Loko Yesu A Ta Hi Ku Vangama Ka Mfumo

“Van’wana exikarhi ka lava nga kwala, . . . [a] va nga khumbiwi hi rifu va nga si vona N’wana-wa-Munhu a vuya eMfun’weni wa yena.”—MATEWU 16:28.

1, 2. Ku humelele yini endzhakunyana ka Pentekosta ya 32 C.E., naswona a ku ri xihi xikongomelo xa xiendlakalo xexo?

ENDZHAKUNYANA ka Pentekosta ya 32 C.E., vaapostola vanharhu va Yesu Kreste va vone xivono lexi nga rivalekiki. Hi ku ya hi rhekhodo leyi huhuteriweke, “Yesu a teka va Petro na Yakobo na Yohane makwa Yakobo, a ya na vona entshaveni leyo leha va ri voxe. Kutani a hundzuka emahlweni ka vona.”—Matewu 17:1, 2.

² Xivono lexi xa ku hundzuka xi te hi nkarhi wo nonon’hwa. Yesu a ha ku byela valandzeri vakwe leswaku u ta twisiwa ku vaviseka ni ku fa eYerusalema, kambe marito yakwe a ma va tikela ku ma twisisa. (Matewu 16:21-23) Xivono lexi xi tiyise ripfumelo ra vaapostola vanharhu va Yesu leswaku va ta kota ku langutana ni rifu rakwe leri taka swin’we ni malembe ya ntirho lama nonon’hwaka ni ndzingo lowu a wu ta wela vandlha ra Vukreste. Xana hina namuntlha hi nga dyondza swo karhi eka xivono lexi? Ina, hikuva entiyisweni leswi a swi fanekisela swona swi humelela enkarhini wa hina.

3, 4. (a) Xana Yesu u vule yini emasikwini ya tsevu emahlweni ka ku hundzuka ka yena? (b) Hlamusela leswi humeleleke hi nkarhi wa ku hundzuka loku.

³ Masiku manharhu emahlweni ka ku hundzuka loku, Yesu u byele valandzeri vakwe a ku: “N’wana-wa-Munhu ú ta vuya hi ku kwetsima ka Tata wa yena, a ri ni tintsumi ta yena, kutani hi kona a nga ta nyika un’wana ni un’wana hi ku ya hi mintirho ya yena.” Marito lawa a ma ta hetiseka ‘eku heleni ka mafambiselo ya swilo.’ Yesu u ye emahlweni a ku: “Ndzi tiyisile ndzi ri ka n’wina: Ku ni van’wana exikarhi ka lava nga kwala, lava nga ta ka va nga khumbiwi hi rifu va nga si vona N’wana-wa-Munhu a vuya eMfun’weni wa yena.” (Matewu 16:27, 28; 24:3; 25:31-34, 41; Daniyele 12:4) Ku hundzuka loku ku endleke leswaku ku hetiseka marito lawa yo hetelela.

⁴ Kahle-kahle, i yini leswi vaapostola lavanharhu va swi voneke? Luka u hlamusela leswi humeleleke hi marito lama landzelaka: “Loko [Yesu] a ri karhi a khongela, nghohe ya yena yi vonaka yi hundzukile, swiambalo swa yena swi basa, swi vangama. Kutani hi nomu lo, ku humelela vavanuna vambirhi va vulavula na yena, va nga vona Muxe na Eliya. Va humelela va ri lava kwetsimaka, kutani va vulavula hi ta ku hundza ka yena emisaveni, loku nga ta fanela ku endleka eYerusalema.” Kutani, “papa ri ta, ri ta va funengeta [vavapostola]; loko va ri endzeni ka rona, vadyondzisiwa lava va khomiwa hi ku chava. Kutani rito ri huma epapeni ri ku: ‘Loyi i N’wananga, loyi ndzi n’wi hlawuleke, n’wi yingiseni!’”—Luka 9:29-31, 34, 35.

Ripfumelo Ra Hina Ra Tiyisiwa

5. Xana ku hundzuka loku ku n’wi khumbe njhani muapostola Petro?

⁵ Muapostola Petro ana se a hlamusele Yesu tanihi “Mesiya, N’wana wa Xikwembu lexi hanyaka.” (Matewu 16:16) Marito ya Yehovha lama humaka etilweni a ma tiyisekisa nhlamuselo yoleyo, naswona xivono xa ku hundzuka ka Yesu a xi fanekisela ku ta ni ku vangama ka Kreste ematimbeni ya Mfumo, laha eku heteleleni a nga ta avanyisa vanhu. Ku tlula 30 wa malembe endzhaku ka ku hundzuka koloko, Petro u tsarile a ku: “A hi landzanga mintsheketo yo endliwa hi vutlhari, loko hi mi tivisile ta ku humelela hi matimba ka Hosi ya hina Yesu Kriste; hina hi timbhoni ta vukulukumba bya yena, lebyi hi nga byi vona hi mahlo. Hikuva siku a nga nyikiwa ku dzuneka ni ku twala hi Xikwembu Tatana, rito ri fikile eka yena ri ta hi ku kwetsima loku hlamarisaka, ri ku: ‘Loyi i N’wananga, loyi ndzi n’wi rhandzaka ni ku n’wi tsakela.’ Kutani hina hi ri twile rito leri, loko ri huma etilweni, hikuva a hi ri na yena entshaveni leyo hlawuleka.”—2 Petro 1:16-18; 1 Petro 4:17.

6. Hi swihi swiendlakalo leswi xiyekeke endzhaku ka hundzuka loku?

⁶ Namuntlha, ripfumelo ra hina na rona ra tiyisiwa hi leswi vaapostola lavanharhu va swi voneke. Kavula, swiendlakalo swi ye emahlweni swi humelela ku sukela hi 32 C.E. Hi lembe leri tlhandlameke, Yesu u file a tlhela a pfuxiwa eku feni, a tlhandluka a ya evokweni ra xinene ra Tata wakwe. (Mintirho 2:29-36) Hi Pentekosta ya lembe rero, ku tswariwe “Israyele [lontshwa] wa Xikwembu,” naswona tsima ro chumayela ri sungurile, ku sukela eYerusalema kutani endzhaku ka nkarhi ri hangalaka ku ya fika ni le makun’wini ya misava. (Vagalatiya 6:16, NW; Mintirho 1:8) Hi ku hatlisa ripfumelo ra valandzeri va Yesu ri ringiwile. Vaapostola va khomiwile va tlhela va biwa swinene hikwalaho ko ala ku tshika ku chumayela. Ku nga ri kungani Stefano u dlayiwile. Kutani Yakobo, mbhoni leyi voneke ku hundzuka koloko hi mahlo, u dlayiwile. (Mintirho 5:17-40; 6:8–7:60; 12:1, 2) Hambiswiritano, Petro na Yohane, va ponile leswaku va ta tirhela Yehovha hi vutshembeki malembe man’wana lama engetelekeke. Entiyisweni, ekusuhi ni ku hela ka lembe-xidzana ro sungula C.E., Yohane u tsale marungula lama engetelekeke hi ku komisa malunghana ni ku vangama ka Yesu ka le tilweni.—Nhlavutelo 1:12-20; 14:14; 19:11-16.

7. (a) Xana xivono xa ku hundzuka xi sungule rini ku hetiseka? (b) Xana Yesu u va hakele rini van’wana hi ku ya hi swiendlo swa vona?

⁷ Ku sukela eku sunguleni ka “siku ra Hosi” hi 1914, swo tala swa swivono leswi voniweke hi Yohane a swi ri karhi swi hetiseka. (Nhlavutelo 1:10) Ku vuriwa yini hi loko Yesu a ‘ta eku vangameni ka Tata wakwe,’ hilaha ku fanekiseriweke hakona hi ku hundzuka? Xivono lexi xi sungule ku hetiseka eku velekiweni ka Mfumo wa Xikwembu wa le tilweni hi 1914. Loko Yesu tanihi nyeleti ya siku, a humelerile exivonweni xa vuako hinkwabyo tanihi Hosi leyintshwa leyi vekiweke exiluvelweni xa vuhosi, sweswo a ku ri ku sungula ka siku lerintshwa. (2 Petro 1:19; Nhlavutelo 11:15; 22:16) Xana enkarhini wolowo Yesu u hakele van’wana hi ku ya hi swiendlo swa vona? Ina. Ku ni vumbhoni lebyi tiyeke bya leswaku endzhakunyana ka kwalaho, ku pfuxeriwa etilweni ka Vakreste lava totiweke ku sungurile.—2 Timotiya 4:8; Nhlavutelo 14:13.

8. Hi swihi swiendlakalo leswi nga ta fungha makumu ya ku hetiseka ka xivono xa ku hundzuka?

⁸ Hambiswiritano, ku nga ri kungani Yesu u ta fika “hi ku kwetsima ka yena, ni tintsumi hinkwato ti ri na yena” leswaku a ta avanyisa vanhu hinkwavo. (Matewu 25:31) Enkarhini wolowo, u ta tikombisa eku kwetsimeni ka yena lokukulu naswona u ta “nyika un’wana ni un’wana” hi ku ya hi swiendlo swa yena. Lava fanaka ni tinyimpfu va ta kuma vutomi lebyi nga heriki eMfun’weni lowu lunghiseleriweke vona, naswona lava fanaka ni timbuti va ta “ya eku biweni loku nga heriki.” Wa nga vona makumu lama hlamarisaka swinene ya ku hetiseka ka xivono xolexo xa ku hundzuka!—Matewu 25:34, 41, 46; Marka 8:38; 2 Vatesalonika 1:6-10.

Vanakulobye Va Yesu Lava Kwetsimisiweke

9. Xana hi fanele hi langutela leswaku Muxe na Eliya va va na Yesu eku hetisekeni ka xivono xa ku hundzuka? Hlamusela.

⁹ Yesu a a nga ri yexe loko a hundzuka. U voniwe a ri na Muxe na Eliya. (Matewu 17:2, 3) Xana a va ri kona hi xiviri? E-e, hikuva vavanuna lava havambirhi a va fe khale naswona ana se a va etlele entshurini va rindzele ku pfuxiwa ka vafi. (Eklesiasta 9:5, 10; Vaheveru 11:35) Xana va ta humelela na Yesu loko a ta eku kwetsimeni ka le tilweni? E-e, hikuva Muxe na Eliya va hanye enkarhini lowu ntshembo wo hanya etilweni a wu nga si pfuleriwa vanhu. Va ta va xiphemu xa ‘lavo lulama lava nga ta pfuxiwa eku feni’ laha misaveni. (Mintirho 24:15) Hikwalaho ku humelela ka vona exivonweni xa ku hundzuka loku i ko fanekisela. Ku fanekisela yini?

10, 11. I vamani lava Eliya na Muxe a va fanekisela vona hi mongo lowu hambaneke?

¹⁰ Minkarhi yin’wana, Muxe na Eliya i vaprofeta vo fanekisela. Tanihi muhlanganisi wa ntwanano wa Nawu, Muxe a a fanekisela Yesu, Muhlanganisi wa ntwanano lowuntshwa. (Deteronoma 18:18; Vagalatiya 3:19; Vaheveru 8:6) Eliya a a fanekisela Yohane Mukhuvuri, mubula-ndlela wa Mesiya. (Matewu 17:11-13) Ku tlhandlekela kwalaho, hi ku ya hi mongo wa Nhlavutelo ndzima 11, Muxe na Eliya a va fanekisela masalela lama totiweke eminkarhini ya makumu. Xana hi swi tivisa ku yini sweswo?

¹¹ Kutani, pfula eka Nhlavutelo 11:1-6. Eka ndzimana 3 ha hlaya: “Ndzi ta nyika timbhoni ta mina timbirhi ematimba yo vula Rito hi masiku lawa ya 1260, ti ambele tinguvu leto khwaxa.” Vuprofeta lebyi a byi ri karhi byi hetiseka eka masalela ya Vakreste lava totiweke hi nkarhi wa Nyimpi yo Sungula ya Misava.a Ha yini ti ri timbhoni timbirhi? Hikuva masalela lama totiweke ma endla mintirho ya swa moya, leyi fanaka ni leyi a yi endliwa hi Muxe na Eliya. Tindzimana 5 na 6 ti ya emahlweni ti ku: “Loko munhu a ringeta ku va vavisa [timbhoni timbirhi], ku huma ndzilo hi le milon’weni ya vona, wu herisa valala va vona; hi mukhuva wolowo munhu wihi na wihi loyi a nga ta ringeta ku va vavisa, u ta fanela ku dlawa. Va ni matimba yo pfala tilo leswaku mpfula yi nga ni, loko va ri karhi va vula Rito. Naswona va ni matimba yo hundzula mati hinkwawo ma endla ngati; va nyikiwile ni matimba ya ku ba misava hi mintungu ya tinxakaxaka, nkarhi wihi na wihi loko va swi lava.” Xisweswo, hi tsundzuxiwa masingita lama endliweke hi Eliya na Muxe.—Tinhlayo 16:31-34; 1 Tihosi 17:1; 2 Tihosi 1:9-12.

12. Hi ku ya hi mongo wa ku hundzuka, i vamani lava fanekiseriwaka hi Muxe na Eliya?

¹² Kutani, xana Muxe na Eliya va fanekisela vamani emhakeni leyi ya ku hundzuka? Luka u vula leswaku va humelele va ri swin’we na Yesu “va ri lava kwetsimaka.” (Luka 9:31) Handle ko kanakana, a va fanekisela Vakreste lava totiweke hi moya lowo kwetsima tanihi “vadyandzhaka” swin’we na Yesu lava kumeke ntshembo lowu hlamarisaka wo “kwetsimisiwa” na yena. (Varhoma 8:17) Vatotiwa lava pfuxiweke eku feni va ta va na Yesu loko a ta eku kwetsimeni ka Tata wakwe leswaku a “nyika un’wana ni un’wana hi ku ya hi mintirho ya yena.”—Matewu 16:27.

Timbhoni Leti Fanaka Na Muxe Na Eliya

13. I swiendlakalo swihi leswi endlaka Muxe na Eliya va faneleka ku va swikombiso swa vuprofeta swa vadyandzhaka-kulobye va Yesu lava kwetsimisiweke na yena?

¹³ Ku ni swivumbeko leswi xiyekaka leswi endlaka Muxe na Eliya va va swikombiso leswi fanelaka swa vuprofeta bya vadyandzhaka-kulobye na Yesu lava totiweke. Havambirhi ka vona Muxe na Eliya va tirhe tanihi vavulavuleri va Yehovha ku ringana malembe layo tala. Havambirhi va tshame va langutana ni vukarhi bya valawuri. Loko va pfumala, un’wana ni un’wana u wundliwe hi ndyangu wa vanhu vambe. Havambirhi ka vona va profete hi xivindzi eka tihosi ni ku yima va tiyile va lwisana ni vaprofeta va mavunwa. Muxe na Eliya va vone swikombiso swa matimba ya Yehovha eNtshaveni ya Sinayi (leyi nakambe yi vitaniwaka Horebu). Hinkwavo va hlawule vatlhandlami va vona evuxeni bya Yordani. Naswona enkarhini wa vona havambirhi Muxe (a ri na Yoxuwa) na Eliya (a ri na Elixa) va vone mahlori yo tala lamakulu, lama hambaneke ni lama humeleleke enkarhini wa Yesu.b

14. Xana vatotiwa va tirhe njhani tanihi muvulavuleri wa Yehovha, kukota Muxe na Eliya?

¹⁴ Xana sweswo hinkwaswo a swi hi tsundzuxi Israyele wa Xikwembu? Ina, swi hi tsundzuxa yena. Yesu u byele valandzeri va yena lavo tshembeka a ku: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n’wina masiku hinkwawo, ku ko ku hela misava.” (Matewu 28:19, 20) Hi ku yingisa marito lawa, Vakreste lava totiweke va tirhe tanihi muvulavuleri wa Yehovha ku sukela hi Pentekosta ya 33 C.E. ku fikela sweswi. Tanihi Muxe na Eliya, a va langutane ni vukari bya valawuri, naswona va nyikele vumbhoni eka vona. Yesu u byele vaapostola vakwe va 12 a ku: “Mi ta yisiwa emahlweni ka tindhuna ni le mahlweni ka tihosi hikwalaho ka mina, leswaku mi humesa vumbhoni eka vona ni ka vamatiko.” (Matewu 10:18) Marito yakwe a ma ri karhi ma hetiseka hi ku phindha-phindha ematin’wini ya vandlha ra Vukreste.—Mintirho 25:6, 11, 12, 24-27; 26:3.

15, 16. Hi kwihi ku yelana loku nga kona exikarhi ka vatotiwa ni loku a ku ri kona eka Muxe na Eliya (a) emhakeni ya vona yo yimela ntiyiso handle ko chava? (b) kuma mpfuno eka lava nga riki Vaisrayele?

¹⁵ Ku tlhandlekela kwalaho, ku fana na Muxe na Eliya, Vakreste lava totiweke a va ri karhi va yimela ntiyiso va lwisana ni mavunwa ya vukhongeri handle ko chava. Tsundzuka ndlela leyi Pawulo a soleke Bariyesu muprofeta wa mavunwa wa Muyuda ha yona, ni ku paluxa mavunwa ya swikwembu swa Vaatena hi vutlhari kambe a tiyile. (Mintirho 13:6-12; 17:16, 22-31) Nakambe tsundzuka leswaku eminkarhini ya manguva lawa masalela lama totiweke hi xivindzi ma paluxe Vujagana naswona ku nyikeriwa koloko ka vumbhoni ku byi karhatile.—Nhlavutelo 8:7-12.c

¹⁶ Loko Muxe a balekela vukari bya Faro, u ye a ya tumbela ekaya ra Rhuwele loyi a nga riki Muisrayele, loyi nakambe a vitaniwa Yetro. Endzhaku ka nkarhi, Muxe u kume ndzayo leyinene eka Rhuwele malunghana ni nhleleko, loyi n’wana wakwe Hobabu, a kongomiseke Vaisrayele loko va ri karhi va famba emananga.d (Eksoda 2:15-22; 18:5-27; Tinhlayo 10:29) Xana swirho swa Israyele wa Xikwembu swi pfuniwe hi ndlela leyi fanaka hi vanhu lava nga riki swirho leswi totiweke swa Israyele wa Xikwembu? Ina, a swi ri karhi swi pfuniwa hi “ntshungu lowukulu” wa “tinyimpfu tin’wana,” lowu humeleleke eminkarhini leyi ya makumu. (Nhlavutelo 7:9; Yohane 10:16; Esaya 61:5) Loko a vhumba nseketelo wa rirhandzu lowu “tinyimpfu” a ti ta wu nyika vamakwavo lava totiweke, Yesu u va byele leswi hi ndlela yo profeta: “‘A ndzi ri ni ndlala, kutani mi ndzi fihlutile; a ndzi ri ni torha, mi ndzi siyele ndzi nwa; a ndzi ri muendzi, mi ndzi rhurherile; a ndzi swerile, mi ndzi ambexile; a ndzi vabya, mi ndzi ongorile; a ndzi ri ekhotsweni, mi tile mi ta ndzi kamba.’ . . . ‘Ndzi tiyisile ndzi ri ka n’wina, loko mi tshame mi endla swilo leswi eka un’wana wa vamakwerhu lavatsongo lava, mi swi endlele mina.’”—Matewu 25:35-40.

17. Xana vatotiwa va ve ni ntokoto wihi lowu fanaka ni wa Eliya eNtshaveni ya Horebu?

¹⁷ Ku tlhandlekela kwalaho, Israyele wa Xikwembu u ve ni ntokoto lowu fanaka ni wa Eliya eNtshaveni ya Horebu.e Kukotisa Eliya hi nkarhi lowu a baleka Nkosikazi Yezabele, masalela lama totiweke lama nga ni xivindzi a ma anakanya leswaku ntirho wa wona wu herile eku heleni ka Nyimpi yo Sungula ya Misava. Nakambe ku fana na Eliya, a ma ri ni vutihlamuleri eka Yehovha, loyi a teke ku ta avanyisa tinhlengeletano leti tivulaka “yindlu ya Xikwembu.” (1 Petro 4:17; Malakiya 3:1-3) Loko Vujagana byi kumiwe byi nga rindzelanga nchumu, masalela lama totiweke ma tlhele ma hleriwa tanihi “nandza la tshembekaka, wo tlhariha” kutani ma hlawuleriwe ku langutela swilo swa Yesu swa la misaveni hinkwaswo. (Matewu 24:45-47) EHorebu, Eliya u twe “mpfumawulonyana lo’wo nanḍiha” lowu tikombaka wu ri wa Yehovha, a n’wi nyika ntirho lowu engetelekeke leswaku a wu endla. Hi nkarhi lowu rhuleke wa le ndzhaku ka nyimpi, malandza ya Yehovha yo tshembeka lama totiweke ma twe rito rakwe eBibeleni. Na wona ma swi xiyile leswaku ma ni xileriso lexi ma faneleke ma xi hetisisa.—1 Tihosi 19:4, 9-18; Nhlavutelo 11:7-13.

18. Xana swikombiso leswi xiyekaka swa matimba ya Yehovha a swi endlisiwa ku yini hi ku tirhisa Israyele wa Xikwembu?

¹⁸ Xo hetelela, xana swikombiso swa matimba ya Yehovha a swi ri karhi swi kongomisiwa hi ku tirhisa lsrayele wa Xikwembu? Endzhaku ka rifu ra Yesu, vaapostola va endle masingita yo tala, kambe hakatsongo-tsongo ma ye ma hela. (1 Vakorinto 13:8-13) Emasikwini ya sweswi, a hi ma voni mahlori hi tlhelo ra nyama. Hi hala tlhelo, Yesu u byele valandzeri vakwe a ku: “Ndzi tiyisisile ndzi ri ka n’wina: La pfumelaka ka mina, na yena ú ta endla mintirho leyi ndzi yi endlaka; ú ta endla ni leyi tlulaka yoleyi.” (Yohane 14:12) Loku a ku ri ku hetiseka ko sungula loko vadyondzisiwa va Yesu va ri karhi va chumayela mahungu lamanene eMfun’weni hinkwawo wa Rhoma eka lembe-xidzana ro sungula. (Varhoma 10:18) Ni namuntlha ku endliwa hambi yi ri mintirho leyikulu tanihi leswi masalela lama totiweke ma rhangeleke eku chumayeriweni ka mahungu lamanene leswaku ma “va vumbhoni eka vanhu va matiko hinkwawo.” (Matewu 24:14) Xana vuyelo byi ve byihi? Eka lembe-xidzana ra vu-20 ku ve ni ku hlengeletiwa lokukulu ka malandza ya Yehovha lama tshembekeke lama tinyiketeleke ematin’wini. (Nhlavutelo 5:9, 10; 7:9, 10) Wa nga vona vumbhoni lebyi xiyekaka bya matimba lamakulu ya Yehovha!—Esaya 60:22.

Vamakwavo Va Yesu Va Ta Eku Kwetsimeni

19. Xana vamakwavo va Yesu lava totiweke va voniwa rini va ri karhi va kwetsimisiwa na yena?

¹⁹ Loko masalela ya vamakwavo va Yesu ma ri karhi ma heta pfhumba ra vona ra laha misaveni, va kwetsimisiwa na yena. (Varhoma 2:6, 7; 1 Vakorinto 15:53; 1 Vatesalonika 4:14, 17) Xisweswo va va tihosi ni vaprista lava nga fiki eMfun’weni wa le tilweni. Va ri swin’we na Yesu enkarhini wolowo va ta ‘risa vanhu hi nhonga ya nsimbhi, va va fayetela kukota timbita ta vumba.’ (Nhlavutelo 2:27; 20:4-6; Pisalema 110:2, 5, 6) Va ri na Yesu, va ta tshama eswiluvelweni swa vuhosi va avanyisa “tinyimba ta Israele leta 12.” (Matewu 19:28) Swivumbiwa leswi konyaka a swi ri karhi swi rindzele swiendlakalo leswi hi mahlo-ngati, leswi nga xiphemu lexi “Xikwembu xi kombisa[ka] erivaleni vana va xona.”—Varhoma 8:19-21; 2 Vatesalonika 1:6-8.

20. (a) Xana xivono xa ku hundzuka xi tiyise ripfumelo ra Petro malunghana na yini? (b) Xana ku hundzuka loku ku va tiyisa njhani Vakreste namuntlha?

²⁰ Pawulo u vulavule hi nhlavutelo ya Yesu hi nkarhi wa ‘nhlomulo lowukulu’ loko a tsarile a ku: “[U] tela ku ta dzunisiwa exikarhi ka vahlawuriwa va y[e]na, ni ku voniwa hi vapfumeri hinkwavo.” (Matewu 24:21; 2 Vatesalonika 1:10) Mayana ntshembo wo tano lowunene eka Petro, Yakobo, Yohane na Vakreste hinkwavo lava totiweke hi moya! Ku hundzuka ku tiyise ripfumelo ra Petro. Entiyisweni, ku hlaya malunghana na kona swi tlhela swi tiyisa ripfumelo ra hina lerova hi tiyisa ntshembo wa hina wa leswaku ku nga ri khale Yesu u ta “hakela un’wana ni un’wana hi ku ya hi mintirho ya yena.” Vakreste vo tshembeka lava totiweke lava hanyeke ku ta fikela sweswi va vona ntshembo wa vona wa leswaku va ta kwetsimisiwa na Yesu wu ri karhi wu tiyisekisiwa. Tinyimpfu tin’wana ti tiyisiwile eripfumelweni hi ku va ni vutivi bya leswaku u ta ti ponisa eku heleni ka mafambiselo lawa ya swilo yo homboloka ti ya emisaveni leyintshwa leyo vangama. (Nhlavutelo 7:14) Vona xikhutazo xo tano xo yima hi tiyile ku ya fikela emakumu! Naswona xivono lexi xi nga hi dyondzisa swo tala leswi engetelekeke, hilaha hi nga ta swi vona hakona eka xihloko lexi landzelaka.

[Tinhlamuselo ta le hansi]

Wa Tsundzuka Xana?

◻ I vamani lava humeleleke va ri na Yesu loko a hundzuka?

◻ Xana ripfumelo ra vaapostola ri tiyisiwe njhani hi ku hundzuka loku?

◻ Loko Muxe na Eliya va humelerile “eku kwetsimeni” va ri na Yesu loko a hundzuka, xana a va yimela vamani?

◻ Hi kwihi ku yelana loku nga kona exikarhi ka Muxe na Eliya ni loku nga kona eka Israyele wa Xikwembu?

[Xifaniso lexi nga eka tluka 10]

Ku hundzuka koloko ku tiyise ripfumelo ra Vakreste va le minkarhini leyi hundzeke ni va le minkarhini ya sweswi