Swivutiso Swa Vahlayi . . .

Xana Xikwembu Xi Ni Masungulo?

▪ Bibele yi vula leswaku Xikwembu a xi na masungulo, i khale xi ri kona. Hambileswi swi nga oloviki ku yi twisisa hi ku helela mhaka leyi, sweswo a swi nge endli leswaku hi yi bakanyela etlhelo.

A swi bihanga ku lava ku tiva tindlela hinkwato ta Xikwembu. Phela muapostola Pawulo u te: “Mawaku ku enta ka rifuwo ni vutlhari ni vutivi bya Xikwembu! Vuavanyisi bya xona a byi lavisiseki, ni tindlela ta xona a ti landzeleriseki!” (Varhoma 11:33) Mianakanyo ya hina a yi nge swi koti ku byi twisisa hi vuenti vutlhari ni vutivi bya Xikwembu, ku fana ni n’wana la nga ta ka a nga swi koti ku twisisa tindlela hinkwato ta mutswari wakwe. Marito wolawo lama huhuteriweke ya Pawulo lama vulavulaka hi vutlhari ni tintswalo ta Xikwembu ma swi veka erivaleni leswaku ku ni tindlela tin’wana leti Yehovha Xikwembu a endlaka swilo ha tona leti swi nga ta ka swi nga hi oloveli ku ti twisisa. Yin’wana ya tona i mhaka ya leswaku Xikwembu a xi na masungulo. Kambe, hi nga swi tshemba hi ku helela leswi Bibele yi swi dyondzisaka hi Xikwembu. Loko Yesu Kreste a vulavula hi matsalwa yo kwetsima u te: “Rito ra wena i ntiyiso.”—Yohane 17:17.

Loko Muxe a khongela eka Yehovha u te: “U Xikwembu ku suka enkarhini lowu nga riki na makumu ku ya enkarhini lowu nga riki na makumu.” (Pisalema 90:2) Eka ndzimana leyi, Muxe u hlamusela Xikwembu tanihi lexi endlaka swilo swimbirhi swo hambana. Lexi xo sungula xi khumba vumundzuku. Yehovha hi yena “Loyi a hanyaka hi masiku ni masiku.” (Nhlavutelo 4:10) Xisweswo, vukona bya Xikwembu byi famba byi ya fika ni le ka vumundzuku lebyi nga riki na makumu. Lexi xa vumbirhi xi khumba swilo leswi nga hundza. Hi marito man’wana, Xikwembu a xi vumbiwanga. Ematshan’weni ya sweswo, vukona bya xona a ku na laha byi sungulaka kona.

Vo tala va hina a swi hi oloveli ku twisisa timhaka leti rharhanganeke. Minkarhi yin’wana ha swi kota ku tlhantlha timhaka to tika, to tanihi tinhlayo leti hlanganisiwaka ni leti susiwaka. Ku hlayela tinomboro a swi heli, ku nga khathariseki leswaku u sungula ehenhla kumbe ehansi. Xifaniso lexi xi n’wi hlamusela kahle Muvumbi wa hina.

A swi hlamarisi leswi ku nga Xikwembu ntsena lexi nga ni xithopo xo hlawuleka lexi nge “Hosi leyi nga riki na makumu.” (1 Timotiya 1:17) Ehleketa hi mhaka leyi: Yesu Kreste, makume ya magidi ya tintsumi ni vanhu hinkwavo lava nga laha misaveni va ni masungulo hikuva va lo vumbiwa. (Vakolosa 1:15, 16) Kambe a swi tano hi Xikwembu. Ku sindzisa leswaku xi lo vumbiwa kumbe ku lava ku tiva leswaku i mani la xi vumbeke a swi pfuni nchumu hikuva swi ngo endla leswaku hi vulavula hi mhaka leyi nga riki na nhloko na ncila. Yehovha hi yena ntsena la nga “Xikwembu ku suka enkarhini lowu nga riki na makumu ku ya enkarhini lowu nga riki na makumu.” (Pisalema 90:2) Hi marito man’wana, Yehovha i Xikwembu “hilaha ku nga riki na makumu.”—Yudha 25.

Tsundzuka leswaku mhaka ya leswaku Xikwembu i khale xi ri kona a hi ntsheketo. Xikhongelo xa Muxe xi kombisa leswaku Xikwembu lexi nga riki na makumu xi hi tshembisa vutomi lebyi nga heriki. Ku hambana ni vutomi bya hina lebyi hundzaka, Xikwembu xi hlamuseriwa tanihi “vutshamo bya hina bya xiviri eka xitukulwana xin’wana ku ya eka xitukulwana xin’wana.” Ku fana ni Tatana la nga ni rirhandzu, Yehovha u tshama a ri ni vanhu vakwe minkarhi hinkwayo naswona a nge va siyi. Onge ntiyiso lowu wu nga ku chavelela!—Pisalema 90:1.