Xana Swa Ha Koteka Ku Horisa Hi Singita?

“PFUMELA eka Yesu kutani u ta hanyisiwa!” Swiga swo kota leswi swi vangele Alexandre, xirho xa kereke ya Evangelical, ku pfumela leswaku ku tshungula vuvabyi bya yena hi ku tirhisa mirhi swi ta kombisa ku pfumala ripfumelo. U sungule ku kholwa leswaku ripfumelo ra yena ri ri roxe ri ta n’wi horisa hi singita, ku nga nchumu lowu a lava wona. Benedita, Mukhatoliki la hisekaka u khumbeke swinene loko a twe mahungu-ndlela yo hanyisa hi singita evukwetsimelweni bya Aparecida do Norte, exifundzeni xa São Paulo, le Brazil. Hi ku tirhisa mavulavulelo ya masalamusi lawa mhani-nkulu wa yena a n’wi dyondziseke wona, Benedita u khongele eka Our Lady of Aparecida, Anthony ni “vakwetsimi” van’wana leswaku a kuma matimba yo horisa vavabyi.

Handle ko kanakana, hambi ku ri eka lembe-xidzana leri ra vu-20, vanhu vo tala va ha pfumela eka ku horisa hi singita—kambe ha yini? Kumbexana, van’wana va hetiwa matimba loko madokodela ma nga swi koti ku endla leswi engetelekeke ku horisa vuvabyi, switlhavi ni ku xaniseka ka varhandziwa va vona, ngopfu-ngopfu vana va vona. Lava xanisiwaka hi mavabyi lama hetaka nkarhi wo leha va nga ha titwa onge hikwalaho ka ku durha ka mirhi ya manguva lawa, a swi nge vi na khombo ku lava ku horisiwa hi ripfumelo. Van’wana va vona tikereke to hambana-hambana eka TV ni vanhu lava horisaka AIDS, ntshikilelo wa mianakanyo, khensa, vuvabyi byo hlangana nhloko, nsusumeto wa le henhla wa ngati ni mavabyi man’wana yo tala. Hambiloko va ma tshemba marito yo tano kumbe e-e, va nga ha hundzukela eka wona tanihi goza ro hetelela ro kuma mpfuno. Hambiswiritano, van’wana lava anakanyaka leswaku vuvabyi bya vona byi vangiwa hi mimoya leyo biha va nga ha vona onge mirhi leyi tolovelekeke a yi na matimba yo va pfuna.

Hi hala tlhelo, ku ni lava lwisanaka swinene na yona hambi ku ri ku sola dyondzo ya ku horisiwa hi singita hi “vakwetsimi” lava feke kumbe vahanyisi lava hanyaka. Hi ku ya hi Jornal da Tarde, mutivi wa nsawutiso Dráusio Varella u vona onge dyondzo leyi yi “sapatela ripfumelo ra lava nga xalamukangiki ni lava heleriweke hi ntshembo.” Wa engetela: “Hi ku va ni ntshembo eka masingita, vo tala va nga ha tshika mirhi ya swa vutshunguri leyi pfunaka hikwalaho ka vakanganyisi lava.” Naswona The New Encyclopædia Britannica ya hlamusela: “Ku horisa loku nga tolovelekangiki enkarhini lowu hundzeke a ku fambisana ni tindhawu leti kwetsimaka ni mihivahivana ya vukhongeri, naswona vutshunguri bya sayense byi voyamele eku endleni ka mahanyiselo yo tano hinkwawo ya fambiselo leri tolovelekeke ra ku humba mano loku tirhaka ehansi ka swiyimo leswinene.” Hambiswiritano, ku ni vo tala lava pfumelaka leswaku va hanyisiwe hi singita hakunene. Eka vona, ku hanyisiwa ku tirhile!

Lava tolovelaneke ni Bibele va swi xiya leswaku Yesu Kreste u hanyise vavabyi hi minkarhi yo tala, a endla leswi hi ku tirhisa “matimba ya Xikwembu.” (Luka 9:42, 43, NW) Xisweswo va nga ha tivutisa, ‘Xana matimba ya Xikwembu ma ha tirha ni ku horisa hi singita namuntlha?’ Loko swi ri tano, ha yini matshalatshala yo hanyisa ma tsandzeka ku tisa vuyelo lebyi tshembisiweke? Xana ku hi kwalaho ka leswi muvabyi a nga riki na ripfumelo lerikulu kumbe ku hi kwalaho ka leswi munyikelo wa yena wu nga nyawuliki? Xana swi fanerile leswaku Mukreste a ya hanyisiwa hi singita loko a karhatiwa hi vuvabyi lebyi vavaka swinene kumbexana lebyi nga tshungulekiki? Xana ku hanyisa hi singita loku nga tsandzekiki ka muxaka lowu Yesu a wu tirhiseke ka ha ta endleka nakambe? U nga kuma tinhlamulo ta swivutiso leswi swa nkoka exihlokweni lexi landzelaka.