Swiphiqo Swo Hlawuleka Swa Mindyangu Ya Vukati Bya Vumbirhi

MINDYANGU YA VUKATI BYA VUMBIRHI LEYI TSAKEKE YA KOTEKA! NJHANI?

Ndyangu wa vukati bya vumbirhi wu hundzuke ndyangu lowu tolovelekeke etindhawini to tala ta misava. Kambe, mindyangu ya vukati bya vumbirhi yi ni swiphiqo swo hlawuleka. A swi kanakanisi leswaku xiphiqo lexikulu ngopfu i ku kurisa vana. Hambiswiritano, hilaha swihloko swimbirhi leswi landzelaka swi nga ta ringeta ku kombisa hakona, swa koteka ku kurisa vana hi ndlela leyi humelelaka endyangwini wa vukati bya vumbirhi.

HI NTOLOVELO, VATATANA NA VAMANANA VA VUKATI BYA VUMBIRHI KU VULAVURIWE HI VONA HI ndlela yo biha. Loko vo tala va hina ha ha ri vatsongo, hi tshama hi twa hi ntsheketo wa Cinderella, loyi a xanisiweke ngopfu hi mana wakwe wa vukati bya vumbirhi. Nakambe, vana va le Yuropa va dyondza hi ntsheketo wa Snow White and the Seven Dwarfs. Mana wa vumbirhi wa Snow White u hetelele a ve noyi wo homboloka!

Xana mintsheketo yo tano yi nyika vonelo lerinene hi mindyangu ya vukati bya vumbirhi? Xana hinkwavo vatswari va vumbirhi va homboloke hi ndlela yoleyo? E-e. Vo tala va va navelela leswinene vana lava va va kumaka evukatini. Kambe va langutana ni swiphiqo swo karhi leswi tikaka leswi taka ni vutomi bya ndyangu wa vukati bya vumbirhi.

Swiphiqo Swa Ku Kurisa Vana

Loko vukati byo sungula byi onhaka, hakanyingi xivangelo i ku va vatekani va nga wupfanga. Ku tirhisana ni vana evukatini bya vumbirhi ku nga onha vuxaka. Swiviko swin’wana swi kombisa leswaku mindyangu yo tlula mune eka ya khume leyi hlanganisiweke yi hetelela yi hohlokile ku nga si hela malembe ya ntlhanu yo sungula.

Vatekani lavantshwa swi nga endleka va nga xiyi ku pfilunganyeka ka mintlhaveko, ku nga tshembani ni mintlhaveko ya mavondzo ni xikhomela leswi vana va vaka na swona loko ku fika mutswari wa vumbirhi. Vana va nga ehleketa leswaku mutswari wa vona wa xiviri u ta rhandza mutswari wa vumbirhi ku tlula vona. Tlhandla-kambirhi, mutswari wa xiviri la siyiweke hi munghana wakwe a nga swi kuma swi tika ku twisisa rirhandzu leri tamaka ri ri kona, leri vana va nga na rona eka munghana wakwe wo sungula. Mufana un’wana u ringete ku hlamusela vuxaka byakwe lebyinene ni tata wakwe wa xiviri, a ku: “Manana, ndza swi tiva leswaku Tatana u ku khome hi ndlela yo biha, kambe mina a ndzi n’wi rhandza!” Marito wolawo, hambiloko ma ri ntiyiso, ma nga endla leswaku manana a titwa a ri ni xikhomela lexikulu eka tata wa n’wana.

Tatana un’wana wa vumbirhi u te: “Entiyisweni a ndzi nga ku lulamiselanga ku langutana ni swiphiqo leswi hinkwaswo leswi yelanaka ni ku kurisa vana va mina va vumbirhi. Ndzi nghenele vukati lebyi ndzi ri ni vonelo ra leswaku leswi ndzi tekeke mana va vona se ndzi tata wa vona. A ndzi swi teka hi ndlela yoleyo! A ndzi ri twisisanga rirhandzu leri vana lava a va ri na rona eka tata wa vona wa xiviri, kutani ndzi endle swihoxo swo tala.”

Swi nga endleka ku va ni ku nga twanani ngopfu-ngopfu loko swi ta emhakeni ya ku laya. Vana va lava ndzayo leyi nga ni rirhandzu, kambe hakanyingi va lwisana na yona hambiloko yi huma eka mutswari wa xiviri. Swi tika ngopfu ku yi amukela loko yi huma eka mutswari wa vumbirhi! Hi ntolovelo, loko a fanele a layiwa, n’wana wa vukati bya vumbirhi u ta ku: “A wu tata wa mina wa xiviri!” Marito yo tano ma nga vavisa mbilu swonghasi eka mutswari wa vumbirhi la tiyimiseleke ku pfuna!

Xana vana va nga kurisiwa hi ndlela leyi humelelaka eka mindyangu leyi hlanganisiweke? Xana vatswari va vumbirhi va nga humelela eku akeni ndyangu wa vukati bya vumbirhi? Nhlamulo ya swivutiso leswi swimbirhi i ina loko hinkwavo lava khumbekaka va landzela ndzayo leyi nga eRitweni ra Xikwembu leri huhuteriweke, ku nga Bibele.

[Xifaniso lexi nga eka tluka 3]

“A wu tata wa mina wa xiviri!”