Hikwalaho Ka Yini U Tirhela Xikwembu?
Hosi leyi chavaka Xikwembu yi tshame yi nyika n’wana wa yona ndzayo leyi: “Tiva Xikwembu xa tata wa wena u xi tirhela hi mbilu leyi heleleke ni hi moya-xiviri lowu tsakeke.” (1 Tikronika 28:9) Kunene, Yehovha u lava malandza ya yena ma n’wi tirhela hi mbilu leyi tsakeke, ni hi ku tlangela.
TANIHI Timbhoni ta Yehovha, handle ko kanakana ha pfumela leswaku loko switshembiso leswi nga le Bibeleni swi hlamuseriwa eka hina ro sungula, timbilu ta hina ti khapa-khape hi ku tlangela. Siku rin’wana ni rin’wana hi dyondza swilo swintshwa hi xikongomelo xa Xikwembu. Loko hi ya hi dyondza hi Yehovha, hi laha ku navela ka hina ko n’wi gandzela “hi mbilu hinkwayo ni hi moya-xiviri lowu tsakeke ku yaka ku kula.”
Vo tala lava vaka Timbhoni ta Yehovha va ya emahlweni va tirhela Yehovha hi ntsako lowu nga ringanisiwiki na nchumu vutomi bya vona hinkwabyo. Hambiswiritano, Vakreste van’wana va sungula kahle, kambe loko nkarhi wu ri karhi wu famba, va lahlekeriwa hi xivangelo lexi hi susumetelaka ku tirhela Xikwembu. Xana swi tano ha wena? Loko swi ri tano, u nga heli matimba. Ku lahlekeriwa hi ntsako ku nga pfuxetiwa. Njhani?
Languta Leswi U Katekisiweke Hi Swona
Xo sungula ehleketisisa hi mikateko ya siku ni siku leyi u yi kumaka yi huma eka Xikwembu. Ehleketa hi tinyiko letinene ta Yehovha: hi mintirho ya yena ya tsandza vahlayi ya ntumbuluko—leyi pfunaka un’wana ni un’wana ku nga khathariseki leswaku u wa rixaka rihi kumbe xiyimo xa wena xa ikhonomi—lunghiselelo ra yena ra ntumbuluko ra swakudya ni mati, rihanyo leri u ri tsakelaka, vutivi lebyi u nga na byona hi ntiyiso wa Bibele naswona ngopfu-ngopfu nyiko ya N’wana wakwe. Rifu rakwe ri ku pfulele ndlela, leswaku u kota ku tirhela Xikwembu hi mbilu leyi baseke. (Yohane 3:16; Yakobo 1:17) Loko u ya u anakanyisisa hi vunene bya Xikwembu, hi laha ku xi tlangela ka wena ku yaka ku kula. Kutani mbilu ya wena yi ta ku susumetela leswaku u xi tirhela hikwalaho ka hinkwaswo leswi xi swi endleke. A swi kanakanisi leswaku u ta tlhela u titwa hilaha mupisalema la tsaleke a ti tweke hakona: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; A nga kona la nga fanisiwaka na wena. . . . Yi tele swinene lerova a ndzi nge yi runguli.”—Pisalema 40:5.
Marito lawa ma tsariwe hi Davhida wanuna loyi a a ri ni swiphiqo evuton’wini bya yena. Loko a ha ri jaha, Davhida u hete nkarhi wa yena wo tala a ri mubaleki, loko Hosi yo biha Sawulo ni varindzi va yena va kunguhata ku n’wi dlaya. (1 Samuwele 23:7, 8, 19-23) Nakambe Davhida a a hela matimba, ku nga xiphiqo lexi a a a fanele a langutana na xona. Leswi u swi paluxa eka Pisalema ya vu-40: “ndzi rhendzeriwe hi makhombo kukondza ma nga ha hlayeki. Swidyoho swa mina swo tala swi ndzi talele ngopfu, ndzi nga ha koti ku vona; Swi tele ku tlula misisi ya nhloko ya mina, Ni mbilu ya mina yi ndzi siyile.” (Pisalema 40:12) Ina, Davhida a a ri ni swiphiqo kambe a swi n’wi hetanga matimba. A a langute eka mikateko leyi Yehovha a n’wi endleleke yona, ku nga khathariseki swiphiqo swa yena naswona u kume leswaku mikateko yoleyo a yi ta ma tlulela ekule makhombo ya yena.
Loko u titwa u hlaseriwa hi swiphiqo swa wena n’wini kumbe u titwa u nga faneleki, i swinene leswaku u yima u hlayela leswi u katekisiweke ha swona, hilaha Davhida a endleke hakona. Handle ko kanakana, ku tlangela mikateko yo tano swi ku susumetela ku tinyiketela eka Yehovha; miehleketo yo tano yi nga tlhela yi ku pfuna ku pfuxelela ntsako wa wena lowu a wu nga ha ri na wona ni ku ku pfuna ku tirhela Xikwembu swi suka embilwini.
Minhlangano Ya Vandlha Yi Nga Pfuna
Ku tlula kwalaho leswaku hi anakanyisisa exihundleni hi vunene bya Yehovha hi fanele hi ti hlanganisa ni Vakreste kulorhi. Swa khutaza ku hlangana ni vavanuna, vavasati ni vantshwa lava rhandzaka Xikwembu naswona va tiyimisele ku xi tirhela. Swikombiso swa vona swi nga hi khutaza entirhweni wa Yehovha wa mbilu hinkwayo. Ku va kona ka hina eHolweni ya Mfumo swi nga va khutaza.
Hakunene, loko hi vuya ekaya endzhaku ka ntirho wa siku hinkwaro kumbe loko hi hetiwe matimba hikwalaho ka swiphiqo swo karhi kumbe ku nga hetiseki, a swi nge olovi leswaku hi ya eminhlanganweni eHolweni ya Mfumo. Minkarhi yin’wana swi nga ha lava hi tiyisa voko eka hina vini, hi ‘ba miri wa hina’ leswaku hi ta kota ku yingisa xileriso xo hlengeletana kun’we ni Vakreste-kulorhi.—1 Vakorinto 9:26, 27; Vaheveru 10:23-25.
Kambe loko ku ri ni lexi endlaka leswaku hi nga humeleli a hi fanelanga hi gimeta hi leswaku a hi n’wi rhandzi hi xiviri Yehovha? Nikatsongo. Vakreste lava wupfeke va nkarhi lowu hundzeke lava rirhandzu ra vona hi Xikwembu ri nga kanakanisiki, sweswo a swi lava va endla matshalatshala lamanene leswaku va endla ku rhandza ka Xikwembu. (Luka 13:24) Muapostola Pawulo a ri un’wana wa Vakreste lava. U yi veka erivaleni ndlela leyi a a titwa ha yona: “Hikuva ndza swi tiva leswaku eka mina, ku nga enyameni ya mina, a ku tshami nchumu lexinene; hikuva vuswikoti byo navela byi kona eka mina, kambe vuswikoti byo endla leswi nga swinene a byi kona. Hikuva leswinene leswi ndzi swi navelaka a ndzi swi endli, kambe leswo biha leswi ndzi nga swi naveliki hi swona leswi ndzi hanyaka hi swona.” (Varhoma 7:18, 19) Kutani u byele Vakorinto: “Kutani loko ndzi vula mahungu lamanene, a ndzi na xivangelo xo tibuma, hikuva ndzi boheka ku swi endla. . . . Loko leswi ndzi swi endla hi ku tirhandzela, ndzi ta kuma hakelo; kambe loko ndzi swi endla ndzi nga swi rhandzi, swa ha fana, ndzi tamerisiwe vulanguteri.”—1 Vakorinto 9:16, 17.
Ku fana ni vo tala va hina, Pawulo a ri ni mboyamelo wa xidyoho lowu a wu kavanyeta ku navela ka yena ku endla leswi nga swinene. Hambiswiritano, u lwisane na yona mimboyamelo yoleyo naswona minkarhi yo tala a a humelela. Ina, Pawulo a nga kotanga ku hetisisa hinkwaswo leswi hi matimba ya yena. U tsarile: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Vafilipiya 4:13) Yehovha, loyi a nyikeke Pawulo matimba, a nga ku nyika matimba na wena yo endla leswi lulameke loko u kombela leswaku a ku pfuna. (Vafilipiya 4:6, 7) Kutani ‘lwana hi matimba u lwela ripfumelo’—Yudha 3.
A wu fanelanga u langutana ni nyimpi leyi u ri wexe. Emavandlheni ya Timbhoni ta Yehovha, vakulu va Vakreste lava kuleke, lava tiyiselaka ku “lwela ripfumelo” va tshama va lunghekile ku ku pfuna. Loko u tshinelela nkulu u lava mpfuno u ta endla matshalatshala yo ‘vulavula hi ndlela yo chavelela.’ (1 Vatesalonika 5:14) Xikongomelo xa yena i ku va “ndhawu ya ku tifihla emhehweni ni vutumbelo exidzedzeni.”—Esaya 32:2.
“Xikwembu i rirhandzu,” naswona xi lava malandza ya xona ma xi tirhela ma tsakile. (1 Yohane 4:8) Loko rirhandzu ra wena hi Xikwembu ri lava ku pfuxetiwa, teka magoza lama faneleke yo endla tano, hi laha swi kombisiweke hakona laha henhla. Loko u endle tano swi ta ku tsakisa.