Tsundzuka Mutumbuluxi Wa Wena Lonkulu!
“Tsundzuka Mutumbuluxi wa wena Lonkulu sweswi, . . . ku nga si fika masiku ya khombo.”—EKLESIASTA 12:1, NW.
1. Xana vantshwa lava tinyiketeleke eka Xikwembu a va fanele va tsakela ku byi tirhisa njhani vuntshwa ni matimba ya vona?
YEHOVHA u nyika malandza ya yena matimba ya ku endla leswi a swi rhandzaka. (Esaya 40:28-31) U endla tano ku nga khathariseki malembe ya vona. Kambe vantshwa lava tinyiketeleke eka Xikwembu hi vona ngopfu-ngopfu lava a va fanele va tsakela ku tirhisa vuntshwa ni matimba ya vona hi vutlhari. Hikwalaho, va anakanyisisa hi xitsundzuxo xa “muhlengeleti,” Hosi Solomoni wa le tikweni ra khale ra Israyele. U khutazile a ku: “Tsundzuka Mutumbuluxi wa wena Lonkulu sweswi, emasikwini ya vujaha bya wena, masiku ya khombo ma nga si ta, kumbe ma nga si fika malembe lawa u nga ta vula ha wona u ku: ‘A ma ndzi tsakisi.’”—Eklesiasta 1:1; 12:1, NW.
2. Xana vana va Vakreste lava tinyiketeleke va fanele va endla yini?
2 Xitsundzuxo xa Solomoni malunghana ni ku va munhu a tsundzuka Mutumbuluxi Lonkulu loko a ha tsakama, eku sunguleni a xi kongomisiwe eka majaha ni vanhwana va le Israyele. A va velekeriwe etikweni leri tinyiketeleke eka Yehovha. Ku vuriwa yini hi vana va Vakreste lava tinyiketeleke namuntlha? Ina, va fanele va tsundzuka Mutumbuluxi wa vona Lonkulu. Loko va endla tano, va ta n’wi dzunisa kutani va pfuneka ha swona.—Esaya 48:17, 18.
Swikombiso Leswinene Swa Le Nkarhini Lowu Hundzeke
3. I swikombiso swihi leswi vekiweke hi Yosefa, Samuwele na Davhida?
3 Vantshwa vo tala lava Bibele yi vulavulaka ha vona va veke swikombiso leswinene swa ku tsundzuka Mutumbuluxi wa vona Lonkulu. Yosefa n’wana wa Yakobe u tsundzuke Mutumbuluxi wakwe ku sukela loko a ha ri ntsongo. Loko nsati wa Potifaro a ringe Yosefa leswaku a endla vuoswi na yena, u ale hi matimba a ku: “Nḍi nga endlisa ku yini ŝo biha le’ŝikulu ŝonghasi, nḍi dyohela Šikwembu šana?” (Genesa 39:9) Samuwele wa Mulevhi a nga tsundzukanga Mutumbuluxi wakwe loko a ha ri ntsongo ntsena, kambe u n’wi tsundzuke evuton’wini byakwe hinkwabyo. (1 Samuwele 1:22-28; 2:18; 3:1-5) Davhida wa le Betlehema u n’wi tsundzuke swinene Mutumbuluxi wakwe loko a ha ri muntshwa. Ku tshemba ka yena Xikwembu ku tikombe loko a langutane na Goliyadi, xihontlovila xa Mufilista, kutani a ku: “U tile ka mina hi banga, ni tlhari, ni ntlhuv̌ana, kambe mina nḍi ta ka wena hi v̌ito ra Yehova wa mav̌andla, ni ra Šikwembu ša tinyimpi ta Israel leti u ti sanḍeke. Namuntlha Yehova o ta ku nyiketa mav̌okweni ya mina; nḍi ta ku tlhav̌a, nḍi ku ṭema nhloko; . . . misav̌a hikwayo yi ta tiv̌a leŝaku Šikwembu ša Israel ši kona. Nhlengeletano hikwayo leyi yi ta tiv̌a leŝaku Yehova wa ponisa, kambe ku nga ri hi banga ni matlhari; hikuv̌a ku lwa ni ku hlula, i ka Yehova, kutani o mi nyiketile mav̌okweni ya hina.” Endzhakunyana ka sweswo, Goliyadi u dlayiwile, hiloko Vafilista va baleka.—1 Samuwele 17:45-51.
4. (a) I yini lexi kombisaka leswaku nhwanyana wa Muisrayele la yisiweke evuhlongeni le Siriya kun’we na Hosi Yosiyasi la ha riki ntsongo va n’wi tsundzukile Mutumbuluxi wa hina Lonkulu? (b) Yesu u swi kombise njhani leswaku a a tsundzuka Mutumbuluxi wa yena loko a ha ri na malembe ya 12 hi vukhale?
4 Muntshwa un’wana loyi a tsundzukeke Mutumbuluxi Lonkulu a ku ri nhwanyana wa Muisrayele la yisiweke evuhlongeni. U nyikele vumbhoni lebyinene ngopfu eka nsati wa ndhuna ya vuthu ra Siriya, ku nga Namani, lerova yi ya eka muprofeta wa Xikwembu, nhlokonho ya yona yi hola, kutani yi va mugandzeri wa Yehovha. (2 Tihosi 5:1-19) Loko Hosi Yosiyasi a ha ri ntsongo u ve ni xivindzi xa ku kondletela vugandzeri lebyi tengeke bya Yehovha. (2 Tihosi 22:1–23:25) Kambe xikombiso lexinene eka hinkwaswo xa munhu la tsundzukeke Mutumbuluxi wakwe Lonkulu loko a ha ri ntsongo i xa Yesu wa le Nazareta. Xiya leswi humeleleke loko a ri ni malembe ya 12 hi vukhale. Vatswari vakwe va fambe na yena ePasekeni le Yerusalema. Loko va ri endleleni yo muka, va kume leswaku Yesu a nga kona; kutani va tlhela va ya n’wi lava. Hi siku ra vunharhu, va n’wi kume etempeleni a ri karhi a tlhuvutsa swivutiso swa Matsalwa swin’we ni vadyondzisi. Yesu u hlamule xivutiso xa mana wakwe la karhatekeke, a ku: “Ha yini mi boheke ku famba mi ndzi lava? Xana a mi nga swi tivi leswaku ndzi fanele ku va endlwini ya Tatana?” (Luka 2:49) A swi fanerile leswaku Yesu a dyondza timhaka ta moya etempeleni, ‘endlwini ya Tata wakwe.’ Namuntlha, Holo ya Mfumo ya Timbhoni ta Yehovha i ndhawu leyinene yo kuma vutivi lebyi kongomeke malunghana ni Mutumbuluxi wa hina Lonkulu.
Tsundzuka Yehovha Sweswi!
5. Hi marito ya wena, u nga swi veka njhani leswi muhlengeleti a swi tsaleke eka Eklesiasta 12:1?
5 Munhu la gandzelaka Yehovha hi mbilu hinkwayo u tiyimisela ku amukela ntirho wa Yena hi ku hatlisa hilaha swi nga kotekaka hakona ni ku tirhela Xikwembu vutomi byakwe hinkwabyo. Hambiswiritano, xana hi wihi ntshembo wa munhu loyi a tlangaka hi vuntshwa byakwe hi ku ka a nga tsundzuki Mutumbuluxi? Muhlengeleti u vule leswi landzelaka, a ri karhi a huhuteriwa hi moya wa Xikwembu: “Tsundzuka Mutumbuluxi wa wena Lonkulu sweswi, emasikwini ya vujaha bya wena, masiku ya khombo ma nga si ta, kumbe ma nga si fika malembe lawa u nga ta vula ha wona u ku: ‘A ma ndzi tsakisi.’”—Eklesiasta 12:1.
6. I vumbhoni byihi lebyi nga kona bya leswaku Simiyoni na Ana lava dyuhaleke va tsundzuke Mutumbuluxi wa vona Lonkulu?
6 A nga kona loyi a tsakelaka “masiku ya khombo” ya ku dyuhala. Kambe vadyuhari lava tsundzukaka Xikwembu va tsakile. Hi xikombiso, Simiyoni la dyuhaleke u vukarhe Yesu etempeleni loko a ha ri ricece, kutani a vula hi ntsako a ku: “Sweswi, Hosi Leyi Lawulaka, u tshika hlonga ra wena ri tifambela hi ku rhula hi ku landza leswi u swi tiviseke; hikuva mahlo ya mina ma vone ndlela ya wena yo ponisa leyi u yi lunghiseke emahlweni ka vanhu hinkwavo, ku vonakala ka ku susa nturhu ematikweni ni ku vangama ka vanhu va wena va Israyele.” (Luka 2:25-32) Ana wa malembe ya 84 hi vukhale na yena u tsundzuke Mutumbuluxi wa yena. A a tshama a ri kona etempeleni, naswona loko Yesu a yisiwa kona a ha ri ricece, a a ri kona na yena. “Hi nkarhi wowolowo a tshinela ivi a sungula ku yisa minkhenso eka Xikwembu ni ku vulavula hi n’wana eka hinkwavo lava rindzeleke ku kutsuriwa ka Yerusalema.”—Luka 2:36-38.
7. Hi xihi xiyimo xa lava va dyuhalelaka entirhweni wa Xikwembu?
7 Timbhoni ta Yehovha ta manguva lawa leti dyuhalelaka entirhweni wa Xikwembu ti nga va ni switlhavi ni ku hluleka ku endla swin’wana hikwalaho ka ku dyuhala. Hambiswiritano, ti tsakile hakunene, naswona hina hi wu tlangela swinene ntirho lowu ti wu endlaka hi ku tshembeka! Ti ni “ku ṭaka ka Yehova,” hikuva ta swi tiva leswaku u tirhise matimba yakwe lama nga hlulekiki emisaveni leyi naswona u veke Yesu Kreste a va Hosi ya matimba etilweni. (Nehemiya 8:10) Sweswi i nkarhi wa leswaku vantshwa ni vadyuhari va yingisa xikhutazo lexi nge: “Madžaha ni v̌anhwana, ŝikoša ni v̌ana! A v̌a ḍunise v̌ito ra Yehova! Hikuv̌a v̌ito ra yena hi rona ntsena le’ri tlakukeke; v̌uhosi bya yena byi tlakukile ku tlula misav̌a ni matilo.”—Pisalema 148:12, 13.
8, 9. (a) I vamani lava nga vuyeriwiki hi “masiku ya khombo,” naswona ha yini? (b) U nga yi hlamusela njhani Eklesiasta 12:2?
8 “Masiku ya khombo” ya ku dyuhala a ma hakeli—kumbexana ma vanga ku karhateka lokukulu—eka lava va nga anakanyiki Mutumbuluxi wa vona Lonkulu ni lava va nga swi twisisiki swikongomelo swakwe leswinene. A va na kona ku twisisa ka moya loku nga va pfunaka ku langutana ni maxangu ya ku dyuhala ni makhombo lama kavanyeteke vanhu ku sukela loko Sathana a hlongoriwile etilweni. (Nhlavutelo 12:7-12) Hikwalaho, muhlengeleti u hi khutaza ku tsundzuka Mutumbuluxi wa hina “ku nga si nyama dyambu, ni ku v̌onakala, ni ṅhweti, ni tinyeleti, ni mapapa ma nga si lanḍela mpfula.” (Eklesiasta 12:2) Xana marito lawa ma vula yini?
9 Solomoni u fanisa nkarhi wa vuntshwa ni ximumu xa le Palestina loko dyambu, n’weti ni tinyeleti swi voninga swi ri exibakabakeni lexi nga riki na mapapa. Hi nkarhi wolowo ku va ni ku vonakala lokukulu. Hambiswiritano, loko munhu a dyuharile, masiku ya yena ma fana ni nguva ya vuxika leyi titimelaka ni leyi nga ni timpfula, laha maxangu ma ngo na kunene. (Yobo 14:1) Swa vavisa hakunene ku tiva Mutumbuluxi kambe u tsandzeka ku n’wi tirhela wa ha tsakama! Loko se u dyuharile, swilo swi sungula ku famba ximatsi, ngopfu-ngopfu eka lava va honiseke ku tirhela Yehovha loko va ha ri vantshwa hikwalaho ka ku hlongorisa swilo swa hava. Hambiswiritano, ku nga khathariseki malembe ya hina, a hi ‘landzeleni Yehovha hi xitalo,’ ku fana na Kalebe, nakulobye la tshembekaka wa muprofeta Muxe.—Yoxuwa 14:6-9.
Vuyelo Bya Ku Dyuhala
10. I yini leswi yimeriwaka hi (a) “v̌alanguteri v̌a yindlu”? (b) “v̌av̌anuna v̌a tinhenha”?
10 Endzhaku, Solomoni u vulavula hi swihinga swa “siku leri v̌alanguteri v̌a yindlu v̌a nga ta rurumela, ni v̌av̌anuna v̌a tinhenha v̌a nga ta korama, ni la’v̌a silaka v̌a nga ta yima, hikuv̌a nṭengo wa v̌ona wu hungutekile, ni la’v̌a langutaka hi mafestera v̌a nga ta nyamisiwa.” (Eklesiasta 12:3) “Yindlu” yi yimela miri wa munhu. (Matewu 12:43-45; 2 Vakorinto 5:1-8) “Valanguteri” va yona i mavoko ni swandla, leswi sirhelelaka miri ni ku wu wundla. Hikwalaho ka ku dyuhala, hakanyingi swa rhurhumela loko munhu a tsanile, a chuhile ni loko a ri ni ritukulu. “V̌av̌anuna v̌a tinhenha”—ku nga milenge—se a va ha ri tinsika to tiya, kambe va tsanile ni ku goveka lerova vo kokakoka mikondzo. Hambiswiritano, xana a swi ku tsakisi ku vona vapfumeri-kuloni lava dyuhaleke eminhlanganweni ya Vukreste?
11. Hi ndlela yo fanekisela, i vamani ‘vavasati lava silaka,’ naswona i vamani “la’v̌a langutaka hi mafestera”?
11 ‘Vavasati lava silaka va tshike ku tirha hileswi ntsengo wa vona wu hungutekeke’—kambe njhani? Meno ma nga va ma borile kumbe ma gulekile, ku sala maxinini ntsena. Ku cakunya swakudya a swa ha olovi kumbe a swa ha koteki. “La’v̌a langutaka hi mafestera”—ku nga mahlo lama pfuniwaka hi mianakanyo leswaku hi kota ku vona—va ni riphume kumbe a va ha voni hi ku helela.
12. (a) Swi endlekisa ku yini leswaku ‘ku pfariwa tinyangwa to ya entsendzeleni’? (b) Hi rihi langutelo ra wena hi vahuweleri va Mfumo lava dyuhaleke?
12 Muhlengeleti u ya emahlweni a ku: “Ni [siku] timbanti timbiri ti nga ta pfariwa e nṭenḍeleni; siku mpfumawulo wa ku sila wu nga ta hunguteka; siku ku nga ta pfukiwa hi ku rila ka tinyanyana; siku ku nga ta karala ŝiyimbeleri hikwaŝo.” (Eklesiasta 12:4) Timbati timbirhi ta nomu—ku nga milomu—a ta ha pfuleki kahle ti vula leswi nga ‘endlwini’, kumbe emirini wa lava dyuhaleke, lava nga tirheliki Xikwembu. A va koti ku vula nchumu xo ya “e nṭenḍeleni” leswaku va pfuna vanhu evuton’wini. Kambe, ku vuriwa yini hi vahuweleri lava hisekaka va Mfumo, lava dyuhaleke? (Yobo 41:14) Va nga famba hi ku nonoka entirhweni wa yindlu ni yindlu naswona van’wana va vona swi nga va tikela ku vulavula, kambe lexi hi tiyisekaka ha xona hi leswaku va dzunisa Yehovha!—Pisalema 113:1.
13. Muhlengeleti u swi hlamusela njhani swiphiqo swin’wana swa vadyuhari, kambe hi xihi xiyimo xa Vakreste lava dyuhaleke?
13 Mpfumawulo wa ku sila wa hunguteka tanihi leswi swakudya swi cakunyiwaka hi maxinini ntsena. Munhu la dyuhaleke a nga ha etleli kahle. U kavanyetiwa ni hi ku rila kunene ka nyanyana. Tinsimu to tala a nga ha swi koti ku ti yimbelela, u tsandzeka ni ku hlavelela kunene. “Ŝiyimbeleri hikwaŝo”—miloti ya vuyimbeleri—‘a swa ha twali kahle.’ Munhu la dyuhaleke a nga ha byi twi kahle vuyimbeleri ni tinsimu leti yimbeleriwaka hi van’wana. Hambiswiritano, vadyuhari lava totiweke ni vanghana va vona, lava van’wana va vona va dyuhaleke swinene, va hambeta va yimbelela hi matimba va dzunisa Xikwembu eminhlanganweni ya Vukreste. Swa hi tsakisa hakunene ku yimbelela swin’we na vona, hi dzunisa Yehovha evandlheni!—Pisalema 149:1.
14. I yini leswi chaviwaka hi vadyuhari?
14 A hi ku vavisa ka xona xiyimo xa vadyuhari, ngopfu-ngopfu lava va honiseke Mutumbuluxi! Muhlengeleti u ri: “Siku v̌anhu v̌a nga ta tšhav̌a ku ya ŝiv̌andleni le’ŝi tlakukeke, ku nga ta tšhav̌iwa e tindleleni; siku muri wa almond wu nga ta baleka, ni [njiya] yi nga ta tika, ni munhu a nga ta phirwa hi ŝakudya; [siku ku nga ta phyandleka mbhandzu wa kaperi, NW]; e siku munhu a nga ta tiyela e ndlwini ya yena ya makumu, ni v̌arili va nga ta renḍeleka e miṭenḍeleni.” (Eklesiasta 12:5) Vadyuhari vo tala va chava ku wa loko va ri emaninginingini ya switepisi swo leha. Hambi ku ri ku tlakusa mahlo va languta nchumu lowu tlakukeke swi nga va khomisa nsululwani. Loko va boheka ku huma va ya eswitarateni swa mphesamphesa, va biwa hi ripfalo, hi ku anakanya leswaku va ta vavisiwa kumbe ku hlaseriwa hi makhamba.
15. ‘Murhi wa almond wu baleka swiluva’ hi ndlela yihi, naswona njiya yi ‘famba hi ku tikokakoka’ hi ndlela yihi?
15 Eka mudyuhari, “muri wa almond [wa] baleka,” leswi handle ko kanakana swi kombisaka leswaku misisi yakwe yi hundzuka timpfi, endzhaku yi basa bya gamboko. Misisi ya timpfi yi wa ku fana ni swiluva swo basa swa murhi wa almond. Loko a ‘famba hi ku kokakoka milenge,’ kumbexana a govekile, a lengalengisa mavoko kumbe a tikhoma tinyonga, swikokola swi langute ehenhla, u va a fana ni njiya. Kambe, loko exikarhi ka hina ku ri ni loyi a nga exiyin’weni lexi lavaka ku fana ni xexo, hi nga rivali leswaku i xirho xa vuthu ra tinjiya ta Yehovha, leti nga ni matimba ni rivilo lerikulu!—Vona Xihondzo xo Rindza xa May 1, 1998, matluka 8-13.
16. (a) ‘Ku phyandleka ka mbhandzu wa kaperi’ ku kombisa yini? (b) I yini ‘yindlu ya makumu’ ya munhu, naswona ku va ni swikombiso swihi swa ku tshinela ka rifu?
16 Munhu la dyuhaleke a nga ha swi tsakeli ngopfu swakudya, hambi swo xawula ku fana ni mbhandzu wa kaperi. Khale mihandzu leyi, a yi tirhisiwa ku endla leswaku munhu a tsakela swakudya. ‘Ku phyandleka ka mbhandzu wa kaperi’ ku kombisa leswaku, loko munhu la dyuhaleke a nga ha swi tsakeli swakudya, hambi wu ri mbhandzu lowu a wu swi koti ku n’wi phomisa marha. Sweswo swi komba leswaku u tshinela “e ndlwini ya yena ya makumu,” ku nga sirha. Ri ta va kaya ra yena hilaha ku nga heriki loko a tsandzeke ku tsundzuka Mutumbuluxi wakwe, naswona a landzele ndlela yo biha, lerova Xikwembu xi nga n’wi tsundzuki loko ku pfuxiwa vafi. Swikombiso swa ku tshinela ka rifu i ku kolola ni ku konya ka ku vilela loku humaka etinyangweni ta nomu wa mudyuhari.
17. Xana “ringhole ra silver” ri susiwa njhani, naswona “šimbitana ša nsuku” xi nga yimela yini?
17 Hi khutaziwa leswaku hi tsundzuka Mutumbuluxi wa hina “ringhole ra silver ri nga si nṭhunšiwa, ni šimbitana ša nsuku ši nga si fayeka, ni khuwana ri nga si fayeka e šihlobyeni le’ši pfelelaka, ni sonḍo ri nga si fayiwa e kheleni.” (Eklesiasta 12:6) “Ringhole ra silver” ri nga vula longo. Munhu wa fa loko ntila lowu wo hlamarisa wa switwi wu nga ha pfuxeteki. “Šimbitana ša nsuku” xi nga vula byongo, lebyi nga exipalapaleni lexi fanaka ni ximbitana, lexi hlanganeke ni longo. Tanihi leswi byongo byi nga bya nkoka ku fana ni nsuku, ku phyandleka ka byona i ku fa ka munhu.
18. I yini ‘khuwana ro fanekisela leri nga exihlobyeni,’ naswona ku endleka yini loko ri fayeka?
18 ‘Khuwana leri nga exihlobyeni’ i mbilu, leyi tswongaka ngati yi tlhela yi yi hlanta leswaku yi rhendzeleka ni miri. Loko munhu a fa, mbilu yi sala yi fana ni khuwana leri fayekeke exihlobyeni, hikuva a ya ha tswongi ni ku pompa ngati leyi akaka miri ni ku wu phyuphyisa. ‘Sondzo leri fayiweke ekheleni’ a ra ha fambi, sweswo swi herisa ndzhendzeleko wa ngati leyi nyikaka vutomi. Xisweswo, Yehovha u tivise Solomoni khale swinene hi ta ndzhendzheleko wa ngati, emahlweni ko va dokodela wa lembe-xidzana ra vu-17, William Harvey, a kombisa leswaku ngati ya rhendzeleka.
19. Marito ya Eklesiasta 12:7 ma tirha njhani loko munhu a file?
19 Muhlengeleti u ye emahlweni a ku: “[Kutani] nṭhuri wu . . . tlhelela e misav̌eni laha wu humeke kona, ni moya wu . . . tlhelela e ka Šikwembu le’ši nyikeke wona.” (Eklesiasta 12:7) Loko “sonḍo” ri fayekile, miri wa munhu, lowu eku sunguleni wu endliweke hi ntshuri wa misava, wu tlhelela entshurini. (Genesa 2:7; 3:19) Moya-xiviri wa fa, hikuva moya, kumbe matimba ya vutomi lama humaka eka Xikwembu, ma tlhelela eka Mutumbuluxi wa hina, ma tshama eka yena.—Ezekiyele 18:4, 20; Yakobo 2:26.
Hi Byihi Vumundzuku Bya Lava N’wi Tsundzukaka?
20. Muxe a a kombela yini loko a endla xikhongelo lexi tsariweke eka Pisalema 90:12?
20 Solomoni u swi kombise kahle leswaku i swa nkoka hakunene ku tsundzuka Mutumbuluxi wa hina Lonkulu. Kunene, vutomi byo koma ni lebyi teleke maxangu a hi makumu ya hinkwaswo, eka lava va tsundzukaka Yehovha ni ku endla ku rhandza ka yena hi timbilu ta vona hinkwato. Hambi va ha ri vantshwa kumbe va dyuharile, va ni langutelo leri fanaka ni ra Muxe, loyi a khongeleke a ku: “Hi dyonḍise ku hlaya ŝinene masiku ya hina, leŝaku timbilu ta hina ti ṭunḍukela e v̌utlharini.” Muprofeta wa Xikwembu la titsongahataka a a swi navela swinene leswaku Yehovha a komba kumbe ku dyondzisa yena ni tiko ra Israyele ku tirhisa vutlhari byo vona nkoka wa ‘masiku ya malembe ya vona,’ leswaku va ma tirhisa hi ndlela leyi amukelekaka eka Xikwembu.—Pisalema 90:10, 12.
21. Hi fanele hi endla yini leswaku hi hlayela masiku ya hina hi ndlela leyi nga ta dzunisa Yehovha?
21 Lexi vantshwa lava nga Vakreste va faneleke va tikarhatela xona ngopfu i ku yingisa ndzayo ya muhlengeleti ya ku tsundzuka Mutumbuluxi. Va ni malunghelo ya risima swonghasi yo endlela Xikwembu ntirho wo kwetsima! Hambiswiritano, ku nga khathariseki vukhale bya hina, loko hi dyondza ku hlayela masiku ya hina hi ndlela leyi dzunisaka Yehovha, ‘enkarhini lowu wa makumu,’ hi nga kota ku hambeta hi ma hlayela hilaha ku nga heriki. (Daniyele 12:4; Yohane 17:3) Kunene, leswaku hi endla tano, hi fanele hi tsundzuka Mutumbuluxi wa hina Lonkulu. Nakambe hi fanele hi hetisisa vutihlamuleri hinkwabyo lebyi hi nga na byona eka Xikwembu.
A Wu Ta Hlamurisa Ku Yini Xana?
◻ Ha yini vantshwa va khutaziwa ku tsundzuka Mutumbuluxi wa vona?
◻ Hi swihi swikombiso swin’wana swa Matsalwa swa lava va tsundzukeke Mutumbuluxi wa vona Lonkulu?
◻ Hi byihi vuyelo byin’wana bya vudyuhari lebyi hlamuseriweke hi Solomoni?
◻ Lava va tsundzukaka Yehovha va ni vumundzuku byihi?
[Swifaniso leswi nga eka tluka 15]
Davhida, nhwanyana wa Muisrayele la yisiweke evuhlongeni, Ana na Simiyoni va tsundzuke Yehovha
[Swifaniso leswi nga eka tluka 16]
Hi ntsako, Timbhoni ta Yehovha leti dyuhaleke ti endlela Mutumbuluxi wa hina Lonkulu ntirho wo kwetsima