Ripfumelo Ra Vakreste Ri Ta Ringiwa

“Ripfumelo a hi ra vanhu hinkwavo.”—2 VATESALONIKA 3:2.

1. Xana matimu ma swi kombise njhani leswaku a hi vanhu hinkwavo va nga ni ripfumelo ra xiviri?

EMATIN’WINI hinkwawo, a ku ri ni vavanuna, vavasati ni vana lava nga ni ripfumelo ra xiviri. Rihlawuri leri nge “xiviri” ra faneleka hikuva vanhu van’wana va timiliyoni va kombise ripfumelo ra ku tekeka, ku kholwa nchumu handle ka xisekelo kumbe xivangelo xo twala. Ripfumelo ro tano hakanyingi a ri katsa swikwembu swa mavunwa kumbe vugandzeri lebyi nga fambisaniki ni Lowa-matimba-hinkwawo, Yehovha, ni Rito ra yena leri paluxiweke. Xisweswo muapostola Pawulo u tsarile a ku: “Ripfumelo a hi ra vanhu hinkwavo.”—2 Vatesalonika 3:2.

2. Hikwalaho ka yini swi ri swa nkoka leswaku hi kambisisa ripfumelo ra hina vini?

² Kambe marito ya Pawulo ma kombisa leswaku hi nkarhi wolowo van’wana a va ri na rona ripfumelo ra xiviri naswona leswi swi vula leswaku ni namuntlha va kona lava va nga na rona. Vahlayi vo tala va magazini lowu va swi navela ku va ni ripfumelo ra xiviri ni ku ri antswisa—ripfumelo leri fambisanaka ni vutivi lebyi kongomeke bya ntiyiso wa Xikwembu. (Yohane 18:37; Vaheveru 11:6) Xana na wena wa swi navela? Loko swi ri tano, i swa nkoka ku tiva ni ku rindzela leswaku ripfumelo ra wena ri ta ringiwa. Hikwalaho ka yini ku vuriwa sweswo?

3, 4. Hikwalaho ka yini hi fanele hi languta Yesu malunghana ni miringo ya ripfumelo?

³ Hi fanele hi pfumela leswaku Yesu Kreste i xisekelo xa ripfumelo ra hina. Ina, Bibele yi vula leswaku hi yena Muhetisisi wa ripfumelo ra hina. Leswi swi hikwalaho ka leswi Yesu a swi vuleke ni ku swi endla, ngopfu-ngopfu ndlela leyi a hetisiseke vuprofeta ha yona. U tiyise xisekelo lexi vanhu va nga simekaka ripfumelo ra xiviri eka xona. (Vaheveru 12:2; Nhlavutelo 1:1, 2) Nakambe, hi hlaya leswaku Yesu hi loyi “a ringiweke hi tindlela hinkwato ku fana na hina, kambe yena a nga vanga na xidyoho.” (Vaheveru 4:15) Ina, ripfumelo ra Yesu ri ringiwile. Ematshan’weni ya leswaku leswi swi hi heta matimba kumbe ku hi endla hi karhateka, swi fanele swi hi chavelela.

⁴ Hi ku langutana ni miringo leyikulu ku katsa ni ku langutana ni rifu emhandzini, Yesu “u dyondze ku yingisa.” (Vaheveru 5:8) U kombise leswaku vanhu va nga swi kota ku hanya hi ripfumelo ra xiviri ku nga khathariseki miringo leyi nga ha va welaka. Leswi swi xiyeka ngopfu loko hi anakanya hi leswi Yesu a swi vuleke malunghana ni valandzeri va yena: “Tsundzukani rito leri ndzi mi byeleke rona, Hlonga a ri n’wi tluli n’wini wa rona hi vukulu.” (Yohane 15:20) Kahle-kahle, Yesu u vhumbhe leswi malunghana ni valandzeri va yena va le nkarhini wa hina: “Mi ta vengiwa hi matiko hinkwawo hikwalaho ka vito ra mina.”—Matewu 24:9.

5. Xana Matsalwa ma swi kombisa njhani leswaku hi ta langutana ni miringo?

⁵ Eku sunguleni ka lembe-xidzana leri, ku avanyisa ku sungule hi yindlu ya Xikwembu. Matsalwa ma vhumbhe leswi: “I nkarhi lowu vekiweke wa leswaku vuavanyisi byi sungula hi yindlu ya Xikwembu. Kutani loko byi rhanga hi hina ku sungula, makumu ya lava nga yingisiki mahungu lamanene ya Xikwembu ma ta va wahi? ‘Naswona loko swi nonon’hwa leswaku munhu wo lulama a ponisiwa, munhu la nga xiximiki Xikwembu ni mudyohi xana va nga voniwa ni ntshwati wa vona ke?’”—1 Petro 4:17, 18.

Ripfumelo Ra Ringiwa —Hikwalaho Ka Yini?

6. Hikwalaho ka yini ripfumelo leri ringiweke ri ri ni ntikelo?

⁶ Kahle-kahle, ripfumelo leri nga ringiwangiki a wu tiviwi ntikelo wa rona, naswona ku tiya ka rona a ku nge tiviwi. U nga ha ri fanisa ni cheke leyi nga si cinciwaka yi va mali. U nga ha va u amukele cheke hikwalaho ka ntirho lowu u wu endleke, hikwalaho ka nhundzu leyi u yi humeseke kumbe hambi yi ri nyiko yinene. Cheke yi nga ha languteka yi ri kahle, kambe yi kahle hakunene? Xana yi na yona mali leyi tsariweke eka yona? Hi laha ku fanaka, ripfumelo ra hina a ri fanelanga ri va nchumu wa le handle kumbe lowu vuriwaka hi nomu ntsena. Ri fanele ri ringiwa loko hi ta kombisa leswaku ri ni ntikelo naswona ri tiyile. Loko ripfumelo ra hina ri ringiwa, hi nga ha kuma leswaku ri tiyile naswona ri ni ntikelo. Ndzingo wu nga ha tlhela wu paluxa tindhawu tihi na tihi leti ripfumelo ra hina ri lavaka ku antswisiwa ni ku tiyisiwa eka tona.

7, 8. Xana miringo ya ripfumelo ra hina yi huma kwihi?

⁷ Xikwembu xa ku pfumelela ku xaniseka ni miringo yin’wana ya ripfumelo leswaku yi hi wela. Ha hlaya: “Loko a ri endzingweni, munhu a nga vuli a ku: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) I mani kumbe i yini lexi tisaka miringo leyi? I Sathana, misava, swin’we ni nyama ya hina leyi nga hetisekangiki.

⁸ Swi nga endleka ha swi vona ku Sathana u ni nkucetelo lowukulu emisaveni, eka ndlela leyi yi ehleketaka ha yona ni swiendlo swa yona. (1 Yohane 5:19) Nakambe swi nga ha endleka ha swi tiva leswaku u endla leswaku Vakreste va xanisiwa. (Nhlavutelo 12:17) Kambe, xana ha khorwiseka hakunene leswaku Sathana u ringeta ku hi hambukisa hi ku tirhisa nyama ya hina leyi nga hetisekangiki, a tisa vutihungasi bya misava ematihlweni ya hina, hi ntshembo wa leswaku hi ta phaseka, hi tlula nawu wa Xikwembu kutani hi hetelela hi nga ha amukeleki eka Yehovha? Ina, tindlela ta Sathana a ti fanelanga ti hi hlamarisa, hikuva u tirhise tindlela leti fanaka loko a ringa Yesu.—Matewu 4:1-11.

9. Xana hi nga vuyeriwa njhani eka swikombiso swa ripfumelo?

⁹ Hi ku tirhisa Rito ra yena ni vandlha ra Vukreste, Yehovha u hi nyika swikombiso leswinene swa ripfumelo leswi hi nga swi tekelelaka. Pawulo u tsundzuxile: “Hi vun’we vanani vatekeleri va mina, vamakwerhu, kutani mi veka tihlo eka lava va fambaka endleni leyi fambisanaka ni xikombiso lexi hina hi mi vekelaka xona.” (Vafilipiya 3:17) Tanihi un’wana wa malandza ya Xikwembu lama totiweke, hi lembe-xidzana ro sungula, Pawulo a a famba emahlweni hi ku endla mintirho ya ripfumelo hambileswi a a langutana ni miringo leyikulu. Hambileswi hi hanyaka eku heleni ka lembe-xidzana ra vu-20, a hi swi pfumali swikombiso swa ripfumelo leswi fanaka na yena. Marito lama nga eka Vaheveru 13:7 ma tirha sweswi hi ntamu lowu fanaka ni lowu a ma tirha ha wona loko Pawulo a ma tsala: “Tsundzukani lava rhangelaka exikarhi ka n’wina, lava mi byeleke rito ra Xikwembu, naswona loko mi ri karhi mi xiyisisa vuyelo bya ku tikhoma ka vona, mi tekelela ripfumelo ra vona.”

10. Hi swihi swikombiso swo karhi swa ripfumelo leswi hi nga na swona eminkarhini ya sweswi?

¹⁰ Xitsundzuxo lexi i xa ntikelo swinene loko hi anakanya vuyelo bya ndlela leyi masalela lama totiweke ma tikhomeke ha yona. Hi nga anakanyisisa hi xikombiso xa vona kutani hi tekelela ripfumelo ra vona. Ripfumelo ra vona i ripfumelo ra xiviri leri hlutiweke hi miringo. Eka masungulo lamatsongo le ndzhaku hi va-1870, ku hume vumakwerhu bya Vukreste bya misava hinkwayo. Hikwalaho ka ripfumelo ni ku tiyisela ka vatotiwa ku sukela hi nkarhi wolowo ku ya emahlweni, Timbhoni ta Yehovha to tlula ntlhanu wa timiliyoni ni hafu sweswi ti karhi ta chumayela ni ku dyondzisa hi Mfumo wa Xikwembu. Vandlha leri nga kona sweswi ra misava hinkwayo ra vagandzeri lava hisekaka, i xikombiso xa ripfumelo leri ringiweke.—Tito 2:14.

Ripfumelo Ri Ringiwa Malunghana Na 1914

11. Xana lembe ra 1914 a ri ri ra nkoka hi ndlela yihi eka C. T. Russell ni vatirhi-kulobye?

¹¹ Khale nyimpi yo sungula ya misava yi nga si tlhekeka, masalela lama totiweke a ma ri karhi ma twarisa leswaku 1914 ri ta va lembe leri xiyekaka eka vuprofeta bya Bibele. Hambiswiritano, swin’wana leswi a va swi languterile a ku nga ri nkarhi wa swona, naswona matwisiselo ya vona malunghana ni leswi a swi ta humelela a ma nga pakanisanga. Hi xikombiso, C. T. Russell, muungameri wo sungula wa Sosayiti ya Watch Tower, ni vanghana vakwe a va swi vona leswaku ka ha laveka ntirho lowukulu wo chumayela. A va hlaye leswi: “Evhangeli leyi ya mfumo yi ta chumayeriwa emisaveni hinkwayo leswaku byi va vumbhoni eka matiko hinkwawo; kutani hi kona makumu ma nga ta fika.” (Matewu 24:14, King James Version) Xana ntlawanyana wa vona lowutsongo a wu ta swi kotisa ku yini ku endla sweswo?

12. Xana un’wana wa vatirhi-kulobye va Russell u titwise ku yini hi ntiyiso wa Bibele?

¹² Vona ndlela leyi leswi swi khumbeke A. H. Macmillan ha yona, mutirhi-kulobye wa Russell. Macmillan u velekiwe le Canada, naswona a nga si hlanganisa malembe ya 20 loko a kuma buku ya Russell leyi nge The Plan of the Ages (1886). (Buku leyi, nakambe yi vitaniwa The Divine Plan of the Ages, yi ve Vholumo 1 ya xikatsa xa tibuku leti hangalasiweke swinene leti nge Studies in the Scriptures. Vholumo 2, The Time Is at Hand [1889], yi kombetele eka 1914 tanihi ku hela ka “minkarhi ya Vamatiko.” [Luka 21:24, KJ]) Hi vusiku lebyi Macmillan a sunguleke ha byona ku hlaya, u te: “Leswi swi twala swi ri ntiyiso!” Hi ximumu xa 1900, u hlangane na Russell eka ntsombano wa Swichudeni swa Bibele, hilaha Timbhoni ta Yehovha a ti vitaniwa hakona hi nkarhi wolowo. Hi ku hatlisa Macmillan u khuvuriwile kutani a sungula ku tirha na Makwerhu Russell eyindlu-nkulu ya Sosayiti le New York.

13. Hi xihi xiphiqo lexi Macmillan ni van’wana va xi voneke malunghana ni ku hetiseka ka Matewu 24:14?

¹³ Hikwalaho ka leswi va swi kumeke loko va hlaya Bibele, Vakreste lava lava totiweke va kombetele eka 1914 tanihi lembe ra nkoka eku hetisekeni ka xikongomelo xa Xikwembu. Kambe Macmillan ni van’wana a va nga twisisi leswaku ku chumayela eka matiko loku vhumbhiweke eka Matewu 24:14 a ku ta endliwa njhani hi nkarhi lowu lowutsongo swonghasi lowu saleke. Endzhakunyana u te: “Ndzi tsundzuka ndzi vulavula na Makwerhu Russell ha swona minkarhi yo hlayanyana, naswona a a hlamula a ku, ‘Phela, makwerhu, kwala New York hi ni Vayuda vo tala ku tlula lava nga kona eYerusalema. Hi ni vanhu vo huma eIreland laha ku tlula lava va nga kona le Dublin. Naswona hi ni Mantariyana yo tala ku tlula lawa ma nga kona le Rhoma. Kutani loko ho va fikelela laha, hi ta va hi fikelele vanhu hi rungula.’ Kambe sweswo a swi nga yi enerisi mianakanyo ya hina. Hi loko ku anakanyiwa hi ‘Photo-Drama.’”

14. Emahlweni ka 1914, hi wihi ntirho lowu xiyekaka lowu sunguriweke?

¹⁴ “Photo-Drama of Creation” a wu ri nchumu lowuntshwa lowu hlamarisaka! A yi hlanganisa swifaniso leswi tshukatshukaka ni ti-slide ta nghilazi leti pendiweke hi voko, leti fambisanaka ni tinkulumo ta Bibele ni vuyimbeleri lebyi nga eka tirhekhodo ta fonografi. Hi 1913, Xihondzo xo Rindza (xa Xinghezi) xi vule leswi malunghana ni ntsombano lowu khomeriweke le Arkansas, U.S.A.: “Ku fikeleriwe xiboho, hi vun’we, xa leswaku sweswi i nkarhi wo sungula ku tirhisa swifaniso leswi tshukatshukaka eku dyondziseni ka mintiyiso ya Bibele. . . . [Russell] u vule leswaku se u ni malembe manharhu a ri karhi a tirhela ku hetisisa kungu leri naswona sweswi ana se ku ni madzana ya swifaniso swo saseka leswi se swi lunghekeke, leswi handle ko kanakana swi nga ta koka mintshungu leyikulu ni ku twarisa Evhangeli, ni ku pfuna vanhu leswaku va tlhela va kombisa ripfumelo eka Xikwembu.”

15. Xana “Photo-Drama” yi ve ni vuyelo bya njhani?

¹⁵ Kunene “Photo-Drama” yi endle sweswo loko yi kombisiwa ro sungula hi January 1914. Hi leswi swiviko leswi humaka eka Xihondzo xo Rindza (xa Xinghezi) xa 1914:

April 1: “Endzhaku ko vona swiyenge swimbirhi, mufundhisi un’wana u te, ‘Ndzi lo vona hafu ntsena ya PHOTO-DRAMA OF CREATION, kambe eka yona se ndzi dyondze swo tala swinene hi Bibele ku tlula leswi ndzi swi dyondzeke eka khoso ya malembe manharhu eka seminara ya ta vukhongeri.’ Muyuda un’wana endzhaku ka ku yi vona u te, ‘Sweswi ndzi titwa ndzi ri Muyuda wo antswa ku tlula loko ndzi nga si ta laha.’ Ku te vafundhisi ni tinani to hlayanyana ta Khatoliki, ti ta vona DRAMA naswona ti yi tsakerile swinene. . . . Ku ni swiyenge swa khume-mbirhi ntsena swa DRAMA leswi swi heleke . . . Hambiswiritano, se hi fikelele madoroba lamakulu ya makume-nharhu-n’we naswona hi karhi hi tirha eka wona . . . Vanhu vo tlula makume-nharhu tlhanu wa magidi hi siku ma karhi ma yi vona, ma yi twa, ma yi tsakela, ma anakanya ha yona naswona ma karhi ma katekisiwa.”

June 15: “Swifaniso leswi swi ndzi endle ndzi hisekela swinene ku hangalasa Ntiyiso, naswona swi kurise rirhandzu ra mina hi Tata wa le Tilweni ni Makwerhu wa hina Lonkulu Yesu. Siku na siku ndzi khongelela leswaku Xikwembu xi katekisa swinene PHOTO-DRAMA OF CREATION ni hinkwavo lava nga ni xandla eku yi kombiseni . . . Ndzi nandza wa n’wina eka Yena, F. W. KNOCHE.—Iowa.”

July 15: “Ha tsaka ku vona ndlela leyi swifaniso leswi swi tsakiseke vanhu va doroba leri ha yona, naswona ha tiyiseka leswaku vumbhoni lebyi lebyi nyikeriwaka emisaveni bya karhi bya tirhisiwa ku hlengeleta vo tala lava tikombisaka va ri swin’wetsin’wetsi leswi hlawuriweke hi Hosi. Laha ku ni nhlayo yo nyawula ya swichudeni swa Bibele swa xiviri, leswi hi swi tivaka naswona swi hlanganyelaka ni Vandlha hikwalaho ko pfuniwa hi Photo-Drama. . . . Makwenu wa xisati eHosini, EMMA L. BRICKER.”

November 15: “Ha tshemba leswaku mi ta tsaka ku twa hi ta vumbhoni lebyinene lebyi nyikeriwaka hi ku tirhisa PHOTO-DRAMA OF CREATION eka The London Opera House, Kingsway. Voko leri kongomisaka ra Hosi ri tikombise hi ndlela leyi hlamarisaka eka nkombiso lowu hinkwawo lowu vamakwerhu va wu tsakelaka swinene . . . Vayingiseri va hina a va huma eka swiyimo hinkwaswo ni tinxaka hinkwato ta vanhu; hi vone ni vafundhisi vo tala va ri kona. Mufundhisi un’wana . . . u kombele mathikithi ya leswaku yena ni nsati wa yena va ta tlhela va nghena ha wona va yi vona. Rhekta wa Kereke ya Nghilandhi u ve kona ku ta vona DRAMA leyi minkarhi yo hlayanyana, naswona . . . u te ni vanghana vakwe vo tala leswaku va ta yi vona. Nakambe a ku ri na vabixopo vambirhi, ni vachaviseki vo hlayanyana.”

December 1: “Mina ni nsati wa mina hi nkhensa swinene Tata wa hina wa le Matilweni hikwalaho ka nkateko lowu lowukulu, lowu nga ringanisiwiki na nchumu, lowu hi veke na wona hikwalaho ka wena. I PHOTO-DRAMA ya wena yo saseka leyi endleke leswaku hi kota ku vona ni ku amukela Ntiyiso . . . Laha hi ni tivholumo ta wena ta tsevu leti nge STUDIES IN THE SCRIPTURES. Ta hi pfuna swinene.”

Ndlela Leyi Miringo Yi Langutiweke Ha yona Hi Nkarhi Wolowo

16. Hikwalaho ka yini lembe ra 1914 ri hundzuke ndzingo eka ripfumelo?

¹⁶ Kambe, ku vuriwa yini loko Vakreste volavo lava tshembekeke ni lava tinyiketeleke va kume leswaku ku langutela ka vona ka leswaku va hlanganisiwa ni Hosi hi 1914 a ku hetiseki? Vatotiwa lava va langutane ni nkarhi wo tika swinene. Xihondzo xo Rindza (xa Xinghezi) xa November 1, 1914, xi te: “A hi tsundzukeni leswaku hi le ka nguva ya ku ringiwa.” Malunghana ni mhaka leyi, buku leyi nge Timbhoni Ta Yehovha I Vahuweleri Va Mfumo Wa Xikwembu (1993) yi ri: “Malembe yo suka eka 1914 ku ya eka 1918, hakunene ma tikombe ma ri ‘nguva ya ku ringiwa’ eka Swichudeni swa Bibele.” Xana a va ta pfumela leswaku ripfumelo ra vona ri hlutiwa ni mianakanyo ya vona yi ololoxiwa leswaku va ta kota ku endla ntirho lowukulu lowu va vekeriweke wona?

17. Xana vatotiwa lava tshembekaka va titwise ku yini loko va tikuma va ha ri laha misaveni endzhaku ka 1914?

¹⁷ Xihondzo xo Rindza (xa Xinghezi) xa September 1, 1916, xi te: “A hi anakanya leswaku ntirho wo Tshovela, wa ku hlengeleta Kereke [vatotiwa] a wu ta hela ku nga si hela Minkarhi ya Vamatiko; kambe a ku kona eBibeleni laha ku vuriwaka sweswo. . . . Xana ha tisola leswi ntirho wo Tshovela wa ha yaka emahlweni? . . . Vamakwerhu, langutelo ra hina ra sweswi, ri fanele ri va leriya ra ku nkhensa Xikwembu swinene, hi kurisa ku tlangela ka hina Ntiyiso wo saseka lowu xi hi nyikeke lunghelo ra ku wu vona ni ku va xiphemu xa wona, ni ku engetela ku hiseka ka hina, hi teka Ntiyiso wolowo hi wu tivisa van’wana.” Ripfumelo ra vona a ri ringiwa, kambe va langutane ni ndzingo naswona va humelerile. Kambe hina Vakreste hi fanele hi tsundzuka leswaku miringo ya ripfumelo yi nga ha va yi nyingi naswona yi ri leyi nga faniki.

18, 19. Hi yihi miringo yin’wana ya ripfumelo leyi veke kona eka vanhu va Xikwembu endzhaku ka rifu ra Makwerhu Russell?

¹⁸ Hi xikombiso, ndzingo wun’wana wu fikele masalela endzhakunyana ka loko Makwerhu Charles T. Russell a lovile. Wolowo a wu ri ndzingo wa ku tshembeka ni wa ripfumelo ra vona. Xana ‘hlonga ro tshembeka’ ra le ka Matewu 24:45 a ri ri mani? Van’wana a va vona onge a ku ri Makwerhu Russell hi yexe, naswona a va nga tiyimiselanga ku tirhisana ni malunghiselelo lamantshwa yo fambisa timhaka. Loko a a ri yena hlonga ra kona, xana vamakwerhu a va ta endla yini leswi sweswi se a feke? Xana a va fanele va landzelela munhu wo karhi lontshwa la hlawuriweke, kumbe sweswi a ku ri nkarhi wa ku xiya leswaku Yehovha a a nga tirhisi munhu un’we, kambe a a tirhisa ntlawa hinkwawo wa Vakreste tanihi xitirho, kumbe ntlawa wa hlonga?

¹⁹ Ndzingo wun’wana wu te eka Vakreste va ntiyiso hi 1918 loko valawuri va tiko, lava a va kuceteriwa hi vafundhisi va Vujagana, ‘va sungule hasahasa hi ku tirhisa nawu’ ku lwisana ni nhlengeletano ya Yehovha. (Pisalema 94:20, KJ) Swichudeni swa Bibele swi sungule ku xanisiwa hi tihanyi eAmerika N’walungu ni le Yuropa. Nkaneto lowu vangiwaka hi vafundhisi wu fikelele maninginingi ya wona hi May 7, 1918, loko le United States ku humesiwe xileriso xa le nawini xa leswaku ku khomiwa J. F. Rutherford ni van’wana vo hlayanyana lava a tirhisanaka na vona, ku katsa na A. H. Macmillan. Hi vunwa ku vuriwe leswaku va vanga nhlunga-vuhosi etikweni, naswona valawuri va arile ku va yingisa loko va vula leswaku va hava nandzu.

20, 21. Hilaha swi vhumbhiweke hakona eka Malakiya 3:1-3, hi wihi ntirho lowu a wu endliwa exikarhi ka vatotiwa?

²⁰ Hambileswi vona a va nga swi voni hi nkarhi wolowo, a ku ri karhi ku endliwa ntirho wo basisa, hilaha wu hlamuseriwaka hakona eka Malakiya 3:1-3: “I mani l’a nga ṭhamelaka siku ra ku ta ka yena? I mani l’a nga yimaka e ku fikeni ka yena? Hikuv̌a [ntsumi ya ntwanano yi] kotisa nḍilo wa muṅwokisi, ni šisipi ša v̌ahlantŝi. O ta ṭhama, a ri kari a ṅwokisa, a basisa silver; o ta basisa v̌ana v̌a Levi, a v̌a tengisa e ku fana ni nsuku ni ku kotisa silver, leŝaku v̌a v̌a e ka Yehova, v̌a humesa maganḍelo hi ku lulama.”

²¹ Loko Nyimpi yo Sungula ya Misava yi ya eku heleni, Swichudeni swin’wana swa Bibele swi langutane ni ndzingo wun’wana wa ripfumelo—wa ku hlayisa vukala-tlhelo hi ku helela etimhakeni ta nyimpi ya misava. (Yohane 17:16; 18:36) Van’wana a va byi hlayisanga vukala-tlhelo. Kutani hi 1918, Yehovha u rhumele ‘ntsumi ya ntwanano,’ Kreste Yesu, etempeleni Yakwe ya moya leswaku yi ta basisa ntlawa wa Yena lowutsongo wa vagandzeri eka thyaka ra misava. Lava a va tiyimisele ku kombisa ripfumelo ra ntiyiso, va dyondzile eka leswi va humeleleke naswona va ye emahlweni, va chumayela hi ku hiseka.

22. Malunghana ni miringo ya ripfumelo, i yini leswi swa ha faneleke swi kambisisiwa?

²² Leswi hi swi dyondzeke sweswi a ko va matimu ntsena. Swi xi khumba swinene xiyimo xa moya xa sweswi xa vandlha ra Yehovha ra misava hinkwayo. Kambe, eka xihloko lexi landzelaka, a hi kambisiseni yin’wana ya miringo ya ripfumelo leyi langutanaka ni vanhu va Xikwembu namuntlha kutani hi vona leswaku hi nga yi hlula njhani hi ndlela leyi humelelaka.

Wa Tsundzuka Xana?

◻ Hikwalaho ka yini vanhu va Yehovha va fanele va langutela leswaku ripfumelo ra vona ri ringiwa?

◻ Hi wahi matshalatshala lawa a ma ri karhi ma endliwa, yo hangalasa rungula ra Xikwembu emahlweni ka 1914?

◻ “Photo-Drama” a ku ri yini, naswona yi ve ni vuyelo byihi?

◻ Xana swiendlakalo leswi sukelaka eka 1914 ku ya eka 1918 swi ve ndzingo eka vatotiwa hi ndlela yihi?

[Xifaniso lexi nga eka tluka 12]

Eku heleni ka lembe-xidzana leri hundzeke ni le ku sunguleni ka leri, vanhu ematikweni yo tala a va dyondza Bibele hi ku pfuniwa hi ntlhandlamano wa “Millennial Dawn,” lowu endzhakunyana wu vitaniweke “Studies in the Scriptures”

[Xifaniso lexi nga eka tluka 13]

Papila ro huma eka C. T. Russell leri nga ni rungula ra xingheniso leri nga ta rhekhodiwa leri eka rona a nga te: “‘Photo-Drama of Creation’ yi humesiwe hi IBSA—International Bible Students Association. Xikongomelo xa yona i ku dyondzisa hi timhaka ta sayense ya vukhongeri, ni ku lwela Bibele”

[Xifaniso lexi nga eka tluka 15]

Demetrius Papageorge u famba-fambe a kombisa “Photo-Drama of Creation.” Endzhakunyana u khotsiwile hikwalaho ka vukala-tlhelo byakwe tanihi Mukreste