Vun’we Endleleni Yo Antswa Ya Vutomi
Loko vaaki va misava vo ya emahlweni va andza, ku nga ri khale ku ta va ku ri ni vanhu va tsevu wa magidi ya timiliyoni emisaveni. Hambileswi hinkwavo va humaka eka tatana un’we, swi vonaka vanhu vo tala va nga swi pfumeli leswaku i swirho swa ndyangu wa misava hinkwayo lowu tihlamulelaka eka Muvumbi wo tlhariha ni la nga ni rirhandzu. Timholovo ni madzolonga exikarhi ka matiko, tinxaka ni mindhavuko, i vumbhoni lebyi dyisaka mbitsi bya xiyimo lexi, lexi khomisaka gome.
HIKWALAHO ka swiyimo swa sweswi swa misava, vun’we bya misava hinkwayo byi nga vonaka onge byi nge fikeleriwi. Buku leyi nge The Columbia History of the World yi ri: “Eka xivutiso xo hlawuleka ku swi tlula hinkwaswo xa leswaku ku nga hanyiwa njhani hi vun’we, misava ya manguva lawa a yi na yona ndlela leyintshwa, nikatsongo.”
Hambiswiritano, ku endla leswaku ku va ni vun’we eka vaaki hinkwavo va misava a swi lavi ndlela leyintshwa. Ndlela leyi yisaka evun’weni yi andlariwile eMatsalweni yo Kwetsima. Yi titshege hi ku gandzela Loyi a vumbeke misava ni vutomi hinkwabyo lebyi nga ehenhla ka yona. Vun’we bya ntiyiso bya mianakanyo, xikongomelo ni ndlela ya vutomi ana se byi kona exikarhi ka vanhu va Xikwembu. Leswi va endlaka timiliyoni ta ntlhanu na hafu ematikweni ya 233, va ni vun’we eku pfumeleni ka vona leswaku ku hanya hi ndlela ya Xikwembu hi yona ndlela yo antswa. Ku fana ni mupisalema, va khongela va ku: “Oho Yehovha, ndzi letele hi ndlela ya wena. Ndzi ta famba entiyisweni wa wena. Endla mbilu ya mina yi va ni vun’we leswaku yi chava vito ra wena.”—Pisalema 86:11, NW.
Ku hlanganisiwa loku ka vanhu leswaku va ta evugandzerini bya ntiyiso ku vhumbhiwe khale swinene hi muprofeta Esaya. U tsarile a ku: “E mikarini ya makumo, ku ta humelela leŝaku nṭhav̌a ya yindlu ya Israel yi ta v̌ekiwa e nhlohlorini ya tinṭhav̌a, yi tlakusiwa henhla ka ŝiṭunga, kutani matiko hikwawo ma ta talela kona. Matiko la’yo tala ma ta ta kona, ma ku: Tanani, hi ta tlhandlukela nṭhav̌eni ya Yehova, e ndlwini ya Šikwembu ša Yakob; ši ta hi dyonḍisa tindlela ta šona, kutani hi ta famba e mitileni ya šona.”—Esaya 2:2, 3.
Vun’we bya Timbhoni ta Yehovha byi hlawulekile. Emavandlheni yo tlula 87 000 emisaveni hinkwayo, ti dya swakudya leswi fanaka swa moya eminhlanganweni ya tona ya vhiki rin’wana ni rin’wana. (Matewu 24:45-47) Hambiswiritano, ku sukela exikarhi ka 1998 ku ya eku sunguleni ka 1999, Timbhoni ti kombise vun’we bya tona hi ndlela yin’wana—hi ku hlangana emisaveni hinkwayo eMintsombanweni ya tona ya masiku manharhu ya “Ku Hanya Hi Ndlela Ya Xikwembu.” Ematikweni ya 13, minhlangano leyi yi katse ni vapfhumba vo tala lava humaka ematikweni yo hambana-hambana kutani a yi vitaniwa mintsombano ya matiko hinkwawo. Yin’wana a yi vitaniwa mintsombano ya muganga. Kambe emintsombanweni leyi hinkwayo a ku nyikeriwa nongonoko wun’we wa swilo leswinene swa moya.
A swi tsakisa swonghasi ku vona vapfhumba lava tsakeke, lava ambaleke kahle va khitikanela etiholweni ta mintlangu ni le switediyamu leswaku va ta dyondzisiwa hi Yehovha! Xikombiso xa xiviri hi leswi swi nga vuriwa hi mupfhumba un’wana wa ntsombano wa matiko hinkwawo lowu a wu khomeriwe eMichigan, U.S.A. U te: “A ku ri ntsako wonghasi ku vona vamakwerhu lava humaka emisaveni hinkwayo—eRiphabliki ya Czech, eBarbados, eNigeria, eHungary, eNghilandhi, eHolland, aEtiyopiya, eKenya ni le matikweni man’wana yo tala—va vukarhana! A swi nyanyula ku vona vamakwerhu va tshame swin’we hi vun’we, va humesa mihloti ya ntsako hikwalaho ka rirhandzu leri va nga na rona eka un’wana ni un’wana ni le ka Xikwembu xa vona lexikulu, Yehovha.” Xihloko lexi tlhandlamaka xi ta kambisisa nongonoko wa ntsombano lowu tsakeriweke hi timiliyoni emisaveni hinkwayo.
[Laha Xifaniso Xi Humaka Kona eka tluka 3]
Mountain High Maps® Copyright © 1997 Digital Wisdom, Inc.