Misava Yo Pfumala Gome Yi Tshinele

VUTOMI byi ya byi tika naswona swivangelo swo khomiwa hi gome swi tele. Loko hi tshikilelekile, swi nga ha hi tikela ku lawula mintlhaveko ya hina. Phela, hambi ku ri vanhu lava rhandzaka vutomi va nga hlunama swinene! Xiya swikombiso swi nga ri swingani.

Eminkarhini ya khale muprofeta Muxe u tshame a heleriwa hi ntshembo lerova a ku eka Xikwembu: “Ndzi kombela u ndzi dlaya, loko ndzi kume tintswalo ematihlweni ya wena, endla leswaku ndzi nga ri voni khombo ra mina.” (Tinhlayo 11:15) Loko muprofeta Eliya a balekela valala va yena u te: “Swi ringene! Sweswi Wena Yehovha, susa moya-xiviri [vutomi] wa mina.” (1 Tihosi 19:4) Naswona muprofeta Yonasi u te: “Oho Yehovha, ndzi kombela u susa moya-xiviri wa mina eka mina, hikuva swa antswa leswaku ndzi fa ematshan’weni ya leswaku ndzi hanya.” (Yonasi 4:3) Kambe Muxe, Eliya kumbe Yonasi a va tisungangi. Hinkwavo a va xi tiva xileriso xa Xikwembu lexi nge: “U nga tshuki u dlaya hi vomu.” (Eksoda 20:13) Hi ku va ni ripfumelo leri tiyeke eka Xikwembu, a va swi tiva leswaku a ku na xiyimo lexi nga tshembisiki ni leswaku vutomi i nyiko leyi humaka eka Xikwembu.

Ku vuriwa yini hi swiphiqo leswi hi langutanaka na swona sweswi? Ku engetela eka nhlomulo wa mintlhaveko kumbe swiphiqo swa miri, minkarhi yin’wana hi nga boheka ku tiyiselela ku khomiwa hi ndlela yo biha hi swirho swa ndyangu, vaakelani kumbe vatirhi-kulorhi. Bibele yi vulavula hi vanhu lava teleke “hi leswi nga lulamangiki hinkwaswo, vuhomboloki, ku navela, vubihi, ku tala mona, ku dlaya hi vomu, dzolonga, vuxisi, nsele, i vahleveteri, vahehli, lava vengaka Xikwembu, varhukani, lava titlakusaka, lava titivaka, lava vangaka swilo swo biha, lava nga yingisiki vatswari, lava nga twisisiki, lava nga hlayisiki mintwanano, lava nga riki na xinakulobye xa ntumbuluko, lava pfumalaka tintswalo.” (Varhoma 1:28-31) Ku hanya ni vanhu vo tano siku ni siku swi nga endla leswaku vutomi byi vonaka byi tika. Xana hi nga va pfunisa ku yini vanhu lava lavaka nchavelelo ni ntshunxeko?

Ku Tiyimisela Ku Yingisa

Maxangu ni ku xaniseka swi nga endla leswaku munhu a lahlekeriwa hi ku ringanisela emianakanyweni. Wanuna wa vutlhari u te: “Ku tshikileriwa ku nga hlanganisa nhloko ya lowo tlhariha.” (Eklesiasta 7:7) Hikwalaho munhu la vulavulaka hi ku tisunga u fanele ku tekeriwa enhlokweni. Swiphiqo leswi a nga na swona, ku nga ha va swa mintlhaveko, swa miri, swa mianakanyo kumbe swa moya, swi nga lava ku hatla swi tlhantlhiwa. Ina, vutshunguri bya vatshila bya hambana naswona munhu u fanele ku tiendlela xiboho xa vutshunguri lebyi a byi lavaka.—Vagalatiya 6:5.

Ku nga khathariseki leswaku hi xihi xivangelo lexi n’wi endlaka a titwa a lava ku tisunga, swa pfuna swinene leswaku a tiphofula eka munhu la twisisaka, la nga ni ntwela-vusiwana ni la lehisaka mbilu. Swirho swa ndyangu ni vanghana lava tiyimiseleke ku yingisela va nga pfuna. Ku engetela eka ku va ni ntwela-vusiwana ni ku va ni musa eka van’wana, marito lama akaka lama humaka eRitweni ra Xikwembu ma nga pfuna swinene eka lava va heleriweke hi ntshembo.

Mpfuno Wa Moya Eka Lava Va Nga Ni Gome

U nga hlamala ku vona ndlela leyi ku hlaya Bibele swi nga ku khutazaka ha yona. Hambileswi yi nga riki buku ya rihanyo ra miehleketo, Bibele yi nga hi pfuna ku teka vutomi byi ri bya nkoka. Hosi Solomoni u te: “Ndza swi tiva leswaku a ku na nchumu lexi antswaka eka vona ematshan’weni yo tsaka ni ku endla leswinene evuton’wini bya munhu; nileswaku munhu un’wana ni un’wana u fanele a dya, kunene a nwa, a kuma leswinene entirhweni wakwe hinkwawo wa matimba. I nyiko leyi humaka eka Xikwembu.” (Eklesiasta 3:12, 13) Handle ka ntirho lowu enerisaka lowu wu hi endlaka hi vona xikongomelo xa vutomi, swilo leswitsongo—swo fana ni moya wo tenga, masana, swiluva, misinya ni swinyenyana—i tinyiko leti humaka eka Xikwembu leti hi nga ti tsakelaka.

Lexi khutazaka ngopfu i xitiyisekiso xa Bibele xa leswaku Yehovha Xikwembu ni N’wana wa yena Yesu Kreste va hi khathalela. (Yohane 3:16; 1 Petro 5:6, 7) Swi fanerile leswi mupisalema a nga te: “A a dzunisiwe Yehovha, loyi a hi rhwalelaka mpingu wa hina siku ni siku, Xikwembu xa ntiyiso xa ku ponisiwa ka hina.” (Pisalema 68:19) Hambileswi hi nga ha titwaka hi nga ri va nkoka naswona hi nga pfuni nchumu, Xikwembu xa hi rhamba leswaku hi khongela eka xona. Tiyiseka swinene leswaku a nga kona loyi a nga honisiwaka loko a kombela mpfuno wa xona hi ku titsongahata na hi mbilu hinkwayo.

A nga kona loyi a nga langutelaka vutomi lebyi nga hava swiphiqo namuntlha. (Yobo 14:1) Kambe, ntiyiso wa le Ritweni ra Xikwembu wu kombe vanhu vo tala leswaku ku tisunga a hi ndlela leyinene yo lulamisa swiphiqo swa vona. Xiya ndlela leyi muapostola Pawulo a pfuneke mulanguteri wa khotso la heleriweke hi ntshembo, “[kuteloko] a pfuka evurhongweni a vona tinyangwa ta khotso ti pfulekile, a hlomula banga rakwe naswona a a lava ku tidlaya, a anakanya leswaku vakhotsiwa va balekile.” Hi ku copeta ka tihlo mulanguteri yoloye wa khotso u anakanye leswaku ku tisunga a swi antswa ku ri ni rifu leri tsongahataka leri a nga langutanaka na rona hikwalaho ka xihoxo xa yena. Muapostola u huwelerile a ku: “U nga tivavisi, hikuva hi kona hinkwerhu!” Pawulo a nga helelanga kwalaho. Entiyisweni, yena na Silasi va chavelele mulanguteri yoloye wa khotso naswona va hlamula xivutiso xa yena lexi nge: “Vakulukumba, xana ndzi fanele ku endla yini leswaku ndzi ponisiwa?” Va n’wi hlamule va ku: “Pfumela eka Hosi Yesu kutani u ta ponisiwa, wena ni ndyangu wa wena.” Kutani va n’wi byele rito ra Yehovha swin’we ni vandyangu wakwe, vuyelo byi va leswaku “yena ni lava va nga va yena va khuvuriwa handle ka ku hlwela.” Mulanguteri yoloye wa khotso ni vandyangu wa yena hinkwawo va tsake ngopfu naswona vutomi bya vona byi ve ni xikongomelo lexintshwa.—Mintirho 16:27-35.

Namuntlha, swa hi ntshunxa ku tiva leswaku Xikwembu a hi xona xi vangaka vubihi lebyi nga kona! Rito ra xona ri kombisa leswaku moya lowo biha, lowu “vuriwaka Diyavulosi na Sathana,” hi yena la “xisaka misava hinkwayo leyi akiweke.” Kambe nkarhi wa yena wa hela. (Nhlavutelo 12:9, 12) Ku nga ri khale, mahlomulo hinkwawo lawa Sathana ni madimona ya yena va ma tiseke emisaveni leyi akiweke ma ta hela loko Xikwembu xi nghenelela. Kutani misava leyintshwa yo lulama leyi Xikwembu xi yi tshembiseke yi ta swi herisela makumu leswi endlaka leswaku ku va ni ku heleriwa hi ntshembo ni ku tisunga.—2 Petro 3:13.

Nchavelelo Eka Lava Va Rilelaka Mpfuno

Ni sweswi, lava va nga ni gome va nga kuma nchavelelo eMatsalweni. (Varhoma 15:4) Mupisalema Davhida u yimbelele a ku: “Oho Xikwembu, mbilu leyi tshovekeke yi tlhela yi pfotloseka a wu nge yi languteli ehansi.” (Pisalema 51:17) I ntiyiso leswaku a hi swi koti ku papalata ku langutana ni miringo yo karhi ni ku langutana ni vuyelo bya ku nga hetiseki. Kambe ku nghenisa vutivi lebyi kongomeke hi Tata wa hina wa le tilweni la nga ni musa, rirhandzu ni ku anakanyela, swi ta hi tiyisekisa leswaku hi va risima ematihlweni ya yena. Xikwembu xi nga va Munghana ni Muleteri wa hina lonkulu. Loko hi hlakulela vuxaka lebyikulu na Yehovha Xikwembu, a nga ka a nga hi khomisi tingana. Muvumbi wa hina u ri: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.”—Esaya 48:17.

Ku tshembela eka Xikwembu swi pfune vanhu vo tala. Hi xikombiso: Mara ana se a tsanisiwe hi ntshikilelo nkarhi wo leha loko a feriwa hi n’wana wa yena la nga yexe wa mufana emhangwini ya movha.a A a chuhile naswona u ringete ku tidlaya. Hambiswiritano, sweswi u pfuka ka ha ri mpundzu siku ni siku leswaku a tirha ntirho wa yena wa le kaya. U tsakela ku yingisela vuyimbeleri ni ku pfuna van’wana. Ntshembo wa leswaku “ku ta va ni ku pfuxiwa ka lava lulameke ni ka lava nga lulamangiki” wu hungute ku vava loku a veke na kona hikwalaho ka rifu leri hlomulaka mbilu ra n’wana wakwe la rhandzekaka, naswona wu tiyise ripfumelo rakwe eka Xikwembu. (Mintirho 24:15) Tanihi leswi Mara a nga siki tshamaka a fikeriwa hi ku navela ku va a fana ni ntsumi etilweni, marito ya Pisalema 37:11 ma khumbe mbilu ya yena: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”

Wansati un’wana wa le Brazil la vitaniwaka Sandra, u tirhe hi matimba leswaku a va manana la hetisekeke eka vana va yena vanharhu. U ri: “A ndzi tshama ndzi khomekile lerova loko tatana a fa hi xitshuketa naswona hi nkarhi lowu fanaka ndzi kuma leswaku nuna wa mina u ni xigangu, ndzi rivale ni ku ehleketa ku khongela ndzi kombela mpfuno eka Xikwembu.” Sandra u ringete ku tidlaya hikwalaho ka gome. I yini lexi n’wi pfuneke leswaku a hlakarhela? I ku tlangela ka yena swilo swa moya. “Vusiku byin’wana ni byin’wana loko ndzi nga si etlela ndzi hlaya Bibele naswona ndzi ringeta ku tiveka exiyin’weni xa vanhu lava ndzi hlayaka ha vona. Ndzi hlaya ni timagazini ta Xihondzo xo Rindza ni Xalamuka! naswona ndzi rhandza swihloko leswi vulavulaka hi timhaka ta vutomi bya vanhu van’wana hikuva swi ndzi pfuna ku eneriseka hi leswi ndzi nga na swona evuton’wini.” Hi ku tiva leswaku Yehovha hi yena munghana wa yena lonkulu u dyondze ku vula swilo hi ku kongoma eswikhongelweni swa yena.

Vumundzuku Lebyi Nga Riki Na Gome

Swa khutaza swonghasi ku tiva leswaku ku xaniseka ka vanhu i ka xinkarhana! Ehansi ka Mfumo wa Xikwembu, vana ni vanhu lavakulu lava sweswi va langutanaka ni vugevenga, vuhomboloki kumbe xihlawuhlawu va ta tsaka. Hilaha swi vuriweke hakona eka pisalema ya vuprofeta, Yesu Kreste Hosi leyi hlawuriweke ya Yehovha, “yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni.” Tlhandlakambirhi, “yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana.” Hakunene, “yi ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya yona.”—Pisalema 72:12-14.

Nkarhi wa ku hetiseka ka marito wolawo ya vuprofeta wu le kusuhi. Xana mhaka ya ku tsakela vutomi lebyi nga heriki emisaveni ehansi ka swiyimo swo tano a yi ku tsakisi? Loko swi ri tano u ni xivangelo xo tsaka ni ku tlangela vutomi tanihi nyiko leyi humaka eka Xikwembu. Naswona loko u byela van’wana switshembiso leswi, leswi chavelelaka swa Matsalwa, u ta tisa ntsako lowukulu evuton’wini bya lava rilelaka mpfuno emisaveni leyi nga riki na ntwela-vusiwana ni leyi pfumalaka rirhandzu.

[Nhlamuselo ya le hansi]

[Xifaniso lexi nga eka tluka 6]

Yi tele minkarhi ya ku titsakisa namuntlha

[Xifaniso lexi nga eka tluka 7]

Xana u yi langutele hi mahlo-ngati misava leyi nga riki na gome?