Vutomi Ni Vutirheli Bya Yesu

Xikombiso Xa Ku Kwetsima Ka Mfumo Ka Kriste

YESU u yimile endleleni leyi yaka eKhezariya wa Filipi, kutani u dyondzisa ntshungu kun’we ni vaapostola vakwe. U endla xitiviso lexi xo hlamarisa eka vona a ku: “Ndzi tiyisile ndzi ri ka n’wina: Ku ni van’wana exikarhi ka lava nga kwala, lava nga ta ka va nga khumbiwi hi rifu va nga si vona N’wana-wa-Munhu a vuya eMfun’weni wa yena.”

‘Yesu a a vula yini?’ vadyondzisiwa va fanele va hlamala. Kwalomu ka vhiki endzhaku, Yesu u teka Petro, Yakobo na Yohane va famba na yena kutani va khandziya entshaveni leyo leha. Byi vonaka byi ri vusiku, hi leswi vadyondzisiwa va khudzehelaka. Loko Yesu a ha khongela, wa hundzuka emahlweni ka vona. Nghohe yakwe yi sungula ku hatima kukota dyambu, na tinguvu ta yena ti hundzuka leto basa ti vangama kukotisa ku vonakala.

Kutani, vanhu vambirhi, lava fanaka na “Muxe na Eliya,” va humelela ivi va sungula ku vulavula na Yesu ‘hi ta ku hundza ka yena emisaveni loku nga ta endleka eYerusalema.’ Ku hundza emisaveni entiyisweni ku kombetela eka rifu ra Yesu ni ku pfuxiwa evafini loku landzelaka. Xisweswo, bulo leri ri komba leswaku rifu rakwe leri khomisaka tingana a hi nchumu wo wu papalata, hi laha Petro a naveleke ha kona.

Loko va sisimuke hi xitalo, vadyondzisiwa va languta ni ku yingisela hi ku hlamala. Hambi leswi leswi ku nga xivono, swi vonaka swi ri swa xiviri laha Petro a sungulaka ku hlanganyela eka xivono, a ku: “Hosi, swi sasekile loko hi ri kwala; loko u swi rhandza, ndzi nga aka mitsonga minharhu kwala, wun’wana wa wena, wun’wana wa Muxe, wun’wana wa Eliya.”

Loko Petro a ha vulavula, papa lero vangama ri va funengeta kutani rito leri humaka epapeni ri ku: “Loyi i N’wananga, la rhandzekaka, loyi ndzi n’wi tsakelaka, n’wi yingiseni!” Loko va twa rito, vadyondzisiwa va wa hi mimombo ya vona. Kambe Yesu u ri: “Sukani mi yima, mi nga chavi!” Loko va endla tano, a va voni munhu handle ka Yesu.

Endleleni ya vona loko va rhelela hi le ntshaveni siku leri tlhandlamaka, Yesu wa lerisa: “Mi nga tshuki mi byela vanhu leswi mi swi voneke, ku fikela loko N’wana-wa-Munhu a ta va a pfukile eku feni.” Ku vonaka ka Eliya exivonweni ku pfuxa xivutiso emiehleketweni ya vadyondzisiwa. Va vutisa, “Hikwalaho ka yini vatsari va vula leswaku Eliya ú fanele ku rhanga a ta xana?”

“Eliya ú tile,” ku hlamula Yesu, “ntsena a va n’wi tivanga.” Hambi swi ri tano, Yesu, u vulavula hi Yohane Mukhuvuri, loyi a hetisiseke ntirho lowu fanaka ni wa Eliya. Yohane u lunghiselele ndlela ya ku ta ka Kriste, hi laha Eliya a n’wi lunghiseleleke ha kona Elixa.

Xivono lexi xi tikombe xi tiyisa swonghasi, eka Yesu ni le ka vadyondzisiwa vakwe! Xivono, hi xoxe, a xi ri xikombiso xa ku kwetsima ka Mfumo ka Kriste. Entiyisweni, vadyondzisiwa va vone “N’wana-wa-Munhu a vuya eMfun’weni wa yena,” hi laha Yesu a tshembiseke ha kona vhiki endzhakunyana. Endzhaku ka rifu ra Yesu, Petro u tsale hi ku ‘va timbhoni ta vukulukumba bya Kriste loko hi ri na yena entshaveni leyo kwetsima.’

Vafarisi va kombele Yesu xikombiso xo komba leswaku a a ri loyi a tshembisiweke eMatsalweni ku va Hosi leyi hlawuriweke ya Xikwembu. A va nyikiwanga xikombiso xo tano. Hi tlhelo rin’wana, vadyondzisiwa va Yesu va le kusuhi va pfumeleriwa ku vona ku hundzuka ka Yesu tanihi xitiyiso xa vuprofeta bya Mfumo. Xisweswo, Petro endzhaku u tsarile a ku: “Hikokwalaho, rito ra vaprofeta, hina hi ri kuma ri tiyile ku tlula ni khale.” Matewu 16:28–17:13; Marka 9:1-13; Luka 9:27-37; 2 Petro 1:16-19.

◆ Van’wana va vone Kriste a vuya eMfun’weni wa yena va nga si khumbiwa hi rifu hi ndlela yihi?

◆ Exivonweni, i yini lexi Muxe na Eliya a va vulavula hi xona na Yesu?

◆ Ha yini xivono lexi a xi ri mpfuno lowu tiyisaka eka vadyondzisiwa?

[Xifaniso lexi tataka tluka hinkwaro lexi nga eka tluka 9]