KRESTE A HUNDZURIWA Ni KU VANGAMISIWA

Loko Yesu a ri karhi a dyondzisa vanhu exifundzheni xa Khezariya wa Filipi, lexi nga kwalomu ka 25 wa tikhilomitara ku suka eNtshaveni ya Herimoni, u tivisa vaapostola vakwe xitiviso xo hlamarisa a ku: “Ndzi tiyisile ndzi ri eka n’wina, ku ni van’wana lava yimeke laha, lava nga ta ka va nga fi va nga si vona N’wana wa munhu a ri eMfun’weni wakwe.”—Matewu 16:28.

Swi nga endleka vadyondzisiwa va tivutisa leswaku Yesu u vulavula hi yini. Endzhakunyana ka vhiki, u teka vaapostola vakwe vanharhu ku nga Petro, Yakobo na Yohane ivi a famba na vona entshaveni leyi tlakukeke. Swi nga endleka ku ri vusiku hikuva vavanuna lavanharhu va khudzehela. Loko Yesu a ri karhi a khongela, wa hundzuriwa emahlweni ka vona. Vaapostola va vona xikandza xakwe xi sungula ku hatima ku fana ni dyambu, swiambalo swakwe swi sungula ku vangama swi basa.

Hiloko ku humelela vavanuna vambirhi, lava fanekiselaka “Muxe na Eliya.” Va sungula ku vulavula na Yesu hi ku ‘tlhandluka kakwe loku a ku ta endleka eYerusalema.’ (Luka 9:30, 31) Swi le rivaleni leswaku ku tlhandluka kakwe swi vula rifu ni ku pfuxiwa ka yena, ku nga leswi a ha ku vulavulaka ha swona. (Matewu 16:21) Bulo leri ri kombisa leswaku ku hambana nileswi Petro a swi vuleke, a swi koteki ku balekela ku dlayiwa ka Yesu hi ndlela leyi khomisaka tingana.

Leswi se va pfukeke, vaapostola vanharhu va languta leswi nga eku endlekeni ni ku yingisela hi ku hlamala. Lexi i xivono kambe xi vonaka xi ri xa xiviri lerova Petro a ku: “Rabi, swa tsakisa ku va laha. Hi pfumelele hi dzima mitsonga yinharhu, wun’we wu va wa wena, wun’wana wu va wa Muxe, wun’wanyana wu va wa Eliya.” (Marka 9:5) Xana Petro u lava va dzima mitsonga hileswi a lavaka leswaku xivono lexi xi ya emahlweni?

Loko Petro a ha vulavula, papa leri vangamaka ri va funengeta kutani rito leri humaka epapeni ri ku: “Loyi i N’wananga, loyi ndzi n’wi rhandzaka, loyi ndzi n’wi amukeleke. N’wi yingiseni.” Loko va twa rito ra Xikwembu, vaapostola lava taleke hi ku chava va khinsama naswona swikandza swa vona swi langute ehansi kambe Yesu a va byela a ku: “Pfukani. Mi nga chavi.” (Matewu 17:5-7) Loko va pfuka, vaapostola lavanharhu a va ha voni munhu handle ka Yesu hikuva xivono se xi herile. Ninhlikanhi loko va rhelela va huma entshaveni, Yesu u ri: “Mi nga byeli munhu xivono lexi ku fikela loko N’wana wa munhu a pfuxiwile eku feni.”—Matewu 17:9.

Ku humelela ka Eliya exivonweni ku tlakusa xivutiso. Vaapostola va vutisa va ku: “Hikwalaho ka yini vatsari va vula leswaku ku fanele ku rhanga ku ta Eliya?” Yesu a hlamula a ku: “Eliya se u tile naswona a va n’wi lemukanga.” (Matewu 17:10-12) Yesu u vulavula hi Yohane Mukhuvuri, loyi a endleke ntirho wo fana ni wa Eliya. Eliya u lunghiselele Elixa ndlela, kasi Yohane u lunghiselele Kreste ndlela.

Mayana ndlela leyi xivono lexi xi tiyisaka Yesu ni vaapostola hayona. I xivono xa ku vangama ka Kreste eMfun’weni. Hilaha Yesu a tshembiseke hakona, vadyondzisiwa va vone “N’wana wa munhu a ri eMfun’weni wakwe.” (Matewu 16:28) Loko va ri entshaveni, va ve “timbhoni leti ku voneke hi mahlo ku vangama kakwe.” Hambileswi Vafarisi a va lava xikombiso xa leswaku Yesu u ta va Hosi leyi hlawuriweke ya Xikwembu, a nga va nyikanga xona. Kambe vadyondzisiwa va Yesu va pfumeleriwile ku vona ku hundzuriwa kakwe, sweswo swi tiyisekisa vuprofeta bya Mfumo. Endzhakunyana, Petro u tsale a ku: “Hi ni rito ra vuprofeta leri tiyisekisiweke swinene.”—2 Petro 1:16-19.