Xana Wu Kona Ntshembo Wa Ku Ponisiwa?

Lembe-xidzana ra vu-20 ri vuriwe rin’wana ra malembe-xidzana lawa ku halatiweke ngati swinene eka wona. Vugevenga, tinyimpi, madzolonga ya rixaka, ku tirhisiwa ka swidzidzirisi hi ndlela yo biha, ku nga tshembeki ni madzolonga a swi tele swinene eka makume ya malembe yo hetelela. Ku engetela eka leswi, ku ni nhlomulo ni ku xaniseka loku vangiwaka hi vuvabyi, ku dyuhala ni rifu. Xana u kona loyi a nga swi laviki ku ntshunxeka eka swiphiqo leswi leswikulu leswi nga kona emisaveni namuntlha? Loko hi languta enkarhini lowu taka, xana ku ni ntshembo wa ku ponisiwa?

ANAKANYA hi xivono lexi muapostola Yohane a kombiweke xona malembe ya kwalomu ka 2 000 lama hundzeke. U tsarile: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:3, 4) Muprofeta Esaya na yena u profetile: “Entiyisweni u ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo. Naswona ku rhukaniwa ka vanhu va yona yi ta ku susa emisaveni hinkwayo, hikuva Yehovha u vurile.”—Esaya 25:8.

Anakanya leswi ku hetiseka ka switshembiso swa Xikwembu swi nga ta vula swona! Vanhu va ta ponisiwa kumbe va kutsuriwa eku xanisiweni swin’we ni le ka madzolonga, ni le ka leswi vangaka ku xaniseka ni ntshikilelo. Phela, hambi ku ri vuvabyi, ku dyuhala ni rifu a swi nge he hi karhati! Rito ra Xikwembu ku nga Bibele, ri tshembisa vutomi lebyi nga heriki lebyi hetisekeke emisaveni. (Luka 23:43; Yohane 17:3) Naswona byi nga kumiwa hi un’wana ni un’wana loyi a byi lavaka. “[Ku rhandza ka Xikwembu hileswaku] vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.”—1 Timotiya 2:3, 4.

Kambe, leswaku hi vuyeriwa eka switshembiso swa Xikwembu hi fanele hi twisisa vutihlamuleri lebyi Yesu Kreste a nga na byona eku ponisiweni ka hina kutani hi kombisa ripfumelo eka yena. Yesu u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Loko a vulavula hi vutihlamuleri lebyikulu bya Yesu Kreste emhakeni leyi, muapostola Petro u te: “A ku na ku ponisiwa eka un’wana, hikuva ku hava vito rin’wana ehansi ka tilo leri nyikiweke vanhu leri hi faneleke ku ponisiwa ha rona.” (Mintirho 4:12) Muapostola Pawulo swin’we ni mutirhi-kulobye Silasi va khutaze munhu loyi a a lava ku tiva hakunene, va ku: “Pfumela eka Hosi Yesu kutani u ta ponisiwa, wena ni ndyangu wa wena.”—Mintirho 16:30, 31.

Ina, Yesu Kreste i “Murhangeri Lonkulu wa vutomi,” naswona ku ponisiwa ku kumeka ha yena ntsena. (Mintirho 3:15) Kambe, xana swi nga endleka njhani leswaku munhu un’we a va wa nkoka swonghasi lerova a kota ku hi ponisa? Ku byi twisisa kahle vutihlamuleri bya yena emhakeni leyi swi fanele swi kurisa ntshembo wa hina wa ku ponisiwa.

[Mimfungho ya Vini va Swifaniso eka tluka 2]

Page 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo