Swivutiso Swa Vahlayi
Xana Swilo Leswi Hi Humelelaka eVuton’wini Swi Kunguhatiwe Hi Xikwembu?
Vanhu van’wana va vula leswaku siku leri hi nga ta fa ha rona se ri kunguhatiwile. Van’wana va phikelela va vula leswaku Xikwembu hi xoxe xi kunguhate nkarhi lowu hi nga ta fa ha wona. Ku engetela kwalaho, vanhu volavo va vula leswaku swilo leswi humelelaka evuton’wini bya hina a swi nge papalateki. Xana na wena u swi teka hi ndlela yoleyo?
U nga ha tivutisa swivutiso leswi landzelaka: ‘Loko hakunene ku nga ri na nchumu lowu hi nga wu endlaka leswaku hi cinca leswi nga ta hi humelela evuton’wini naswona Xikwembu xi swi kunguhate khale leswi nga ta hi humelela, ha yini hi khutaziwa ku khongela? Loko se swi kunguhatiwile leswi nga ta hi humelela, ha yini hi teka magoza yo karhi leswaku hi tisirhelela? Ha yini hi boha bandhi ra vuhlayiseki loko hi ri karhi hi famba hi movha? Nakambe, ha yini hi nga lavi ku chayela loko hi dakwile?’
Bibele yi lwisana ni langutelo ro tano ra ku va munhu a nga khathali hi vuhlayiseki byakwe. Ematshan’weni yo vula leswaku swilo hinkwaswo leswi hi humelelaka swi kunguhatiwe hi Xikwembu, Bibele yi lerise Vaisrayele leswaku va tshama va xalamukele vuhlayiseki bya vona. Hi xikombiso, a va lerisiwe ku aka rirhangu ro koma etlhelo ka lwangu ra tiyindlu ta vona. Xikongomelo xa kona a ku ri ku sirhelela vanhu leswaku va nga wi elwangwini hi xihoxo. Kutani ha yini Xikwembu xi nyike vanhu xileriso xolexo loko ku ri leswaku a xi kunguhate leswaku va wa elwangwini kutani va fa?—Deteronoma 22:8.
Ku vuriwa yini hi vanhu lava feke hikwalaho ka timhangu ta ntumbuluko kumbe timhangu tin’wana leti a va nga ta swi kota ku ti lawula? Xana a va kunguhateriwe “siku ra ku fa”? Doo, Hosi Solomoni, mutsari wa tibuku tin’wana ta Bibele u hi tiyisekisa leswaku “nkarhi ni xiendlakalo lexi nga languteriwangiki swa [hi] wela [hinkwerhu].” (Eklesiasta 9:11) Kutani hambiloko swiyimo swa kona swi nga tolovelekanga, swiendlakalo leswi nga ni khombo leswi hi humelelaka a swi kunguhatiwanga hi Xikwembu.
Hambiswiritano, van’wana va nga ha vona onge mhaka leyi yi kanetana ni leswi Solomoni a swi vuleke eku sunguleni loko a ku: “Xin’wana ni xin’wana xi ni nkarhi wa xona lowu vekiweke, ni nkarhi wa mhaka yin’wana ni yin’wana ehansi ka matilo: nkarhi wa ku velekiwa ni nkarhi wa ku fa.” (Eklesiasta 3:1, 2) Kambe, xana hakunene Solomoni a a vula leswaku swilo leswi hi humelelaka evuton’wini swi kunguhatiwe hi Xikwembu? A hi ma kambisiseni kahle marito wolawo.
Solomoni a a nga vuli swona leswaku Xikwembu hi xona lexi kunguhateke siku leri munhu a nga ta velekiwa ni ku fa ha rona. Ematshan’weni ya sweswo, a a vula leswaku ku velekiwa ni ku fa ka vanhu i swilo leswi tshamelaka ku endleka evuton’wini ku fana ni swilo swin’wana. Hakunene vutomi a byi ta va ni swiendlakalo leswi tsakisaka ni leswi nga tsakisiki. Solomoni u te: ‘Ku ni nkarhi wa ku rila ni nkarhi wa ku hleka.’ U kombisa leswaku swilo swo tano leswi endlekaka hi ku phindha-phindha ni makhombo lama nga languteriwangiki, i swilo leswi tolovelekeke evuton’wini, eka “mhaka yin’wana ni yin’wana ehansi ka matilo.” (Eklesiasta 3:1-8; 9:11, 12) Hikokwalaho, mhaka leyi a gimeteke ha yona a yi fanelanga yi hi endla hi karhateka ku tlula mpimo hi swilo leswi hi swi endlaka siku ni siku lerova hi rivala Muvumbi wa hina.—Eklesiasta 12:1, 13.
Hambileswi Muvumbi wa hina a byi twisisaka hi ku helela vutomi swin’we ni rifu, a hi yena loyi a kunguhateke swilo leswi hi humelelaka evuton’wini. Bibele yi dyondzisa leswaku Xikwembu xi nyika hinkwerhu ka hina ntshembo wo hanya hilaha ku nga heriki. Kambe Xikwembu a xi hi sindzisi ku endla leswi xi swi lavaka leswaku hi ta kota ku hanya hilaha ku nga heriki. Ematshan’weni ya sweswo, Rito ra xona ri ri: “Mani na mani la swi navelaka a a nwe mati ya vutomi mahala.”—Nhlavutelo 22:17.
Ina, hi fanele hi lava ku “[nwa] mati ya vutomi.” Kutani Xikwembu a xi hi kunguhatelanga swilo leswi nga ta hi humelela enkarhini lowu taka. Swiboho leswi hi swi endlaka, mahanyelo ya hina swin’we ni swiendlo swa hina hi swona leswi kombisaka leswaku hi ta va ni vumundzuku bya njhani.