Xana I Mahlonga Ya Vanhu Kumbe I Malandza Ya Xikwembu?

“TIMBHONI TA YEHOVHA ta ndhundhuzeriwa hi ndlela yo karhi.” Ku vula buku ya Xijarimani leyi nge Seher, Grübler, Enthusiasten (Vavoni, Vaanakanyisisi, Vahiseki). Hambileswi yi xopaxopaka Timbhoni, yi ri: “Hi ku angarhela, ti pfumala xisandzu, ti hanya vutomi bya ntlawa wa vanhu lava titsongahataka. Ta gingiriteka ni ku va ni vukheta entirhweni wa tona wo tihanyisa, i vaaka-tiko lava rhuleke ni vahakeri va xibalo lava tshembekaka. Ti papalata ku hlongorisa rifuwo ngopfu. . . . Ku tikhoma ka tona emintsombanweni ka dzuneka. Moya wa tona wa ku tinyikela wa ringana ni wa ntlawa wihi na wihi wa vukhongeri; malunghana ni vutirheli bya tona ti yi tlula swinene mintlawa leyin’wana. Kambe lexi ti tlakusaka ku tlula kereke yin’wana ni yin’wana ya Vukreste ni ntlawa wa le sikwini ra hina i ku tiyimisela ka tona loku nga hundzukiki loku to tala ta tona ti twarisaka hakona tidyondzo ta tona ehansi ka swiyimo hinkwaswo ni le hansi ka makhombo hinkwawo.”a

Ku nga khathariseki ku tlakusiwa lokunene, mianakanyo yin’wana yi ringeta ku hlamusela Timbhoni ta Yehovha hi ndlela leyi hambaneke. Ematikweni yo tala emisaveni hinkwayo, Timbhoni ti endle mintirho ya tona ya vukhongeri erivaleni ku ringana makume ya malembe yo tala handle ko siveriwa. Timiliyoni ta vanhu ta ti tiva, ta ti xixima naswona ta pfumela leswaku ti ni mfanelo yo hanya hi vukhongeri bya tona. Kutani, ha yini ku kanakaniwa leswaku Timbhoni ta Yehovha i vamani?

Kumbexana xivangelo xin’wana xa ku kanakana hi leswaku sweswinyana nhlayo ya mintlawa ya vukhongeri byin’wana yi katsekile eku khomiweni ka vana hi ndlela yo biha, ku tisunga ka mintshungu ni minhlaselo ya vutherorisi. Kavula, ku pfilunganyeka ko fana ni loku ku hinkwako-nkwako, ku nga ri exikarhi ka lava nga vakhongeri ntsena. Hambiswiritano, malunghana ni vukhongeri vanhu vo tala va byi kanakana, van’wana va kaneta.

Makhombo Yo Landzela Vanhu

“Mpambukwa” wu hlamuseriwe tanihi “ntlawa lowu namarhelaka eka dyondzo leyi nga faniki ni yin’wana kumbe eka murhangeri.” Hilaha ku fanaka, lava nga eka “mihivahivana ya vukhongeri” va “tinyiketela swinene emunhwini, eka mavonelo kumbe nchumu wo karhi.” Entiyisweni, swirho swa ntlawa wun’wana ni wun’wana wa vukhongeri leswi namarhelaka swinene eka varhangeri va vanhu ni mavonelo ya vona, swi le khombyeni ro va mahlonga ya vanhu. Ku va ni vuxaka ni munhu loyi a rhandzaka ku va murhangeri swi nga vanga ku titshemba loku nga riki kunene ka mintlhaveko ni ka moya. Khombo ra kona ri nga vangiwa na hiloko munhu a kuriseriwe exiyin’weni xa vupambukwa ku sukela evutsongwanini.

Lava va karhatekaka hi ndlela yoleyo hikwalaho ka vukhongeri va lava rungula leri tshembekaka. Van’wana va nga ha va va byeriwe leswaku Timbhoni ta Yehovha ti wela eka ntlawa wa vukhongeri lowu endlaka swirho swa wona mahlonga, wu swi lawula hi tihanyi, wu lawula ntshunxeko wa swona ku tlula mpimo ni ku swi endla swi kanetana ni vanhu hinkwavo.

Timbhoni ta Yehovha ta swi tiva leswaku ku karhateka loku a ku twali. Hikwalaho, ta ku rhamba leswaku u ta tivonela hi wexe. Endzhaku ka ku kambisisa hi vukheta, tiendlele swiboho swa wena. Xana Timbhoni i malandza ya Xikwembu, hilaha ti vulaka hakona, kumbe entiyisweni i mahlonga ya vanhu? Xana xihlovo xa matimba ya tona i yini? Swihloko swimbirhi leswi nga eka matluka 12-23 swi ta nyikela tinhlamulo leti enerisaka eka swivutiso swoleswo.

[Nhlamuselo ya le hansi]