Ha Yini Vanhu Va Ri Ni Mavonelo Yo Hambana-hambana—Malunghana Ni Moya Lowo Kwetsima?

MOYA LOWO KWETSIMA i yini? Xivutiso lexi xi twala xi olova, kambe ku xi hlamula swi nga ha tika. Mupapa Benedict wa vu-16 u byele ntshungu eAustralia a ku: “Swi vonaka swi nga koteki ku twisisa leswi Moya wu nga swona.”

Kahle-kahle vanhu va ni mavonelo yo tala naswona va kanakana loko va hlamula xivutiso lexi nge, Moya lowo kwetsima i yini? Van’wana va hlamula hi ndlela leyi landzelaka:

• I munhu loyi a tshamaka endzeni ka vadyondzisiwa va Kreste.

• I sayense ya Xikwembu, ku nga nawu wa Xikwembu lowu tirhaka.

• I ndlela leyi Xikwembu xi tirhaka ha yona emisaveni.

• I munhu wa vunharhu eka Vunharhu-un’we.

Ha yini ku ri ni mavonelo yo tala hi ndlela leyi? Sweswo hi swona leswi humeleleke hi lembe-xidzana ra vumune C.E. loko vativi van’wana va ta vukhongeri va vula leswaku moya lowo kwetsima a wu ri munhu loyi hi ndlela yo karhi a ringanaka ni Xikwembu. Hambiswiritano, leswi a hi swona leswi dyondzisiwaka hi Matsalwa kumbe hi valandzeri vo sungula va Kreste. New Catholic Encyclopedia yi ri: “Testamente ya Khale a yi hlamuseli moya wa Xikwembu tanihi munhu . . . moya wa Xikwembu ko va matimba ya xona ntsena.” Buku leyi fanaka yi ya emahlweni yi ku: “Matsalwa yo tala ya Testamente Leyintshwa ma hlamusela moya wa Xikwembu tanihi nchumu wo karhi ku nga ri munhu wo karhi; leswi swi vonaka ngopfu-ngopfu eka ku fana loku nga kona exikarhi ka moya ni matimba ya Xikwembu.”

Swa twisiseka leswaku hikwalaho ka yini vanhu swi va tikela ku anakanya leswaku matimba ma nga ha va munhu. Hambiswiritano, ndzavisiso wa sweswinyana lowu endliweke eUnited States wu kombisa leswaku vanhu vo tala a va pfumelelani na swona leswaku moya lowo kwetsima i munhu, kumbe “nchumu lowu hanyaka.” Xana va tiyisile? Kumbe, xana hi fanele hi tshemba vativi va vukhongeri lava sindzisaka leswaku “Moya lowo Kwetsima i Munhu loyi a hambaneke na Tatana ni N’wana”?

Leswaku hi kuma nhlamulo leyi tshembekaka, hi fanele hi ya eRitweni ra Xikwembu, ku nga Bibele, leri hlamuselaka moya lowo kwetsima hi vuenti. Muapostola Pawulo u tsale a ku: “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni.”—2 Timotiya 3:16.

Hikwalaho ka yini u fanele u lava ku tiva ntiyiso malunghana ni moya lowo kwetsima? Sweswo swi ta endla leswaku u swi kota ku kuma mpfuno lowu humaka eka Xikwembu. Xana minkarhi yin’wana u titwa u ri hava matimba ya ku ya emahlweni u tiyisela? Yesu u tshembise vadyondzisiwa vakwe a ku: “Hambetani mi kombela, mi ta nyikiwa . . . Loko n’wina . . . mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!”—Luka 11:9, 13.

Eka swihloko leswi landzelaka, hi ta pfumelela Matsalwa leswaku ma hi hlamusela leswi moya lowo kwetsima wu nga swona. Naswona hi ta vona ndlela leyi wu nga hi vuyerisaka ha yona evuton’wini bya hina.

[Marito lama tshahiweke exihlokweni lama nga eka tluka 3]

Matsalwa ma hi hlamusela leswi moya lowo kwetsima wu nga swona