Xiviko Xa Vahuweleri Va Mfumo
Ripfumelo Ra Vona Ri Hakeriwile
MUAPOSTOLA PAWULO a a ri wanuna wa ripfumelo leri tiyeke, naswona u khutaze vapfumeri-kulobye leswaku va hlakulela ripfumelo leri fanaka. U te: “La tshinelelaka Xikwembu u fanele a kholwa leswaku xi kona ni leswaku hi xona muhakeri wa lava va xi lavaka hi mbilu hinkwayo.” (Vaheveru 11:6) Mintokoto leyi landzelaka ya le Mozambhiki yi kombisa ndlela leyi Yehovha a ri hakelaka ha yona ripfumelo leri tiyeke, ni ku hlamula swikhongelo leswi humaka embilwini.
• Makwerhu wa xisati loyi a a ri noni ya le xifundzheni xa le n’walungwini xa Niassa a a karhateka hileswaku yena ni vana va yena va tsevu va ta swi kotisa ku yini ku ya eNtsombanweni wa Muganga wa “Ku Hanya Hi Ndlela Ya Xikwembu.” A a kuma mali yo tihanyisa hi ku xavisa swilo emakete ya kwalaho, kambe loko siku ra ntsombano ri tshinela, a a ri na mali leyi ringaneke ku hakela exitimeleni xo ya ntsena, yo hakelela yena na ndyangu wakwe. Hambiswiritano, u tshembe matimba ya Yehovha kutani a ya emahlweni ni makungu yakwe leswaku a ta kota ku va kona entsombanweni.
U khandziye xitimela ni vana vakwe va tsevu. Loko va ri eriendzweni, mulawuri u tile ka yena ku ta kambela thikithi. Xikan’we-kan’we loko a vona beji yakwe, u n’wi vutise leswaku i ya yini. Makwerhu loyi wa xisati u n’wi byele leswaku a yi ri yo n’wi tivisa tanihi mupfhumba entsombanweni wa muganga wa Timbhoni ta Yehovha. Mulawuri u n’wi vutisile: “Xana ntsombano lowu wu ta khomeriwa kwihi?” Endzhaku ko swi tiva leswaku ntsombano a wu ta khomeriwa exifundzheni xa Nampula, ku nga mpfhuka wo ringana 300 wa tikhilomitara, u n’wi hakerise hafu ya mali a nga swi langutelanga, ematshan’wini ya mali leyi faneleke! Kutani u tlhele a nyika yena na ndyangu wakwe, mathikithi yo vuya ha wona hi hafu leyin’wana ya mali. Mawaku ntsako lowu a veke na wona hikwalaho ko tshemba Yehovha!—Pisalema 121:1, 2.
• Ku ringana malembe ya kwalomu ka 25, wansati loyi a a rhandza vukhongeri u khongele Xikwembu leswaku xi n’wi komba ndlela leyinene ya ku xi gandzela. Kereke leyi a a nghena yona a yi hlanganisa timhaka ta vukhongeri ni mihivahivani ya ndhavuko, kutani a a tivutisa loko maendlelo lawa ya vugandzeri ya xi tsakisa Xikwembu.
Wa hlamusela: “Nkarhi na nkarhi a ndzi tsundzuka marito ya Yesu lama tsariweke eka Matewu 7:7: ‘Hambetani mi kombela, kutani mi ta nyikiwa; hambetani mi lava, kutani mi ta swi kuma; hambetani mi gongondza, kutani mi ta pfuleriwa.’ Nkarhi hinkwawo ndzi khongele Xikwembu leswaku xi ndzi kongomisa entiyisweni ndzi ri karhi ndzi anakanyisisa hi tsalwa leri. Siku rin’wana mufundhisi wa kereke ya hina u kombele leswaku hinkwavo lava tirhaka emakete ya kwalaho va tisa mali yo karhi swin’we ni swilo swin’wana swa vona leswaku a ta swi katekisa. Ndzi vone leswaku xikombelo lexi a xi nga fambisani ni Matsalwa, kutani a ndzi yisanga nchumu. Loko mufundhisi a swi vonile leswaku a ndzi nga tisanga ‘xitlhavelo,’ u sungule ku ndzi rhukana emahlweni ka swirho swa kereke. Siku rero ndzi lemuke leswaku leyi a yi nga ri yona ndlela leyi Xikwembu xi lavaka leswaku hi xi gandzela ha yona, kutani ndzi tshike kereke. Hi nkarhi lowu fanaka, ndzi ye emahlweni ndzi phikelela ndzi khongelela leswaku ndzi kuma ntiyiso.
“Eku heteleleni ndzi kanye mbilu ndzi tihlanganisa na xaka ra mina leri nga Mbhoni ya Yehovha. Ri ndzi nyike xiphephana, kutani loko ndzi heta ku xi hlaya ndzi swi xiye xikan’we-kan’we leswaku Xikwembu xi hlamule swikhongelo swa mina. Hi ku famba ka nkarhi, nkatanga na yena u sungule ku tlangela mintiyiso ya Bibele, kutani hi tsarise vukati bya hina hi nawu. Hambiswiritano, endzhakunyana nuna wa mina u vabye ngopfu. Kambe u ndzi khutazile, kukondza a fa, leswaku ndzi tiyisela endleleni ya ntiyiso, leswaku hi ta tlhela hi hlangana eParadeyisini.
“Ndzi ba mandla ndzi vuyelela hikwalaho ka leswi Yehovha a hlamuleke swikhongelo swa mina ni ku ndzi komba ndlela ya ntiyiso ya ku n’wi gandzela. Swikhongelo swa mina swi tlhele swi hlamuriwa hileswi ndzi voneke ni vana va mina hinkwavo va nhungu va tinyiketela ku va malandza ya Yehovha.”