Va Endle Ku Rhandza Ka Yehovha

Vutshembeki Bya Yobo Byi Hakeriwa

YOBO a a ri wanuna wa ntwela-vusiwana; mulweri wa tinoni, lava feriweke hi vatswari ni lava nge khombyeni. (Yobo 29:12-17; 31:16-21) Kutani, hi xitshuketa u wele ekhombyeni, a lahlekeriwa hi rifuwo ra yena ni vana va yena, ni rihanyo ra yena. Lexi twisaka ku vava, wanuna loyi wo xiximeka loyi a a ri phuphu leyi tiyisaka lava tshikeleriweke, a nga wu kumanga mpfuno hi nkarhi lowu a wu pfumala. Hambi ku ri nsati wakwe u n’wi byele leswaku a “rukana Šikwembu, [a] fa!” Ni “vanghana” vakwe Elifasi, Bilidada na Sofara a va n’wi chavelelanga. Ematshan’wini ya sweswo, va anakanye leswaku Yobo u dyohile, kutani a a faneriwa hi ku vaviseka.—Yobo 2:9; 4:7, 8; 8:5, 6; 11:13-15.

Hambileswi a a xaniseka swinene, Yobo u tshame a tshembekile. Hikokwalaho ka leswi, Yehovha u hetelele a kombise Yobo tintswalo ni ku n’wi katekisa. Mhaka leyi kombisaka ndlela leyi leswi a swi endleke ha yona, yi tiyisekisa malandza ya Xikwembu hinkwawo lama hlayisaka vutshembeki, leswaku hi ku famba ka nkarhi na wona ma ta hakeriwa.

Ku Pfumala Nandzu Ni Ku Kondletela

Xo sungula, Yehovha u sole Elifasi, Bilidada na Sofara. Loko a vulavula na Elifasi loyi a nga ha vaka a a ri lonkulu, u te: “V̌ukari bya mina byi pfurele wena ni v̌anakuloni la’v̌ambiri, hikuv̌a a mi v̌ulanga ŝa mina ŝinene kukotisa Yobo, nanḍa wa mina. Hikwalaho, humesani tinkunzi ta ntlhanu na timbiri, ni makhuna ya ntlhanu na mambiri, mi ya ka nanḍa wa mina Yobo, mi ya titlhav̌ela maganḍelo, kutani Yobo, nanḍa wa mina, o ta mi khongelela.” (Yobo 42:7, 8) Anakanya leswaku leswi a swi katsa yini!

Yehovha a lava gandzelo leri xiyekaka eka Elifasi, Bilidada na Sofara, kumbexana leswaku a va kombisa vukulu bya xidyoho xa vona. Hakunene, hambi a va swi lemuka kumbe a va nga swi lemuki, va rhukane Xikwembu hi ku vula leswaku ‘swi tsandza ni malandza ya xona a xi ma tshembi’ naswona eka xona, leswaku Yobo a tshembekile kumbe e-e, a swi nga vuli nchumu. Elifasi, u vule ni leswaku emahlweni ka Xikwembu Yobo a fana ni xivungu xinene! (Yobo 4:18, 19; 22:2, 3) A swi hlamarisi leswi Yehovha a nga te: “Hikuv̌a a mi v̌ulanga ŝa mina ŝinene”!

A swi helelanga kwalaho. Elifasi, Bilidada na Sofara va dyohele Yobo hi xiviri hi ku n’wi byela leswaku swiphiqo swakwe a a lo tivangela. Swihehlo swa vona leswi nga riki na xisekelo ni ku pfumala ka vona ntwela-vusiwana ku siye Yobo a hlundzukile a ri ni gome, leswi swi n’wi vangele ku huwelela a ku: “Mi ta . . . hlokohlisa moya wa mina, ni ku nḍi tikerisa hi marito ya ṅwina e ku yisa kwihi šana?” (Yobo 10:1; 19:2) Anakanya tingana leti vanhu lava vanharhu a va ri na tona loko va tisa gandzelo ra swidyoho swa vona eka Yobo!

Kambe Yobo a nga kalanga a va hleka eka tingana leti a va ri na tona. Kahle-kahle Yehovha a lava leswaku a khongelela vahehli vakwe. Yobo u endle hilaha a lerisiweke ha kona, naswona u katekisiwile hikokwalaho ka leswi. Xo sungula, Yehovha u ntshungurile vuvabyi byakwe lebyi chavisaka. Hi loko vamakwavo va Yobo vaxinuna, vaxisati swin’we ni khale ka vanghana vakwe, va ta ku ta n’wi chavelela, kutani “uṅwana ni uṅwana a ṅwi nyika šiphemu ša silver ni sinḍa ra nsuku.”a Ku tlula kwalaho, Yobo “a fuwa tinyimpfu ta 14 000, ni tikamela ta 6000, ni tihav̌i ta madžoko ya 1000, ni timbongolo ta matŝele ta 1000.”b Naswona nsati wa Yobo handle ko kanakana a vuyelelanile na yena. Hi ku famba ka nkarhi, Yobo u katekisiwile hi majaha ya nkombo ni vanhwanyana vanharhu, nakambe u hanye ku kondza a vona switukulwana swa yena swa mune.—Yobo 42:10-17.

Leswi Hi Dyondzaka Swona

Yobo u veke xikombiso lexi xiyekaka eka malandza ya Xikwembu ya manguva lawa. A ri “l’a fambaka hi ku lulama ni ku tenga,” wanuna loyi Yehovha a a tinyungubyisa ha yena ku n’wi vitana “nanḍa wa mina.” (Yobo 1:8; 42:7, 8) Hambiswiritano, leswi a swi vuli swona leswaku Yobo a hetisekile. Eka nkarhi wun’wana, loko a langutane ni miringo, hi xihoxo u anakanye leswaku Xikwembu a ku ri xona xi n’wi vangelaka khombo. U tlhele a sola ni ndlela leyi Xikwembu xi tirhisanaka ni vanhu ha yona. (Yobo 27:2; 30:20, 21) Naswona u tivitane lowo lulama ematshan’wini yo teka Xikwembu xi ri xona lexi lulameke. (Yobo 32:2) Kambe Yobo a nga n’wi fularhelanga Muvumbi, naswona u amukele ndzulamiso wo huma eka Xikwembu hi ku titsongahata. U te: “Nḍi v̌ulav̌urile nḍi nga ri na ku twisisa. Nḍa tisola, nḍi tiba šifuv̌a nḍi ri nṭhurini ne nkumeni.”—Yobo 42:3, 6.

Loko hi ri endzingweni na hina hi nga ha anakanya, hi vulavula, kumbe hi endla swilo hi ndlela leyi nga fanelangiki. (Ringanisa Eklesiasta 7:7.) Hambiswiritano, loko rirhandzu ra hina eka Xikwembu ri entile, a hi nge xi xandzukeli kumbe hi hlundzuka hikwalaho ka leswi xi pfumeleleke leswaku hi langutana ni maxangu. Ematshan’wini ya sweswo, hi ta hlayisa vutshembeki bya hina kutani eku heteleleni hi tshovela mikateko leyikulu. Loko a vulavula hi Yehovha mupisalema u te: “Lo’nene, u ṅwi endla hi v̌unene.”—Pisalema 18:25.

Loko Yobo a nga si hanyisiwa emavabyini, Yehovha a a lava leswaku a khongelela lava va n’wi dyoheleke. Mawaku xikombiso lexinene swonghasi eka hina! Yehovha u lava leswaku hi rivalela lava hi dyohelaka emahlweni ko va swidyoho swa hina swi rivaleriwa. (Matewu 6:12; Vaefesa 4:32) Loko hi nga swi rhandzi ku rivalela van’wana loko ku ri ni xisekelo lexi twalaka xa ku endla tano, xana hi nga langutela leswaku Yehovha a kombisa tintswalo eka hina?—Matewu 18:21-35.

Hikwerhu hi langutana ni miringo minkarhi yin’wana. (2 Timotiya 3:12) Hambiswiritano, ku fana na Yobo hi nga byi hlayisa vutshembeki. Hi ku endla tano, hi ta kuma hakelo leyikulu. Yakobo u tsarile: “Maswivo! Lava tiyiseleke hi va vula lava tsakeke. Mi twile hi ta ku tiyisela ka Yobo naswona mi byi vonile vuyelo bya kona lebyi Yehovha a byi nyikeleke, leswaku Yehovha u ni xinakulobye lexikulu swinene ni tintswalo.”—Yakobo 5:11.

[Tinhlamuselo ta le hansi]