Xana U Aka eHenhla Ka Sava Kumbe eHenhla Ka Ribye?
XANA wa swi tsakela ku hlaya Bibele? Xana u kala u tivekela nkarhi wo dyondza Bibele nkarhi ni nkarhi ni un’wana wa Timbhoni ta Yehovha? Loko swi ri tano, a swi kanakanisi leswaku vutivi lebyi se u byi kumeke byi ku pfune ku twisisa leswaku ha yini ku ri ni swiphiqo swo tala emisaveni. (Nhlavutelo 12:9, 12) Ku tlula kwalaho, tindzimana to hlayanyana ta Bibele ti ku chavelerile loko u langutane ni maxangu ti tlhela ti ku nyika ntshembo wa leswaku swilo swi ta va kahle enkarhini lowu taka.—Pisalema 145:14; 147:3; 2 Petro 3:13.
Ku kuma vutivi lebyi kongomeke bya Bibele i goza ra nkoka eka lava navelaka ku va valandzeri va Kreste. Kambe, xana ku kuma vutivi hi rona ntsena goza ra nkoka? Doo! Leswaku xichudeni xa Bibele xi tshama xi ri Mukreste wa ntiyiso, ngopfu-ngopfu loko ripfumelo ra xona ri ringiwa, xi fanele xi teka goza rin’wana ra nkoka. Hi rihi goza ra kona? Leswaku hi kuma nhlamulo, a hi kambisiseninyana Dyondzo ya le Ntshaveni, ku nga nkulumo leyi nyikeriweke hi Yesu entshaveni ya le Galeliya.—Matewu 5:1, 2.
Ku Kamberiwa Ka Tiyindlu Timbirhi
Xana wa swi tiva leswi ku vulavuriweke ha swona eka Dyondzo ya le Ntshaveni? U nga kuma nkulumo leyi leyi dumeke swinene eka Evhangeli ya Matewu na Luka. (Matewu 5:1–7:29; Luka 6:20-49) Swi teka 20 wa timinete ntsena ku hlaya dyondzo leyi hinkwayo. Hambiswiritano, yi ni mintshaho yo tlula 20 leyi humaka eka Matsalwa ya Xiheveru ni swiga-ririrmi swo tlula 50. Xifaniso xin’wana lexi vulavulaka hi ku akiwa ka tiyindlu timbirhi, xi hlawulekile hikuva Yesu u vulavule ha xona loko a gimeta nkulumo yakwe. Loko u twisisa nhlamuselo ya xifaniso xexo xo hetelela, swi ta ku pfuna ku vona ndlela leyi ha yona u nga tshamaka u tiyile tanihi mulandzeri wa Kreste hambiloko u langutana ni miringo yihi ni yihi leyi nga ha ringaka ripfumelo ra wena.
Yesu u te: “Un’wana ni un’wana la twaka leswi ndzi swi vulaka kutani a swi endla u ta fanisiwa ni wanuna wo tlhariha, la akeke yindlu ya yena ehenhla ka ribye lerikulu. Kutani mpfula yi halaka ni tindhambhi ti ta ni timheho ti hunga ti ba yindlu yoleyo, kambe yi nga wi, hikuva yi akiwe ehenhla ka ribye lerikulu. Ku tlula kwalaho, un’wana ni un’wana la twaka leswi ndzi swi vulaka kambe a nga swi endli u ta fanisiwa ni wanuna wa xiphukuphuku, la akeke yindlu ya yena ehenhla ka sava. Kutani mpfula yi halaka ni tindhambhi ti ta ni timheho ti hunga ti ba yindlu yoleyo, yi wa, naswona ku wa ka yona ku va kukulu.”—Matewu 7:24-27.
Munhu “Loyi A Celeke A Ya Ehansi Swinene”
Hi yihi mhaka ya nkoka leyi Yesu a yi dyondziseke vadyondzisiwa vakwe hi xifaniso lexi xa vaaki vambirhi? Leswaku u kuma nhlamulo, kambisisa marito ya Yesu hi vukheta. I yini leswi u swi xiyaka hi tiyindlu leti timbirhi? Hatimbirhi ti weriwe hi swilo leswi fanaka. Swi nga ha endleka leswaku tiyindlu leti a ti fana. Nakambe swi nga ha endleka leswaku a ti akiwe endhawini yin’we. Hambiswiritano, yin’wana a yi akiwe ehenhla ka sava kasi leyin’wana a yi akiwe ehenhla ka ribye. Xana sweswo swi nga endlekisa ku yini? Hikuva hilaha swi boxiweke hakona eka Evhangeli ya Luka, munhu wo tlhariha u “[cele] a ya ehansi swinene” leswaku a fikelela ribye. (Luka 6:48) Hikwalaho ka sweswo, yindlu ya munhu wo tlhariha yi akiwe yi tiya.
Hi yihi yinhla leyi Yesu a a lava ku yi kandziyisa? Yesu u vule xifaniso lexi leswaku a kandziyisa leswi endliweke hi vaaki, ku nga ri ku languteka ka tiyindlu, ndhawu leyi a ti akiwe eka yona kumbe ndlela leyi maxelo yo hambana-hambana a ma ri ni matimba ha yona. Wanuna un’wana u cele a ya ehansi, kasi loyi un’wana a nga endlanga tano. U nga cela njhani u ya ehansi ku fana ni wanuna lowo tlhariha? Yesu u katsakanye yinhla ya xifaniso xexo hi ku vula leswi: “Kutani, ha yini mi ndzi vitana mi ku ‘Hosi! Hosi,’ kambe mi nga swi endli swilo leswi ndzi swi vulaka? Un’wana ni un’wana loyi a taka eka mina, a twa marito ya mina a tlhela a ma endla, ndzi ta mi komba leswaku u fana na mani: U fana ni munhu . . . loyi a celeke a ya ehansi swinene ivi a veka masungulo ehenhla ka ribye lerikulu.”—Luka 6:46-48.
I ntiyiso leswaku ku yingisela ntsena tidyondzo ta Bibele kumbe ku hlaya Bibele ekaya swi fana ni ku aka yindlu ehenhla ka sava—a swi lavi ku cela. Kambe ku hanya hi tidyondzo ta Kreste swi lava matshalatshala lamakulu ni ku tiyimisela. Swi katsa ku cela u ya ehansi leswaku u fikelela ribye leri tiyeke.
Hikokwalaho, ku va u tshama u tiyile tanihi mulandzeri wa Kreste swi titshege hi ku va u tirhisa leswi u swi tweke. Loko u tirhisa leswi u swi dyondzeke eBibeleni evuton’wini bya wena, u fana ni munhu wo tlhariha loyi a celeke a ya ehansi. Hikokwalaho, xichudeni xin’wana ni xin’wana xa Bibele xi fanele xi tivutisa: ‘Xana ndzi mutwi wa rito kumbe ndzi muendli wa rona? Xana ndzi hlaya Bibele leswaku ndzi hetisisa nawu kumbe ndzi landzela swileriso swa yona loko ndzi endla swiboho?’
Vuyelo Byo Cela U Ya Ehansi Swinene
Xiya ntokoto wa José. Vatswari vakwe va n’wi dyondzise ku hanya hi milawu ya mahanyelo leyi nga eBibeleni, kambe a a nga si tshama a tihlayela Rito ra Xikwembu. José u ri: “Loko ndzi huma muti, ndzi ringete ku va munhu lonene, kambe a ndzi ri ni vanghana vo biha. Ndzi sungule ku tirhisa swidzidziharisi, ndzi hlanganyela masangu naswona a ndzi tshamela ku lwa ni vanhu van’wana.”
Eku heteleleni, José u endle xiboho xo tshika mahanyelo yakwe yo biha naswona u sungule ku tsakela ku dyondza Bibele. José u ri: “Nchumu lowu entiyisweni wu ndzi pfuneke ku tshika mahanyelo ya mina ku ve ku hlaya Dyondzo ya Yesu ya le Ntshaveni. Kambe swi teke nkarhi leswaku ndzi cinca vumunhu ni mahanyelo ya mina. Eku sunguleni, a ndzi chava leswaku vanghana va mina va ta ku yini, kambe ndzi ku hlurile ku chava koloko. Ndzi tshike ku vulavula mavunwa ni mavulavulelo ya nhlambha naswona ndzi sungule ku ya eminhlanganweni ya Timbhoni ta Yehovha. Hilaha Yesu a tshembiseke hakona, ndzi dyondze leswaku ku hanya vutomi byo olova ni ku tirhisa ndzayo ya Bibele swi tisa ntsako lowukulu hakunene.”—Matewu 5:3-12.
Xana u ta vuyeriwa hi yini loko u cela u ya ehansi swinene leswaku u aka eribyeni, leswi vulaka ku hisekela ku tirhisa leswi u swi hlayaka eRitweni ra Xikwembu? Yesu u te: “Loko ku va ni ndhambi, nambu wu ba yindlu yoleyo, kambe a wu vanga na matimba lama eneleke ya ku yi ninginisa, hikwalaho ka leswi a yi akiwe kahle.” (Luka 6:48) Hakunene, loko u aka kahle hi ku tirhisa leswi u swi dyondzaka, miringo leyi fanaka ni xidzedze yi ta tsandzeka ku tshova ripfumelo ra wena hambi ku ri ku ri tsekatsekisa. I mhaka leyi khutazaka hakunene!
Mudyondzisiwa Yakobo, makwavo wa Yesu hi manana, u boxe nchumu wun’wana lowu nga kumiwaka hi swichudeni swa Bibele leswi nga riki vatwi ntsena va rito kambe swi nga vaendli va leswi tsariweke eRitweni ra Xikwembu. Yakobo u tsale a ku: “Vanani vaendli va rito, mi nga vi vatwi ntsena . . . Loyi a kambisisaka nawu lowu hetisekeke lowu fambisanaka ni ntshunxeko ni loyi a phikelelaka eka wona, munhu yoloye, leswi a nga vangiki mutwi loyi a rivalaka, kambe a veke muendli wa ntirho, u ta tsaka eku wu endleni kakwe.”—Yakobo 1:22-25.
Lava tirhisaka ndzayo leyi humaka eBibeleni va tsaka hakunene. Kutani ntsako wolowo wu nyika valandzeri va Kreste matimba yo tshama va tiyile loko va weriwa hi miringo leyi fanaka ni xidzedze leyi ringaka ripfumelo ra vona ni leswaku va tinyiketele ku fikela kwihi eka Xikwembu.
Xana U Ta Endla Yini?
Loko Yesu a dyondzisa Dyondzo yakwe ya le Ntshaveni, u kandziyise leswaku loko hi tirhela Yehovha Xikwembu hi fanele hi endla minhlawulo yo karhi. Hi xikombiso, Yesu u dyondzise leswaku loko munhu a nga ri ni tihlo ro olova u fanele a ri ni tihlo ro homboloka, loko a nga ri hlonga ra Xikwembu u fanele a ri hlonga ra rifuwo ni leswaku loko a nga fambi egondzweni ro khuma u fanele a famba egondzweni leri anameke. (Matewu 6:22-24; 7:13, 14) Kutani loko Yesu a gimeta xifaniso xa vavanuna vambirhi lava a va aka tiyindlu, u hlawurise vadyondzisiwa vakwe a ku: Endlani ku fana ni wanuna wo tlhariha kumbe wanuna wa xiphukuphuku.
Loko u hambeta u swi tirhisa hi mbilu ya wena hinkwayo leswi u swi dyondzaka eka dyondzo ya wena ya Bibele, u endla hi vutlhari. Ku cela u ya ehansi leswaku u aka ehenhla ka ribye swi ta ku tisela mikateko sweswi ni le nkarhini lowu taka.—Swivuriso 10:25.
[Swifaniso leswi nga eka tluka 30]
Leswaku hi tshama hi tiyile swi titshege hi ku tirhisa leswi hi swi dyondzaka