Ha Yini Xikwembu Xi Pfumelela Vubihi?

KUN’WANA ni kun’wana laha u langutaka kona, u xiya leswaku vubihi ni ku xaniseka swi tele. Tinyimpi ti dlaya vaaka-tiko ni masocha. Vugevenga ni madzolonga i tshamelo maxelo. Kumbexana sweswinyana wa ha ku khomiwa hi ndlela leyi nga riki ni vululami kumbe u nyenyiwa. Hi ku ya hi leswi u swi voneke ni leswi swi ku humeleleke, a swi kanakanisi leswaku u vutisile u ku, ‘Ha yini Xikwembu xi pfumelela vubihi?’

Vanhu vo tala va tivutise xivutiso xolexo. Malembe ya kwalomu ka 3 600 lama hundzeke, nandza wo tshembeka wa Xikwembu la vuriwaka Yobo u vutisile: “Hikwalaho ka yini lavo homboloka va hambeta va hanya?” (Yobo 21:7) Muprofeta Yeremiya wa lembe-xidzana ra vunkombo B.C.E., loyi a a khunguvanyisiwa hi swiendlo swo biha swa vaaki-kulobye, u vutisile: “Ha yini ndlela ya lavo homboloka yi humelerile, nileswi hinkwavo lava xengaka va nga karhatekiki hi nchumu?” (Yeremiya 12:1) Yobo na Yeremiya a va swi tiva leswaku Xikwembu xi lulamile. Kambe a va hlamarisiwa hileswaku ha yini vubihi a byi tele ngopfu. Kumbexana na wena swa ku hlamarisa sweswo.

Vanhu van’wana va sola Xikwembu hileswi ku nga ni vubihi ni ku xaniseka. Van’wana va tivutisa: ‘Loko Xikwembu xi ri ni matimba hinkwawo, xi lulamile naswona xi ri ni rirhandzu, ha yini xi nga herisi vubihi ni ku xaniseka? Ha yini xi pfumelele vubihi byi hambeta byi va kona ku fikela namuntlha?’ Xihloko lexi landzelaka xi kambisisa tinhlamulo ta swivutiso leswi ni swin’wana swa nkoka.

[Mimfungho va Vini va Xifaniso eka tluka 3]

AP Photo/Adam Butler