Xana Swikhongelo Swa Wena Swi ‘Lunghiseleriwe Ku Fana Ni Murhi Wa Risuna’?
“Šikhongelo ša mina a ši tlhandlukele ka wena tani hi miri ya risuna.”—PISALEMA 141:2.
1, 2. Ku hisiwa ka murhi wa risuna a ku fanekisela yini?
YEHOVHA XIKWEMBU u lerise muprofeta wakwe Muxe leswaku a lunghiselela mirhi ya risuna yo kwetsima, leswaku yi ta tirhisiwa etabernakeleni ya Israyele, yo gandzela eka yona. Xileriso lexi humaka etilweni a xi lava leswaku ku hlanganisiwa mixaka ya mune ya swinun’hwerisi. (Eksoda 30:34-38) Hakunene a a swi ri nun’hwelo wo nandziha.
2 Ntwanano wa Nawu lowu tiko ra Israyele ri nghenisiweke eka wona, a wu lava leswaku ku hisiwa murhi wa risuna siku na siku. (Eksoda 30:7, 8) Xana ku tirhisiwa ka murhi wa risuna a ku ri ni ntikelo wo karhi wo hlawuleka? Ina, hikuva mupisalema u yimbelerile a ku: “Šikhongelo ša mina a ši tlhandlukele ka wena [Yehovha Xikwembu] tani hi miri ya risuna, ni ku tlakuka ka mav̌oko ya mina a ku fane ni ganḍelo ra madyambu!” (Pisalema 141:2) Ebukwini ya Nhlavutelo, muapostola Yohane u hlamusela lava va rhendzeleke xiluvelo xa Xikwembu xa le matilweni tanihi lava nga ni minkambana ya nsuku leyi teleke mirhi ya risuna. “Naswona,” hi ku vula ka rungula leri huhuteriweke, “murhi wa risuna wu vula swikhongelo swa vakwetsimi.” (Nhlavutelo 5:8) Kutani ke, ku hisiwa ka murhi wa risuna, lowu nga ni nun’hwelo wo nandziha, a swi yimela swikhongelo leswi amukelekaka leswi a swi nyikeriwa hi malandza ya Yehovha vusiku ni nhlikanhi.—1 Vatesalonika 3:10; Vaheveru 5:7.
3. I yini lexi faneleke xi hi pfuna leswaku hi ‘lunghiselela swikhongelo swa hina swi fana ni murhi wa risuna eka Xikwembu’?
3 Loko swikhongelo swa hina swi ta amukeleka eka Xikwembu, hi fanele hi khongela eka xona hi vito ra Yesu Kreste. (Yohane 16:23, 24) Kambe, xana hi nga wu antswisa njhani ntikelo wa swikhongelo swa hina? Ku kambisisa swikombiso swin’wana swa le Matsalweni swi nga hi pfuna leswaku hi lunghiselela swikhongelo swa hina swi fana ni murhi wa risuna eka Yehovha.—Swivuriso 15:8.
Khongela Hi Ripfumelo
4. Ripfumelo ri hlangana njhani ni xikhongelo lexi amukelekaka?
4 Loko swikhongelo swa hina swi ta tlhandlukela eka Xikwembu ku fana ni murhi wa risuna lowu nga ni nun’hwelo wo nandziha, hi fanele hi khongela hi ripfumelo. (Vaheveru 11:6) Loko vakulu va Vakreste va kuma leswaku munhu la vabyaka emoyeni wa wu amukela mpfuno wa vona lowu humaka eMatsalweni, “xikhongelo [xa vona] xa ripfumelo xi ta hanyisa la nga pfukiki swinene.” (Yakobo 5:15) Swikhongelo leswi vuriwaka hi ripfumelo swa tsakisa eka Tata wa hina wa le matilweni, leswi swi tano na hi ku hlaya Rito ra Xikwembu hi ku tinyiketela. Mupisalema u kombise langutelo lerinene loko a yimbelerile a ku: “Nḍi ta tlakusela ku lerisa ka wena e mav̌oko ya mina, hikuv̌a nḍa ku ranḍa, nḍi engeta nḍi anakanya tifanelo ta wena. Nḍi dyonḍise, nḍi he ku twa lo’kunene, ni ku twisisa! Hikuv̌a nḍi pfumerile ku lerisiwa hi wena.” (Pisalema 119:48, 66) A hi ‘pfuleni mavoko ya hina’ hi xikhongelo xa ku titsongahata, hi tlhela hi kombisa ripfumelo hi ku fambisana ni swileriso swa Xikwembu.
5. Hi fanele hi endla yini loko hi pfumala vutlhari?
5 A hi nge hi pfumala vutlhari lebyi lavekaka leswaku hi langutana ni ndzingo. Kumbexana a hi tiyiseki leswaku vuprofeta byo karhi bya Bibele hakunene byi karhi bya hetiseka sweswi. Ematshan’weni yo pfumelela nchumu lowu wu hi dlaya emoyeni, a hi khongeleleni vutlhari. (Vagalatiya 5:7, 8; Yakobo 1:5-8) Kambe, a hi nge languteli leswaku Xikwembu xi hi hlamula hi ndlela yo karhi yo hlawuleka. Hi fanele hi kombisa leswaku hi tiyimiserile hi leswi hi swi khongelelaka, hi ku endla leswi xi languteleke leswaku vanhu va xona hinkwavo va swi endla. I swa nkoka leswaku hi va ni dyondzo leyi akaka ripfumelo, ya Matsalwa, hi ku pfuniwa hi tibuku leti humaka eka “hlonga ro tshembeka ni ro tlhariha.” (Matewu 24:45-47; Yoxuwa 1:7, 8) Nakambe hi fanele hi kula evutivini hi ku va ni xiphemu nkarhi na nkarhi eminhlanganweni ya vanhu va Xikwembu.—Vaheveru 10:24, 25.
6. (a) I yini lexi hinkwerhu hi faneleke hi xi xiya malunghana ni nkarhi wa hina swin’we ni ku hetiseka ka vuprofeta bya Bibele? (b) Ku tlhandlekela eka ku khongelela ku kwetsimisiwa ka vito ra Yehovha, hi fanele hi endla yini?
6 Namuntlha, Vakreste van’wana va hlongorisa swilo ni mintirho leyi kombisaka leswaku va rivele leswaku sweswi hi le kusuhi swinene ni ‘nkarhi wa makumu.’ (Daniyele 12:4) I swinene loko vapfumeri-kulobye va khongelela vanhu vo tano leswaku va tlhela va pfuxeta kumbe ku tiyisa ripfumelo ra vona eka vumbhoni bya Matsalwa bya leswaku vukona bya Kreste byi sungule hi 1914 loko Yehovha a n’wi veke tanihi Hosi ya matilo ni leswaku wa fuma exikarhi ka valala vakwe. (Pisalema 110:1, 2; Matewu 24:3) Hinkwerhu hi fanele hi swi xiya leswaku swiendlakalo leswi vhumbhiweke swo fana ni ku lovisiwa ka vukhongeri bya mavunwa—“Babilona Lonkulu”—ni nhlaselo wa tihanyi wa Gogo wa Magogo ehenhla ka vanhu va Yehovha, ni ku ponisiwa ka vona hi Xikwembu xa Matimba Hinkwawo enyimpini ya Armagedoni, swi nga ha endleka nkarhi wun’wana ni wun’wana naswona hinkwaswo swi nga humelela hi xinkarhana lexitsongo swinene. (Nhlavutelo 16:14, 16; 18:1-5; Ezekiyele 38:18-23) Kutani ke, a hi khongeleleni mpfuno wa Xikwembu leswaku hi ta tshama hi xalamukile emoyeni. Onge hinkwerhu ka hina hi nga khongela swinene leswaku ku kwetsimisiwa vito ra Yehovha, leswaku Mfumo wa yena wu ta, ni leswaku ku rhandza ka yena ku endliwa emisaveni tanihi le tilweni. Ina, onge hi nga hambeta hi kombisa ripfumelo, hi kombisa leswaku swikhongelo swa hina swi huma embilwini. (Matewu 6:9, 10) Ina, onge hinkwavo lava rhandzaka Yehovha, va nga lava Mfumo ku sungula ni ku lulama ka yena, naswona va hlanganyela swinene eku chumayeleni ka mahungu lamanene, makumu ma nga si fika.—Matewu 6:33; 24:14.
Dzunisa Ni Ku Nkhensa Yehovha
7. I yini lexi ku tsakisaka eka xikhongelo xa Davhida lexi tsariweke eka 1 Tikronika 29:10-13?
7 Ndlela ya nkoka ya ku ‘lunghiselela swikhongelo swa hina swi fana ni murhi wa risuna’ i ku dzunisa ni ku nkhensa Xikwembu hi mbilu ya hina hinkwayo. Hosi Davhida u endle xikhongelo xa muxaka lowu loko yena ni vanhu va Israyele va endle nhlengo wo seketela ku akiwa ka tempele ya Yehovha. Davhida u khongerile a ku: “A ku nkhensiwe Yehova, Šikwembu ša Israel tata wa hina, hi masiku ni masiku! E ka wena Yehova ku v̌e v̌ukulu, ni matimba, ni ku twala, ni ku kwetsima, ni v̌uhosi, hikuv̌a hikwaŝo le’ŝi nge tilweni ne misav̌eni, ŝi na wena; e ka wena Yehova, ku v̌e ku fuma, wena l’a titlakuseke ku v̌a hosi henhla ka ŝilo hikwaŝo! Ku fuma ni ku twala ku hume ka wena; wa fuma henhla ka ŝilo hikwaŝo: matimba ni ku tiya ŝi le v̌okweni ra wena; hi wena l’a tiv̌aka ku nyika v̌ukulu hikwabyo ni matimba hikwawo. Oho! Šikwembu ša hina! Ŝeŝi ha ku v̌onga, hi ḍunisa v̌ito ra wena le’ri kwetsimaka.”—1 Tikronika 29:10-13.
8. (a) Hi wahi marito ya ku dzunisa lama nga eka Tipisalema 148 ku ya eka 150 lama khumbaka swinene mbilu ya wena? (b) Loko hi pfumelelana ni marito lama nga eka Pisalema 27:4, xana hi ta endla yini?
8 Mawaku marito yonghasi ya ku dzunisa ni ku nkhensa! Swi nga ha endleka swikhongelo swa hina swi nga fuwi ku fana ni lexi, kambe swi nga koteka leswaku swi huma embilwini ku fana na xona. Buku ya Tipisalema yi lo mphaa, hi swikhongelo swa ku nkhensa ni ku dzunisa. Marito yo saseka ya ku dzunisa ma kumeka eka Tipisalema 148 ku ya eka 150. Ku tlangela Xikwembu ka phofuriwa eka tipisalema to tala. Davhida u yimbelerile a ku: “Nḍi komberile šilo šiṅwe ka Yehova, nḍa ha ši nav̌ela ngopfu: hi leŝaku nḍi ṭhama e ndlwini ya Yehova hi masiku hikwawo ya ku hanya ka mina. Nḍi ta hlalela ku kwetsima ka Yehova, nḍi v̌a nḍi kambisisa tempele ya yena.” (Pisalema 27:4) A hi hanyeni hi ku pfumelelana ni swikhongelo swo tano, hi ku gingiritekela mintirho hinkwayo leyi endliwaka hi mintshungu leyi hlengeletaneke ya Yehovha. (Pisalema 26:12) Loko ho endla leswi hi tlhela hi anakanyisisa hi Rito ra Xikwembu siku na siku, hi ta kuma swivangelo swo tala swo dzunisa ni ku nkhensa Yehovha hi mbilu hinkwayo.
Lava Mpfuno Wa Yehovha Hi Ku Titsongahata
9. Xana Hosi Asa u khongele njhani naswona vuyelo byi ve byihi?
9 Loko hi tirhela Yehovha hi mbilu hinkwayo tanihi Timbhoni ta yena, hi nga tiyiseka leswaku wa swi twa swikhongelo swa hina swo kombela mpfuno. (Esaya 43:10-12) Anakanya hi Hosi Asa wa le Yuda. Malembe ya 10 yo sungula, ya mfumo wakwe wa malembe ya 41 (977-937 B.C.E.), a ma rhurile. Hiloko mfumo wa Yuda wu hlaseriwa hi vuthu leri nga ni vavanuna va miliyoni leri rhangeriweke hi Zara lowa Muetiyopiya. Hambileswi nhlayo ya vanhu vakwe a yi ri yitsongo swinene, Asa ni vuthu rakwe va humile va ya hlangana ni vahlaseri. Kambe, Asa u khongele hi matimba swinene loko nyimpi yi nga si sungula. A a swi tiva leswaku Yehovha u ni matimba ya ku va kutsula. Loko yi kombela mpfuno, hosi yi te: “Hi ṭhemba wena, kutani hi humile nyimpi hi v̌ito ra wena ku ta lwa ni v̌unyingi lebyi. Hi wena Yehova, Šikwembu ša hina; u nga ṭhuki u hluriwa hi munhu!” Va hlurile hi ku helela loko Yehovha a ponisa Yuda hikwalaho ka vito rakwe lerikulu. (2 Tikronika 14:1-15) Ku nga khathariseki leswaku Xikwembu xa hi kutsula hi xiviri emiringweni kumbe xi hi pfuna leswaku hi yi tiyisela, a swi kanakanisi leswaku swikombelo swa hina swo lava mpfuno xa swi twa hakunene.
10. Loko hi nga swi tivi leswaku hi nga langutana njhani ni xiphiqo xo karhi, xana xikhongelo xa Hosi Yoxafati xi nga va mpfuno hi ndlela yihi?
10 Loko hi nga swi tivi leswaku hi nga langutana njhani ni xiphiqo xo karhi, hi nga tiyiseka leswaku Yehovha u ta swi twa swikombelo swa hina swo lava mpfuno. Leswi swi kombisiwe emasikwini ya Hosi ya Yudiya, Yoxafati, loyi mfumo wakwe wa malembe ya 25 wu sunguleke hi 936 B.C.E. Loko tiko ra Yuda ri xungetiwe hi mavuthu lama hlanganeke ya Mowabu, Amoni ni tiko ra le tintshaveni ra Seyiri, Yoxafati u khongerile a ku: “Oho! Šikwembu ša hina! Šana u nga ka u nga v̌a av̌anyisi šana? Hikuv̌a hi pfumala matimba e mahlweni ka v̌unyingi lebyi le’byikulu le’byi taka henhla ka hina; loko hi ri hina, a hi tiv̌i leŝi hi nga ta ŝi endla, kambe mahlo ya hina ma langutela wena.” Yehovha u xi hlamurile xikhongelo xexo xa ku titsongahata, a lwela tiko ra Yuda hi ku pfilunganya mavuthu ya valala lerova ma dlayana hi woxe. Hikwalaho ka sweswo, matiko lama nga ekusuhi ma ngheniwe hi ku chava, kutani ku va ni ku rhula eYuda. (2 Tikronika 20:1-30) Loko hi pfumala vutlhari lebyi lavekaka leswaku hi langutana ni xiphiqo, hi nga khongela ku fana na Yoxafati: ‘A hi swi tivi leswi hi faneleke hi swi endla, kambe mahlo ya hina ma langute wena, Yehovha.’ Moya wo kwetsima wu nga hi endla leswaku hi tsundzuka tinhla ta Matsalwa leti lavekaka leswaku hi tlhantlha xiphiqo xexo, kumbe Xikwembu xi nga ha hi pfuna hi ndlela leyi tlulaka ku twisisa ka munhu.—Varhoma 8:26, 27.
11. I yini lexi hi nga xi dyondzaka hi xikhongelo, eka ndlela leyi Nehemiya a endleke ha yona malunghana ni rirhangu ra Yerusalema?
11 Hi nga ha boheka ku hambeta hi khongelela mpfuno wa Xikwembu. Nehemiya u kolorile, a rila, a titsona swakudya ni ku khongela masiku yo tala malunghana ni makhumbi ya Yerusalema lama onhiweke swin’we ni khombo leri weleke vaaki va Yuda. (Nehemiya 1:1-11) Handle ko kanakana, swikhongelo swa yena swi tlhandlukele eka Xikwembu ku fana ni murhi wa risuna lowu nun’hwelaka kahle. Siku rin’wana Atazekiseki Hosi ya le Peresiya u vutise Nehemiya la heleke matimba a ku: “U kombela yini ka mina-ke?” “Kutani,” hi laha Nehemiya a vikaka ha kona, “nḍi khongela Šikwembu ša le matilweni.” Xikhongelo xexo xo koma, lexi vuriweke hi mbilu xi hlamuriwile, hikuva Nehemiya u pfumeleriwile ku hetisisa ku navela ka mbilu ya yena hi ku ya eYerusalema a ya pfuxeta makhumbi ya wona lama onhiweke.—Nehemiya 2:1-8.
Pfumelela Yesu A Ku Dyondzisa Ku Khongela
12. Hi marito ya wena n’wini, u nga ti katsakanya njhani tinhla-nkulu ta xikhongelo xa Yesu xa xikombiso?
12 Eka swikhongelo hinkwaswo leswi tsariweke eMatsalweni, lexi dyondzisaka swinene i xikhongelo xa xikombiso lexi nyikeriweke hi Yesu Kreste ku fana ni murhi wa risuna. Evhangheli ya Luka yi ri: “Un’wana wa vadyondzisiwa [va Yesu] a ku eka yena: ‘Hosi, hi dyondzise ndlela ya ku khongela, hilaha Yohane na yena a dyondziseke vadyondzisiwa vakwe hakona.’ Kutani a ku eka vona: ‘Loko mi khongela, vulani leswi, “Tatana, vito ra wena a ri kwetsimisiwe. Mfumo wa wena a wu te. Hi nyike xinkwa xa hina xa siku hi ku ya hi xilaveko xa siku. Naswona u hi rivalela swidyoho swa hina, hikuva na hina ha va rivalela hinkwavo lava nga ni nandzu eka hina; u nga hi yisi endzingweni.”’” (Luka 11:1-4; Matewu 6:9-13) A hi kambisiseni xikhongelo lexi, lexi a xi nga endleriwanga ku nhlokohatiwa kambe leswaku xi va nkongomiso.
13. Xana u nga swi hlamusela njhani leswi vuriwaka hi marito lama nge, “Tatana, vito ra wena a ri kwetsimisiwe”?
13 “Tatana, vito ra wena a ri kwetsimisiwe.” Ku vitana Yehovha tanihi Tatana i lunghelo ro hlawuleka eka malandza yakwe lama tinyiketeleke. Tanihi leswi vana, hi ku ntshunxeka va tshinelelaka tatana la nga ni tintswalo, va n’wi byela swivilelo swihi na swihi, na hina nkarhi na nkarhi hi fanele hi tinyika nkarhi wo khongela eka Xikwembu hi ndlela leyi xiximekaka ni leyi kombaka xichavo. (Pisalema 103:13, 14) Swikhongelo swa hina swi fanele swi kombisa leswaku ha karhateka hi ku hlawulekisiwa ka vito ra Yehovha hikuva hi navela ku ri vona ri susiwe swisandzu hinkwaswo leswi vekiweke ehenhla ka rona. Ina, hi lava leswaku vito ra Yehovha ri hlawuleka, ri tshama ri ri leri kwetsimaka.—Pisalema 5:11; 63:3, 4; 148:12, 13; Ezekiyele 38:23.
14. Xana ku khongela u ku, “Mfumo wa wena a wu te,” swi vula yini?
14 “Mfumo wa wena a wu te.” Mfumo i vuhosi bya Yehovha lebyi yimeriweke hi hulumendhe ya Mesiya ya le tilweni, leyi fambisiwaka hi N’wana wa yena ni ‘vakwetsimi’ lava nga vafumi-kulobye na Yesu. (Daniyele 7:13, 14, 18, 27; Nhlavutelo 20:6) Ku nga ri khale wu ta “ta” wu ta hlasela vanhu hinkwavo lava kanetaka vuhosi bya Xikwembu laha misaveni, wu va herisa. (Daniyele 2:44) Kutani ku rhandza ka Yehovha ku ta endliwa emisaveni, tanihi le tilweni. (Matewu 6:10) Mawaku ntsako lowu swivumbiwa hinkwaswo leswi hi ku tshembeka swi tirhelaka Hosi ya Vuako Hinkwabyo, swi nga ta va na wona!
15. Ku kombela “xinkwa xa hina xa siku” eka Yehovha, swi kombisa yini?
15 “Hi nyike xinkwa xa hina xa siku hi ku ya hi xilaveko xa siku.” Ku kombela eka Yehovha swakudya swa “siku” swi kombisa leswaku a hi kombeli swilo swo tala, kambe hi kombela leswi hi swi pfumalaka siku na siku. Hambiloko hi tshemba leswaku Xikwembu xi ta hi nyika, hi tlhela hi tirha ni ku tirhisa ndlela yihi na yihi leyi nga yinene leswaku hi kuma swakudya ni swilaveko swin’wana. (2 Vatesalonika 3:7-10) Ina, hi fanele hi nkhensa Munyiki wa hina wa le tilweni hikuva rirhandzu, vutlhari ni matimba yakwe hi swona swi endlaka leswaku hi kuma swilo leswi.—Mintirho 14:15-17.
16. Xana hi nga ku kuma njhani ku rivaleriwa hi Xikwembu?
16 “U hi rivalela swidyoho swa hina, hikuva na hina ha va rivalela hinkwavo lava nga ni nandzu eka hina.” Tanihi leswi hi nga hetisekangiki naswona hi nga ni vudyoho, a hi swi koti ku fikelela mimpimanyeto leyi hetisekeke ya Yehovha hi ku helela. Hikwalaho, hi fanele hi khongelela ku rivaleriwa hi yena exisekelweni xa gandzelo ra nkutsulo ra Yesu. Kambe loko hi lava leswaku ‘Mutwi wa xikhongelo’ a tirhisa ntikelo wa gandzelo leri eka swidyoho swa hina, hi fanele hi tisola naswona hi tiyimisela ku amukela ndzayo yihi na yihi leyi a hi nyikaka yona. (Pisalema 65:2; Varhoma 5:8; 6:23; Vaheveru 12:4-11) Ku tlula kwalaho, hi nga langutela ku rivaleriwa hi Xikwembu ntsena loko hi ‘va rivalerile lava nga ni nandzu eka hina,’ lava va hi dyohelaka.—Matewu 6:12, 14, 15.
17. Marito lama nge, “U nga hi yisi endzingweni,” ma vula yini?
17 “U nga hi yisi endzingweni.” Bibele minkarhi yin’wana yi vula leswaku Yehovha u endla swilo swokarhi, loko entiyisweni a swi pfumelela kunene. (Rhuti 1:20, 21) Xikwembu a xi hi ringi leswaku hi dyoha. (Yakobo 1:13) Ndzingo wo endla swo biha wu huma eka Diyavulosi, nyama ya hina leyi nga ni vudyoho ni le ka misava leyi. Sathana i Muringi la ringetaka ku hi endla hi dyohela Xikwembu. (Matewu 4:3; 1 Vatesalonika 3:5) Loko hi khongela hi ku, “U nga hi yisi endzingweni,” hi kombela Xikwembu leswaku xi nga hi tshiki hi hluriwa, loko hi ringiwa ku tlula nawu wa xona. Xi nga swi kota ku hi kongomisa leswaku hi nga hluriwi ni leswaku Sathana “lowo homboloka” a nga hi hambukisi.—Matewu 6:13; 1 Vakorinto 10:13.
Hanya Hi Ku Pfumelelana Ni Swikhongelo Swa Wena
18. Xana hi nga hanya njhani hi ku pfumelelana ni swikhongelo swa hina leswaku hi kuma ntsako evukatini ni le vuton’wini bya ndyangu?
18 Xikhongelo xa Yesu xa xikombiso xi hlanganise tinhla-nkulu, kambe hi nga ha khongela hi mhaka yihi na yihi. Hi xikombiso, hi nga ha khongela hi phofula ku navela ka hina ku va ni ntsako evukatini. Leswaku hi tshama hi tengile ku fikela loko hi cata, hi nga ha khongelela ku tikhoma. Kambe, a hi hanyeni hi ku pfumelelana ni swikhongelo swa hina hi ku papalata tibuku ni vuhungasi lebyi thyakeke. Nakambe a hi tiyimiseleni ku ‘nghenela vukati eHosini ntsena.’ (1 Vakorinto 7:39; Deteronoma 7:3, 4) Loko se hi byi nghenerile vukati, hi fanele hi hanya hi ku pfumelelana ni swikhongelo swa hina swo va ni tsako hi ku tirhisa ndzayo ya Xikwembu. Naswona loko hi ri ni vana, a swi enelanga ku khongelela leswaku va va malandza lama tshembekeke ya Yehovha. Hi fanele hi lwa hi matimba leswaku hi nghenisa mintiyiso ya Xikwembu emianakanyweni ya vona hi ku dyondza Bibele na vona ni ku ya na vona eminhlanganweni ya Vukreste.—Deteronoma 6:5-9; 31:12; Swivuriso 22:6.
19. Xana hi fanele hi endla yini loko hi ri karhi hi khongela hi ntirho wa hina wa nsimu?
19 Xana hi khongelela ku kuma mikateko ensin’wini? Kutani ke, a hi endleni hi ku pfumelelana ni swikhongelo sweswo hi ku hlanganyela hi xitalo entirhweni wo chumayela hi Mfumo. Loko hi khongelela lunghelo ro pfuna van’wana leswaku va nghena endleleni yo ya evuton’wini lebyi nga heriki, hi fanele hi va ni nxaxamelo lowu tsariweke kahle wa lava tsakelaka naswona hi tiyimisela ku nghenisa nkarhi wo fambisa tidyondzo ta Bibele ta le kaya eka xiyimiso xa hina. Ku vuriwa yini loko hi navela ku nghenela ntirho wo chumayela nkarhi hinkwawo hi ri phayona? Kutani a hi tekeni magoza lama pfumelelanaka ni swikhongelo swa hina, hi ku antswisa ntirho wa hina wa ku chumayela ni ku huma nsimu ni maphayona. Loko hi teka magoza yo tano swi ta kombisa leswaku hi hanya hi ku pfumelelana ni swikhongelo swa hina.
20. I yini leswi nga ta kambisisiwa eka xihloko lexi landzelaka?
20 Loko hi tirhela Yehovha hi ku tshembeka, hi nga tiyiseka leswaku u ta swi hlamula swikhongelo swa hina leswi pfumelelanaka ni ku rhandza ka yena. (1 Yohane 5:14, 15) Ina, hi kume tinhla ta nkoka hi ku kambisisa swin’wana swa swikhongelo leswi tsariweke eBibeleni. Xihloko xa hina lexi landzelaka xi ta andlala nkongomiso wun’wana wa Matsalwa eka lava navelaka ku ‘lunghiselela swikhongelo swa vona swi fana ni murhi wa risuna eka Yehovha.’
U Nga Hlamula Njhani?
◻ Hikwalaho ka yini hi fanele hi khongela hi ripfumelo?
◻ Xana ku dzunisa ni ku nkhensa swi fanele swi va ni xiphemu xihi eswikhongelweni swa hina?
◻ Hikwalaho ka yini hi fanele hi nga kanakani ku khongela hi kombela mpfuno eka Yehovha?
◻ Hi tihi tin’wana ta tinhla-nkulu ta xikhongelo xa xikombiso?
◻ Xana hi nga hanya hi ku pfumelelana ni swikhongelo swa hina hi ndlela yihi?
[Xifaniso lexi nga eka tluka 12]
Ku fana na Hosi Yoxafati, minkarhi yin’wana hi fanele hi khongela hi ku: ‘A hi swi tivi leswi hi faneleke hi swi endla, kambe mahlo ya hina ma langute wena, Yehovha’
[Xifaniso lexi nga eka tluka 13]
Xana u khongela hi ku pfumelelana ni xikhongelo xa Yesu xa xikombiso?