Ku Endzela Endhawini Yo Gandlisela

MAGAZINI lowu u wu hlayaka swi nga ha endleka wu fana ni lowu u tshameke u wu vona. Kumbexana Timbhoni ta Yehovha ti ku endzerile ekaya ka wena kutani ti ku nyika Xihondzo xo Rindza ni Xalamuka! leswaku ti ku pfuna ku twisisa Bibele ku antswa. Kumbe swi nga ha endleka u tshame u vona Timbhoni ti fambisa Xihondzo xo Rindza ni Xalamuka! exitarateni kumbe endhawini ya vuxaviselo ya laha u tshamaka kona. Entiyisweni, n’hweti ni n’hweti ku fambisiwa tikopi to tlula 35 wa timiliyoni ta magazini lowu, leswi endlaka leswaku wu va wona lowu fambisiwaka ngopfu emisaveni hinkwayo.

Kambe, xana u tshame u tivutisa leswaku timagazini leti hinkwato ti endliwa kwihi naswona njhani? Leswaku hi hlamula xivutiso lexi, a hi kambisiseni yin’wana ya tindhawu to tala to gandlisela leti Timbhoni ta Yehovha ti ti tirhisaka ematikweni yo hambana-hambana—leyi nga eWallkill, le New York, U.S.A. Vo tala va vahlayi va minkandziyiso ya hina emisaveni hinkwayo a swi va oloveli ku endzela ndhawu leyi yo gandlisela leyi Timbhoni ta Yehovha ti tirhelaka eka yona eUnited States, kutani swifaniso leswi ni tinhlamuselo swi ta ku pfuna ku tiva swo tala hi ndhawu leyi yo gandlisela.

Loko ku nga si gandlisiwa ku rhanga ku tsariwa rungula. Ndzawulo yo Hlela Swifaniso swa Minkandziyiso yi kuma rungula leri tsariweke leri lavaka ku gandlisiwa hi ku va yi rhumeriwa rona hi ku tirhisa khompyuta ri huma eka Ndzawulo ya Vutsari ya le Brooklyn, eNew York. Rungula rolero hi rona leri tirhisiwaka loko ku gandlisiwa. Le Wallkill, n’hweti ni n’hweti ku fika tirholo ta maphepha ta kwalomu ka 1 400 endhawini yo gandlisela, laha hi siku ku tirhisiwaka phepha leri tikaka tithani ta 80 ku ya eka 100. Tirholo—leti tin’wana ta tona ti tikaka tiphawundi to tlula 3 000—ti hoxiwa emichinini leyikulu yo gandlisa ya ntlhanu. Phepha ra gandlisiwa, ri tsemiwa ni ku petsiwa ri va ni matluka ya 32. Magazini lowu u wu hlayaka i phepha rin’we. Ku vuriwa yini hi tibuku letin’wana? Endhawini leyi ku hlanganisiwaka kona tibuku, matluka ma hlanganisiwa leswaku ma endla tibuku. Muchini wun’wana wo hlanganisa matluka wu nga humesa 50 000 wa tibuku ta swifunengeto swo tsindziyela kumbe 75 000 wa tibuku ta swifunengeto swo olova hi siku. Kasi muchini wun’wana wo hlanganisa matluka wu nga humesa kwalomu ka 100 000 wa tibuku ta swifunengeto swo olova hi siku.

Hi 2008, ndhawu leyi yo gandlisela yi humese tibuku to tlula 28 000 000, laha to tlula 2,6 wa timiliyoni ku nga Tibibele. Hi lembe rolero, ku humesiwe timagazini ta 243 317 564. Ndhawu leyi yo gandlisela yi ni minkandziyiso yoleyo ya Tibibele hi tindzimi ta kwalomu ka 380. Xana ku humelela yini endzhaku ka loko se minkandziyiso yi endliwile?

Ndhawu yo gandlisela yi amukela swikombelo swo huma emavandlheni ya Timbhoni ta Yehovha lama ringanaka 12 754 etikweni ra United States swin’we ni swikombelo swo huma emavandlheni lama ringanaka 1 369 ya le Caribbean ni le Hawaii. Ndzawulo yo Rhumela Tibuku yi paka minkandziyiso hinkwayo leyi komberiweke kutani yi lunghiselela xo famba lexi nga ta ti yisa laha yi faneleke yi yisiwa kona. N’hweti ni n’hweti, ku fambiwa kwalomu ka 14 wa timiliyoni ta tikhilomitara leswaku ku heleketiwa minkandziyiso emavandlheni lama nga eUnited States.

Nchumu wa nkoka swinene lowu nga endhawini leyi yo gandlisela, a hi michini kambe i vanhu. Vanhu vo tlula 300 va tirha eka tindzawulo to gandlisa—Ndzawulo yo Hlela Swifaniso swa Minkandziyiso, yo Hlela Xiyimiso, yo Gandlisa, yo Hlanganisa Tibuku ni yo Rhumela Tibuku. Hinkwavo ka vona i vatirhi va ku tirhandzela lava nga holiki nchumu, lava nga ni malembe ya 19 ku ya eka 92.

Va khathala swinene hi vanhu—lava nga ta amukela minkandziyiso leyi hi mapfundza kutani va dyondzisiwa, va khutaziwa ni ku kongomisiwa hi milawu leyi hlamuseriweke eBibeleni. Hi tshemba leswaku u un’wana wa vahlayi volavo lava nghenisaka vutivi ha Yehovha Xikwembu na Yesu Kreste, leswi vulaka vutomi lebyi nga heriki.—Yohane 17:3.