Hi Vanhu Lava Nga Ni Ripfumelo
Ku Twarisa Mahungu Lamanene eMasin’wini Ya Mpunga Le Taiwan
HAKANYINGI le Taiwan ku na mpfula yo tala swinene, leyi endlaka leswaku vanhu va kona va tshovela mpunga lowunene kambirhi lembe ni lembe. Kambe, minkarhi yin’wana timpfula a ti ni hi nkarhi wa tona, kutani swimilana swa fa. Loko swi fa, xana murimi wa lan’wa? E-e. Wa swi tiva leswaku u fanele a phikelela. U byala swimilana swin’wana emasin’wini. Kutani loko swiyimo swi antswa, murimi u kuma ntshovelo lowunene. Minkarhi yin’wana swi tano ni hi ku byala ni ku tshovela hi tlhelo ra moya.
Ku Phikelela Eku Tshoveleni Hi Tlhelo Ra Moya
Hi malembe yo tala Timbhoni ta Yehovha ta le Taiwan ti tirhe hi matimba leswaku ti byala ti tlhela ti tshovela timbewu ta ntiyiso wa Matsalwa etindhawini leti a ti vonaka ti nga humesi mihandzu. Xikombiso xin’wana i xa Xifundzha xa Miao-li. Vanhu a va nga anguli kahle eka matshalatshala yo nyikela vumbhoni endhawini yoleyo, lawa a ma endliwa nkarhi ni nkarhi. Kutani hi 1973 mpatswa wa maphayona yo hlawuleka wu averiwe ku ya tirha kwalaho swin’we ni vahuweleri va Mfumo va nkarhi hinkwawo. Eku sunguleni, van’wana va ma tsakerile mahungu lamanene. Hambiswiritano, ku tsakela koloko a ku tlhaveriwanga hi dyambu. Kutani maphayona lawa yo hlawuleka ma averiwe ku ya endhawini yin’wana.
Hi 1991 ku tlhele ku averiwa maphayona man’wana mambirhi yo hlawuleka. Nakambe swiendlakalo swi kombise leswaku a ku nga si va nkarhi wo byala hi tlhelo ra moya. Endzhaku ka malembe ma nga ri mangani, maphayona yo hlawuleka ma averiwe ku ya emasin’wini lawa a ma tikomba ma ri ni ntshovelo wukulu. Xisweswo, masimu wolawo ma tshikiwe ma va fusi ku ringana nkarhi wo karhi.
Matshalatshala Lamantshwa Ma Tirha
Hi September 1998 ku endliwe xiboho xa ku endla matshalatshala yo lava tindhawu leti vekaka mihandzu swinene emasin’wini lamakulu lama nga aviwangiki le Taiwan. Xana leswi a swi ta endlisiwa ku yini? Ku averiwe maphayona yo hlawuleka ya nkarhinyana lama ringanaka 40 leswaku ma tirha emasin’wini lama nga aviwangiki lama nga ni vanhu vo tala swinene.
Madoroba mambirhi lama nga vaakelani le Xifundzheni xa Miao-li a ma ri man’wana ya masimu lama hlawuleriweke tsima leri. Vamakwerhu va xisati va mune lava nga tekiwangiki a va fanele va tirha nsimu yoleyo ku ringana tin’hweti tinharhu ku ri ndlela yo yi kambela. Endzhakunyana ka ku fika ka vona, va tsale swiviko leswi tsakisaka malunghana ni nhlayo ya vanhu lava tsakelaka lava a va va kuma. Loko se ku hele tin’hweti ta vona tinharhu va ri karhi va phayona endhawini yoleyo, ana se a va fambisa tidyondzo ta Bibele to tala swinene. Va tlhele va sungula ntlawa wa dyondzo ya buku va pfuniwa hi nkulu la humaka evandlheni ra le kusuhi.
Vanharhu va vamakwerhu lava va xisati va swi veke erivaleni leswaku va ta tsakela ku ya emahlweni va khathalela “swimilana” leswa ha riki switsongo leswi a swi kula kahle. Hikwalaho, vambirhi va vona va hlawuriwe ku va maphayona yo hlawuleka ya nkarhi hinkwawo, naswona lowa vunharhu u hambete a tirha kwalaho a ri phayona ra nkarhi hinkwawo. Nkulu la humaka evandlheni ra le kusuhi u rhurhele endhawini yoleyo leswaku a ta va pfuna. Vanhu vo tlula 60 va ve kona eka nkulumo ya le rivaleni leyi a yi sungula ku nyikeriwa endhawini yoleyo. Sweswi vandlha leri ra le kusuhi ri pfuna ntlawa lowu wa ha riki wuntshwa leswaku wu khoma minhlangano ya Sonto nkarhi ni nkarhi ku engetela eka tidyondzo ta buku to hlayanyana. Ku nga ha sunguriwa vandlha lerintshwa ku nga ri khale endhawini yoleyo.
Ku Phikelela Swi Tisa Mikateko eTindhawini Tin’wana Ta Le Taiwan
Etindhawini tin’wana vanhu va angule hi ndlela leyi fanaka. EXifundzheni xa le I-lan exiphen’wini xa le n’walungu-vupela-dyambu bya xihlala xolexo, ku sunguriwe Dyondzo ya Buku ya Vandlha endhawini yoleyo laha maphayona yo hlawuleka ya nkarhinyana a ma tirha kona.
Loko phayona rin’wana ro hlawuleka ra nkarhinyana ri ri karhi ri famba hi yindlu ni yindlu eka madyambu man’wana, ri hlangane ni jaha, kutani ri ri kombe xiphephana lexi a xi kombisa minhlangano ya vandlha. Xikan’we-kan’we jaha leri ri vutisile: “Xana ndzi nga ta eminhlanganweni mundzuku nimadyambu? Loko swi ri tano, ndzi fanele ndzi ambala njhani?” Phayona leri ri tikume ri fambisa nhungu wa tidyondzo ta Bibele vhiki rin’wana ni rin’wana ni vanhu lava tsakelaka. Swichudeni swa Bibele swo hlayanyana swi hatle swi kunguhata ku va vahuweleri va mahungu lamanene, swi ri ni pakani ya ku khuvuriwa.
Munhu un’wana edorobeni rolero a a nghena kereke malembe yo tala kambe a nga swi kotanga ku kuma munhu loyi a nga n’wi dyondzisaka Bibele. Loko a twe hi lunghiselelo ra ku dyondza Bibele, u tirhise lunghelo rolero. U khutaziwe ku lunghiselela tidyondzo ta yena ka ha ri emahlweni. Loko phayona ro hlawuleka ra nkarhinyana ri fika leswaku ri ta fambisa dyondzo, ri kume leswaku wansati loyi u endle “ntirho-kaya” wa yena, u xave buku ivi a tsala swivutiso leswi nga ebukwini ya yena. Kutani a tsala tinhlamulo ta yena ta xivutiso xin’wana ni xin’wana. A a tsale matsalwa hinkwawo ebukwini ya yena, lama tshahiweke eka dyondzo ya siku rero. Loko makwerhu loyi wa xisati a fika ku ta fambisa dyondzo yo sungula, u kume wansati loyi se a lunghiselele tidyondzo tinharhu to sungula!
Ku kumiwe vuyelo lebyi fanaka edorobeni ra Dongshih leri nga exivindzini xa Taiwan. Maphayona yo hlawuleka ya nkarhinyana ma fambise tibroxara to tlula 2 000 eka tin’hweti tinharhu loko ma tirha kwalaho. Hi n’hweti ya vunharhu, a ma fambisa tidyondzo ta le kaya ta Bibele ta 16. Doroba leri ri onhiwe swinene hi ku tsekatseka ka misava loku hlaseleke exivindzini xa Taiwan hi September 21, 1999, kambe vanhu van’wana lava tsakelaka va hambeta va endla nhluvuko wa moya, hambiloko va boheka ku famba awara va ya eminhlanganweni eHolweni ya Mfumo ya le kusuhi. Ina, ku laveka ku phikelela leswaku hi ta kuma ntshovelo lowunene, ku nga ha va wa le masin’wini kumbe hi tlhelo ra moya.
[Mepe lowu nga eka tluka 8]
(Leswaku u vona rungula leri hleriweke hi ku helela, vona nkandziyiso wa kona)
CHAYINA
Muhocho wa le Taiwan
TAIWAN
[Xihlovo Xa Kona]
Mountain High Maps® Copyright © 1997 Digital Wisdom, Inc.