Va Endle Ku Rhandza Ka Yehovha

Yesu A Rhuma Vadyondzisiwa Va 70

A KU ri xixikana xa 32 C.E. A ku sele tin’hweti ta tsevu leswaku Yesu a fa. Hikwalaho, leswaku a hatlisisa ntirho wo chumayela ni ku nyika van’wana va valandzeri vakwe vuleteri lebyi engetelekeke, u hlawule vadyondzisiwa va 70 ivi a va “rhuma hi vambirhi-mbirhi emahlweni ka [yena] emutini ni le ndhawini yin’wana ni yin’wana leyi [a] ta ya eka yona hi xiviri.”—Luka 10:1.a

Yesu u rhumele vadyondzisiwa va yena “emahlweni ka [yena]” leswaku vanhu va ta kota ku endla xiboho hi ku hatlisa loko va pfumelelana na Mesiya kumbe va lwisana na yena loko Yesu a ta fika hi yexe endzhakunyana. Kambe ha yini a va rhume “hi vambirhi-mbirhi”? Handle ko kanakana, u swi endlele leswaku va ta khutazana loko va langutane ni nkaneto.

Loko a kandziyisa xihatla xa ntirho wa vona wo chumayela, Yesu u byele valandzeri va yena a ku: “Hakunene, ntshovelo i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:2) Ku wu fanisa ni ntshovelo a swi fanerile, hikuva ku hlwela hi nkarhi wa ntshovelo a ku ta vanga ku lahlekeriwa hi swakudya swa nkoka. Hi ku fanana, loko vadyondzisiwa a va honisa xiavelo xa vona xo chumayela, a ku ta lahleka vutomi bya risima!—Ezekiyele 33:6.

Vatirheli Lava Nga Kavanyetiwiki

Yesu u ye emahlweni a lerisa vadyondzisiwa va yena a ku: “Mi nga tameli xiphachi, kumbe nkwama wa swakudya, kumbe maphaxani, loko mi xeweta munhu egondzweni mi nga n’wi angarhi.” (Luka 10:4) A swi tolovelekile leswaku mufambi a nga teki nkwama ni swakudya ntsena kambe ni maphaxani man’wana, hikuva swirhendze swi nga hela naswona tingoti ti tsemeka. Kambe vadyondzisiwa va Yesu a va nga fanelanga va karhateka hi swilo sweswo. Ematshan’weni ya sweswo, a va fanele va tshemba leswaku Yehovha u ta va khathalela hi ku tirhisa Vaisrayele-kulobye, lava hi ntolovelo a va ri ni malwandla.

Kambe ha yini Yesu a byele vadyondzisiwa va yena leswaku va nga angarhi munhu loko va xeweta? Xana a va fanele va nga vi na rirhandzu, va tlhela va nga vi na vumunhu? Nikatsongo! Rito ra Xigriki a·spaʹzo·mai, leri vulaka ku angarha loko u xeweta, ri nga vula leswi tlulaka ku “avuxeni” kumbe “i nhlikanhi” leswi kombisaka ku xixima. Ri nga ha katsa ni ku ntswontswana ka ndhavuko, ku angarhana ni ku bula nkarhi wo leha loku nga vaka kona loko vanhu vambirhi lava tolovelaneke va hlangana. Muhlamuseri un’wana u ri: “Maxewetelo ya vanhu va le Vuxeni a ma nga katsi ku korhamisanyana nhloko, kumbe ku qhavulana hilaha hina hi endlaka hakona, kambe a va angarhana ko tala, ni ku korhamisa nhloko hambi ku ri ku nkhinsama ehansi. Hinkwaswo leswi a swi lava nkarhi.” (Ringanisa 2 Tihosi 4:29.) Xisweswo Yesu u pfune valandzeri va yena ku papalata ku hambukisiwa hi swilo leswi nga nyawuriki hambi loko swi ri mukhuva.

Xo hetelela, Yesu u byele vadyondzisiwa va yena leswaku loko va nghena emutini ivi va amukeriwa, va fanele va “tsham[a] endlwini yoleyo, [va] dya ni ku nwa swilo leswi va [nga] swi lunghiselelaka.” Kambe loko va nghena emutini kambe va nga amukeriwi, va fanele va “hum[a va] ya etindleleni to anama ta wona ivi [va] ku, ‘Hambi ku ri ritshuri leri namarheleke milenge ya hina emutini wa n’wina hi ri phumunhela eka n’wina.’” (Luka 10:7, 10, 11) Ku phumunha kumbe ku susa ritshuri emilengeni ya munhu a swi kombisa leswaku vadyondzisiwa a va suka hi ku rhula endlwini kumbe emutini lowu nga riki ni malwandla, va siya vumundzuku bya wona emavokweni ya Xikwembu. Kambe lava amukeleke vadyondzisiwa va Yesu hi musa a va endla leswaku va fanelekela ku kuma mikateko. Hi nkarhi wun’wana Yesu u byele vaapostola va yena a ku: “Loyi a mi amukelaka u amukela na mina, ni loyi a ndzi amukelaka u amukela ni loyi a ndzi rhumeke. Naswona mani na mani loyi a nyikaka un’wana wa lava lavatsongo xinwelo xa mati yo titimela ntsena leswaku a nwa hileswi a nga mudyondzisiwa, ndzi tiyisile ndzi ri eka n’wina, a nge lahlekeriwi hi hakelo yakwe.”—Matewu 10:40, 42.

Tidyondzo Eka Hina

Xileriso xo chumayela mahungu lamanene ya Mfumo wa Xikwembu ni ku endla vadyondzisiwa sweswi xi hetisisiwa hi Timbhoni ta Yehovha leti tlulaka 5000000 emisaveni hinkwayo. (Matewu 24:14; 28:19, 20) Ta swi xiya leswaku rungula ra tona i ra xihatla. Hikwalaho, ti tirhisa nkarhi wa tona hi ndlela leyinene, ti papalata swikavanyeti leswi nga ti sivelaka ku nyikela nyingiso lowu teleke eka xiavelo xa tona xa nkoka.

Timbhoni ta Yehovha ti ringeta ku va ni xinghana eka hinkwavo lava ti hlanganaka na vona. Hambiswiritano, a ti ngheneli mabulo lama nga pfuniki nchumu, hambi ku ri ku phikizana hi timhaka ta swiyimo swa vanhu kumbe ku tsandzeka ka matshalatshala ya misava leyi ku susa vuhomboloki. (Yohane 17:16) Ematshan’weni ya sweswo, va kongomisa bulo ra vona eka ntlhantlho wun’we ntsena wa swiphiqo swa vanhu wa nkarhi wo leha—Mfumo wa Xikwembu.

Hakanyingi, Timbhoni ta Yehovha ti voniwa ti tirha hi timbirhi-mbirhi. Xana a ku nga ta hetisisiwa swo tala loko un’wana ni un’wana a tirha a ri yexe? Kumbexana. Hambiswiritano, Vakreste namuntlha va xiya mpfuno wo tirha swin’we ni mupfumeri-kulobye. Swi va nyika nsirhelelo wo karhi loko va nyikela vumbhoni etindhawini leti nga ni khombo. Ku tirha ni munhu un’wana swi tlhela swi endla leswaku lava ha riki vantshwa va vuyeriwa eka vutshila bya vahuweleri va mahungu lamanene lava nga ni ntokoto swinene. Hakunene, havambirhi va nga hoxa xandla eku khutazaneni.—Swivuriso 27:17.

Handle ko kanakana, ntirho wo chumayela i ntirho wa xihatla swinene lowu endliwaka “emasikwini [lawa] yo hetelela.” (2 Timotiya 3:1) Timbhoni ta Yehovha ta tsaka ku seketeriwa hi vamakwerhu va misava hinkwayo lava ti tirhaka swin’we na vona eku “[lweleni] ripfumelo eka mahungu lamanene.”—Vafilipiya 1:27.

[Nhlamuselo ya le hansi]