Xana Lava Xanisekaka Va Ta Kala Va Kuma Ku Rhula?

XANA u nga tsakela ku vona ku herisiwa ka ku xaniseka, ku nga ri eka wena ntsena kambe eka vanhu hinkwavo? Anakanya hi swikombiso leswi:

Sonia u xaniseke ngopfu swinene.a Ku xaniseka ka yena ku sungule loko a tshubule leswaku nuna wa yena a ri na malembe ya khume a ri na xigangu. Kutani n’wana wa yena wa mufana lontsongo a tluleriwa hi HIV ivi a dlayiwa hi AIDS. Malembe mambirhi endzhakunyana n’wana wa yena wa mufana lowun’wana u vabyile, ivi hi ku hatlisa na yena a dlayiwa hi AIDS. Sonia wa tsundzuka: “Xiyimo xo hetelela xa vuvabyi bya yena xi teke nkarhi wo leha. U karhatiwe hi ntshikilelo lowukulu wa mianakanyo, misisi ya yena yi hela naswona a nga ha voni kahle. A swi vavisa ngopfu.”

Fabiana, xichudeni xa le yunivhesiti ya le Brazil, a a karhateka hikwalaho ka vuhomboloki bya ta ntshamisano wa misava. Kutani u weriwe hi khombo. Buti wa yena, loyi a ri ni gome u tisungile. Loko Fabiana a heleriwe hi ntirho, munghana wa yena u ringanyete leswaku a lava pai-de-santo (n’anga ya xintima), a ehleketa leswaku leswi Fabiana a nga wela hi khombo rolero un’wana u fanele a n’wi endlele migilo! Kambe pai-de-santo a yi n’wi pfunanga. Ematshan’weni ya sweswo, Fabiana u vone onge wa xanisiwa, a nga koti ku etlela hikwalaho ka maxangu ya yena.

Ku xaniseka ka Ana ku sungule a ha ri ntsongo. Wa hlamusela: “Loko ndzi ri ni lembe rin’we hi vukhale, manana u ndzi tshikile, kutani ndzi khathaleriwe hi kokwa wa mina wa xisati.” Kutani loko Ana a ri ni malembe manharhu hi vukhale, kokwa wa yena wa xisati u lovile. Ana u yisiwe laha a ku khathaleriwa swisiwana kona le Rio de Janeiro, laha a tshameke kona ku kondza a va na 13 wa malembe. U ri: “A hi khomiwa hi ndlela yo biha swinene, ivi ndzi xandzuka. Loko ndzi ri karhi ndzi kula, a ndzi lwisana ni xilo xin’wana ni xin’wana.”

Ku xaniseka ku vonaka ku khumba vutomi bya munhu un’wana ni un’wana hi ndlela yo karhi. Hakunene, hi twa mahungu ya makhombo ya vanhu siku na siku—loko hi hlalela, hi ma hlaya kumbe hi yingisela timhaka. Dok. Mary Sykes Wylie wa tsala: “Nguva ya hina . . . ya tindlela to tala to vulavurisana, yi endla hi nga swi koti ku balekela ku hlaseriwa loku hambetaka ka mahungu layo biha. Tinyimpi, makhombo ya ntumbuluko, makhombo ya le tindhawini ta vumaki, timhangu ta le patwini leti dlayaka, vugevenga, vutherorisi, ku khomiwa hi ndlela yo biha hi tlhelo ra rimbewu, ku pfinya, madzolonga ya le ndyangwini—hinkwaswo swi endla ntshikilelo wu va nchumu lowu chavisaka lowu vuyaka emianakanyweni siku na siku wa lembe-xidzana leri ra vu-20.” Muapostola wa Mukreste Pawulo hi xiviri u katsakanye leswi humelelaka munhu hi ku: “Swivumbiwa hinkwaswo swa konya hi ku vaviseka.”—Varhoma 8:22.

Ku vuriwa yini hi wena? Xana wa xaniseka? Xana u nga langutela ku pfuniwa ka muxaka muni? Xana u ta kala u ku kuma ku rhula ka ntiyiso? Sonia, Fabiana, na Ana va kume ku chaveleleka ka xiviri ni mpimo wo karhi wa ku rhula ka xiviri! U nga hlaya hi mhaka leyi exihlokweni lexi landzelaka.

[Nhlamuselo ya le hansi]