Swivutiso Swa Vahlayi
Xana Yobo u xaniseke nkarhi wo tanihi kwihi?
Vanhu vo tala va anakanya leswaku miringo ya Yobo yi hete malembe yo tala, kambe buku ya Yobo a yi boxi malembe yo tala ya ku xaniseka ka yena.
Xiyenge xo sungula xa miringo ya Yobo, ku nga ku lahlekeriwa hi swirho swa ndyangu wakwe ni nhundzu, swi tikomba swi nga tekanga nkarhi wo leha. Ha hlaya: “Kutani siku rin’wana vana [va Yobo] va majaha ni va vanhwanyana a va dya ni ku nwa vhinyo endlwini ya makwavo wa mativula.” Yobo u kume swiviko leswi tlhandlamanaka leswi vikaka leswaku u lahlekeriwe—hi tihomu, timbhongolo, tinyimpfu, tikamela ni malandza yakwe lama khathalelaka swifuwo sweswo. Handle ko kanakana, endzhaku ka sweswo, Yobo u twe hi ta rifu ra vana vakwe va majaha ni vanhwana lava “a va dya ni ku nwa vhinyo endlwini ya makwavo wa mativula.” Swi tikomba onge swilo sweswo hinkwaswo swi humelele hi siku rin’we.—Yobo 1:13-19.
Xiyenge lexi landzelaka xa miringo ya Yobo xi fanele xi hete nkarhi wo leha. Sathana u tshinelele Yehovha kutani a vula leswaku Yobo a ta landzula loko ku xaniseka loku a ko khumba yena hi xiviri—miri wakwe. Hiloko Yobo a hlaseriwa “hi marhumba lama nga ni khombo ku sukela enkondzweni wakwe ku ya ethavathaveni.” Ku hangalaka ka vuvabyi lebyi emirini wakwe hinkwawo ku nga ha va ku hete nkarhi wo leha. Kumbexana swi teke nkarhi leswaku mahungu lawa ya ‘ta makhombo lawa hinkwawo’ ma fika etindleveni ta lava a va tivula vachaveleri vakwe, lava teke eka yena.—Yobo 2:3-11.
Elifazi a a huma eTemani etikweni ra Edomu, naswona Sofara a a huma endhawini ya le n’walungu vupela-dyambu bya le Arabiya, kutani makaya ya vona a ma nga ri kule ni ra Yobo, eUzha, leri kumbexana a ri ri en’walungwini wa Arabiya. Hambiswiritano, Bilidadi a ri wa le Xuwa, naswona ku vuriwa leswaku vanhu va ka vona a va vambe na Yufrata. Loko ku ri leswaku Bilidadi a ri ekaya hi nkarhi wolowo, swi nga ha va swi n’wi tekele mavhiki kumbe tin’hweti leswaku a twa hi ta xiyimo xa Yobo kutani a khoma ndlela, a kongoma eUzha. Ku nga va ku ri ntiyiso leswaku vanhu lavanharhu a va tshama endhawini leyi Yobo a tshama eka yona loko a sungula ku xaniseka. Ku nga khathariseki leswaku xona hi xihi, loko vanghana lava vanharhu va Yobo va ta fika, “va hambeta va tshama na yena ehansi masiku ya nkombo ni vusiku bya nkombo” va nga vuli rito.—Yobo 2:12, 13.
Kutani ku fika xiyenge xo hetelela xa miringo ya Yobo, ku nga vuxokoxoko lebyi tateke tindzima to tala ta buku leyi. Ku ve ni nxaxamelo wa minjhekanjhekisano kumbe ku burisana ni lava a va tivula vachaveleri va yena, naswona Yobo a a tala ku angula. Endzhaku ka loko sweswo swi herile, jaha leri va nge i Elihu ri nyikele ndzayo, naswona Yehovha u tshinye Yobo a ri ematilweni.—Yobo 32:1-6; 38:1; 40:1-6; 42:1.
Hikwalaho, ku xaniseka ka Yobo ni xihlambanyo xa kona swi nga ha va swi humelele etin’hwetini ti nga ri tingani, kumbexana a ku helanga ni lembe. U nga ha va u ri ni ntokoto wa leswaku miringo loko yi tika, yi tikomba yi teka nkarhi. Kambe hi nga rivali leswaku miringo ya hela, tanihi leswi ya Yobo yi heleke. Ku nga khathariseki leswaku miringo leyi hi langutanaka na yona yi teka nkarhi wo tanihi kwihi, hi nga wu rivali nseketelo wa Xikwembu, hilaha wu kombisiwaka hakona emaritweni lama huhuteriweke: “Hambileswi nhlomulo wu nga wa nkarhinyana naswona wu vevukaka, wu hi tisela ku vangama loku nga ni ntikelo lowukulu swinene ni loku nga heriki.” (2 Vakorinto 4:17) Muapostola Petro u tsarile: “Loko mi xaniseke nkarhinyana, Xikwembu xa musa hinkwawo lowu nga faneriwiki, lexi mi vitaneleke eku vangameni ka xona loku nga heriki leswaku mi va ni vun’we na Kreste, xona hi xoxe xi ta hetisa ku leteriwa ka n’wina, xi ta mi tiyisa, xi mi nyika ntamu.”—1 Petro 5:10.