Ku Herisa Xiphiqo Xa Ku Nga Fani Ka Vanhu Hi Swiyimo

Ku nga ri khale Muvumbi u ta tisa ku ringana hi swiyimo loku vanhu va ku navelaka swinene. Ku kondza nkarhi wolowo wu fika, lexi hi nga xi endlaka i ku teka magoza yo hlangavetana ni xiphiqo xa ku nga fani ka vanhu hi swiyimo lexi khumbaka hina ni mindyangu ya hina. Hilaha Nelson Mandela, khale ka muungameri wa Afrika Dzonga, a swi vekeke hakona, “leswi hambanisaka vanhu a hi leswi hi nyikiweke swona kambe i ndlela leyi hi swi tirhisaka ha yona.”

MATIMU ya seketela marito ya yena. Vavanuna ni vavasati vo tala lava nga nyikiwangiki swo tala loko va velekiwa kambe lava tirhiseke leswi a va ri na swona, va humelele hi ndlela leyi va hambaniseke ni tintangha ta vona leti nyikiweke swo tala. Ku hambana ni sweswo, vanhu van’wana lava katekisiweke hilaha ku fuweke hi swilo leswinene loko va velekiwa va tlange hi leswi a va ri na swona ivi va tsandzeka ku tirhisa vuswikoti bya vona hilaha ku teleke.

Swi Tirhise Swinene Leswi U Nga Na Swona!

Timbhoni ta Yehovha ti swi tsakela swinene ku pfuna vanhu leswaku va tiva swikongomelo swa Xikwembu hi dyondzo ya Bibele. Hambiswiritano, ta swi xiya leswaku vanhu va fanele va kota ku hlaya ni ku tsala leswaku va ta vuyeriwa swinene eka rungula ra Bibele. Hikwalaho ka sweswo, Timbhoni ta Yehovha ti dyondzise vanhu va makume ya magidi ku hlaya ni ku tsala, ku katsa ni vanhu va 23 000 (ku sukela exikarhi ka va-1990) etikweni rin’we ntsena ra le Afrika Vupela-dyambu. Loko yi vulavula hi ntirho wo hlamarisa wo pfuna vanhu lowu Timbhoni ta Yehovha ti wu endlaka, San Francisco Examiner yi te: “U nga va teka tanihi vaaki lava nga xikombiso lexinene. Va hakela swibalo hi ku tinyiketela, va khathalela vavabyi, va lwisana ni ku pfumala dyondzo.”

Ku engetela kwalaho, hi ku tirhisa dyondzo leyi yaka emahlweni ya ku vulavula erivaleni, Timbhoni ta Yehovha ti letele vanhu va madzana ya magidi leswaku va va swivulavuri leswi fanelekaka, leswi kotaka ku vulavula hi ku khuluka emahlweni ka vanhu. Exikarhi ka magidi lawa ku ni van’wana lava tshameke va va ni swiphiqo leswikulu swa ku vulavula. Anakanya hi wanuna wa le Afrika Dzonga loyi a tsalaka a ku: “Manghanghamelo ya mina a ma ri makulu lerova se a ndzo miyela, hi ntolovelo ndzi titshega hi van’wana leswaku va ndzi vulavulela. . . . Loko ndzi tsarise eXikolweni xa Vutirheli bya le Tilweni kutani ndzi fanele ndzi hlaya Bibele emahlweni ka vayingiseri vatsongo . . . , ndzi nghanghamele swinene lerova a ndzi swi kotanga ku heta nkulumo ya mina hi nkarhi lowu vekiweke. Endzhaku ka nhlangano [mutsundzuxi] u ndzi nyike ndzayo leyi twisisekaka hi tintswalo. U ringanyete leswaku ndzi titoloveta ku hlayela ehenhla loko ndzi ri ndzexe. Leswi ndzi swi endlile, siku na siku ndzi heta nkarhi ndzi hlaya Bibele ni magazini wa Xihondzo xo Rindza hi rito leri twakalaka.” Wanuna loyi u endle nhluvuko lowunene lerova sweswi u nyikela tinkulumo ta le rivaleni eka vayingiseri va madzana, hambi ku ri magidi.

Ku Ringana Hi Swiyimo Exikarhi Ka Vamakwerhu

Swiyimo swa malunghana ni dyondzo, nkhathalelo wa rihanyo, ikhonomi ni ntshamisano swi hambana ngopfu exikarhi ka Timbhoni ta Yehovha. Ku hambana loku, ko kombisa swiyimo swa misava leswi nga hetisekangiki leswi ti hanyaka eka swona. Kambe ku hambana ni mintlawa yin’wana ya vukhongeri, xihlawu-hlawu xa rixaka, xa swiyimo swa vanhu ni xa ikhonomi xi herisiwile hilaha ku heleleke exikarhi ka tona.

Leswi ti swi hetisise hi ku endla leswi ti nga swi kotaka leswaku ti hanya hi ku ya hi leswi ti swi dyondzeke eBibeleni. Ti amukela misinya ya milawu ya Bibele hi mbilu hinkwayo, yo tanihi leyi nge: “Yehova a nga languti le’ŝi langutiwaka hi v̌anhu, hikuv̌a v̌anhu v̌a languta ngohe, kambe Yehova o languta mbilu.” (1 Samuwele 16:7) “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) “Mi nga tlheriseli swo biha hi swo biha hambi eka mani. Endlani swilo leswi nga swinene emahlweni ka vanhu hinkwavo. Loko swi koteka, swi titshege hi n’wina, vanani ni ku rhula ni vanhu hinkwavo.”—Varhoma 12:17, 18; nakambe vona 1 Timotiya 6:17-19; Yakobo 2:5, 9.

Hi ku namarhela swinene misinya leyi ya milawu ya Bibele leyi kondletelaka vun’we, Timbhoni ta Yehovha a ti xi pfumeleli xihlawu-hlawu xa ku ya hi tinxaka, swiyimo swa vanhu kumbe ikhonomi. Hi xikombiso, tinhla leti a ti hoxi xandla eku endleni ka xiboho xa leswaku i mani loyi a nga ta nyikiwa malunghelo ya ntirho evandlheni ra Vukreste. Swiavelo swa vutihlamuleri, swo tanihi ku dyondzisa ni ku langutela, swi aviwa ntsena exisekelweni xa ku faneleka hi tlhelo ra moya.—1 Timotiya 3:1-13; Tito 1:5-9.

Eka vanhu lava xanisekeke hikwalaho ka ku nga fani ka swiyimo swa misava leyi yaka hi nghohe, swa phyuphyisa loko van’wana va va khoma tanihi vamakwavo lava nga ni xiyimo lexi fanaka emahlweni ka Muvumbi wa vona! Martina a nga swi seketela leswi. Endzhaku ka loko tata wa yena a lan’we ndyangu, u kuriseriwe ekaya ra swisiwana ra mutswari un’we. Hakanyingi a a khomiwa tanihi munhu la nga laviwiki, a a nga titshembi naswona a swi n’wi tikela ku tolovelana ni vanhu van’wana. U ve ni langutelo ra ku nga vi na mhaka. Hambiswiritano, swilo swi cincile endzhaku ka loko a sungule ku dyondza Bibele ivi a va un’wana wa Timbhoni ta Yehovha. U ri: “Ndza ha fanele ndzi lwisana ni mianakanyo leyi hoxeke, kambe sweswi ndza swi kotanyana ku langutana ni xiphiqo lexi. Ku tixixima ka mina se ka antswa, naswona ndzi vulavula hi ku titshemba. Ntiyiso wu endle leswaku ndzi titwa ndzi ri ni vutihlamuleri byo karhi. Sweswi ndza swi tiva leswaku Yehovha wa ndzi rhandza ni leswaku swa fanela ku hanya.”

Tanihi ntlawa wa matiko hinkwawo wa Vakreste, Timbhoni ta Yehovha ti ni mpimo wo karhi wa ku ringana hi swiyimo ematikweni yo tlula 230, ku nga nchumu lowu hlawulekeke hakunene emisaveni ya namuntlha. Xana nhlengeletano yihi na yihi ya vukhongeri yi nga vula leswi fanaka ivi yi swi seketela hi swiendlo?

Ina, Timbhoni ta Yehovha ti langutana ni ntiyiso. Ta pfumela leswaku tanihi leswi ti tswariweke ti nga hetisekanga, a ti nge swi koti ku herisa ku nga fani ka vanhu hi swiyimo loku van’wana va ringeteke ku ku herisa hi malembe-xidzana—kambe va tsandzekile. Hambiswiritano, ta tsaka hileswi ti endleke swo tala leswaku ti herisa xiphiqo lexi, lexi dlayaka. Naswona hi ku va ni ripfumelo leri tiyeke exitshembisweni xa Xikwembu, ti langutele misava leyintshwa ya ku lulama laha ku nga fani ka vanhu hi swiyimo ku nga ta va nchumu lowu heriseriweke makumu.

Ina, vanhu hinkwavo lava yingisaka va ta tlhela va va lava ringanaka “hi xindzhuti ni timfanelo” leswi Muvumbi wa vona a a tiyimisele leswaku va va na swona eku sunguleni. Mawaku mianakanyo leyi tsakisaka swonghasi! Naswona enkarhini wolowo swi ta va swa xiviri!

[Xifaniso lexi nga eka tluka 7]

Timbhoni ta Yehovha ti lwa ni ku nga koti ku hlaya ni ku tsala hi ku dyondzisa vanhu va makume ya magidi

[Xifaniso lexi nga eka tluka 8]

Ntiyiso wa Bibele wu pfuna ku herisa xihlawu-hlawu xa rixaka, xa swiyimo swa vanhu ni xa ikhonomi