinharhu.

Ndza ha tsundzuka loko hi suka endhawini ya hina yo tshama eka yona eTenedou Street ka ha ri mahlamba-ndlopfu, hi ya evugandliselweni. Endzhaku ka loko hi tirhe laha ku kondza ku ba 1:00 nidzhenga a ndzi ya eLombardou Street laha maphepha lama kandziyisiweke a ma yisiwa kona. Kona endhawini leyi a ma petsiwa ma va timagazini, ma hlanganisiwa ivi ma tsemiwa hi mavoko. Endzhaku ka kwalaho a hi yisa timagazini leti heleleke eposweni, ivi hi ti rhwala hi ti yisa eka xithezi xa vunharhu, hi pfuna ni vatirhi va le posweni leswaku hi ti hlela ni ku tlhela hi namarheta switempe eka timvhilopho leswaku ti ta rhumeriwa.

Hi 1954, Timbhoni eGreece se a ti engeteleke ti tlula nhlayo ya 4000, naswona miako leyikulu a yi laveka. Hikwalaho, hi rhurhele eBethele leyintshwa leyi nga ni swithezi swinharhu exiphen’wini xa le hansi edorobeni ra Atena, eKartali Street. Hi 1958, ndzi komberiwe ku va mulanguteri wa khixi, naswona byebyo byi ve vutihlamuleri bya mina ku fika hi 1983. Hi nkarhi wolowo, hi 1959, ndzi tekane na Eleftheria, loyi a veke munghana wo tshembeka la nga mpfuno entirhweni wa Yehovha.

Ku Tiyisela Nkaneto Nakambe

Hi 1967, ntlawa wa mavuthu wu vutle mfumo, naswona swipimelo swi tlhele swi vekiwa entirhweni wa hina wo chumayela. Hambiswiritano, hikwalaho ka ntokoto lowu a hi ri na wona wo langutana ni ku yirisiwa emintirhweni ya hina, hi hatle hi tolovelana ni xiyimo ivi hi ya emahlweni hi ndlela leyi humelelaka hi ri karhi hi tumbela.

Hi khome minhlangano ya hina emakaya naswona a hi tirhisa vukheta evutirhelini bya hina bya yindlu na yindlu. Hambiswiritano, vamakwerhu va hina a va ri karhi va khomiwa nkarhi na nkarhi, naswona milandzu ya le tihubyeni yi engetelekile. Magqweta ya hina minkarhi hinkwayo a ma ya hala ni hala leswaku ma tenga milandzu leyi a yi ri kona eswiphen’wini swo hambana-hambana swa tiko. Ku nga khathariseki nkaneto, Timbhoni to tala a ti hambeta ti va kona nkarhi na nkarhi entirhweni wo chumayela, ngopfu-ngopfu hi mahelo-vhiki.

Hi Mugqivela kumbe Sonto yo karhi endzhaku ka loko hi hete ku chumayela ka siku rero, a hi kambisisa ku vona loko ku ri ni un’wana la nga riki kona entlaweni wa hina. Hi ntolovelo lava a va va va nga ri kona a va pfaleriwa exitichini xa maphorisa xa le kusuhi. Hikwalaho, a hi va yisela minkumba ni swakudya ni ku va khutaza. Nakambe, a hi tivisa magqweta ya hina lawa hi Musumbhunuku a ma humelela emahlweni ka muchuchisi leswaku ma yimelela lava pfaleriweke. Hi langutane ni xiyimo lexi hi ntsako hikuva a hi xanisiwa hikwalaho ka ntiyiso!

Hi nkarhi wa ku yirisiwa, mintirho ya hina yo kandziyisa eBethele yi yimisiwile. Hikwalaho yindlu leyi mina na Eleftheria a hi tshama eka yona ekusuhi na Atena yi hundzukenyana ndhawu ya vugandliselo. Eleftheria a a tsala swihloko swa tikopi ta Xihondzo xo Rindza hi muchini wo tika swinene. A a veka maphepha ya khume ni tikhabhoni hi nkarhi wun’we eka muchini wo tsala naswona a a boheka ku tshikilela hi matimba leswaku maletere ma ta tsaleka. Kutani a ndzi hlengeleta maphepha lawa ivi ndzi ma hlanganisa. Leswi a swi endliwa madyambu man’wana ni man’wana ku kondza ku va exikarhi ka vusiku. Phorisa rin’wana a ri tshama eka xithezi lexi nga ehansi, naswona ha ha tivutisa leswaku ha yini ri nga hi ehleketelelanga.

Ku Tsakisiwa Hi Ku Ndlandlamuka Loku Yaka eMahlweni

Xidimokrati xi kondleteriwile eGreece hi 1974, naswona ntirho wa hina wo chumayela wu tlhele wu endliwa hi ku ntshunxeka. Kambe, emalembeni ya nkombo ya ku yirisiwa ka ntirho wa hina, hi tsakele ku andza loku hlamarisaka hi ku engetelaka ka 6000 wa Timbhoni letintshwa, ivi hi fikelela ntsengo lowu tlulaka 17 000 wa vahuweleri va Mfumo.

Hi tlhele hi sungula ntirho wa hina wa ku kandziyisa nkarhi na nkarhi emiakweni ya rhavi. Hikwalaho, miako ya Bethele leyi nga eKartali Street, hi ku hatlisa yi ve yitsongo swinene. Hikwalaho ndhawu leyi nga ringanaka hekitara yin’we yi xaviwile exidorobanini xa Marousi eAtena. Ku akiwe miako leyintshwa ya Bethele, leyi a yi katsa 27 wa tikamara to etlela eka tona, ni fektri, tihofisi ni miako yin’wana. Yi nyiketeriwile hi October 1979.

Hi ku famba ka nkarhi hi boheke ku lava ndhawu leyi kuleke ku ringana. Hikwalaho ku xaviwe ndhawu leyi nga ringanaka 22 wa tihekitara endhawini leyi nga kwalomu ka 60 wa tikhilomitara en’walungwini wa Atena. Ndhawu leyi yi le Eleona, exintshabyanini, laha tintshava ni minkova leyi nga ni mati swi vonakaka kahle. Endhawini leyi, hi April 1991, hi nyiketele muako lowukulu swinene lowu katsaka tiyindlu ta 22, laha yin’wana ni yin’wana ya tona yi rhurhelaka vanhu va nhungu.

Endzhaku ko heta malembe ya 60 evutirhelini bya nkarhi hinkwawo, ndza ha ri ni rihanyo lerinene. Lexi tsakisaka, ndza ha ri “ni matimba eku dyuhaleni.” (Pisalema 92:14, NW) Ndzi nkhensa ngopfu Yehovha hikwalaho ka leswi ndzi hanyeke ku kondza ndzi tivonela hi ya mina mahlo ku andza lokukulu ka vagandzeri va yena va ntiyiso. Muprofeta Esaya u vhumbe hi ku andza ko tano: “Tinyangwa ta wena ti ta pfuriwa hi mikari hikwayo, nhlekanhi ni v̌usiku a ti nga pfariwi, leŝaku ku ta kota ku nghena v̌ukosi bya matiko, ni tihosi ta wona ni malanḍa ya tona.”—Esaya 60:11.

Swi tsakisa swonghasi ku vona vanhu va timiliyoni, va matiko hinkwawo va khitikanela enhlengeletanweni ya Yehovha ni ku va va dyondzisiwa ndlela yo pona nhlomulo lowukulu va nghena emisaveni leyintshwa ya Xikwembu! (2 Petro 3:13) Ndzi vula hi mbilu hinkwayo leswaku vutirheli bya nkarhi hinkwawo byi ve bya risima swinene ku tlula nchumu wun’wana ni wun’wana lowu nga nyikeriwaka hi misava leyi. Ina, ndzi kume rifuwo leri nga riki ra nsuku, kambe ra tidayimani ta moya leti fuwiseke vutomi bya mina hi ndlela leyi nga riki na xiringaniso.

[Swifaniso leswi nga eka tluka 23]

Michalis na Eleftheria Kaminaris

(Exineneni) Muchini wo gandlisa eLombardou Street