Ku Ponisiwa Hi Nkarhi Wa Timhangu
VHENGELE leri xavisaka swilo swo tala ra swithezi swa ntlhanu le Seoul, eKorea, ri mbundzukile hi xitshuketa, ri pfalela madzana ya vanhu endzeni! Vatirhi vo ponisa va tirhe vusiku ni nhlekanhi leswaku va ponisa vanhu vo tala hilaha va nga kotaka hakona. Loko masiku ma ri karhi ma hundza, ntshembo wo kuma vaponi van’wana lava funengetiweke hi nhulu ya khonkhiriti ni tinsimbi wu sungule ku hela.
Loko ntshembo wo kuma vaponi van’wana se wu vonaka wu herile, xilo xin’wana lexi hlamarisaka xi humelerile. Ku twiwe ku rila ka munhu la tsaneke ni la nga ni gome ehansi ka thyaka. Hikwalaho ko chava, vaponisi va cele hi mavoko leswaku va ponisa wansati wa malembe ya 19 hi vukhale loyi a celeriwe a ri karhi a hanya ku ringana masiku ya 16. Khexe leyi weke yi n’wi sirhelete eka khonkhiriti yo tala swinene leyi a yi ri eku weni. Hambileswi a a nga ha ri na mati yo nyawula emirini naswona a a xekaxekiwile, u pone ku fa!
Masiku lawa, a swi talanga leswaku n’hweti yi hela ku nga ri na swiviko swa makhombo, ku nga ha va ku ri ku tsekatseka ka misava, xidzedze lexi onhaka, ku buluka ka vholkheno, mhangu kumbe ndlala. Naswona timhaka leti nyanyulaka ta ku ponisiwa ni ku pona ka vanhu ti tsakisa timiliyoni ta vanhu lava rhandzaka mahungu. Hambiswiritano, xitsundzuxo xa khombo leri taka—lerikulu ku tlula rihi ni rihi leri tshameke ri humelela ematin’wini ya vanhu—hi ntolovelo ri honisiwile. (Matewu 24:21) Bibele yi hlamusela xiendlakalo lexi lexi taka hi marito lawa: “V̌onani ku biha ku hume tikweni riṅwana ku ya tikweni riṅwana, šihuhuri le’ši tšhav̌isaka ši ta pfuka e makuṅwini ya misav̌a. E sikwini rolero, la’v̌a tlhav̌iweke i Yehova v̌a ta v̌a kona, ku suka e makuṅwini maṅwana ya misav̌a, ku ya fika e makuṅwini maṅwana ya misav̌a; a v̌a nga rileriwi, v̌a nga hlengeletiwi, v̌a nga lahliwi; v̌a ta v̌a v̌ulongo e henhla ka misav̌a.”—Yeremiya 25:32, 33.
Marito lawa ma hlamarisa! Kambe ku hambana ni makhombo ya ntumbuluko ni timhangu, khombo leri a ri nge dlayi mani na mani. Entiyisweni, wena—hi wena wexe—u nga pona!
Nkarhi Wa Xihatla
Leswaku munhu a twisisa mhaka leyi kahle, xo sungula u fanele a twisisa leswaku hikwalaho ka yini khombo leri ra misava hinkwayo ri fanele ri ta. Entiyisweni, hi rona ntsena ntlhantlho wa swiphiqo swa vanhu. I vanhu va nga ri vangani namuntlha lava titwaka va hlayisekile ni ku sirheleteka. Ku nga khathariseki matshalatshala lamakulu ya sayense, mavabyi lama tlulelaka ma ya emahlweni ma hlasela vaaki va misava. Tinyimpi leti vangiwaka hi ku nga twanani ka vukhongeri, swivongo ni tipolitiki, ti heta vutomi bya vanhu hi magidi. Ndlala ya engetela eka mbitsi ni ku xaniseka ka vavanuna, vavasati ni vana lava nga riki na nandzu. Ku hohloka ka mahanyelo ku onha masungulo ya vandla ra vanhu; hambi ku ri vana va onhakile.
Hi ku pakanisa loku xiyekaka, vuprofeta bya Bibele lebyi tsariweke malembe yo tlula 1900 lama hundzeke byi hlamusela xiyimo xa hina. Byi ri: “Mi fanele mi swi tiva leswaku emasikwini ya makumu minkarhi yi ta va yi tele hi makhombo.”—2 Timotiya 3:1, The New Testament in Modern English, hi J. B. Phillips; ringanisa Matewu 24:3-22.
Xana swi vonaka swi twala eka wena leswaku Xikwembu lexi nga ni rirhandzu xi nga va xi nga ri na mhaka ni xiyimo xa hina? Bibele yi ri: “Šona Šikwembu le’ši endleke misav̌a ni ku yi v̌umba, . . . a [xi] yi endlanga mananga, kambe [xi] yi endlile leŝaku yi akiwa.” (Esaya 45:18) Ina, ematshan’weni yo pfumelela pulanete leyi yo saseka leswaku yi onhiwa ni leswaku vaaki va yona hinkwavo va herisiwa, Xikwembu xi ta nghenelela. Xivutiso hi leswaku, Xana xi ta swi endlisa ku yini sweswo?
Hlawula Vutomi!
Bibele ya hlamula eka Pisalema 92:7: “Hambi v̌adyohi v̌a mila [tanihi] byanyi, ni v̌ahomboloki loko v̌a anḍa, v̌a ta herisiwa ni makumo.” Ntlhantlho wa Xikwembu eka swiphiqo swa misava i ku herisa vubihi hi byoxe. Lexi tsakisaka, leswi a swi vuli swona leswaku vanhu hinkwavo va fanele va herisiwa. Pisalema 37:34 ya hi tiyisekisa: “Ṭhemba Yehova, u hlayisa ndlela ya yena, o ta ku kurisa leŝaku u fuma misav̌a; kambe u ta v̌ona ku herisiwa ka la’v̌o biha.”
Marito lawa ma kombisa leswaku wu kona nkarhi wo ponisiwa eka khombo lerikulu ku tlula hinkwawo, leri nga ta wela vanhu. Xikwembu xi hi nyike nhlawulo. Marito lawa Muxe a khongoteleke Vaisrayele ha wona loko va ri karhi va tilunghisela ku nghena eTikweni leri Tshembisiweke ma tirha hilaha ku fanaka eka hina namuntlha: “Nḍi v̌ekile mahlweni ka wena e v̌utomi ni rifu, e ku kateka ni ku rukana; hlawula v̌utomi leŝaku u hanya, wena ni v̌atukulu v̌a wena.” (Deteronoma 30:19) Kambe, xana munhu u “hlawula v̌utomi” ivi a ponisiwa hi ndlela yihi? Xana ku ponisiwa ka xiviri ku vula yini?
[Laha Xifaniso Xi Humaka Kona eka tluka 2]
COVER: Explosion: Copyright © Gene Blevins/Los Angeles Daily News
[Laha Xifaniso Xi Humaka Kona eka tluka 3]
Yunhap News Agency/Sipa Press