Wa Tsundzuka Xana?

Xana u tshame u anakanyisisa swinene hi minkandziyiso ya sweswinyana ya Xihondzo xo Rindza? Loko swi ri tano, u ta tsakela ku tsundzuka leswi landzelaka:

◻ Xana namuntlha mimpatswa yo tala leyi tekaneke yi landzelele xikombiso lexinene xa Akwila na Prisila hi ndlela yihi?

Akwila na Prisila va tirhe emavandlheni yo hlayanyana lama hambaneke. Ku fana na vona, Vakreste vo tala va manguva lawa va tiendla va kumeka leswaku va rhurhela laha xilaveko xi kuleke swinene kona. Va tlhele va kuma ntsako ni ku eneriseka loku vangiwaka hi ku vona swilaveko swa Mfumo swi ri karhi swi kula, ni leswi va kotaka ku hlakulela vunghana bya Vukreste bya risima.—12/15, tluka 24.

◻ Xana hi rihi vonelo ra Bibele hi swakunwa swa xihoko?

Vonelo ra Bibele hi swakunwa swa xihoko hi leri ringaniseriweke. Hi hala tlhelo, Bibele yi vula leswaku vhinyo i nyiko leyi humaka eka Xikwembu. (Pisalema 104:1, 15) Hi tlhelo lerin’wana, yi sola ku nwa ku tlula mpimo. (Luka 21:34; 1 Timotiya 3:8; Tito 2:3; 1 Petro 4:3)—12/15, tluka 27.

◻ Hi xihi xivumbeko xa nkoka xa buku ya Bibele ya Hagayi?

Hambileswi buku ya Hagayi yi nga na tindzimana ta 38, vito ra Xikwembu ri tirhisiwa minkarhi ya 35. Vuprofeta byo tano a byi twali kahle loko vito ra Yehovha ri siviwa hi xithopo lexi nge “Hosi.”—1/1, tluka 6.

◻ Hi yihi dyondzo leyi nga dyondziwaka eka swidyoho swa Davhida na Manase?

Ku nga khathariseki leswi Yehovha a rivaleleke Davhida na Manase, vavanuna lava—vona kun’we na Israyele—va boheke ku kuma vuyelo bya swiendlo swa vona swa vudyoho. (2 Samuwele 12:11, 12; Yeremiya 15:3-5) Hi ndlela leyi fanaka, hambiloko Yehovha a rivalela vadyohi lava hundzukaka, ku nga ha va ni vuyelo lebyi nga papalatekiki bya swiendlo swa vona.—1/1, tluka 27.

◻ Xana ‘milenge ya lava chumayelaka mahungu lamanene’ ya Mfumo wa Xikwembu yi “sasekile” hi ndlela yihi? (Esaya 52:7)

I milenge leyi hi ntolovelo yi fambisaka munhu, loko a ri karhi a ya eku chumayeleni ka van’wana. Hakunene milenge yo tano, yi fanekisela munhu. Kutani eka vo tala lava tweke va tlhela va angula kahle eka mahungu lamanene ya Mfumo, milenge ya varhumiwa vo tano yi languteka yi ri yo saseka hakunene.—1/15, tluka 13.

◻ Hi wihi ntirho wa swiyenge swimbirhi lowu katsekaka eku “twaris[eni] ka Mahungu Lamanene”? (1 Vakorinto 9:16)

Xo sungula, hi fanele hi huwelela mahungu lamanene ya Mfumo. Xiyenge xa vumbirhi xa ntirho lowu xi katsa ku dyondzisa lava angulaka hi ndlela leyinene eku huweleriweni ka Mfumo.—1/15, tluka 23.

◻ Hi byihi vuyelo bya munhu hi xiyexe lebyi vaka kona eku yimbeleleni ka tinsimu ta Mfumo eminhlanganweni ya vandlha?

Ku yimbelela ku hi nyika nkarhi wo phofula mintlhaveko ya hina malunghana ni Muvumbi wa hina. (Pisalema 149:1, 3) Loko hi yimbelela hi timbilu ta hina hinkwato swin’we ni vandlha, swi nga ha endla leswaku mianakanyo ni timbilu ta hina swi va eka nongonoko lowu landzelaka. Swi nga hi susumetela ku hlanganyela swinene evugandzerini bya Yehovha.—2/1, tluka 28.

◻ Xana swi nga vurisiwa ku yini leswaku siku ra ku fa ri tlula siku ra ku velekiwa? (Eklesiasta 7:1)

Siku ra ku fa ri nga antswa ku tlula siku leri munhu a tswariweke ha rona loko munhu enkarhini wolowo se a tiakele vito lerinene na Yehovha, loyi a nga swi kotaka ku pfuxa vanhu lava tshembekeke, loko va file. (Yohane 11:25)—2/15, tluka 12.

◻ Ha yini buku ya Eklesiasta yi fanele yi pfuna un’wana ni un’wana wa hina?

Yi nga pfuna un’wana ni un’wana wa hina leswaku a va ni hi langutelo lerinene hi vutomi ni leswi a faneleke a tikarhatela swona. (Eklesiasta 7:2; 2 Timotiya 3:16, 17)—2/15, tluka 16.

◻ Xana Timbhoni ta Yehovha i van’waxisungusungu?

E-e. Hambileswi ti nga ni mimpimanyeto leyi tiyeke ya vukhongeri, a hi van’waxisungusungu hi laha rito leri ri tirhisiweke hakona. A ti tirhisi minkombiso ya ku vilela ni madzolonga leswaku ti lwisana ni lava va nga pfumelelaniki na tona. Ti tekelela Murhangeri wa tona, Yesu Kreste.—3/1, tluka 6.

◻ Ku nga tivi nkarhi lowu kongomeke wa ku tisa ka Yesu ku avanyisa ka Xikwembu ku ni vuyelo byihi eka Vakreste?

Leswi swi endla leswaku Vakreste va gingiriteka naswona swi va nyika nkarhi siku na siku wa leswaku va kombisa leswaku va tirhela Yehovha handle ka vutianakanyi.—3/1, tluka 13.

◻ I yini lexi hi faneleke hi xi tsundzuka hi nga si mangalela makwerhu loyi a nga ha vaka a hi kanganyisile?

Hi fanele hi tsundzuka vuyelo lebyi nga ha vaka kona eka hina, eka van’wana lava katsekaka, evandlheni ni le ka vanhu va le handle. (1 Vakorinto 6:7)—3/15, tluka 22.

◻ Xana ntsako wa ntiyiso wu nga kumiwa hi ndlela yihi?

Ntsako wa ntiyiso i xiyimo xa mbilu, lexi sekeriweke eka ripfumelo ra xiviri ni vuxaka lebyinene na Yehovha. (Matewu 5:3)—3/15, tluka 23.

◻ Xana Mukreste u fanele a endla yini loko a vitaniwa leswaku a ya nghenela ntirho wa huvo yo avanyisa?

Mukreste un’wana ni un’wana la langutaneke ni ntirho wa huvo u fanele a endla xiboho xa leswaku u ta landzelela ndlela yihi, lexi sekeriweke eku twisiseni ka yena Bibele ni le ka ripfalo ra yena n’wini. (Vagalatiya 6:5)—4/1, tluka 29.