Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w00 6/15 matl. 5-7
  • Vutomi Lebyi Hetisekeke A Ko Va Norho!

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Vutomi Lebyi Hetisekeke A Ko Va Norho!
  • Xihondzo xo Rindza Xi Huwelela Mfumo Wa Yehovha—2000
  • Swihloko
  • Tinhlokomhaka Tin'wana Leti Yelana Na Yona
  • Ringeta Ku Va La Ringaniselaka
  • Vuyelo Byo Anakanyela
  • Vutomi Lebyi Hetisekeke Bya Antswa Ku Ri Ni Ku Tiendla La Hetisekeke
  • Xana Ndzi Nga Swi Tshika Njhani Ku Ringeta Ku Va La Hetisekeke?
    Xalamuka!—2003
  • Ha Yini Ndzi Vona Onge Ndzi Fanele Ndzi Va La Hetisekeke?
    Xalamuka!—2003
  • Ha Yini U Fanele U Hlula Moya Wo Tiendla La Hetisekeke?
    Xihondzo xo Rindza Xi Huwelela Mfumo Wa Yehovha—2000
  • Swivutiso Swa Vahlayi
    Xihondzo xo Rindza Xi Huwelela Mfumo Wa Yehovha—2010
Vona Swo Tala
Xihondzo xo Rindza Xi Huwelela Mfumo Wa Yehovha—2000
w00 6/15 matl. 5-7

Vutomi Lebyi Hetisekeke A Ko Va Norho!

Misava leyi hetisekeke—xana yi vula yini eka wena? Ehleketa hi tiko leri ri nga riki na vugevenga, ku tirhisiwa ka swidzidzirisi hi ndlela yo biha, ndlala, vusweti kumbe vuhomboloki. Hinkwavo va ni rihanyo lerinene naswona va khapakhapa hi ntsako. A ku na nhlomulo kumbe gome hikuva hambi ku ri rifu ri susiwile. Xana swa twala ku navela misava yo tano?

HAMBILOKO hi nga honisi nhluvuko lowu endliweke eka sayense ni thekinoloji, vanhu vo tala a va tshembi leswaku vutlhari bya munhu kumbe dyondzo swi ta tisa misava leyi hetisekeke leyi eka yona hinkwavo va nga ta tshama hi ku rhula ni ntsako. Hi hala tlhelo, mboyamelo wa munhu lowu nga papalatekiki i wo lava ku antswisa swilo ni ku lulamisa ku nga hetiseki. Ina, norho ntsena a wu nge va pfuni lava pfumalaka vutshamo ni swisiwana, hambi ku ri ku enerisa lava lamaleke ni lava vabyaka lava navelaka ku hanyisiwa eku xanisekeni ka vona. Misava leyi hetisekeke yi nga ka yi nga tisiwi hi vuswikoti bya munhu. Hambiswiritano, ku nga khathariseki mbitsi lowu nga kona ni ntshikilelo, ku ni swivangelo leswi tiyeke swo kholwa leswaku misava leyi u nga ta yi vitana leyi hetisekeke entiyisweni yo va kwala nyongeni.

Loko u ehleketa hi vutomi lebyi hetisekeke, u nga ha anakanya hi vutomi bya Yesu Kreste. A hi Yesu ntsena munhu la hetisekeke la tshameke a hanya emisaveni. Adamu na Evha, lava a va vumbiwe hi xifaniso xa Xikwembu, va tiphine hi vutomi lebyi hetisekeke eparadeyisini. Hambiswiritano, va lahlekeriwe hi ndhawu leyi leyinene hikwalaho ko xandzukela Tata wa vona wa le tilweni. (Genesa 3:1-6) Kambe, Muvumbi u vumbe vanhu va ri ni ku navela ku hanya hi laha ku nga heriki. Eklesiasta 3:11 yi nyikela vumbhoni bya sweswo: “Swilo hinkwaswo [Xikwembu] xi swi endle swi saseka hi nkarhi wa swona. Ni nkarhi lowu nga riki na makumu xi wu veke embilwini ya vona, leswaku vanhu va nga pfuki va wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya eku heteleleni.”

Hambileswi ku nga hetiseki ni xidyoho swi yiseke vanhu evuton’wini bya “vuhava” ni le ‘vuhlongeni bya ku onhaka,’ xiya marito lama chavelelaka ya muapostola Pawulo: “Ku langutela hi mahlongati ka ntumbuluko ku rindzele ku hlavuteriwa ka vana va Xikwembu. Hikuva ntumbuluko wu vekiwe ehansi ka vuhava, ku nga ri hi ku rhandza ka wona, kambe hikwalaho ka loyi a wu vekeke, exisekelweni xa ntshembo, leswaku ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.” (Varhoma 8:19-21) Bibele yi swi veka erivaleni leswaku malunghiselelo ya Xikwembu yo vuyisela vutomi bya vanhu lebyi hetisekeke ma kumeka ha Yesu Kreste.—Yohane 3:16; 17:3.

Ku engetela eka ntshembo lowu wa vumundzuku lowu hlamarisaka, hinkwerhu hi ni vuswikoti byo endla nhluvuko hi tlhelo ra moya, hi endla nhluvuko wa hina wu vonaka hambi ku ri sweswi.

Ringeta Ku Va La Ringaniselaka

Mhaka ya ku hetiseka a yi ri ya nkoka swinene eka Yesu Kreste lerova u byele ntshungu lowukulu a ku: “Mi fanele mi va lava hetisekeke, tanihi leswi Tata wa n’wina wa le tilweni a hetisekeke.” (Matewu 5:48) Xana Yesu a rindzele leswaku hi pfumala swihoxo eka mafambiselo lawa yo biha? Doo! Entiyisweni hi fanele hi lwela ku hlakulela timfanelo ta ku hanana, musa ni rirhandzu eka vanhu-kulorhi, kambe hakanyingi ha tsandzeka ku endla leswi faneleke. Hambi ku ri un’wana wa vaapostola va Yesu u tsarile a ku: “Loko hi vula swidyoho swa hina, xa tshembeka naswona xi lulamile lerova xi nga hi rivalela swidyoho swa hina ni ku hi basisa evubihini hinkwabyo. Loko hi ku: ‘A hi dyohanga,’ hi xi endla muhembi, naswona rito ra xona a ri kona eka hina.”—1 Yohane 1:9, 10.

Nilokoswiritano, hi nga antswisa ndlela leyi hi titekaka ha yona ni ndlela leyi hi khomaka van’wana ha yona, hi papalata ku hundzeleta swilo. I mani a nga kumaka nkongomiso wo antswa wo kuma vumunhu lebyi ringaniseriweke loko ku nga ri lowu kumekaka eRitweni ra Xikwembu, Bibele? Ku hlakulela timfanelo to tanihi ntsako ni ku ringanisela swi ta hi pfuna ku hanyisana ni van’wana entirhweni, ni vanghana va hina va vukati ni ku hanyisana ni vatswari va hina kumbe vana. Muapostola Pawulo u tsundzuxe Vakreste a ku: “Nkarhi hinkwawo tsakani eHosini. Nakambe ndzi ri, Tsakani! Ku anakanyela ka n’wina a ku tiviwe hi vanhu hinkwavo.”—Vafilipiya 4:4, 5.

Vuyelo Byo Anakanyela

Loko u anakanyela eka leswi u swi languteleke naswona u papalata ku tidyisa mbitsi ni ku tiendla la hetisekeke hi ndlela leyi nga fikelelekiki, ku pfuneka wena n’wini kun’we ni van’wana. Ku tiva vuswikoti bya wena swi katsa ku va la tshembekeke ni la ringaniselaka eka leswi u lavaka ku swi endla. Tsundzuka, Xikwembu xi hi vumbele leswaku hi hanya laha misaveni naswona hi eneriseka hi ntirho lowu twisisekaka lowu vuyerisaka hina ni van’wana.—Genesa 2:7-9.

Loko ku ri leswaku a a wu langutela leswikulu eka wena n’wini, ha yini u nga khongeli eka Yehovha? Ku amukeriwa hi Xikwembu swi ta ku tisela ntshunxeko lowukulu. Yehovha u tiva ndlela leyi hi vumbiweke ha yona ni xiyimo xa hina xa ku nga hetiseki, kutani wa twisisa naswona a swi tiki ku n’wi tsakisa. Mupisalema wa hi tiyisekisa: “Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka. Hikuva yena u ku tiva kahle ku vumbeka ka hina, wa tsundzuka leswaku hi ntshuri.” (Pisalema 103:13, 14) Mayana ntsako lowu hi nga vaka na wona hikwalaho ka leswi Xikwembu xi tirhisanaka ni vanhu hi ndlela ya tintswalo! Xa swi tiva leswi hi kotaka ku swi endla, kambe hi nga va va risima ematihlweni ya xona tanihi vana lava rhandzekaka.

Ematshan’weni yo lwela ku tiendla la hetisekeke, i vutlhari ku hlakulela ku twisisa hi tlhelo ra moya ni ku va ni langutelo lerinene! Tlhandlakambirhi, hi nga tiyiseka leswaku a nga kona la nga sivelaka Yehovha ku hetisisa xikongomelo xa yena xo endla vanhu va hetiseka ehansi ka Mfumo wa Xikwembu. Kambe ku hetiseka ka munhu ku vula yini?

Vutomi Lebyi Hetisekeke Bya Antswa Ku Ri Ni Ku Tiendla La Hetisekeke

Ku hetiseka a swi vuli ku tiendla la hetisekeke. Handle ko kanakana, lava nga ta va ni lunghelo ro hanya eParadeyisini emisaveni ehansi ka Mfumo wa Xikwembu a va nge vi vanhu lava koxaka ni ku tivona va lulamile. Xin’wana lexi lavekaka leswaku u pona nhlomulo lowukulu i ku tlangela gandzelo ra nkutsulo hi mbilu hinkwayo, hilaha swi kombisiwaka hakona hi ntshungu lowukulu wa matiko hinkwawo lowu hlamuseriweke hi muapostola Yohane: “Ku ponisiwa hi ku kolota Xikwembu xa hina, lexi tshameke exiluvelweni, ni le ka Xinyimpfana.” (Nhlavutelo 7:9, 10, 14) Hinkwavo lava nga ta pona nhlomulo lowukulu lowu tshineleke va ta tsaka hi leswi Kreste hi ku swi rhandza a va feleke swin’we ni hinkwavo lava nga ni ripfumelo eka yena. Xitlhavelo xa yena xa rirhandzu xi veka xisekelo xa ku herisa ku nga hetiseki ni ku tsana ka vona hilaha ku nga heriki.—Yohane 3:16; Varhoma 8:21, 22.

Xana vutomi lebyi hetisekeke byi ta va njhani? Ematshan’weni yo phikizana ni ku navela ku fikelela swo karhi hi vutianakanyi, rirhandzu ni tintswalo exikarhi ka vanhu swi ta endla vutomi byi va ni xikongomelo, swi ta herisa ku vilela ni ku nga tixiximi. Kambe vutomi lebyi hetisekeke a byi nge phirhi kumbe ku lolohisa. Rito ra Xikwembu a ri hi nyiki vuxokoxoko hinkwabyo mayelana ni Paradeyisi, kambe ri hlamusela muxaka wa vutomi lebyi hi nga byi langutelaka: “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo. A va nge tirheli swa hava hi matimba, naswona a va nge he velekeli ku karhateka.”—Esaya 65:21-23.

Ematshan’weni yo tivutisa leswaku ku ta va ni vuhungasi, tindhawu ta mabindzu, thekinoloji kumbe swo famba swa muxaka muni leswi Mfumo wu nga ta hi endlela swona, tianakanye u ri karhi u tsakela ku hetiseka ka marito lawa: “‘Mhisi ni xinyimpfana swi ta dya swin’we, nghala yi ta dya byanyi kukota nkunzi; kasi loko ku ri nyoka, swakudya swa yona ku ta va ntshuri. A va nge endli swo biha kumbe ku onha entshaveni ya mina hinkwayo yo kwetsima,’ ku vule Yehovha.” (Esaya 65:25) Mayana ndlela leyi vutomi lebyi hetisekeke byi nga ta va byi hambane ha yona eka lebyi byi nga kona namuntlha! Loko hi nkarhi wolowo u va un’wana wa lava fanelekaka ku hanya, u ta va ni xivangelo xo tshemba leswaku Tata wa wena wa le tilweni u ta ku khathalela swin’we ni ndyangu wa wena. “Kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.”—Pisalema 37:4.

Vutomi lebyi hetisekeke a hi norho. Xikongomelo xa Yehovha xa rirhandzu malunghana ni vanhu xi ta hetiseka hi ku helela. Wena ni ndyangu wa wena mi nga va exikarhi ka lava nga ta endliwa lava hetisekeke naswona mi hanya hilaha ku nga heriki emisaveni leyintshwa ya Xikwembu. Bibele yi vule ka ha ri emahlweni yi ku: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

[Xifaniso lexi nga eka tluka 6]

Hi nga antswisa langutelo leri hi nga na rona hi hina vini ni hi van’wana, hi papalata ku tiendla lava hetisekeke kumbe ku xopaxopa swihoxo

[Xifaniso lexi nga eka tluka 7]

Ha yini u nga tianakanyi u ri karhi u tiphina hi swiyimo swo rhula ni swo lulama eParadeyisini?

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela