Ndzi Dyondze Ntiyiso Wa Bibele Eromania

HI KU VULA KA GOLDIE ROMOCEAN

Hi 1970, ndzi endzele maxaka ya mina le Romania ro sungula kwalomu ka malembe ya 50. Vanhu a va hanya ehansi ka mfumo lowu tshikilelaka wa Vukhomonisi, naswona nkarhi na nkarhi a ndzi tsundzuxiwa ku va ni vukheta hi leswi ndzi swi vulaka. Kutani, loko ndzi yime ehofisini ya hulumendhe ya le ximutanini xa ka hina, mutirhela-mfumo u ndzi kombele ku suka etikweni hi ku hatlisa. Ndzi nga si hlamusela leswaku hikwalaho ka yini, u nge ndzi hlamusela ndlela leyi ndzi dyondzeke ntiyiso wa Bibele ha yona eRomania.

NDZI velekiwe hi March 3, 1903, eximutanini xa Ortelec en’walungu-vupela-dyambu bya Romania ekusuhi na doroba ra Zalău. A hi tshama endhawini yo saseka. Mati ni moya wa kona a swi tengile. A hi tibyalela swakudya swa hina vini naswona a hi nga pfumali nchumu xa swilo leswi vonakaka. Loko ndza ha kula, tiko a ri rhurile.

Vanhu a va rhandza vukhongeri swinene. Entiyisweni, ndyangu wa ka hina a wu ri ni vukhongeri byinharhu. Un’wana wa vakokwa wa mina wa xisati a a nghena kereke ya Orthodox ya Khatoliki, un’wana yena a a nghena kereke ya Adventist, kasi vatswari va mina a va nghena kereke ya Baptist. Hikwalaho ka leswi a ndzi nga pfumelelani ni vukhongeri byihi na byihi bya vona, ndyangu wa ka hina wu vule leswaku ndzi ta va la pfumelaka leswaku Xikwembu a xi kona. Ndzi ehleketile, ‘Loko ku ri ni Xikwembu xin’we, ku fanele ku va ni vukhongeri byin’we—ku nga ri byinharhu endyangwini wun’we.’

Swilo leswi ndzi swi voneke evukhongerini swi ndzi karhatile. Hi xikombiso, muprista u endzele makaya leswaku a ta teka mali ya kereke. Loko vanhu va nga ri na mali yo n’wi nyika, a a teka minkumba ya vona ya voya leya kahle ngopfu ematshan’weni ya mali. Ekerekeni ya Khatoliki, ndzi hlalele kokwana wa xisati loko a nkhinsama a khongela emahlweni ka xifaniso xa Mariya. ‘Ha yini a khongela xifaniso?’ Ndzi tivutisile.

Minkarhi Yo Nonon’hwa

Tatana u ye le United States hi 1912 leswaku a ta kuma mali yo hakela xikweleti. Ku nga ri khale nyimpi yi sungurile, kutani vavanuna va le ximutanini xa ka hina va ye enyimpini—a ku lo sala vavasati, vana ni vakhalabye ntsena. Ximutana xa ka hina xi ve ehansi ka mfumo wa Hungary swa xinkarhana, kambe masocha ya le Romania ma vuyile ivi ma tlhela ma teka ximutana. Va hi lerise ku suka hi ku hatlisa. Hambiswiritano, hikwalaho ka ku hatlisa ni ku pfilunganyiwa hi ku khandziyisa nhundzu ni vana exikalichanini, ndzi siyiwile. Phela, a ndzi ri lonkulu wa kona eka vana lava ntlhanu.

Ndzi tsutsumele eka muakelani, ku nga mukhalabye la saleke, kutani a ku: “Famba ekaya. U lotlela mavanti ya wena, naswona u nga pfumeleli munhu a nghena.” Ndzi yingise hi ku hatlisa. Endzhaku ka loko ndzi dye murhu wa huku ni khavichi leswi siyiweke hikwalaho ko hatlisela ku famba, ndzi nkhinsame ekusuhi ni mubedo wa mina ivi ndzi khongela. Ndzi khomiwe hi vurhongo lebyikulu hi ku hatlisa.

Loko ndzi pfula mahlo ya mina, a ri xile, kutani ndzi ku: “Oho, ndza nkhensa Xikwembu! Ndza ha hanya!” Makhumbi a ma tele hi timbhovo ta makulu, tanihi leswi ku baleseriweke vusiku hinkwabyo. Loko Manana a xiye leswaku a ndzi nga ri na vona eximutanini lexi landzelaka, u rhumele jaha leri vitaniwaka George Romocean, leri ri ndzi kumeke ivi ri tlhela na mina. Hi ku hatlisa hi tlhelele eximutanini xa ka hina ivi hi tlhela hi tshama kona.

Ku Navela Ka Mina Ntiyiso Wa Bibele

Manana a a lava leswaku ndzi khuvuriwa ndzi va mu-Baptist, kambe a ndzi nga swi lavi hikuva a ndzi nga pfumeli leswaku Xikwembu xa rirhandzu a xi ta hisa vanhu hilaha ku nga heriki etiheleni. Loko a ringeta ku hlamusela, Manana u te: “Ntsena loko va endla leswo biha.” Kambe ndzi te: “Loko va endla leswo biha, a va herisiwe, kambe va nga xanisiwi. A ndzi nga ta xanisa hambi ku ri mbyana kumbe ximanga.”

Ndzi tsundzuka siku rin’wana ro saseka ra ximun’wana, loko ndza ha ri ni malembe ya 14 hi vukhale, Manana a ndzi rhuma leswaku ndzi yisa tihomu emadyelweni. Loko ndzi etlela ebyanyini lebyi nga etlhelo ka nambu, hala ndzhaku ku ri ni xihlahla, ndzi langute tilo ivi ndzi ku: “Xikwembu, ndza swi tiva leswaku u kwalaho; kambe a ndzi tsakeri vukhongeri byihi na byihi eka lebyi. U fanele u ri ni byin’we lebyinene.”

Ndza pfumela hakunene leswaku Xikwembu xi twe xikhongelo xa mina hikuva hi ximumu xolexo xa 1917, Swichudeni swimbirhi swa Bibele (hilaha Timbhoni ta Yehovha a ti vitaniwa hakona) swi tile eximutanini xa ka hina. A swi ri makhalipotiya, kumbe vatirheli va nkarhi hinkwawo, kutani swi ye ekerekeni ya Baptist loko ntirho wu ri karhi wu ya emahlweni.

Ntiyiso Wa Bibele Wu Hangalaka eRomania

Malembe ma nga ri mangani emahlweni, hi 1911, Carol Szabo na Josif Kiss, lava se a va ri Swichudeni swa Bibele le United States, va tlhelele eRomania leswaku va ya tivisa ntiyiso wa Bibele kwalaho. Va tshame eTîrgu-Mureş, ku nga tikhilomitara leti nga ehansi ka 160 edzonga-vuxa bya ximutana xa ka hina. Ku nga si hela malembe ma nga ri mangani, madzana ya vanhu va xiviri ma angule kahle eka rungula ra Mfumo ivi ma nghenela vutirheli bya Vukreste.—Matewu 24:14.

Phela, loko Swichudeni leswimbirhi leswintshwa swa Bibele swi te ekerekeni ya Baptist leyi nga eximutanini xa ka hina xa Ortelec, George Romocean, hambileswi a a ri ni malembe ya 18 hi vukhale, a a fambisa ntirho wa kereke naswona a a ringeta ku hlamusela Varhoma 12:1. Eku heteleleni, un’wana wa makhalipotiya lamatsongo u suke a yima ivi a ku: “Vamakwerhu, vanakulorhi, xana muapostola Pawulo u ringeta ku hi byela yini laha?”

Loko ndzi twe sweswo, ndzi tsakile! Ndzi ehleketile, ‘Vavanuna lava va fanele va yi tiva ndlela yo hlamusela Bibele.’ Kambe vo tala va lava a va ri kona va huwelerile: “Vaprofeta va mavunwa! Ha mi tiva leswaku mi vamani!” Ku landzele hasahasa. Kambe tata wa George u suke a yima ivi a ku: “Miyelani hinkwenu ka n’wina! Xana i moya wa muxaka muni lowu—mi lo pyopyiwa xana? Loko vavanuna lava va ri ni leswi va lavaka ku hi byela swona naswona mi nga lavi ku yingisela, mina ndza va rhamba ekaya ra mina. Munhu wihi na wihi la lavaka ku ta wa amukeleka.”

Hi ku nyanyuka, ndzi tsutsumele ekaya ivi ndzi byela Manana leswi humeleleke. A ndzi ri un’wana wa lava amukeleke xirhambo xo ya ekaya ra ka Romocean. Wa nga vona ndlela leyi a ndzi nyanyuke ha yona madyambu wolawo ku swi vona eBibeleni leswaku a ku na tihele leti hisaka ni ku vona vito ra Xikwembu, Yehovha eBibeleni ya mina ya Xiromania! Makhalipotiya ma hlele leswaku Xichudeni xa Bibele xi endzela kaya ra ka Romocean Sonto yin’wana ni yin’wana leswaku xi ta hi dyondzisa. Hi ximumu lexi landzeleke, loko ndzi ri ni malembe ya 15, ndzi khuvuriwile ndzi kombisa ku tinyiketela ka mina eka Yehovha.

Hi ku famba ka nkarhi, kwalomu ka ndyangu wa ka Prodan hinkwawo ni ndyangu wa ka Romocean va amukele ntiyiso wa Bibele ivi va nyiketela vutomi bya vona eka Yehovha. Van’wana vo tala lava humaka eximutanini xa ka hina na vona va endle tano, ku katsa ni mpatswa lowuntshwa lowu kaya ra wona a ri tirha tanihi kereke ya Baptist. Endzhaku ka sweswo va ri hundzule ndhawu ya ku va Swichudeni swa Bibele swi hlangana eka yona swi dyondza. Ntiyiso wa Matsalwa wu hangalake hi ku hatlisa eswimitanini swa le kusuhi, naswona hi va-1920 a ku ri ni kwalomu ka 1800 wa vahuweleri va Mfumo le Romania!

Ku Ya eUnited States

A hi navela swinene ku avela tatana, Peter Prodan leswi hi swi dyondzeke. Kambe, lexi hlamarisaka, hi nga si tsala, hi kume papila leri humaka eka yena ri hi byela leswaku ana se i nandza wa Yehovha la khuvuriweke. U dyondze ni Swichudeni swa Bibele le Akron, eOhio, naswona a a lava leswaku hinkwerhu ka hina hi rhurha hi ya le United States. Hambiswiritano, Manana u arile ku suka le Romania. Kutani, hi 1921, ndzi tirhise mali leyi Tatana a ndzi rhumeleke yona, ndzi rhurha ndzi ya le Akron. George Romocean na buti wa yena ana se a va rhurhele le United States eka lembe leri hundzeke.

Loko ndzi fike hi xikepe le Xihlaleni xa Ellis, eNew York, mutirhela-mfumo wa ta ku rhurha a a nga swi koti ku hundzuluxela vito ra mina ra Aurelia, a ri yisa eka Xinghezi, kutani u te: “Hi wena Goldie.” Rolero ri hundzuke vito ra mina ku sukela kwalaho. Hi ku hatlisa endzhaku ka sweswo, hi May 1, 1921, mina na George Romocean hi tekanile. Kwalomu ka lembe endzhakunyana, Tatana u tlhelele eRomania ivi hi 1925 a vuya na makwerhu lontsongo wa xisati Mary, le Akron. Kutani Tatana u tlhelele eRomania leswaku a ta va na Manana ni ndyangu hinkwawo.

Vutirheli Bya Hina Byo Sungula Le United States

George a a ri nandza wa Yehovha la tshembekeke, ni la tinyiketeleke. Exikarhi ka 1922 na 1932, hi katekisiwe hi vana va mune va vanhwanyana lava rhandzekaka—Esther, Anne, Goldie Elizabeth na Irene. Vandlha ra Xiromania ri sunguriwile le Akron, naswona eku sunguleni minhlangano a yi khomeriwa ekaya ra hina. Eku heteleleni, eka n’hweti yin’wana ni yin’wana ya vutsevu muyimeri la humaka eyindlu-nkulu ya misava hinkwayo ya Swichudeni swa Bibele le Brooklyn, eNew York, u endzele vandlha ra ka hina ivi a tshama na hina.

Hi Tisonto to tala a hi tirha siku hinkwaro eka ntirho wo chumayela. Hi pake minkwama ya hina ya tibuku ni swakudya swa ni nhlikanhi, hi khandziyisa vanhwanyana va hina eka Model T Ford ya hina, ivi hi heta siku hinkwaro hi chumayela ensin’wini ya le matiko xikaya. Kutani nimadyambu, a hi ya eka Dyondzo ya Xihondzo xo Rindza. Vanhwanyana va hina va sungule ku rhandza ntirho wo chumayela. Hi 1931, a ndzi ri kona le Columbus, eOhio, loko Swichudeni swa Bibele swi amukela vito ra swona leri swi hlawulaka ra Timbhoni ta Yehovha.

Ndzulamiso Lowu A Ndzi Wu Lava

Malembe ma nga ri mangani endzhakunyana, ndzi hlundzukele Joseph F. Rutherford, loyi a ri muungameri wa Watch Tower Bible and Tract Society hi nkarhi wolowo. Mbhoni leyi a ya ha ku khuvuriwa yi vone onge Makwerhu Rutherford a nga yi yingisanga hilaha ku enerisaka eka xiphiqo xa yona. Ndzi vone onge Makwerhu Rutherford a a hoxile. Kutani, hi Sonto yin’wana makwerhu wa mina wa xisati Mary ni nuna wa yena, Dan Pestrui, va hi endzerile. Endzhaku ko dya swakudya-nkulu swa siku Dan u te: “A hi lunghekeleni ku ya eminhlanganweni.”

Ndzi te: “A ha ha yi eminhlanganweni. Hi hlundzukele Makwerhu Rutherford.”

Dan u yise mavoko ya yena endzhaku ivi a ya endzhaku na le mahlweni, kutani a ku: “Xana a wu n’wi tiva Makwerhu Rutherford loko u khuvuriwa?”

Ndzi te: “A ndzi nga n’wi tivi. Wa swi tiva leswaku ndzi khuvuriwe eRomania.”

U vutisile: “Ha yini u khuvuriwile?”

Ndzi hlamurile: “Hikuva ndzi dyondze leswaku Yehovha i Xikwembu xa ntiyiso, naswona ndzi lave ku nyiketela vutomi bya mina leswaku ndzi n’wi tirhela.”

U hlamurile: “U nga swi rivali sweswo! Ku vuriwa yini hi loko Makwerhu Rutherford o tshika ntiyiso, xana u ta wu tshika?”

Ndzi te: “E-e, a ndzi nge swi endli sweswo!” Sweswo swi ndzi endle ndzi tianakanyisisa, ivi ndzi ku: “Un’wana ni un’wana a lunghekele ku ya enhlanganweni.” Ku sukela kwalaho a ha ha tshikanga. Wa nga vona ndlela leyi ndzi nkhenseke Yehovha ha yona hikwalaho ka ndzulamiso wa rirhandzu wa sivara wa mina!

Ku Humelela Hi Nkarhi Wa Ku Pfumaleka Ka Mintirho

Hi nkarhi wa ku Pfumaleka ka Mintirho hi va-1930, a swi tika swinene. Siku rin’wana George u vuye ekaya a huma entirhweni a karhatekile, a ndzi byela leswaku u heleriwe hi ntirho wa yena efektri yo endla rhaba. Ndzi te: “U nga vileli, hi ni Tatana la fuweke etilweni, naswona a nge hi tshiki.”

Hi rona siku rolero George u hlangane ni munghana loyi a a khome basikiti leyikulu ya swikowa. Loko George a tive laha munghana wa yena a nga swi kha kona, u vuye ekaya a ri ni swikowa swo tala. Kutani u tirhise tidolara ta hina tinharhu to hetelela a xava tibasikiti letitsongo. Ndzi vutisile: “Xana u nga swi endlisa ku yini sweswo, kasi hi ni swinhwanyetana leswi lavaka ntswamba?”

U hlamurile: “U nga vileli, endla hilaha ndzi vulaka hakona ntsena.” Eka mavhiki ma nga ri mangani lama landzeleke, a hi ri ni fektri endlwini ya hina, hi hlantswa ni ku paka swikowa. A hi swi xavisela switolo swa le henhla ivi hi vuya ekaya ni tidolara ta 30 ku ya ka 40 hi siku, leyi a ku ri mali yo tala eka hina hi nkarhi wolowo. Murimi loyi a hi pfumeleleke ku kha swikowa ensin’wini ya yena u vule leswaku u tshame kwalaho ku ringana malembe ya 25 naswona a nga si tshama a vona swikowa swo tarisa xileswi. Ku nga ri khale fektri ya rhaba yi vitane George leswaku a ta tlhela a tirha.

Ku Hlayisa Ripfumelo Ra Hina

Hi 1943 hi rhurhele le Los Angeles, eCalifornia, naswona malembe ya mune endzhakunyana hi tshame le Elsinore. Hi pfule xitolo xa swakudya kwalaho, naswona ndyangu wa hina hinkwawo a wu cincana ku tirha kona. Hi nkarhi wolowo, Elsinore a xi ri xidorobana xa kwalomu ka vaaki va 2000, naswona a hi boheka ku famba 30 wa tikhilomitara hi ya edorobeni rin’wana eminhlanganweni ya hina ya Vukreste. Wa nga vona ndlela leyi a ndzi tsake ha yona ku vona vandlha leritsongo ri sunguriwa le Elsinore hi 1950! Sweswi ku ni mavandlha ya 13 endhawini yoleyo.

Hi 1950 n’wana wa hina wa xisati Goldie Elizabeth (loyi vo tala sweswi va n’wi tivaka a ri Beth) u thwasile eXikolweni xa Bibele xa Gilead xa Watchtower le South Lansing, eNew York, ivi a averiwa ku ya va murhumiwa eVenezuela. Hi 1955 n’wana wa hina wa xisati lontsongo, Irene, a a tsakile leswi nuna wa yena a rhamberiwe ku va mutirheli la famba-fambaka entirhweni wa xifundzha. Kutani hi 1961, endzhaku ko ya eXikolweni xa Vutirheli bya Mfumo le South Lansing, eNew York, va rhumeriwe eThailand. Minkarhi yin’wana a ndzi kumbuka vana va mina ngopfu lerova ndzi rila, kambe a ndzi tibyela ndzi ku, ‘Hi leswi a ndzi lava leswaku va swi endla.’ Kutani ndzi teke nkwama wa mina wa tibuku ivi ndzi ya entirhweni wo chumayela. Minkarhi hinkwayo a ndzi vuya ekaya ndzi tsakile.

Hi 1966 nuna wa mina la rhandzekaka, George, u ve ni vuvabyi byo oma swirho. Beth, loyi se a vuyile hi le Venezuela hikwalaho ka swiphiqo swa rihanyo, u ndzi pfune ku n’wi khathalela. George u fe hi lembe leri landzeleke, naswona ndzi chaveleriwe hi mhaka ya leswaku u tshame a tshembekile eka Yehovha naswona u kume hakelo ya yena ya le tilweni. Endzhaku ka sweswo Beth u ye eSpain leswaku a ya tirha laha xilaveko xa vahuweleri va Mfumo a xi ri xikulu kona. N’wana wa mina lonkulu, Esther, u khomiwe hi khensa ivi a fa hi 1977, kutani hi 1984, Anne u dlayiwe hi khensa ya tisele ta ngati. Un’wana ni un’wana a ri nandza la tshembekeke wa Yehovha vutomi bya yena hinkwabyo.

Loko Anne a fa Beth na Irene se a va vuyile eswiavelweni swa vona swa ku chumayela ematikweni mambe. Va pfunete ku khathalela vamakwavo, naswona hinkwerhu a hi ri ni gome swinene. Endzhaku ka nkarhi ndzi byele vana va mina ndzi ku: “Se swi ringene! Hi chavelele van’wana hi switshembiso swa risima swa le Bibeleni. Sweswi hi fanele hi tipfumelela ku chaveleleka. Sathana u lava ku hi tekela ntsako wa hina eku tirheleni ka hina Yehovha, kambe a hi nge n’wi pfumeleli.”

Ndyangu Wa Ka Hina Lowu Tshembekeke eRomania

Mina na makwerhu wa xisati Mary hi teke riendzo rolero leri nga rivalekiki ro endzela ndyangu wa ka hina le Romania hi 1970. Un’wana wa vamakwerhu va xisati se a file, kambe hi swi kotile ku endzela makwerhu John na makwerhu wa xisati Lodovica, lava a va ha tshama eximutanini xa Ortelec. Hi nkarhi wa ku endza ka hina, Tatana na Manana se a va file, va tshame va tshembekile eka Yehovha. Vo tala va hi byele leswaku Tatana a a ri phuphu evandlheni. Hambi ku ri van’wana va vatukulu-xinguwe va yena le Romania se i Timbhoni sweswi. Hi tlhele hi endzela maxaka yo tala ya le ka va nuna wa mina ya ndyangu lowu tshameke wu tiyile entiyisweni wa Bibele.

Hi 1970, Romania a ri ri ehansi ka mfumo wa tihanyi wa Vukhomonisi wa Nicolae Ceauşescu, naswona Timbhoni ta Yehovha a ti xanisiwa hi tihanyi. Flore, n’wana wa mufana wa makwerhu John, swin’we ni maxaka man’wana ya mina, va hete malembe yo tala va ri etikampeni ta nxaniso hikwalaho ka ripfumelo ra vona ra Vukreste, na Gábor Romocean, n’wana wa makwenu wa mina wa mufana tlhelo mativula na yena u endle tano. A swi hlamarisi leswi loko hi rhumiwe ku yisa mapapila eyindlu-nkulu ya Timbhoni ta Yehovha le New York, vamakwerhu va hina va le Romania va vuleke leswaku a va karhateka kukondza loko va twe leswaku hi hume laha tikweni hi hlayisekile!

Loko hi xiye leswaku tivhisa ta hina ti heleriwe hi nkarhi, hi ye etihofisini ta hulumendhe le Ortelec. A ku ri Ravuntlhanu nindzhenga, naswona a ko va ni mutirhela-mfumo un’we la tirhaka. Loko a xiye leswaku a hi endzele mani ni leswaku ntukulu wa hina a ri ekampeni ya nxaniso, u te: “Vavasati, mi fanele mi huma laha hi ku hatlisa!”

Makwerhu wa mina wa xisati u hlamurile: “Kambe a ku na xitimela lexi fambaka namuntlha.”

U vule hi ku hatlisa: “A swi na mhaka. Fambani hi bazi. Fambani hi xitimela. Fambani hi thekisi. Fambani hi milenge. Humani laha hi ku hatlisa hilaha mi nga kotaka hakona!”

Loko hi sungula ku famba, hi tlhele hi vitaniwa ivi hi byeriwa leswaku xitimela lexi nga hleriwangiki xa masocha a xi ta hundza laha hi 6:00 nimadyambu. Mawaku ndlela leyi leswi swi tikombeke swi ri nkateko ha yona! Eka xitimela lexi tolovelekeke, maphepha ya hina a ma ta kamberiwa hi ku phindha-phindha, kambe tanihi leswi xitimela lexi a xi rhwele varhangeri va mavuthu naswona a ko va hina ntsena vaaka-tiko endzeni, ku hava la kombeleke ku vona mapasi ya hina yo endza. Va nga ha va va ehlekete leswaku a hi ri vakokwa wa van’wana va vatirhela-mfumo.

Hi fike eTimisoara mixo lowu landzelaka, naswona hi mpfuno wa munghana wa xaka ra hina, hi swi kotile ku kuma tivhisa ta hina. Siku leri tlhandlamaka a hi humile etikweni. Hi tlhelele ekaya ni mikhumbulo leyi rhandzekaka ni leyi nga rivalekiki ya vamakwerhu va xinuna ni va xisati lava tshembekaka va Vukreste va le Romania.

Eka malembe lama tlhandlameke riendzo ra hina ro ya eRomania, hi twe vuxokoxoko byitsongo mayelana ni ntirho wa ku chumayela endzhaku ka Rihlampfu ra Nsimbi. Kambe, a hi tiyiseka leswaku vamakwerhu va hina va xinuna ni va xisati va Vukreste va ta tshama va tshembekile eka Xikwembu xa hina—hambi ko humelela yini na yini. Naswona entiyisweni va swi endlile sweswo! Mawaku ntsako lowu hi veke na wona ku tiva leswaku Timbhoni ta Yehovha ti amukeriwe ximfumo tanihi nhlengeletano ya vukhongeri le Romania hi April 1990! Hi ximumu lexi tlhandlameke hi tsakisiwe hi swiviko swa mayelana ni mintsombano leyi khomeriweke le Romania. Phela, vanhu vo tlula 34 000 va ve kona emadoroba-nkulu ya nhungu, naswona vanhu va 2260 va khuvuriwile! Sweswi ku ni vanhu vo tlula 35 000 lava hlanganyelaka entirhweni wo chumayela le Romania, naswona n’wexemu vanhu va 86 034 va ve kona eXitsundzuxweni xa rifu ra Kreste.

Ntiyiso Wa Ha Ri Wa Risima Eka Mina

Ku ringana malembe ma nga ri mangani, ndzi tshike ku dya swifanekiselo eXitsundzuxweni. Ndzi xiye vamakwerhu lava fanelekaka swinene lava a va nga dyi, ivi ndzi tivutisa ndzi ku: ‘Swi nga endlekisa ku yini leswaku Yehovha a ndzi nyika lunghelo ro va mudyandzhaka-kulobye ni N’wana wa yena etilweni kasi van’wana i swivulavuri leswi khulukaka kunene?’ Kambe loko ndzi nga dyi, ndzi titwe ndzi karhatekile swinene. A swi vonaka onge ndzi ala xanchumu. Endzhaku ka ku dyondza swinene ni ku khongela swinene, ndzi sungule ku dya nakambe. Ku rhula ni ntsako wa mina swi tlhele swi vuya, naswona a swi si thama swi ndzi sukela.

Hambileswi ndzi nga ha swi kotiki kahle ku hlaya, siku rin’wana ni rin’wana ndzi yingisela tikhasete ta Bibele ni ta timagazini ta Xihondzo xo Rindza na Xalamuka! Ndza ha hlanganyela ni le ntirhweni wo chumayela. Hi ntolovelo ndzi fambisa timagazini ta nhlayo ya le xikarhi ka 60 na 100 n’hweti yin’wana ni yin’wana, kambe loko hi ri ni tsima ro hlawuleka ra magazini wa Xalamuka! hi April n’wexemu, ndzi fambise 323 wa timagazini. Hi ku pfuniwa hi vana va mina, ndzi kota ni ku hlanganyela eXikolweni xa Vutirheli bya le Tilweni. Ndza tsaka leswi ndza ha swi kotaka ku khutaza van’wana. Vo tala eHolweni ya Mfumo va ndzi vitana Kokwana.

Loko ndzi languta endzhaku kwalomu ka malembe yo lava ku tlula 79 ya ntirho wo tinyiketela eka Yehovha, ndza n’wi nkhensa siku na siku leswi a ndzi pfumeleleke ku tiva ntiyiso wa yena wa risima ni ku tirhisa vutomi bya mina entirhweni wa yena. Ndza tsaka swinene leswi ndzi hanyeke ndzi kondza ndzi vona ku hetiseka ka vuprofeta lebyi hlamarisaka bya Bibele lebyi vhumbeke ku hlengeletiwa ka vanhu va Xikwembu lava fanaka ni tinyimpfu emasikwini lawa ya makumu.—Esaya 60:22; Zakariya 8:23.

[Xifaniso lexi nga eka tluka 23]

Makwerhu wa xisati Mary na Tatana hi lava yimeke, na mina, George, ni vana va hina va vanhwanyana Esther na Anne

[Xifaniso lexi nga eka tluka 24]

Laha a ndzi ri ni vana va mina va vanhwanyana Beth na Irene na nuna wa Irene ni vana va vona vambirhi va vafana, lava hinkwavo ka vona va tirhelaka Yehovha hi ku tshembeka