Ndzima 60
Xikombiso Xa Ku Kwetsima Ka Mfumo Ka Kriste
YESU u fike eswiphen’wini swa Khezariya wa Filipi, kutani u dyondzisa ntshungu lowu katsaka ni vaapostola vakwe. U endla xitiviso lexi xo hlamarisa eka vona a ku: “Ndzi tiyisile ndzi ri ka n’wina: Ku ni van’wana exikarhi ka lava nga kwala, lava nga ta ka va nga khumbiwi hi rifu va nga si vona N’wana-wa-Munhu a vuya eMfun’weni wa yena.”
‘Yesu a a vula yini?’ vadyondzisiwa va fanele va hlamala. Kwalomu ka vhiki endzhaku, Yesu u teka Petro, Yakobo na Yohane, va famba na yena kutani va khandziya entshaveni leyo leha. Byi vonaka byi ri vusiku, hi leswi vadyondzisiwa va khudzehelaka. Loko Yesu a ha khongela, wa hundzuka emahlweni ka vona. Nghohe yakwe yi sungula ku hatima kukota dyambu, na tinguvu ta yena ti hundzuka leto basa ti vangama kukotisa ku vonakala.
Kutani, vanhu vambirhi, lava fanaka na “Muxe na Eliya,” va humelela ivi va sungula ku vulavula na Yesu ‘hi ta ku hundza ka yena emisaveni loku nga ta endleka eYerusalema.’ Ku hundza emisaveni entiyisweni ku kombetela eka rifu ra Yesu ni ku pfuxiwa eka vafi loku landzelaka. Xisweswo, bulo leri ri komba leswaku rifu rakwe leri khomisaka tingana a hi nchumu lowu nga papalatekaka, hi laha Petro a naveleke ha kona.
Loko va sisimuke hi xitalo, vadyondzisiwa va languta ni ku yingisela hi ku hlamala. Hambi leswi leswi ku nga xivono, swi vonaka swi ri swa xiviri laha Petro a sungulaka ku hlanganyela eka xivono, a ku: “Hosi, swi sasekile loko hi ri kwala; loko u swi rhandza, ndzi nga aka mitsonga minharhu kwala, wun’wana wa wena, wun’wana wa Muxe, wun’wana wa Eliya.”
Loko Petro a ha vulavula, papa lero vangama ri va funengeta kutani rito leri humaka epapeni ri ku: “Loyi i N’wananga, la rhandzekaka, loyi ndzi n’wi tsakelaka, n’wi yingiseni!” Loko va twa rito, vadyondzisiwa va wa hi mimombo ya vona. Kambe Yesu u ri: “Sukani mi yima, mi nga chavi!” Loko va endla tano, a va voni munhu handle ka Yesu.
Endleleni ya vona loko va rhelela hi le ntshaveni siku leri tlhandlamaka, Yesu wa lerisa: “Mi nga tshuki mi byela vanhu leswi mi swi voneke, ku fikela loko N’wana-wa-Munhu a ta va a pfukile eku feni.” Ku vonaka ka Eliya exivonweni ku pfuxa xivutiso emiehleketweni ya vadyondzisiwa. Va vutisa, “Hikwalaho ka yini vatsari va vula leswaku Eliya u fanele ku rhanga a ta xana?”
“Eliya ú tile,” Ku vula Yesu, “ntsena a va n’wi tivanga.” Hambi swi ri tano, Yesu, u vulavula hi Yohane Mukhuvuri, loyi a hetiseke ntirho lowu fanaka ni wa Eliya. Yohane u lunghiselele ndlela ya Kriste, hi laha Eliya a n’wi lunghiseleleke ha kona Elixa.
Xivono lexi xi tikombe xi tiyisa swonghasi, eka Yesu ni le ka vadyondzisiwa vakwe! Xivono, hi xoxe, a xi ri xikombiso xa ku kwetsima ka Mfumo ka Krsite. Entiyisweni, vadyondzisiwa va vone “N’wana-wa-Munhu a vuya eMfun’weni wa yena,” hi laha Yesu a tshembiseke ha kona vhiki endzhakunyana. Endzhaku ka rifu ra Yesu, Petro u tsale hi ku va va ve ‘timbhoni ta vukulukumba bya Kriste loko va ri na yena entshaveni leyo kwetsima.’
Vafarisi va kombele Yesu xikombiso xo komba leswaku a a ri loyi a tshembisiweke eMatsalweni ku va Hosi leyi hlawuriweke ya Xikwembu. A va nyikiwanga xikombiso xo tano. Hi tlhelo rin’wana, vadyondzisiwa va Yesu va le kusuhi va pfumeleriwa ku vona ku hundzuka ka Yesu tanihi xitiyisekiso xa vuprofeta bya Mfumo. Xisweswo, Petro endzhaku u tsarile a ku: “Hikwalaho, rito ra vaprofeta, hina hi ri kuma ri tiyile ku tlula ni khale.” Matewu 16:13, 28–17:13; Marka 9:1-13; Luka 9:27-37; 2 Petro 1:16-19.
▪ Emahlweni ko khumbiwa hi rifu, van’wana va vone Kriste a vuya eMfun’weni wa yena hi ndlela yihi?
▪ Exivon’weni, i yini lexi Muxe na Eliya va vulavulaka hi xona na Yesu?
▪ Ha yini xivono lexi xi ri mpfuno lowu tiyisaka eka vadyondzisiwa?