Ku Nyiketeriwa Ka Ntsindza Wa Dyondzo Wa Watchtower—Nkhuvo Lowu Endleriwaka Yehovha

KU SUKELA eminkarhini ya khale, minkhuvo leyi tsakisaka a yi ri xiphemu xa vugandzeri bya ntiyiso. Yin’wana ya minkhuvo leyi a yi endliwa le Israyele wa khale a yi teka masiku yo hlaya naswona a ku hlangana vagandzeri va Yehovha va magidi. Ku khanguriwa ka tempele ya Solomoni ku hete masiku ya nkombo naswona ku landzeriwe hi Nkhuvo wa Mintsonga lowu heteke vhiki. Leswi swi nyike Vaisrayele nkarhi wo anakanyisisa hi ndlela leyi hlamarisaka leyi Yehovha a tirhisaneke na vona ha yona. Va tlhelele ekaya ‘va tsakile hikwalaho ka vunene hinkwabyo lebyi Yehovha a byi endleke.’—1 Tihosi 8:66.

Leswi humeleleke le Ntsindza wa Dyondzo wa Watchtower le Patterson, eNew York, U.S.A., hi May 17-22, 1999, swi tsundzuxe vaendzi hi minkarhi yoleyo ya minkhuvo ya khale leyi tsakisaka. Leri a ri ri vhiki ra ntirho wo hlawuleka lowu a wu kongomisiwe eku nyiketeriweni ka ndhawu leyi nga ni miako ya 28 leyi endleriweke ku yisa dyondzo ya Bibele ya misava hinkwayo emahlweni. Ku endliwe malunghiselelo ya leswaku swirho hinkwaswo swa 5 400 swa le yindlu-nkulu eBrooklyn, Wallkill na Patterson swi valanga miako hinkwayo ya le Patterson hi vhiki rolero leri nga rivalekiki. Van’wana va lava a va ri kona a ku ri swirho swa 500 leswi hlanganyeleke entirhweni wa ku aka ntsindza lowu wa dyondzo, vayimeri lava humaka emarhavini ya 23 ya Sosayiti ya Watch Tower ni van’wana lava humaka emavandlheni ya le kusuhi—lava va endleke nhlayo ya kwalomu ka 8 100.

Minkombiso Yo Valanga Yi Nyikela Dyondzo

Leswaku vaendzi va tolovelana ni ntsindza lowu wa dyondzo, ku hleriwe leswaku ku va ni minkombiso yo hlawuleka, ku kombisiwa tivhidiyo leti dyondzisaka ku tlhela ku hleriwa leswaku va tivalangela handle ko kongomisiwa. Endhawini leyi ku amukeriwaka vaendzi eka yona, vaendzi va kokiwe nyingiso hi xihatla hi xifaniso xa tempele leyi a yi ri kona eYerusalema hi nkarhi wa vutirheli bya Yesu bya laha misaveni. Minkombiso yin’wana a yi kombisa matimu yo sungula ya Xikolo xa Bibele xa Gilead xa Watchtower, mintsombano leyi nga rivalekiki, minhlangano ya vandlha, ku sunguriwa ka tidyondzo ta le makaya ta Bibele ta manguva lawa—leti timiliyoni ta tona sweswi ti fambisiwaka vhiki na vhiki—ni ntirho lowu endliwaka hi Ndzawulo ya swa le Nawini, leyi endlaka leswaku ndlela yi tshama yi hi pfulekerile leswaku hi endla ntirho wolowo hi ku yingisa xileriso xa Yesu.—Matewu 28:19, 20.

Lava va teke enkhubyeni wa ku nyiketela va tsakisiwe hi nkombiso wa vhidiyo ya 33 wa timinete leyi xihloko xa yona a xi ku, “Ku Nga Ri Hi Matimba—Kambe Hi Moya Wa Mina,” leyi kombiseriweke eholweni leyi nga ekusuhi, leyi tshamisaka vanhu va 1 700. Vhidiyo leyi yi kombise leswi Ntsindza wa Dyondzo wa Watchtower wu sunguriseke xiswona. Mimbulavurisano yi paluxe swiendlakalo leswi swi wu kombisaka kahle nkongomiso wa Yehovha etimhakeni, swin’we ni nkateko wa yena eka matshalatshala yo wu heta hi ndlela leyi humelelaka muako lowu lowu heteke malembe ya 15. Magidi ya vanhu va hlanganyerile hi xiviri entirhweni lowu wo aka. Hi nkarhi wun’wana hi 1994, a ku ri ni vatirhi va 526 endhawini leyi, ku katsa ni vatirhi vo tirhandzela va nkarhi hinkwawo va 350, ni vatirhi va xinkarhana va 113 na 63 wa lava a va ta mpundzu wun’wana ni wun’wana va ta pfuneta. Van’wana vo tala swinene va seketele ntirho lowu hi minyikelo. Hinkwavo ka vona va swi xiya leswaku leswi a swi ta va swi nga kotekanga handle ka moya wa Yehovha.—Zakariya 4:6.

Lava va valangeke ndhawu leyi va swi xiyile leswaku xikongomelo xa ntirho lowu a wu endliwa entsindza wa dyondzo a ku ri ku yisa dyondzo ya Xikwembu emahlweni. Nkombiso lowu a wu ri laha ku ngheniwaka kona loko ku yiwa eXikolweni xa le Gilead eka xithezi xo sungula xa muako wa xikolo, wu kandziyise ndzhaka leyi fuweke ya moya swin’we ni matimu ya xikolo. Xikolo xa Gilead xi letele swichudeni swo tlula 7 000 leswaku swi ya endla ntirho wa vurhumiwa ku sukela eka ntlawa wa xona wo sungula hi 1943, emiakweni yo sungula ya xikolo le South Lansing, eNew York. Minkombiso leyi a yi ri eka xithezi xa vumbirhi xa muako wa xikolo a yi ri ni swifaniso swa Xikolo xa Swirho swa Tikomiti ta Marhavi ni Xikolo xa Valanguteri lava Famba-fambaka, ku nga mintlawa leyi yi khomeriwaka kwalaho. Ku sukela loko xi sunguriwile hi November 1995, xikolo lexi xa rhavi xi nyikele ndzetelo lowu engetelekeke eka swirho swa 360 swa Tikomiti ta Marhavi leswi humaka ematikweni ya 106.

Loko vaendzi va ri karhi va valanga, va hatle va swi xiya leswaku etindhawini to tala a va nga ta vona swifaniso ntsena. Va kote ku nghena etindzawulweni to hambana-hambana, va endzela tihofisi ni tindhawu tin’wana to tirhela eka tona, ivi va wu vona kahle ntirho lowu endliwaka kona. Yinhla-nkulu ya ku valanga a ku ri muako lowu ku endleriwaka eka wona Tikhasete ni Tivhidiyo. Yoleyo i miako leyinene leyi tirhiseriwaka ku yisa dyondzo ya Bibele emahlweni! Vaendzi va pfuniwe ku twisisa ndlela leyi ku rhekhodiwa ka marito ku endliwaka ha yona ni ndlela leyi tivhidiyo ti hleriwaka ha yona, hi ku tirhisa ntlhandlamano wa minkombiso leyi dyondzisaka ni tivhidiyo to koma. Va dyondze swo karhi hi ndzavisiso lowu enteke lowu vaka kona loko ku hleriwa swikhaviso swa le xitejini ni swiambalo swa drama. Va vone ndlela leyi xiteji xi hleriwaka ha yona hi mali leyitsongo, hambiloko nchumu wun’wana ni wun’wana wu lava nyingiso lowukulu. Va tivonele hi voxe ndlela leyi vuyimbeleri byi tirhisiwaka ha yona ku endla vanhu va titwa leswaku va le xivonweni lexi va xi hlaleleke hakunene. Ku sukela hi 1990 Sosayiti yi humese tivhidiyo ta khume hi tindzimi ta 41, ti kandziyisa timhaka to hambana-hambana ta Bibele, ku katsa ni tivhidiyo tin’wana ta lava va tirhisaka Ririmi ra Mavoko ra le Amerika.

Vo tala lava valangeke va ye eLaboratori ya Swifaniso, eNdzawulweni ya Ntivo-vuxongi, eNdzawulweni ya Rungula, leyi nyikelaka ndzetelo ni mpfuno wa khompyuta, Ndzawulo ya Ntirho, leyi langutelaka ntirho wa mavandlha ya 11 242 ni valanguteri lava famba-fambaka va 572, ni Ndzawulo ya Mapapila, laha ku hlamuriwaka swivutiso swa kwalomu ka 14 000 hi lembe. Va tsakisiwe hi ndzavisiso lowu endleriwaka mapapila lama rhumeriwaka ni ku khathala ka xiviri loku kombisiwaka lava swivutiso swa vona swi kombisaka leswaku va ringeta ku langutana ni swiphiqo leswikulu.

Vunyingi bya vavalangi byi endzele Ndzawulo yo Pfuna Vahundzuluxeri. Va hlamarisiwe hi ku twa leswaku eka malembe ya ntlhanu lama hundzeke, ku engeteriwe tindzimi ta 102 eka nhlayo leyi Sosayiti yi kandziyisaka tibuku ta Bibele ha yona. Emisaveni hinkwayo, Timbhoni ta Yehovha ta kwalomu ka 80 wa tiphesente a ti hlayi tibuku ta Sosayiti hi Xinghezi. Leswaku ku hlangavetaniwa ni swilaveko swa vona, ku ni vatirhi vo tirhandzela vo tlula 1 700 lava tirhaka endzawulweni ya vuhundzuluxeri ematikweni ya 100. Minkombiso yi kombise Xihondzo xo Rindza hi tindzimi ta le Matikweni ya Amerika, Yuropa, Asia na Afrika. Vaendzi va vone Bibele ya Vuhundzuluxeri Bya Misava Leyintshwa hi tindzimi ta 31 leti yi kandziyisiweke ha tona. Va xiye ni leswaku sweswi tibuku ta Watch Tower ti kumeka hi tindzimi ta 332 ni leswaku broxara leyi nge I Yini Leswi Xikwembu Xi Swi Languteleke Eka Hina? yi kandziyisiwe hi tindzimi ta 219.

Lava va endzeleke Ndzawulo ya swa le Nawini va kombisiwe mintirho yo hambana-hambana leyi lavaka ku khathaleriwa hi nawu emisaveni hinkwayo. Va vone ku tengiwa ka nandzu ehubyeni eka vhidiyo, laha gqweta leri nga Mbhoni ri vulavulaka hi mhaka leyi khumbaka mpompelo wa ngati. Va tlhele va vona leswi endliwaka leswaku swi koteka ku chumayela mahungu lamanene erivaleni. (Vafilipiya 1:7) Ku tlhele ku kokeriwa nyingiso eka xiboho lexi endliweke hi huvo ya muganga ya mfumo hi March nan’waka, yi lerisa huvo ya Oradell, New Jersey, U.S.A., ku hundzula milawu ya yona leswaku yi nga ha lavi maphepha ya mpfumelelo ni tibeji eka Timbhoni ta Yehovha leti lavaka ku hlanganyela evutirhelini bya le rivaleni bya yindlu na yindlu endhawini yoleyo.

Vaendzi a va vonanga sweswo ntsena. Va vone ni minkombiso ya ntirho wo aka eka Precast Shop ivi va valanga miako ya laha Mati lama Tirhisiweke ma Hlantswiwaka kona, Yindlu ya Gezi, Miako ya laha Mati ma Antswisiwaka kona ni tindhawu to hlayanyana ta laha swilo swi lunghisiwaka kona, loko hi hlaya swi nga ri swingani. Lowu a wu ri nkarhi wo hlawuleka swinene.

Nongonoko Wo Nyiketela Wu Kandziyisa Dyondzo Ya Xikwembu

Nongonoko wa xiviri wa ku nyiketela wu khomiwe hi Ravunharhu, May 19, ku sukela hi 4:00 p.m. Ntshungu lowu tsakeke wa vanhu va 6 929 a wu katsa vatirhi va le yindlu-nkulu, vaendzi va Sosayiti ni vanhu va 372 lava a va hlengeletane erhavini ra le Canada, lava a va yingisele hi riqingho.

Vayingiseri a va tsakile hakunene loko va twa marito lama khutazaka yo va amukela ma vuriwa hi Milton G. Henschel, muungameri wa Sosayiti ya Watch Tower. Endzhaku ka sweswo Theodore Jaracz, xirho xa Huvo leyi Fumaka tlhelo mutshama-xitulu eka nongonoko wolowo u tivise xivulavuri lexi a xi ta landzela ku nga William Malenfant. Loko a nyikela “Tinhla-nkulu Ta Nongonoko Wo Aka,” u vulavurisane ni vamakwerhu vanharhu lava va veke ni xandla swinene eku simekeni, eku mpfampfarhuteni ni le ku akeni ka Ntsindza wa Dyondzo wa Watchtower. Loko mimbulavurisano ya ha ya emahlweni, ku vuriwe leswaku emalembeni lawa ntirho wo aka a wu endliwa ha wona, vatirhi va xinkarhana vo tlula 8 700 va tirhise timali ta vona loko va ta va ta tirha emuakweni lowu. Mawaku vumbhoni lebyinene bya vun’we ni ku hanana leswi kotekeke hikwalaho ka dyondzo ya Xikwembu!

Ku landzele nxaxamelo wa tinkulumo lowu nge, “Dyondzo Ya Xikwembu eMisaveni Hinkwayo.” Wu vekiwe hi swirho swa mune swa Huvo leyi Fumaka. John E. Barr u kandziyise leswaku dyondzo ya Xikwembu yi sekeriwe eRitweni ra Xikwembu, ku nga Bibele, leri khutazaka Vakreste ku “[hambeta va] veka mihandzu entirhweni wun’wana ni wun’wana lowunene ni ku kula eku tiveni ka Xikwembu hi ku kongoma.” (Vakolosa 1:10) Daniel Sydlik u hlamusele ndlela leyi dyondzo ya Xikwembu yi hleriwaka ha yona etilweni ku suka eka nhloko ya vandlha ra Vukreste, ku nga Yesu Kreste, ivi yi hundzela eka xirho xin’wana ni xin’wana xa vamakwerhu va misava hinkwayo. (1 Vakorinto 12:12-27) Tinkulumo timbirhi to hetelela enxaxamelweni, leti nyikeriweke hi Gerrit Lösch na Carey Barber, ti kombise ndlela leyi dyondzo ya Xikwembu yi endlaka vatirheli va fanelekela ku fikelela vanhu hinkwako-nkwako ni ku va letela leswaku na vona va famba endleleni ya Xikwembu.—Esaya 2:1-4; 2 Vakorinto 3:5.

Ku vulavurisaniwe ni valeteri swin’we ni van’wana lava katsekaka, ku endlela leswaku vayingiseri va kota ku twisisa swikolo swo hambana-hambana leswi nga kona le ntsindza wa dyondzo. Ku kombisiwe ndlela leyi xikolo xin’wana ni xin’wana xi wu hetisisaka ha yona nongonoko wa dyondzo ya Xikwembu emisaveni hinkwayo. Ku kombisiwe leswaku Xikolo xa Gilead xi kandziyisa ku dyondza Bibele hinkwayo, matimu ya manguva lawa ya vanhu va Yehovha ni ku tilunghiselela ntirho wa vurhumiwa. Xikolo xa tikomiti ta marhavi i dyondzo leyi hlamarisaka leyi hlanganisaka mintirho yo hambana-hambana leyi swirho swa Tikomiti ta Marhavi swi yi endlaka. Xikolo xa Valanguteri Lava Famba-fambaka xi endleriwe ku enerisa swilaveko swa vamakwerhu lava famba-fambaka ni ku tlhela xi va hlomisela ku nyikela mpfuno wa moya lowu ngopfu-ngopfu wu nga ta vuyerisa mavandlha.

Eku gimeteni ka nongonoko lowunene, Lloyd Barry wa Huvo leyi Fumaka u nyikele nkulumo yo nyiketela leyi vulavulaka hi “Ku Aka Ni Muvumbi Wa Hina Lonkulu.” U kombise leswaku Muvumbi, Yehovha, u tsakela ntumbuluko wa yena hinkwawo naswona u hi rhamba leswaku hi tsaka na yena. (Esaya 65:18) Tanihi leswi “loyi a akeke swilo hinkwaswo [ku nga] Xikwembu,” ku dzuneka hinkwako ku ya eka Yehovha Xikwembu hikwalaho ka ku aka loku hinkwako. (Vaheveru 3:4) Endzhaku ko vula marito wolawo, xivulavuri xi khongele xikhongelo lexi humaka embilwini, xi nyiketela Ntsindza wa Dyondzo wa Watchtower eka Yehovha, Muvumbi wa hina Lonkulu.a

A swi kanakanisi leswaku lava va veke kona a va nge yi rivali minkhuvo ya vhiki rolero hinkwaro. Swi nga va njhani loko wo hlela ku endzela Ntsindza wa Dyondzo wa Watchtower? Ha tiyiseka leswaku hi ku wu endzela ni ku wu valanga u ta khutazeka leswaku u lwela ku dyondza swo tala hi Muvumbi wa hina la rhandzekaka ni ku hanya hi mimpimanyeto ya yena leyinene.

[Nhlamuselo ya le hansi]

[Swifaniso leswi nga eka tluka 10]

Vayingiseri lava a va lo mphaa, eholweni ni le kamareni ro dyela eka rona

[Swifaniso leswi nga eka tluka 10]

Ku valanga a ku ri nchumu lowu tsakisaka swinene