Va Kanye Mbilu

A SWI olovi minkarhi hinkwayo ku kanya mbilu leswaku u chumayela. Entiyisweni, muapostola Pawulo u vule leswaku nkarhi wun’wana, u endle tano “hi ku lwa lokukulu ngopfu.” (1 Vatesalonika 2:⁠2) Xana ‘ku lwela’ ku chumayela swi fanerile? Ku hava xitiyisekiso xa leswaku ku ta endleka masingita yo karhi, kambe hakanyingi vanhu va Xikwembu va tsaka loko va kote ku kanya mbilu. Xiya swikombiso swi nga ri swingani.

Xinhwanyetana xa malembe ya nhungu lexi vuriwaka Tara xi yingisele hi vukheta loko mudyondzisi wa xona a byela tlilasi leswaku hi nkarhi wa Nyimpi ya Vumbirhi ya Misava, Vayuda lava pfaleriweke etikampeni ta nxaniso a va fanele va vehela Nyeleti ya Davhida ya xitshopana, leswaku va tiviwa ha yona. Tara u tivutisile loko a fanele ku vulavula. U ri: “Ndzi khongele ndzi pfule mahlo.” Hiloko a tlakusa voko ivi a vula leswaku Timbhoni ta Yehovha na tona e ti ri etikampeni teto, kambe tona a ti fanele ti vehela xilapana xa xivunguvungu xa tinhla tinharhu. Leswi swi tsakise mudyondzisi, kutani a nkhensa xinhwanyetana lexi. Nhlamuselo ya Tara yi n’wi pfune ku ya emahlweni a vulavula ni mudyondzisi loyi, loyi endzhaku a tlheleke a komba tlilasi yakwe hinkwayo vhidiyo leyi nge Jehovah’s Witnesses Stand Firm Against Nazi Assault.

Le Guinea, eAfrika Vupela-dyambu, muhuweleri lontsongo la nga siki khuvuriwaka la vuriwaka Irène a a lava ku endla nhluvuko evutirhelini byakwe. Murhumiwa loyi a a dyondza Bibele na yena u n’wi khutaze ku ringeta ku fambisa timagazini ta Xihondzo xo Rindza ni Xalamuka! eka swichudeni-kulobye exikolweni. Irène a a lwa ni timbilu hikuva vana lava a a dyondza na vona etlilasini a va nga lavi no twa. Hambiswiritano, hi ku susumetiwa hi xikhutazo xa murhumiwa, Irène u kanye mbilu a sungula hi ku ya eka xichudeni lexi a xi vonaka xi ri xona xi kanetaka ngopfu. Lexi hlamariseke Irène, nhwanyana loyi u angule kahle kutani a teka timagazini hi mandla mambirhi. Ni swichudeni swin’wana swi endle tano. Hi n’hweti yoleyo, Irène u fambise timagazini to tala ku tlula leti a ti fambiseke etin’hwetini leti hundzeke ta ntlhanu hinkwato.

Le Trinidad nkulu un’wana u lwe ni timbilu swinene malunghana ni ku ya eka nhloko ya xikolo a ya yi komba ndlela leyi magazini wa Xalamuka! wu pfunaka ha yona eku dyondziseni. Hambiswiritano, u kanye mbilu. U ri: “Ndzi sungule ku khongela loko ndzi fika exikolweni. Ndzi hlamale ngopfu loko ndzi vona nhloko ya xikolo yi ndzi tsakela hi ndlela yo hlawuleka.” U teke magazini wa Xalamuka! lowu nge “Hi Wihi Ntshembo Lowu Vantshwa Va Namuntlha Va Nga Na Wona?” a tlhela a vula leswaku u ta dyondzisa ha wona etlilasini. Ku sukela kwalaho, u amukele timagazini ta 40 leti vulavulaka hi timhaka to hambana-hambana.

Tanihi muntshwa, minkarhi hinkwayo Vaughn a swi nga n’wi oloveli ku chumayela. “A ndzi khomiwa hi rhumbu, mavoko ya dzuka nyuku, ndzi vulavula hi ku hatlisa​—⁠a ndzi nga miti ni marha.” Hambiswiritano, u ve mutirheli wa nkarhi hinkwawo. Kambe a swi nga n’wi oloveli minkarhi hinkwayo ku vulavula. Siku rin’wana, loko a fambe a lava ntirho kambe a vuya a we mapa, u lave ku nyikela vumbhoni eka un’wana exitimeleni, “kutani a ndzi ta va ndzi endle swo karhi leswinene esikwini leri ri ndzi fambeleke ximatsi.” Kambe u kanakanisiwe hi van’wamabindzu lava a va xiximeka swinene exitimeleni. Eku heteleleni, u kanye mbilu a vulavula ni mukhalabye un’wana loyi a a tshame etlhelo ka yena. Va vulavule nkarhi wo leha. “Hambileswi wa ha riki muntshwa u ni swivutiso leswinene,” ku vula n’wamabindzu un’wana, kutani a n’wi vutisa a ku, “Xana u mufundhisi?” Vaughn u hlamule a ku, “Doo, ndzi Mbhoni ya Yehovha.” Wanuna loyi u n’wayiterile a ku: “Oh! A ndzi ta hlamala.”

Timbhoni leti hinkwato​—⁠ni tin’wana to tala⁠—​ta tsaka leswi ti kanyeke mbilu ti chumayela. Xana na wena u ta endla tano?

[Xifaniso lexi nga eka tluka 25]

Tara

[Xifaniso lexi nga eka tluka 25]

Vaughn